MURU 31
Kodi Umwene wa Mulungu Chin’ni?
Uthenga ofuneya vinjinji m’Baibulo ngokuza Umwene wa Mulungu. Yehova unoza a-indi-edele chito Umwene unola vokwakwaneli-eda yolinga ineyo an’na liye yokuza ilambo yavatila. Ndiye kodi Umwene wa Mulungu chin’ni? Ninaiziwa avi ira umwenola unolamulela? Pivyongo vyiivi vyevyo umwenola uirileathu? Nanga unaza uire vyongo vyiivi usogolo? Vyofuka vyevi vinosomediwa m’muru unola koma teto miru min’li do-arela.
1. Kodi Umwene wa Mulungu chin’ni, nanga Mweniwa mbaani?
Umwene wa Mulungu tiboma lelo lagarati-iwile na Yehova Mulungu. Mweniwa ngu Yesu Kiristu moi unolamulela kumela udimu. (Mateyu 4:17; Yohani 18:36) Voonga vya Yesu Baibulo lini: “Liye unoza alamulele monga Mwene . . . mpakana walewale.” (Luka 1:32, 33) Monga Mwene ya Umwene wa Mulungu, Yesu unoza alamulelenga athu etene vailambo yavatila.
2. Kodi mbaani kanalamulela limo-i na Yesu?
Yesu kanalamulela eka. Athu okumela “mum’logo lililetene, iwongelo iliyetene, mtundu uliwetene, na ilambo iliyetene . . . kanoza kakale mamwene olamulela ilambo yavati.” (Chivumbuluso 5:9, 10) Mba athu angasi anayo kanaze kalamulele na Kiristu? Ambeela vevo Yesu azile liye vailambo yavatila, athu anjinji kokala o-arelaye moi vano kalivo mamiliyoni anjinji. Koma mba athu okwakwana 144,000 oka anayo kanaze kadowe udimu dowa lamulela na Yesu. (Welengani Chivumbuluso 14:1-4.) Koma Akiristu amo-iwa etene kanaza kakale vailambo yavatila moi kanoza kalamuleliwenga na Umwene wa Mulungu. — Salimo 37:29.
3. Kodi Umwene wa Mulungu unakwaranya avi maboma a athu?
Ngakale olamulela ailambwela kaesaesanga panga vyongo vyapama, aliwa katinakwakwani-e panga vyetene vyevyo kanafunaathu. Vavira thawi kanovolowiwa m’malo na olamulela amo-iwa oviwomeliwa vinjinji anayo ka-anafuna kami-eda athu. Mo-iyana na olamulela anala, Yesu unoyo uli Mwene ya Umwene wa Mulungu, kanaza avolowiwa m’malo na muthu uliwetene. Mulungu ugarati-a “umwene woi kunaza uwonongiwa wu thawi detene.” (Daniyeli 2:44) Yesu unoza alamulele ilambo yetene yavati, moi kanaza asakulanga mtundu umo-iwene waathu. Yesu ngwachikondi, wachifundo, koma teto wachilungamo, moi unoza afunji-e athu ira katonyi-edenga makalelo anala. — Welengani Yesaya 11:9.
FUNJEDANI VYOWENJEDELEYA
Saelani ira muiziwe chifukwa iwa Umwene wa Mulungu uli wapama vinjinji kwaranya maboma a athu.
4. Umwene wa Mulungu unoza ulamulelenga ilambo yetene yavati
Yesu Kiristu ukaana kopolo dolamulela ilambo kwaranya athu etene anayo kanalamulela ilambwela. Welengani Mateyu 28:18, era eeno tapanyani yofuka yo-arelela:
-
Kodi ulamulilo wa Yesu unakwaranya avi ulamulilo waathu?
Maboma a athu kanochenjachenja, moi ilambo iliyetene inokaana olamuleliwa. Nanga bwanji voonga vya Umwene wa Mulungu? Welengani Daniyeli 7:14, era eeno tapanyani vyofuka vyo-arelavi:
-
Voi Umwene wa Mulungu kunaza uwonongiwa “kodi vyevi pivyoriya moi avi”?
-
Kodi munaganiza ira ninaza nipindula avi Umwene wa Mulungu uza ulamulelanga ilambo yetene?
