Bali-u kapena fwi-u atatiya vinokala vyovoreya vinjnji. Chichifukwa iwa Baibulo lini khwa ngumudani. (1 Akorinto 15:26) M’muru 27, moofunjeda ira Yehova unoza agonji-e mudani unola. Nanga chin’ni inaze iireye wa athu anayo katatiile? M’murula, ninoona yongo imo-iwa yoriya vinjinji ineyo Yehova ulonjezile liye yokuza athu anayo katatiile. Liye ulonjeza ira unoza avenyi-e athu anayo katatiile ira kaze kakaena moyo o-omala. Kodi nyo munaona ira vyevi vinoza viireye? Kodi athu anayo kanaze kavenyi-iwe kanaza kakalenga waani, udimu kapena vailambo yavatila?

1. Kodi Yehova unafuna aairele n’ni abali-u na afwi-u anayo katatiile?

Yehova unolakalaka zavenyi-a athu anayo katatiile. Yobu unoyo ali muthu wairoromelo kaakaikela ira aza akhwa Mulungu unoza amuvenyi-e. Liye oomuwandela Mulungu ira: “Nyo munoza muitane teto miyo ndinoza ndisomede [kumela umanda].” — Welengani Yobu 14:13-15.

2. Kodi ninaiziwa avi ira athu anayo katatiile kanoza kavenyi-iwe?

Yesu angali vailabwela Mulungu oomuva-a kopolo dovenyi-ela athu. Mofwanafwani-a, Yesu oovenyi-a musikana wa chaka 12 koma teto mwana wa lombwana wa mu-iyana m’mo-iwa wa masiye. (Maliko 5:41, 42; Luka 7:12-15) Vathawi imo-iwa, Lazaro unoyo ali fwaye wa Yesu ootatiiya. Yesu oomuvenyi-a Lazaro ngakale ira vali vangavirile malambo 4 angali m’manda. Yesu angapepelile wa Mulungu ookuwa ira: “Lazaro kuma!” moi “ali okhwole ookuma”! (Yohani 11:43, 44) Kakedani ganizela mwemo abalaye na afwaye a Lazaro mwasangalaleleathu!

3. Kodi abalinyu na afwinyu anayo katatiile kanoza kakaena moyo akoka?

Baibulo linonilonjeza ira: “Unoza ukale venya.” (Vyoira 24:15) Athu etene anayo Yesu aavenyi-ile liye angala vailambo yavatila katadowile udimu. (Yohani 3:13) Aluwa koosangalala venyi-iwa ira kakaena moyo akoka vailambo yavati vevano. Mofwanafwana na vyevi, Yesu unoza avenyi-e athu anjinji ira kakaena moyo m’paradaizo vailambo yavatila mpakana walewale. Liye awongile ira “athu etene anayo kali m’manda oumbuweliwa kanoza kavenyi-iwe,” athu anayo Mulungu unaaumbuwela liye, tangani-avo etene anayo naadiwalile iyo koma teto anayo na-anaaiziwa iyo. — Yohani 5:28, 29.

 FUNJEDANI VYOWENJEDELEYA

4. Vyevyo Yesu airile liye nguumboni woi unowanda venyi-a athu anayo katatiile

Iziwani vinjinji vyokuza vyevyo Yesu airile liye vovenyi-a Lazaro Welengani Yohani 11:14, 38-44, era eeno tapanyani vyofuka vyo-arelavi:

• Kodi ninaiziwa avi ira Lazaro ootatiiya? — Onani vesi 39.

• Aakale ira Lazaro oodowa udimu, vyookala vyovweya ira Yesu amuvenyi-e kumela udimuwo nomuzana vailambo yavativano?

Onelani VIDIYO.

5. Athu anjinji kanoza kavenyi-iwe!

Welengani Salimo 37:29, era eeno tapanyani yofuka yo-arelela:

• Kodi athu anjinji anayo kanaze kavenyi-iwe kanaza kakalenga waani?

Yesu unoza avenyi-e athu anjinji tangani-avo athu oyi katamulambela Yehova. Welengani Vyoira 24:15, era eeno tapanyani yofuka yo-arelela:

• Mbaani unoyo munaomeliwe nyo za muona angavenyi-iwile?

• Kodi idedi-edo yoi okhwa kanoza kavenyi-iwe yakami-ile avi makolo a Phelicity?

VYEVYO NIFUNJEDILE IYO

Baibulo linawonga ira athu anjinji anayo katatiile kanoza kavenyi-iwe. Yehova unafuna ira athu anala kaze kakaena moyo akoka, moi oomuva-a Yesu kopolo doi aze aavenyi-e.

Vyofuka Vyoweli-eda

• Kodi ninaiziwa avi ira Yehova na Yesu kanofunechecha venyi-a athu anayo katatiile?

• Kodi athu anjinji anayo kanaze kavenyi-iwe kanaza kakalenga waani, udimu kapena vailambo yavatila? Chifukwa n’ni munawonga eeno?

• Chin’ni inauiri-ani roromela ira abalinyu na afwinyu anayo katatiile kanoza kavenyi-iwe?