MURU 3
N’nga Milanyo Daphamadi Dinakhumela wa Mulungu?
1. N’nga aarumile athu ira kalembe Bayibulo mbaani?
Mulanyo waphama woi athu kanoza kakhalewo wa dowa no dowa va ilambo ya vathila unafwanyeya m’Bayibulo. (Salimu 37:29) M’Bayibulo muli mabukhu mang’onog’ono okwakwana 66. Mulungu a-indi-edile alombwana ororomeleya okwakwana 40 ira kalilembe. Mabukhu mathanu owambeela a m’Bayibulo kalembiwe na Mose chaka 3500 da mundulimu. Bukhu logomi-eda la m’Bayibulo lalembiwe na namarumiwa Yohani chaka 1900 da mundulimu. N’nga m’Bayibulo mwalembiwe zelu daani? Mulungu a-indi-edile muzimu wochena ira awonge na alombwana anayo kalembile Bayibulo. (2 Samuweli 23:2) Aluwa kalembile maumbuwelelo a Mulungu, okhala zelu diwa. Moi eeno, Mulungu ngwaambeli-ile ira Bayibulo lilembiwe. — Welengani 2 Timoteyu 3:16; 2 Petulo 1:20, 21.
2. N’nga ninaiziwe avi ira Bayibulo mba mazu a Mulungu?
Ninoiziwa ira Bayibulo mba mazu a Mulungu va mwasa woira linowonga vya usogolo mwaimbarimbari, thetho lawonga vinokwakwanela. Kalivo muthu unawandha irana vyokhala aevyo. (Yoswa 23:14) Mbwenye Mulungu Wakhopholo Dethene ngunakhwakhwani-a wonga vya sogolo la athu mwaimbarimbari. — Welengani Yesaya 42:9; 46:10.
Vokhala ira Bayibulo likhumele wa Mulungu, thi lo-iyana na mabukhu manjinji. Mamilioni a makopiya a Bayibulo ko-khumi-iwa mu viwongelo vinjinji. Masiki lili la wan’le, Bayibulo linogwilizana na siyensiya. Iya vyevyo, vyowonga vya alombwana 40 kalilembile kavina-iyana. * Thetho, Bayibulo linothonyi-eda umboni wo-oruni-eya wa zivelo la Mulungu, thetho li-ikhaana khopholo dochenja ingumi ya athu ira ikhale yaphama. Maumboni anala ko-okhami-eda athu anjinji roromela ira Bayibulo mba Mazu a Mulungu. — Welengani 1 Atesalonika 2:13.
3. N’nga thi myasa diivi dedo dinawongiwa m’Bayibulo?
Bayibulo linowonga milanyo daphama doi Mulungu unochenja ilambwela ira ikhale paradaizo. Malemba kanowonga mwemo muthu wowambeela mwalusele liye ngari yokhalawo mu ilambo ya paradaizo, thetho linowonga mwemo Mulungu munafunela liye za weleli-eda paradaizo. — Welengani Chivumbuluso 21:4, 5.
Mazu a Mulungu thetho ko-okhana malamulo, makhundo na mangano. Wenjedela vevo, m’Bayibulo mu-ukhala vyoireya vya mwemo Mulungu mwairelecha liye vyongo na athu a mundulimu. Vyoireyavyo vinathonyi-eda umuthu wa Mulungu. Moi eeno, Bayibulo linoukhami-edani muiziwetchetcha Mulungu. Thetho linowonga mwemo munakhalele nyo m’fwaye. — Welengani Salimu 19:7, 11; Yakobo 2:23; 4:8.
4. N’nga chin’ni inaukhami-edeni ira mulivwetchetche Bayibulo?
Bukhuli linoukhami-ani livwetchetcha phaama Bayibulo mo-arela ndila yeneyo Yesu ya-indi-eda liye mabasa vofunji-a. Liye oowongecha malemba amala liye “thapulela mavweyelo a malembayo.” — Welengani Luka 24:27, 45.
Milanyo daphama dedo Mulungu un’na liye na iyo thi daphama kwaranya yongo ili yethene. Masikive vyangali eeno athu amo-i katinafuna vuruwana thetho amo-i kanonyoza. Mbwenye kamufooke na vyevyo, voi idedi-edo yoza khaana ingumi yo-omala inaroromela muiziwa Mulungu. — Welengani Yohani 17:3.
^ par. 3 Wonani bukhu loi: A Bíblia – Palavra de Deus ou de Homem?
