MURU 4
N’nga Yesu Kiristu Mbaani?
1. N’nga ingumi ya Yesu yaambele avi?
Mba makhalelo avi a Yesu anayo kairi-a athu ira kamuwandamelenge liye? — MATEYU 11:29; MALIKO 10:13-16.
Mo-iyana na muthu uliwethenene, Yesu owambi-a khala udimu a-anaze va ilambo ya vathila. (Yohani 8:23) Uliye ngu muranji wa vyethene viphandutchiwe na Mulungu. Thetho oomukhami-eda Babae vophandutcha vyongo vimo-i. Mulungu amphanduchile ekha Yesu. Va mwasa wonoyo, Yesu uneriwa Mwana “wobaliwa ekha” wa Mulungu. (Yohani 1:14) Yesu oolaba n’nga wofii-eda mazu wa Mulungu moi eeno ngu mwasiwa uneriwa “Mazu”. — Welengani Miyambo 8:22, 23, 30; Akolose 1:15, 16.
2. Mwasiwa ngwan’ni Yesu azile va ilambo ya vathila?
Mulungu oothami-eda ingumi ya Yesu m’mbani mwa namwali wa iyuda zina laye Mariya. Moi eeno Yesu khan’na Babae wom’bala. (Luka 1:30-35) Yesu azele va ilambo ya vathila (1) ira afunji-e imbarimbari ya Mulungu, (2) ira athonyi-ede lifwanafwani-edo la mwemo ninairele iyo ifunelo ya Mulungu, pasikhive nagumanangana nyarwa, thetho (3) ira aveleele ingumae yolongomana n’nga “liwombolo”. — Welengani Mateyu 20:28.
3. Mwasiwa ngwan’ni ninafuneela liwombolo?
Liwombolo chi yongo yeneyo inapelekiwa ira imuwombole muthu wonoyo unafuna phiwa. (Ekisodo 21:29, 30) Yolinga yowambeela ya Mulungu kayali yoi athu kauluulenga thetho ira kakhwenga. Ninaiziwa avi vyevyo? Mulungu amuwandenle muthu wowambeela, Adamu, ira liye airana yongo yeneyo Bayibulo linawongaathu ira, “theenga” unoza akhwe. Moi eeno, Adamu eere aatheenga kanakhwenga. (Genesesi 2:16, 17; 5:5) N’nga mwemo Bayibulo linawongelaathu, ukhwa ‘wavolowile’ va ilambwela zela mwa Adamu. Adamu oovali-a a-imaye theenga na ukhwa. Moi eeno ninofuneela liwombolo ira linivulumuche wu ukhwa wewo wavalile iyo na Adamu. — Welengani Aroma 5:12; 6:23.
N’nga mbaani alivele liwombolo ira nivulumuchiwe wuukhwani? Iyo nakhwanga ninalivela vyotheenga vi-u. Na mwasa woira iyo nili athu o-olongomana, kalivo muthu unawande awombola amo-i. — Welengani Salimu 49:7-9.
4. Mwasiwa ngwan’ni Yesu akhwile?
Mo-iyana na iyo, Yesu ali wolongomana. Moi eeno, liye kaafwaneele vikhwela ekha na mwasa woi liye kaan’na yotheenga. Yesu akhwele vyotheenga vya athu. Mulungu oothonyi-da zivelo laye lilukhulu vomuruma mwanaye ira aze anikhwele iyo. Naliyene thetho Yesu oothonyi-eda zivelo laye wa iyo vomuvwela Babaye liye za veleela ingumaye va mwasa wa vyotheenga vi-u. — Welengani Yohani 3:16; Aroma 5:18, 19.
5. N’nga chin’ni Yesu unairaliye udimu malambwano?
Angali va ilambo ya vathila, Yesu ooili-a athu obulela, oovenyi-a athu okhwa thetho oomali-a nyarwa da athu. Mwandila yenela, liye othonyi-eda vyevyo vinafuna liye za airela athu ethenene anayo kali ovwela. (Mateyu 15:30, 31; Yohani 5:28) Yesu angakhwile Mulungu oomuvenyi-a n’nga muthu wauzimu. (1 Petulo 3:18) Vo-arela viwa, Yesu oomudedi-a Yehova wu muwononi wodjana fieda Yehova m’va-a khopholo dothonga n’nga Mwene ilambo yethene ya vathi. (Aheberi 10:12, 13) Malambwano, Yesu unathonga udimu n’nga Mwene, thetho o-arelaye kanolaleela milanyo daphama da umwene va ilambo yethene ya vathi. — Welengani Daniyeli 7:13, 14; Mateyu 24:14.
Chineneveva, Yesu unoza a-indi-ede mabasa khopholo daye n’nga Mwene ira amali-e nyarwa da athu na ethene anayo kanaambeli-a nyarwa. Athu ethene anayo kanathonyi-eda ira kanamuroromela Yesu no muvwela kanoza kakhaena ingumi yo-omala va ilambo ya vathi ya paradaizo. — Welengani Salimu 37:9-11.
