MURU 17
Kodi Yesu Una Makalelo Oyi Avi?
Nafunjedanga vyevyo Yesu awongile liye noira angali vailambo yavatila, ninofwanya makalelo apama vinjinji anayo kananiiri-a ira nimuwomeliwengana, koma teto ira niwomeliwengana Babaye, Yehova. Kodi amo-i mwa makalelo apama vinjinji anayo Yesu un’na liye mbaavi? Nanga iyo ninamu-arele avi?
1. Kodi Yesu unafwanafwana na Babaye mundila diivi?
Wachaka mabiliyoni anjinji, Yesu ookala udimu na Babaye wachikondi. Vathawi yetene inela, liye oowona nofunjeda kumela va vyevyo Babaye vyaira liye. (Welengani Yohani 5:19.) Eeno liye unoganiza, unokuziwa koma teto unoira vyongo ngati Babaye. Moi Yesu uno-arela makalelo apama anayo Babaye un’na liye. Chichifukwa iwa aongile ira: “Unoyo uonile miyo uona teto Baba.” (Yohani 14:9) Mwafunjedanga makalelo a Yesu, munoza mumuiziwe pama Yehova. Mofwanafwani-a, chifundo ineyo Yesu atonyi-eda liye wa athu ngu umboni oyi Yehova unouvwelani chisoni mwazuzumanga.
2. Kodi Yesu atonyi-edile avi ira unomuwomeliwana Yehova?
Yesu awongile ira: “Ira ilambo iiziwe ira ndinowomeliwana Baba, ndinoira vi mo-arela lamulo lelo Baboyo andiva-ile liye.” (Yohani 14:31) Yesu angali vailambo yavati, ootonyi-eda ira unowomeliwana vinjinji Babaye vomuvwela ngakale vathawi ineyo vyaliathu vyorucha panga vyevi. Liye oomeliwana wonga vyokuza Babaye moi ookami-eda athu amo-iwa ira kaambeele muwomeliwana Mulungu. — Yohani 14:23.
3. Kodi Yesu atonyi-edile avi ira unowomeliwana athu?
Baibulo linotonyi-eda ira Yesu unosangalala vinjinji na “a-ima a athu.” (Miyambo 8:31) Liye ootonyi-eda ira unowomeliwana athu vowalimbi-a nowakami-eda mofunechecha. Vyodabwi-a vyevyo airile liye kavinakeda tonyi-eda ira liye ngwakopolo, koma vinotonyi-eda teto ira liye ngwachifundo. (Maliko 1:40-42) Liye oowakami-eda athu mowoma murima koma teto mo-osakula. Vyevyo awonga liye vyoowamiyali-a koma teto ava-a idedi-edo athu a murima wapama anayo kamuvuruwana. Yesu oololela zuzuma koma teto khwa chifukwa yoi unowomeliwana vinjinji athu etene. Komave liye unowomeliwana vinjinji athu anayo kanawomeliwana vyevyo unafunji-a liye. — Welengani Yohani 15:13, 14.
FUNJEDANI VYOWENJEDELEYA
Saelani ira muiziwe vinjinji vyokuza makalelo a Yesu. Teto onani vyevyo munaire nyo ira mumu-arelenga vakhani yotonyi-eda chikondi nokala ova-a.
4. Yesu unowomeliwana Babaye
Vyevyo Yesu vyaira liye vinonikami-eda iziwa vyevyo ninaire iyo ira nimuwomeliwengana Mulungu. Welengani Luka 6:12 na Yohani 15:10; 17:26. Vanduli vowelenga lemba lililetene, tapanyani yofuka yo-arelela:
-
Vomusazi-eda Yesu, ninatonyi-ede avi ira ninowomeliwana Yehova?
Yesu oowomeliwana Babaye waudimu teto thawi dinjinji oowonga na liye vopepela
5. Yesu unosamalela athu ozuzuma
Yesu oo-ela vasogolo vinjinji vyofuna vya athu amo-iwa kwaranya vyofuna vyaye. Liye ooesaesa indi-eda chito thawi na kopolo daye vokami-eda athu ngakale angagomile. Welengani Maliko 6:30-44, era eeno tapanyani vyofuka vyo-arelavi:
-
Mukhanila, pivyongo vyiivi vyevyo Yesu vyairile liye votonyi-eda ira unoganizela athu amo-iwa? — Onani vesi 31, 34, 41, na 42.
-
Kodi chiikalelo iivi ineyo yairi-ile Yesu ira aakami-ede athwayo? — Onani vesi 34.
-
Vofwanya ira Yesu uno-arela makalelo a Yehova, kodi vyevi vinaufunji-ani n’ni vyokuza Yehova?
-
Pivyongo vyiivi vyevyo ninaire iyo vo-arela Yesu chifukwa yoganizela athu amo-iwa?
6. Yesu ngova-a
Ngakale ira Yesu kaan’na vyongo vinjinji vyaututuni oowomeliwa gawela athu amo-iwa vyevyo vyan’na liye. Liye unafuna ira na-iyene nikale ova-a. Welengani Vyoira 20:35, era eeno tapanyani yofuka yo-arelela:
-
Mogwilizana na vyevyo Yesu vyawongile liye, kodi niirenga n’ni ira nikalenga osangalala?
Onelani VIDIYO, era eeno tapanyani yofuka yo-arelela.
-
Kodi ninatonyi-ede avi murima ova-a, ngakale ira kanin’na vyongo vinjinji?
Nanga munoiziwa?
Baibulo linawonga ira nipepelenga wa Yehova muzina la Yesu. (Welengani Yohani 16:23, 24.) Napepelanga muzina la Yesu, ninotonyi-eda ira ninoyamikela vyevyo Yesu vyairile liye vokami-eda ira Mulungu akale fwi-u.
ATHU AMO-IWA KANAONGA IRA: “Mulungu oovaela lemba vyoi ninerenga gumanana mavuto.”
-
Vofwanya ira Yesu unosazi-eda makalelo a Babaye, kodi vyevyo vinaira liye vinatonyi-eda avi ira kai Yehova unoyo unapangi-a ira nizuzumenga?
VYEVYO NIFUNJEDILE IYO
Yesu unowomeliwana Yehova na athu. Vofwanya ira Yesu unalandela makalelo a Babaye, iziwa vinjinji vyokuza Yesu unoukami-edani ira mumuiziwe pama Yehova.
Vyofuka Vyoweli-eda
-
Kodi ninatonyi-ede avi ira ninowomeliwana Yehova, monga mwemo Yesu munairela liye?
-
Kodi ninatonyi-ede avi ira ninowomeliwana athu monga mwemo Yesu munairela liye?
-
Chiikalelo iivi ya Yesu ineyo inauwomelani vinjinji?
ONANI VIMO-I
Onani amo-i mwa makalelo a Yesu anayo nina-arele iyo.
“Kuti Mutsanzire Yesu Muyenera . . .” (Yesu — Ndi Njira, Choonadi ndi Moyo, takuru 317)
Onani chifuwa iwa ninafuneela pepela zela mu zina la Yesu.
“N’chifukwa Chiyani Tiyenera Kupemphera M’dzina la Yesu?” (Nsanja ya Olonda, February 1, 2008)
Kodi Baibulo linoonga iliyetene yokuza mwemo Yesu mwaoneela liye?
Kodi ninafunjede n’ni vakhani ya mwemo Yesu mwairela liye vyongo na a-iyana?
“Mulungu Amafuna Kuti Akazi Azilemekezedwa” (Nsanja ya Olonda, September 1, 2012)
