MURU 24
Kodi Angelo Mbaani, N’nga Kanaira N’ni?
Yehova unafuna ira niiziwe vyokuza banja laye laudimu. M’banja leli muukala teto angelo, anayo kanaromoliwa ira “a-ima a Mulungu.” (Yobu 38:7) Kodi Baibulo linawonga vyoi avi vyokuza angelo? Kodi angelo kanaira n’ni? Kodi angelo etene kali m’banja la Mulungu?
1. Kodi angelo mbaani?
Aanalenge ilambo yavati, Yehova oolenga angelo. Mofwanafwana na Mulungu, angelo katinaoneya teto kanakala udimu. (Aheberi 1:14) Angelo kalivo mamiliyoni anjinji, moi m’ngelo uliwetene ngo-iyana na fwaye. (Chivumbuluso 5:11) Aliwa ‘kanoira vyevyo Yehova uwongile liye, movwela mawaye.’ (Salimo 103:20) Wan’le Yehova ooruma angelo vailambo yavati ira kaze kapeleke uthenga nokami-eda koma teto vulumucha athwaye. Malambwano angelo kanosogolela Akiristu ira kalaleele wa athu anayo kanafuna iziwa vya Mulungu.
2. Kodi Satana na viwanda vyaye mbaani?
Angelo amo-iwa koosakula iya vwela Yehova. M’ngelo unoyo aambeele ira vyevi ngunoyo unaromoliwa ira “Mdyelekezi na Satana, unoyo una-olocha ilambo yetene yavati wewo uli athu.” (Chivumbuluso 12:9) Satana afuna ira alamulelenga amo-iwa, eeno oonami-a Adamu na Hava moi vanduli viwa oonami-a teto angelo amo-iwa ira ka-iye vwela Mulungu. Angelo kasakulile panduwela Mulungwala kanairiwa viwanda. Voi angelwala kali udimu Yehova oowatamangi-edela vailambo yavati, moi kanodedi-edela onongiwa chinene veva. — Welengani Chivumbuluso 12:9, 12.
3. Kodi Satana na viwanda vyaye kanapusi-a avi athu?
Satana na viwanda vyaye kanopusi-a athu anjinji ira kairenga vyamizimu. Panga vyevi koopi-a vinjinji, chifukwa unowairi-a ira karoromelenga ira kanokoza ongi-ana na athu anayo kakhwile. Mofwanafwani-a, athu amo-iwa kagumanana mavuto, kanodowa gumanana athu ororomela nyenyedi, oro-eda vyamusogolo, kapena asing’anga. Athu amo-iwa kabulela kanodowa saela mirombwe wa athu anayo kanaira vyamizimu. Satana na viwanda vyaye kanopangi-a teto athu amo-iwa roromela ira kanokoza ongi-ana na athu anayo kakhwile. Koma Yehova unonienjeli-a ira: “Kamutembenuwele wa athu owonga na mizimu, teto kamufukedele oro-eda vyamusogolo.” (Levitiko 19:31) Liye unaniwandela vyevi chifukwa unafuna anititi-ede wa Satana na viwanda vyaye, anayo kali adani a Mulungu teto kanafuna niporecha.
FUNJEDANI VYOWENJEDELEYA
Saelani ira muone vyongo vyapama vyevyo angelo kanairaathu, opi-a ororomela mizimu, koma teto vyevyo ninaire iyo ira nivititi-ede wa Satana na viwanda vyaye.
4. Angelo kanokami-a athu funjeda vyokuza Yehova
Angelo a Mulungu katinalaleela vamaso na vamaso wa athu. M’malo mwiwa, kanosogolela atumiki a Mulungu wa athu anayo kanafuna funjeda. Welengani Chivumbuluso 14:6, 7, era eeno tapanyani vyofuka vyo-arelavi:
-
Chifukwa n’ni ninafuneela kami-iwa na angelo nalaleelanga?
-
Kodi munavwa avi mwaganizela ira angelo kanousogolelani wa athu anayo kanafuna funjeda Baibulo? Chifukwa n’ni munawonga eeno?
