MURU 7
N’nga Umwene wa Mulungu chin’ni?
1. N’nga Umwene wa Mulungu chin’ni?
Chin’ni inairi-a Yesu khala Mwene wofwanelela? — MALIKO 1:40-42.
Umwene wa Mulungu thi boma la udimu. Umwenela unoza umali-e maumwene methene a va ilambo ya vathi no khwakhwaneli-eda yofuna ya Mulungu ira iireye udimu na ilambo ya vathila. Milanyo dowonga vya umwene wa Mulungu thi daphama. Chineneveva, Umwenoyo unoza uwava-e athu yongo yeneyo yinafuaathu: boma laphama. Bomalo linoza laawandhani-e athu va ilambo yethene ya vathi. — Welengani Daniyeli 2:44; Mateyu 6:9, 10; 24:14.
Umwene uliwethene unokhaana mwene. Yehova umusakhula Mwanaye, Yesu Kiristu, ira akhale Mwene Wa Umwenaye. — Welengani Chivumbuluso 11:15.
2. Mwasiwa ngwan’ni Yesu uli Mwene wofwanelela?
Mwana wa Mulungu ngu Mwene wofwaneelela na mwasa woi liye ngwa thangaranga thetho unochinji-eda vyaphama. (Mateyu 11:28-30) Wenjedela vevo, liye unaza athongenga ilambwela angali udimu. Vi vinathonyi-eda ira unoza akhaena khopholo dofuneela ira akhami-e athu. Yesu angavenyi-iwile muukhwani, oogwela udimu, dowa garathi umuwononi wodjana wa Yehova liye dedi-edelanga. (Aheberi 10:12, 13) Vogomi-eda viwa, Mulungu oomuva-a khopholo ira aambeele thonga. — Welengani Daniyeli 7:13, 14.
3. Mbaani unaze athonge limo-i na Yesu?
Gulu lelo linairiwa “athu ochena” linoza lithongenga limo-i na Yesu udimu. (Daniyeli 7:27) Athu ochena owambela sakhuliwa kali anamarumiwa ororomeleya a Yesu. Malambwano Yehova unanasakhula alombwana na a-iyana ororomeleya ira kakhale mbali ya athu ochena. Mofwanafwana na Yesu, aluwa kakhwa kanovenyi-iwa na thuthu la muzimu. — Welengani Yohani 14:1-3; 1 Akorinto 15:42-44.
N’nga mba athu angasi anayo kanadowe udimu? Yesu aaromolile ira ti “gulu la khosa ling’onong’ono.” (Luka 12:32) Vogomi-eda viwa, aluwa kanoza kakhwakhwane 144 000. Aluwa kanoza kathongenga ilambwela limo-i na Yesu. — Welengani Chivumbuluso 14:1.
4. N’nga yaireyile chin’ni Yesu angaambele thonga?
Umwene wa Mulungu waambele thonga mu 1914. * Yongo yowambela yairile Yesu n’nga Mwene yali muvokhedela Satana na mizimu daye dothakhala va ilambo yavathila. Satana oonyanyuwa, moi-eno owambeli-a azuzumi-a athu va ilambo yethene yavathi. (Chivumbuluso 12:7-10, 12) Khumela va thawi yeneyo, nyarwa da athu dowenjedeleya vanjinji. Khondo, ndala, bulela na vindarandara vinathonyi-eda ira chineneveva Umwene wa Mulungu unowambela thonga vyongo vyethene va ilambo yavathi. — Welengani Luka 21:7, 10, 11, 31.
5. N’nga chin’ni Umwene wa Mulungu unairaathu?
Zela mu mabasa olaleela anayo kanaireya va ilambo yethene, Umwene wa Mulungu unanagumani-a mwinji wa athu okhumela m’malogo ethene. Athu anjinji ophwaasa kananathongiwa na Umwene wa Mulungu unoyo uli m’mandhani mwa Yesu. Umwene wa Mulungu unoza uwachinji-ede uza uwononganga makhalelo a vyoireya vyothakhala vya ilambwela. Moi-eno athu ethene kanafuna reeli-iwa na Umwene wa Mulungu kanafuneya kafunjede muvwela Yesu. — Welengani Chivumbuluso 7:9, 14, 16, 17.
Muwari mwa chaka 1000 Umwene wa Mulungu unoza ukhwakhwaneli-ede yolinga yowambela ya Mulungu wa athu. Ilambo yethene yavathi inoza ikhale paradaizo. Vogomi-eda viwa, Yesu unoza aweli-ede Umwene wa Babae. (1 Akorinto 15:24-26) Mbani munafunanyo muwandela vya Umwene wa Mulungu? — Welengani Salimu 37:10, 11, 29.
^ par. 6 Ira muiziwe vimo-i vyokhuza chaka ya 1914, onani mathakuru a 217-220 a bukhu loyi O Que Nos Ensina a Bíblia?