5. Maboma a athu kanafuneela venyi-iwavo
Chifukwa n’ni Umwene wa Mulungu unafuneela volowa m’malo mwa maboma a athu? Onelani VIDIYO, era eeno tapanyani yofuka yo-arelela.
-
Kodi vyo-arela vya ulamulilo wa athu pivyoi avi?
Welengani Namalaleya 8:9, era eeno tapanyani vyofuka vyo-arelavi:
-
Kodi munaona ira pivyofuneya ira Umwene wa Mulungu uze uvolowe m’malo mwa maboma a athu? Chifukwa n’ni munaona eeno?
6. Umwene wa Mulungu ukaana olamulela anayo kananivwechecha
Voi Mweni-u, Yesu, ookalavo monga muthu, liye ‘unonivwela chisoni va vyoofoka vi-u.’ (Aheberi 4:15) Yesu oosakula alombwana na a-iyana okwakwana 144 000 anayo kanaze kalamulelenga limo-i na Yesu kumela wu “m’longo lililetene, iwongelo iliyetene, mtundu uliwetene na ilambo iliyetene.” — Chivumbuluso 5:9.
-
Vofwanya ira Yesu koma teto anayo kanaze kalamulelenga na liye, etene koombiya kalavo athu, kodi munaona ira vyevi pivyolimbi-a? Chifukwa n’ni munawonga eeno?
Yehova ukala asakulanga alombwana na a-iyana okumela m’mitundu do-iyana-iyana ira kaze kalamulele limo-i na Yesu
7. Umwene wa Mulungu ukaana malamulo apama vinjinji
Maboma a athu kanopanga malamulo anayo kanakami-a koma teto titi-eda zika diwa. Umwene wa Mulungu teto ukaana malamulo anayo zika diwa dinafuneelaathu a-arelanga. Welengani 1 Akorinto 6:9-11, era eeno tapanyani vyofuka vyo-arelavi:
-
Kodi munaganiza ira vyongo vinaza vikala avi vailambwela uliwetene a-arelanga malamulo a Mulungu? a
-
Yehova unafuna ira zika da Umwenaye di-arelenga malamulwaye. Kodi munaganiza ira vyevyo Yehova unafuna liyevi pivyofwanelela? Chifukwa n’ni munawonga eeno?
-
Tilikundo liivi lelo linatonyi-eda ira athu anayo kaana-arela malamulwala kanokoza chenja? — Onani vesi 11.
Maboma kanogarati-a malamulo na yolinga yofuna kami-a notiti-eda zika diwa. Umwene wa Mulungu ukaana malamulo apama vinjinji anayo kanakami-a notiti-eda zika daye
KODI MUTHU M’MO-IWA ANGAUFUKILENI IRA: “Kodi Umwene wa Mulungu chin’ni?”
-
Munamusomede avi?
VYEVYO NIFUNJEDILE IYO
Umwene wa Mulungu tiboma lelo lili udimu moi unoza ulamulelenga ilambo yetene yavati.
Vyofuka Vyoweli-eda
-
Kodi mbaani anayo kanaze kalamulelenga mu Umwene wa Mulungu?
-
Kodi Umwene wa Mulungu unakwaranya avi maboma a athu?
-
Kodi Yehova unafuna ira zika da Umwenaye diirenga n’ni?
ONANI VIMO-I
Onani vyevyo Yesu afunji-ile liye vyokuza wewo uli umwene wa Mulungu.
“Kodi Ufumu wa Mulungu Uli Mumtima Mwanu?” (Khani yavawebusaiti)
Chifukwa n’ni a Mboni da Yehova kanaona ira kala wororomeleya wu Umwene wa Mulungu kofuneya vinjinji kwaranya kala wororomeleya wu maulamulilo a athu?
Onani vyevyo Baibulo linaongaathu vyokuza athu 144 000 anayo Yehova unaasakula liye ira kaze kalamulele na Yesu.
“Kodi Ndi Ndani Amene Amapita Kumwamba?” (Khani yavawebusaiti)
Chin’ni yamukami-ile mu-iyana m’mo-iwa unoyo ali mundende roromela ira Mulungu ngokaaunoyo unazi-e chilungamo vailambwela?
“Kumene Ndinadziwira Yemwe Adzathetse Kupanda Chilungamo” (Galamukani!, November 2011)
