MURU 09

Pempelo Linokoza Ukami-ani Ira Mulungu Akale Fwinyu

IMBANI

Kodi thawi dimo-i munoona ira munofuneela malangizo oukami-ani va moywinyu? Kodi mukaana vyofuka vyevyo munafunechecha nyo mwangaiziwile vyosomeda viwa? Kodi munofuneela miyali-iwa kapena limbikisiwa? Kodi munofuna ira Yehova akale fwinyu wavamurima? Pempelo linokoza ukami-ani va vyongo vyetene vyevi. Koma kodi ninafuneela pempela moi avi? Kodi Mulungu unovuruwana mapempelo etene? Kodi munaire avi ira Mulungu avuruwanenga mapempelwinyu? Tiyemoni nione.

1. Kodi ninafuneela pempela wa mbaani, nanga ninapempelele vyongo vyiivi?

Yesu oonifunji-a ira nipempelenga wa Babi-u waudimu eka. Naliyene Yesu oopempela wa Yehova. Liye eere: “Koma nyo mupempelenga moi eeni: ‘Babi-u waudimu . . .’” (Mateyu 6:9) Napempelanga wa Yehova, liye unokala fwi-u wavamurima.

Ninokoza pempelela khani iliyetene. Koma ira Mulungu asomede mapempelwi-u, mapempelwayo kanafuneela kala ogwilizana na yolinga yae. Baibulo lini: “Iliyetene ineyo ninamuvepe iyo mogwilizana na ifunelo yae, liye unonivwela.” (1 Yohani 5:14) Yesu ooniva-a isazo ya vyongo vyevyo ninapempelele iyo. (Welengani Mateyu 6:9-13.) Enjedela vopempelela khawa di-u, kanidiwalenga tokoza Mulungu chifukwa ya vyevyo unanipangela liye koma teto muvepa ira akami-e athu amo-iwa.

2. Kodi ninafuneela pempela moi avi?

Baibulo linonilimbikisa ira ‘nimukutulelenga Mulungu vya m’murimani mwi-u.’ (Salimo 62:8) Eeno mapempelwi-u kanafuneela kala okumela vati va murima. Ninokoza pempela mogweli-a mawu kapena mookumi-a mawu. Ninokoza pempela nangagaratile vati, nangali oimela, kapena nangagaratile mundila iliyetene, bola nipange vyongo mwaulemu. Ninokoza pempela vamalo aliyetene kapena thawi iliyetene.

3. Kodi Mulungu unasomeda avi mapempelwi-u?

Yehova unosomeda mapempelo mundila do-iyana-iyana. Liye ooniva-a Mawae Baibulo, lelo linanikami-a fwanya vyosomeda vya vyofuka vi-u. Welenga Mawu a Mulungu unova-a “zelu muthu ooiziwa vyongo.” (Salimo 19:7; welengani Yakobo 1:5.) Yehova unoniva-a murendele wam’murima nagumana na mavuto. Liye uno-indi-eda chito teto atumikae ira kanikami-e vevo nivuteile iyo vinjinji.

FUNJEDANI VYOWENJEDELEYA

Onani vyevyo munaire nyo ira mapempelwinyu kakalenga okumela vati va murima koma teto osangalasa Mulungu. Teto onani mwemo pempela unaukami-edeleniathu.

4. Kodi munaire avi ira Mulungu asomedenga mapempelwinyu?

Kodi pivyongo vyiivi vyevyo vinapangi-a ira Mulungu avuruwanenga mapempelwi-u kapena kavuruwanenga? Onelani VIDIYO.

VIDIYO: Kodi Mulungu Unovuruwana Mapempelo Etene? — Mbali Yoyeva (2:42)

Yehova unafuna ira nipempelenga wa liye. Welengani Salimo 65:2, era eeno tapanyani vyofuka vyo-arelavi:

Kodi munaganiza ira “Ovuruwana mapempelo” unafuna ira nyo mupempelenga wa liye? Chifukwa n’ni munaganiza eeno?

Ira Mulungu avuruwanenga mapempelwi-u, ninafuneela panga vyongo vyogwilizana na vyevyo unafuna liye. Welengani Mika 3:4 na 1 Petulo 3:12, era eeno tapanyani yofuka yo-arelela:

Kodi ninafuneela panga n’ni ira Yehova avuruwanenga mapempelwi-u?

Vathawi ya kondo, asilikali a mbali detene kanokoza pempela ira kawine. Kodi pivyovweya embekezela ira Mulungu unosomeda mapempelo oyi eni?

5. Mapempelwi-u kakalenga okumela vati vamurima

Athu amo-iwa koofunji-iwa ira kakedenga weli-eda mawu amo-ive anayo vopempela. Koma kodi Mulungu unafuna ira nipempelenga mwandila inela? Welengani Mateyu 6:7, era eeno tapanyani yofuka yo-arelela:

Kodi munaire avi ira vopempela kamuongenga “vyongo moweli-edaweli-eda?”

Dambo lililetene, munokoza ganizela yongo imo-i ineyo Yehova uupangeleni liye vamoywinyu nomuyamikela chifukwa ya yongo ineyo. Munokoza panga vyongo vyevi dambo lililetene wa mulungu umo-i, moi munoza muone ira mupempelela vyongo vyo-iyana-iyana vyokwakwana 7 mooweli-edaweli-eda mapempelwinyu.

Baba wapama unofuna ira mwanae aongengana kumela vati vamurima. Naliyene Yehova unofuna ira nipempelenga wa liye kumela vati vamurima

6. Pempelo chi mpaso yokumela wa Mulungu

Kodi pempelo linaniva-e avi kopolo vevo vyongo vinaendaathu pama koma teto vevo vyanaendaathu pama vamoywi-u? Onelani VIDIYO.

VIDIYO: Pempelo Linonikami-a Vilela (1:32)

Baibulo linaonga ira pempelo linokoza nikami-a fwanya murendele wam’murimani. Welengani Afilipi 4:6, 7, era eeno tapanyani vyofuka vyo-arelavi:

Ngakale ira thawi dimo-i mavutwi-u kanokalavove napempela, kodi pempelo linanikami-a avi?
Romolani vyongo vimo-i vyevyo munaomeliwe nyo vipempelela.

Nanga munoiziwa?

Mawu oyi “ame” kanatapulela ira “vikale eeno” kapena ira “pumwemo.” Ngakale athu awale oromoliwa m’Baibulo koonga ira “ame” kamari-a pempela. — 1 Limbili 16:36.

7. Mufwanyenga thawi yopempela

Thawi dimo-i ninotanganidwa vinjinji mpakana diwala pempela. Kodi Yesu aona ira pempela kofuneya mo-i avi? Welengani Mateyu 14:23 na Maliko 1:35, era eeno tapanyani vyofuka vyo-arelavi:

Kodi Yesu aira n’ni ira afwanyenga thawi yopempela?
Kodi nyo munasakule pempelanga thawi iivi?

ATHU AMO-IWA KANAONGA IRA: “Pempelo kai lokami-a. Linakeda pangi-a ira maganizo a muthu kakale m’malo.”

Nanga nyo munaganiza avi?

VYEVYO NIFUNJEDILE IYO

Mapempelo okumela vati vamurima kanokami-a ira Mulungu akale fwi-u, kanoniva-a murendele wam’murima, koma teto kanoniva-a kopolo ira niwande panga vyongo vyosangalasa Yehova.