MURU 6
Chi Yodedi-eda Yoyi Avi Yeneyo Ilivo Wa Athu Anayo Kakhwile?
1. N’nga thi milanyo daphama diivi dilivo wa athu anayo kakhwile?
Yesu angafiile wu Betaniya, muzi wowandamela wu Yelusalemu, vali vangavirile malambo 4 fwaye Lazaro angakhwile. Yesu odowa umanda wa Lazaro limo-i na Marta na Mariya, arongolaye a Lazaro. Vira wa thawi yoyeva, wumanda wule woozaala athu. Kaumbuwelani imwerumweru yeneyo Marta na Mariya yan’naathu kangamuwonile Yesu amuvenyi-anga Lazaro mu ukhwani! — Welengani Yohani 11:21-24, 38-44.
Marta oiziwa ira vi-ikhala milanyo daphama dowonga vya athu anayo kakhwile. Liye oiziwa ira Yehova unoza avenyi-e athu okhwa ira kakhaena ingumi yo-omala va ilambwela. — Welengani Yobu 14:14, 15.
2. Chin’ni inaireya muthu akhwa?
Mulungu oomuwandela Adamu ira: “Weyo uli thumbulu, uthumbuliniwo unoza uwelelewo.” — GENESESI 3:19.
Athu kawombiwe khumela uthumbuluni la theya. (Genesesi 2:7; 3:19) Iyo kanili mizimu dinakhala mu thuthu. Nili vyophanduchiwa vyowoneya na maso. Va mwasa wonola kavili iliyethene inakhaana ingumi muthu akhwa. Nakhwa, ugogwi-u unokhwa, thetho vyethene naumbuwela iyo na vinafuna-iyo vinamalela vevo. Ngu mwasiwa, Lazaro kawongile yongo ili yethene yamwiireyele angakhwile, mwasiwa athu okhwa katinaiziwa yongo. — Welengani Salimu 146:4; Namalaleya 9:5, 6, 10.
N’nga Mulungu unozuzumi-a athu na mulo kakhwa? Voi Bayibulo linawonga ira athu okhwa katinaiziwa yongo, yofunji-a yowonga ira Mulungu unothumeya athu kakhwa chonama thetho vinomuthakhali-a Mulungu. Thetho Mulungu unothakhaleliwana athu kamunamedelanga ira liye unoirana vyevi. — Welengani Yeremiya 7:31.
3. N’nga phi vyowandeya wonga na athu okhwa?
Athu okhwa kathinawonga thetho kathinavwa. (Salimu 115:17) Mbwenye vikhala angelo amo-iwa othakhala kanawanda wonga na athu, vonamedela ira mbaathu anale kakhwile. (2 Petulo 2:4) Yehova unokhoondi-a xixedela mundhila iliyethene wonga na athu okhwa. — Welengani Dotoronomo 18:10, 11.
4. N’nga unaze avenyi-iwe mbaani?
Athu anjinji anayo kakhwile kanoza kavenyiiwe ira kakhalenga va ilambo ya vathila. Athu amo-iwa anayo ka-amuiziwile Mulungu moi koirana vyongo vyothakhala thetho kanoza kavenyi-iwe. — Welengani Luka 23:43; Vyoira (Machitidwe) 24:15.
Athu kanaze kavenyi-iwe kanoza kafunjede imbarimbari yowonga vya Mulungu nothonyi-eda irolomelo wa Yesu vomuvwela. (Chivumbuluso 20:11-13) Athu ovenyi-iwa kaza kairangana vyongo vya phama kanoza kakhaena ingumi va ilambo ya vathila wa dowa no dowa. — Welengani Yohani 5:28, 29.
5. N’nga venyi-iwa wa athu okhwa unanifunji-a n’ni vya Yehova?
Mulungu othonyi-eda ira phi vyowandeya kaana idedi-edo yoi athu okhwa kanoza kavenyi-iwé vevo amurumile liye Mwanaye ira aze anikhwele. Moi-eno venyi-iwa wa athu okhwa unonifunji-a vya zivelo na uphama wo-ofwaneelela iyo wa Yehova. Athu okhwa kaza kavenyi-iwa, nyo munafuna ira muze mugumane naani? — Welengani Yohani 3:16; Aroma 6:23.