5. Mupewenga vyamizimu
Satana na viwanda mbaadani a Yehova, koma teto a iyo athu. Welengani Luka 9:38-42, era eeno tapanyani yofuka yo-arelela:
-
Kodi viwanda vinaairela n’ni athu?
Kaninafuneela irana vyongo vyevyo vinapangi-e ira viwanda vinivuti-enga. Welengani Dotoronomo 18:10-12, era eeno tapanyani vyofuka vyo-arelavi:
-
Kodi viwanda vinafuna wonga na iyo koma teto nipusi-a vo-indi-edela chito ndila diivi? Kodi pivyongo vyiivi vyevyo vinaireyanga wewo munakala nyo?
-
Kodi munoona ira pivyovweya Yehova anikoondi-anga pangana vyongo vyamizimu? Chifukwa n’ni munawonga eeno?
Onelani VIDIYO, era eeno tapanyani vyofuka vyo-arelavi.
-
Kodi munaganiza ira koza lelo palesa awari-ile liye mwanaye lali loopi-a? Chifukwa n’ni munawonga eeno?
-
Kodi Palesa afuneela panga n’ni ira kavuti-iwenga na viwanda?
Akiristu aimbarimbari katinalola ira viwanda viavuti-enga. Welengani Vyoira 19:19 na 1 Akorinto 10:21, era eeno tapanyani yofuka yo-arelela:
-
Akala mun’na vyongo vyokuzana na mizimu chifukwa n’ni munafuneela vitumeya kapena vitatila?
6. Pivyowandeya gonji-a Satana na viwanda vyaye
Satana ngunoyo unalamulela viwanda. Koma angelo ororomeleya kanasogoleliwa na Mikayeli ndimuwa wa angelo. Mikayeli, tizina la Yesu. Kodi Mikayeli un’na kopolo doinjiva moi avi? Welengani Chivumbuluso 12:7-9, era eeno tapanyani vyofuka vyo-arelavi:
-
Kodi wakopolo vinjinji mbaani, vaari va Mikayeli na angelwaye koma teto Satana na viwanda vyaye?
-
Kodi munaganiza ira o-arela a Yesu kanafuneela ova Satana na viwanda vyaye?
Munowanda gonji-a Satana na viwanda vyaye. Welengani Yakobo 4:7, era eeno tapanyani yofuka yo-arelela:
-
Kodi munaire n’ni ira kamuvuti-iwenga na Satana na viwanda vyaye?
ATHU AMO-IWA KANAONGA IRA: “Kavali vuto lililetene waledanga na magemu noonela mafilimu okuzana na vyamizimu. Vikede kala vyosangalasa mba-i.”
-
Chifukwa n’ni maganizo anala kali oopi-a?
VYEVYO NIFUNJEDILE IYO
Angelo ororomeleya kanonikami-eda. Satana na viwanda vyaye mbaadani a Yehova, teto kano-indi-edela chito vyamizimu vofuna olocha athu.
Vyofuka Vyoweli-eda
-
Kodi angelo ororomeleya kanakami-a avi athu funjeda vyokuza Yehova?
-
Kodi Satana na viwanda vyaye mbaani?
-
Chifukwa n’ni nyo kamunafuneela irana yongo iliyetene yokuzana na vyamizimu?
ONANI VIMO-I
Onani umboni otonyi-da ira Yesu ngu Mikayeli ndimuwa wa angelo.
“Kodi Mikayeli Mkulu wa Angelo Ndi Ndani?” (Khani yavawebusaiti)
Onani umboni otonyi-eda ira Mdyerekezi ukalawo.
Onani vyevyo vyakami-ile mu-iyana m’mo-iwa ira a-iye roromela vyamizimu.
Onani mwemo Satana munapusi-ela liye athu vowairi-a ira karoromelenga mizimu.
“Zoona Zake za Matsenga ndi Ufiti” (Njira ya ku Moyo Wosatha, chigawo 5)
