MURU 28
Muyamikelenga Vyevyo Yehova na Yesu Kauireleniathu
Kodi munavwa avi fwinyu auva-ani mphaso yoriya vinjinji? Kan’nakaikela ira munosangalala vinjinji koma teto munoyamikela fwinyuyo chifukwa youva-ani mphasoyo. Yehova na Yesu koniva-a mphaso yamtengo wavadimu vinjinji kwaranya yongo iliyetene. Kodi mphaso inela chin’ni, nanga ninatonyi-ede avi ira ninoyamikela?
1. Kodi ninatonyi-ede avi ira ninoyamikela vyevyo Mulungu na Kiristu kaniireleathu?
Baibulo linawonga ira “Uliwetene wororomela [Yesu]” unokoza kaana moyo mpakana walewale. (Yohani 3:16) Kodi ninaire avi vyevi? Ninotonyi-eda ira ninororomela Yesu muvyosakula vi-u na vyoira vi-u. (Yakobo 2:17) Ira vyevi unonikami-a kala vausamwali olimba na Yesu koma teto Babaye Yehova. — Welengani Yohani 17:21.
2. Kodi ngu mwambo wava-ekiwa uuvi unoyo unanikami-eda yamikela vyevyo Yehova na Yesu kaniireleathu?
Ma-iyu a dambo laye logomi-eda, Yesu ooawandela o-arelaye ndila imo-iwa ineyo ninatonyi-edele iyo yamikela sembe ineyo apelekile liye. Liye oowambeeli-a mwambo wava-ekiwa unoyo m’Baibulo unaromoliwa ira “Yodja Yamazulo ya Mbwiye.” Mwambola unoiriwa teto ira Iumbuwelelo Yokhwa wa Kiristu. (1 Akorinto 11:20) Vowambeeli-a mwambola, Yesu afuna ira anamarumiwaye koma teto Akiristu etene aimbarimbari kaumbuwelenga ira liye oonikhwela. Eeno oonilamula ira: “Muirenga vyevi vondiumbuwela.” (Luka 22:19) Nafwanyeyanga va Iumbuwelelo, ninotonyi-eda ira ninoyamikela chikondi ilukulu ineyo Yehova na Yesu kanitonyi-edileathu.
FUNJEDANI VYOWENJEDELEYA
Onani ndila dimo-i dedo munatonyi-edele nyo ira munoyamikela chikondi ilukulu ineyo Yehova na Yesu kanitonyi-edileathu. Koma teto onani chifukwa iwa fwanyeya va Iumbuwelelo Yokhwa wa Kiristu, uli ofuneya vinjinji.
3. Vyevyo ninaire iyo votonyi-eda yamikela
Nifwanafwani-e ira muthu m’mo-iwa oouvulumuchani vevo mwabwabwa nyo mwiko. Kodi munakeda vinyalanyaza nodiwala vyevyo muthuyo vyauireleni liye? Kapena munoesaesa ira vyongo vyotonyi-eda yamikela?
Ninoza nifwanye moyo o-omala chifukwa yoi Yehova uniwomela murima. Welengani 1 Yohani 4:8-10, era eeno tapanyani vyofuka vyo-arelavi:
-
Chifukwa n’ni ninawonga ira sembe ya Yesu chimphaso yavaekiwa?
-
Kodi munavwa avi mwaganizela vyevyo Yehova na Yesu kauireleniathu?
Kodi ninatonyi-ede avi ira ninoyamikela vyevyo Yehova na Yesu kaniireleathu? Welengani 2 Akorinto 5:15 na 1 Yohani 4:11; 5:3. Mwawelenga lemba lililetene, tapanyani yofuka yo-arelela:
-
Mogwilizana na lembali, kodi ninatonyi-ede avi yamikela?
4. Musazi-edenga Yesu
Ninotonyi-eda yamikela nasazi-edanga Yesu. Welengani 1 Petulo 2:21, era eeno tapanyani yofuka yo-arelela:
-
Kodi munatonyi-ede avi ira muno-arela manyalo a Yesu mosamala vinjinji?
Yesu oomeliwana Mawu a Mulungu oolaleela uthenga wapama koma teto ookami-a athu
5. Muirengana Iumbuwelelo Yokhwa wa Kiristu
Ira muiziwe vyevyo vyaireile vamwambo owambeela wa Yodja Yamazulo ya Mbwiye, welengani Luka 22:14, 19, 20. Era eeno tapanyani vyofuka vyo-arelavi:
-
Chin’ni yaireile va Yodja Yamazulo ya Mbwiye?
-
Kodi pau na vinyu vinaimelela n’ni? — Onani vesi 19 na 20.
Yolinga ya Yesu vowambeeli-a mwambo wa Iumbuwelelo, yali yoi ofunjedaye kauirenga ndila imo-i vachaka vadambo lelo akhwile liye. Chichifukwa iwa chaka iliyetene a Mboni da Yehova kanoira mwambo oumbuwela khwa wa Kiristu mogwilizana na vyevyo alamulile liye. Ira muiziwe vinjinji vyokuza mwambo ufuneya vinjinjila, onelani VIDIYO. Era eeno tapanyanyi yofuka yo-arelela.
-
Kodi vamwambo wa Iumbuwelelo vanaireya n’ni?
Pau ineyo ina-indi-edeliwa chito va Iumbuwelelo, inaimelela thuthu langwilo la Yesu lelo apelekile liye wa athu. Teto vinyu unaimelela magazaye
ATHU AMO-IWA KANAONGA IRA: “Ndoomuwachela wan’le Yesu kala mbwiye na malimba ndivulumucha eeno kandinafuneela ira vyongo vimo-i.”
-
Kodi muna-indi-ede avi chito lemba la Yohani 3:16 na Yakobo 2:17 vofuna mukami-eda ona ira viikala vyongo vinjinji vyevyo muthu unaire liye ira aze avulumuwe?
VYEVYO NIFUNJEDILE IYO
Naroromelanga Yesu nofwanyeya va mwambo wa Iumbuwelelo yokhwa waye ninotonyi-eda ira ninoyamikela vyevyo aniirele liye.
Vyofuka Vyoweli-eda
-
Kodi ninatonyi-ede avi ira ninororomela Yesu?
-
Kodi munatonyi-ede avi ira munoyamikela vyevyo Yehova na Yesu kauireleniathu?
-
Chifukwa n’ni munafuneela irangana mwambo wa Iumbuwelelo Yokhwa wa Kiristu?
ONANI VIMO-I
Kodi khwa wa Yesu unanilimbi-a ira n’ni?
Iziwani vinjinji vyokuza iroromelo koma teto mwemo ninaitonyi-edele iyo.
“Muzisonyeza Kuti Mumakhulupirira Malonjezo a Yehova” (Nsanja ya Olonda, October 2016)
Welengani khani yoi “Ndikuona Kuti Ndine Woyera Komanso Ndili Ndi Moyo Waphindu,” ira muone mwemo funjeda vyokuza sembe ya Yesu wamukami-ileathu mu-iyana m’mo-iwa.
“Baibulo Limasintha Anthu” (Nsanja ya Olonda, August 1, 2011)
Onani chifukwa iwa mba athu oyeva anayo kanadja pau no ng’wa vinyu vamwambo wa Iumbuwelelo.
