MURU 20

Kodi Pingo wa Ikiristu Unaendi-iwa Avi?

IMBANI

Yehova ngu Mulungu wadongosolo. (1 Akorinto 14:33) Eeno athwaye kanafuneela teto ira kairenga vyongo mwadongosolo. Ndiye kodi pingo wa Ikiristu unaendi-iwa avi? Nanga ninakami-e avi ira pingo uendenga pama?

1. Kodi mbaani anayo kanasogolela pingo wa Ikiristu?

“Kiristu ngu muru wapingo.” (Aifeso 5:23) Yesu uli udimu, koma unosogolera chito ineyo athu a Yehova kanairaathu vailambo yetene yavati. Monga muru wapingo, liye usakula “kapolo wororomeleya na wazelu.” Kapolola tigulu ling’onong’ono la andimuwa anayo kanaiziweya ira Bungwe Lolamulela. (Welengani Mateyu 24:45-47.) Mofwanafwana na anamarumiwa koma teto andimuwa a wu Yerusalemu, Bungwe Lolamulela linopeleka malangizo umipingo da vailambo yetene yavati. (Vyoira 15:2) Koma athu anala kai asogoleli a gulu li-u. Ninawonga eeno chifukwa aliwa kanaroromela Yehova na mawaye ira kaasogolelenga teto kanogonjela Yesu monga muruwa.

2. Kodi andimuwa kana-inda chito iivi mupingo?

Andimuwa mba abali olimba mwauzimu anayo kanafunji-a malemba nosamalela athu a Yehova voakami-a noalimbi-a. Aliwa katinaliveliwa ka-indanga chito inela. M’malo mwiwa kanotumikela “mofunechecha, ookala chifukwa yofuna pindulavo imo-iwene koma na murima wetene.” (1 Petulo 5:1, 2) Andimuwa kanokami-ediwa na atumiki okami-a, anayo vira wa thawi naaluwene kanafwaneelela kala andimuwa.

Bungwe Lolamulela linosakula andimuwa amo-iwa ira kakale oing’anela madela. Abali anala, kanoendela mipingo do-iyana-iyana ira kalimbi-e abali na arongola koma teto ava-a malangizo okami-a. Oing’anela madelala, kano-ela vaudindo andimuwa koma teto atumiki okami-a, anayo kanakwakwaneli-eda makundo a m’malemba. — 1 Timoteyu 3:1-10, 12; Tito 1:5-9.

3. Kodi wa Mboni uliwetene un’na udindo uuvi?

Uliwetene mupingo ‘unotamanda zina la Yehova,’ voirana vyongo vyo-iyana-iyana vamisonkano koma teto indana chito yolaleela, mogwilizana na mwemo vyongo vililiathu vamoywaye. — Welengani Salimo 148:12, 13.

FUNJEDANI VYOWENJEDELEYA

Saelani ira muiziwe ira Yesu ngu msogoleli woi avi, vyevyo andimuwa kanairaathu volandela isazo yae, koma teto vyevyo ninapange iyo ira nivwelenga Yesu na andimuwa.

4. Yesu ngu msogoleli wachifundo

Yesu unonivepa mwachikondi ira akale msogoleli-u. Welengani Mateyu 11:28-30, era eeno tapanyani yofuka yo-arelela:

Kodi Yesu ngu msogoleli woi avi? Nanga liye unafuna ira nivwenga avi anisogolelanga?

Kodi andimuwa kana-arela avi isazo ya Yesu? Onelani VIDIYO.

VIDIYO: Andimuwa Kookami-eda Mombaraanya wu Nepal Wangaireile Ivomerezi (4:56)

Baibulo linoonga movweya pama vyevyo andimuwa kanafuneelaathu panga vo-inda chitwiwa.

Welengani Yesaya 32:2 na 1 Petulo 5:1-3, era eeno tapanyani vyofuka vyo-arelavi:

Kodi munavwa avi mwaganizela ira andimuwa kanoesaesa limbi-a amo-iwa, monga mwemo Yesu mwairela liye?
Kodi andimuwa kanamusazi-eda Yesu mundila dimo-i diivi?

5. Andimuwa kanofunji-a athu amo-iwa vo-indi-eda chito isazo iwa yapama

Kodi Yesu unafuna ira andimuwa kauonenga avi udindo kan’naathu? Onelani VIDIYO.

VIDIYO: Andimuwa Musogolelenga! (7:39)

Yesu chiisazo yapama wa abali anayo kanasogolela mupingo. Welengani Mateyu 23:8-12, era eeno tapanyani yofuka yo-arelela:

Chin’ni inauiri-ani chidwi mwaganizela iyana wa vyevyo Baibulo linaongaathu ira andimuwa kairenga, na vyevyo munaona nyo asogoleli a vipembezo kairanga?

Andimuwa kanoesaesa kala vausamwali wolimba na Yehova, teto kanokami-a mabanjiwa ira kairenga vyevyo
Andimuwa kanosamalela athu etene mupingo
Andimuwa kanolaleela thawi detene
Andimuwa kanofunji-a mupingo. Teto kano-inda chito dimo-i monga sakaeda Nyumba ya Umwene

6. Nivwelenga andimuwa

Baibulo linoniwandela chifukwa yovweya ineyo ninafuneela iyo vwela andimuwa. Welengani Aheberi 13:17, era eeno tapanyani vyofuka vyo-arelavi:

Chifukwa n’ni Baibulo linanilimbi-a ira nivwelenga koma teto gonjela anayo kanasogolela? Chifukwa n’ni munawonga eeno?

Welengani Luka 16:10, era eeno tapanyani yofuka yo-arelela:

Chifukwa n’ni ninafuneela vwela andimuwa, ngakale va khani dedo dinaoneya ngati ding’onong’ono?

ATHU AMO-IWA KANAONGA IRA: “Kai vyofuneela kala muipembezo imo-iwene.”

Kodi nyo munaganiza ira muthu unapindule avi, alambelanga Mulungu limo-i na pingo?

VYEVYO NIFUNJEDILE IYO

Yesu ngu muru wapingo. Ninosangalala vwela andimuwa anayo kanavwela Yesu, chifukwa kanonilimbi-a teto kanonifunji-a vo-indi-eda chito isazo iwa yapama.