MURU 33
Kodi Umwene wa Mulungu Unaza Uire Vyongo Vyiivyi?
Umwene wa Mulungu oowambeela wale lamulela. Chinene veva umwenola unozana madaliso anjinji vailambwela. Tiyemoni nione amo-i mwa madaliso anayo ninaze iyo nisangalalena Umwenola uza uwambeela lamulela vailambo yetene yavati.
1. Kodi Umwene wa Mulungu unaza uire n’ni ira uzena murendele na chilungamo vailambo yavatila?
Yesu unoyo uli Mwene ya Umwene wa Mulungu, unoza awononge athu otakala na maboma vakondo ya Armagedo. (Chivumbuluso 16:14, 16) Vathawi inela, ninoza nione kwakwaneli-ediwa wa lonjezo la ya m’Baibuloli: “Va-alile thawi yoyeva vinjinji, otakala katinaza kakalawo.” (Salimo 37:10) Yesu unoza a-indi-ede chito Umwenola, vozana murendele koma teto chilungamo vailambo yetene yavati. — Welengani Yesaya 11:4.
2. Kodi moyo unaza ukale woi avi yolinga ya Mulungu iza ikwakwaneli-ediwa vailambo yavatila?
Umwene wa Mulungu uza ulamulelanga ilambwela, “olungama kanoza kawachele ilambo yavati, teto kanoza kakalenga mwemo mpakana walewale.” (Salimo 37:29) Vinoza vikale vyoriya vinjinji ona ira uliwetene vailambwela ngolungama teto unomuomeliwana Yehova na athu amo-iwa! Kalivo unaze abulelenga, teto athu etene kanoza kakaena moyo mpakana walewale.
3. Kodi Umwene wa Mulungu unaza uire n’ni athu otakala kaza kawonongiwa?
Athu otakala kaza kawonongiwa, Yesu unoza alamulele monga Mwene wa chaka 1000. Vathawi inela, Yesu na Olamulela afwaye okwakwana 144 000, kanoza kakami-e athu etene vailambo yavatila ira kakale olungama. Vofiya umapeto wa chaka 1000, ilambo yetene inoza ikale paradaizo moi athu kanoza kakalenga mosangalala chifukwa yovwela malamulo a Yehova. Era eeno, Yesu unoza aweli-ede Umwene wa Babaye, Yehova. Vathawi ineyo, zina la Yehova “linoza [liweli-iwe] iyani-a na wale letene.” (Mateyu 6:9, 10) Uliwetene unoza aiziwe ira Yehova ngolamulela wapama vinjinji unoyo unaganizela atumikaye. Era eeno Yehova unoza awononge Satana, viwanda, na athu etene anayo kanatonyi-eda ira katinafuna vwela ulamulilwaye. (Chivumbuluso 20:7-10) Vyevi vyaza viireya, madaliso anayo Umwene wa Mulungu unazenaathu vailambwela kanoza kakalewo mpakana walewale.
FUNJEDANI VYOWENJEDELEYA
Saelani ira muiziwe chifukwa iwa kaninakaikela ira Mulungu unoza a-indi-ede chito Umwenaye vokwakwaneli-eda malonjezo etene anayo kali m’Baibulo.
4. Mulungu unoza amali-e maboma etene a athu
Baibulo lini “muthu uvoreya muthu fwaye vomulamulela.” (Namalaleya 8:9) Yehova unoza a-indi-ede chito Umwenaye, vomali-a vyongo vyetene vyo-olungama vyevyo athu kanairelaathu afwiwa.
Welengani Daniyeli 2:44 na 2 Atesalonika 1:6-8, era eeno tapanyani vyofuka vyo-arelavi:
-
Kodi Yehova koma teto Mwanaye, Yesu, kanaza kaira n’ni na maboma a athu koma teto athu anayo kaanaa-arela?
-
Kodi vyevyo mufunjedile nyo vyokuza Yehova na Yesu vinausimikizelani avi ira kanoza kaire vyongo mwachilungamo?
5. Yesu ngu Mwene wapama vinjinji
N’nga Mwene wa Umwene wa Mulungu, Yesu unoza airele athu vyongo vyapama vinjinji vailambwela. Onelani VIDIYO ira muone umboni wotonyi-eda ira Yesu ngofunechecha kami-a athu koma teto ira Mulungu umuva-a kopolo doirela vyevi.
Vyevyo Yesu aira liye angali vailambwela, vyootonyi-eda vyevyo Umwene wa Mulungu unazeathu uirele athu vailambwela. Vamadaliso anayo kali m’pedimu, tidaliso liivi lelo nyo munalidendi-edela nyo vinjinji? Welengani malemba anayo kali usogolo wa daliso lililetene.
|
ANGALI VAILAMBWELA, YESU . . . |
ANGALI UDIMU, YESU . . . |
|---|---|
|
|
|
|
|
|
|
|
6. Madaliso anayo Umwene wa Mulungu unazenaathu
Umwene wa Mulungu unoza uiri-e ira athu kakaena moyo wapama monga mwemo Yehova afunela liye vowambeela. Athu kanoza kakaena moyo m’Paradaizo vailambo yavatila mpakana walewale. Onelani VIDIYO ira muone mwemo Yehova munakwakwaneli-eda liye yolinga yaye, vo-indi-eda chito mwanaye Yesu.
Welengani Salimo 145:16, era eeno tapanyani yofuka yo-arelela:
-
Kodi munavwa avi mwaganizela ira Yehova “unoza akutilise yokumba ya yamoyo iliyetene”?
ATHU AMO-IWA KANAONGA IRA: “Akala ninaire vyongo mogwilizana, ninokoza mali-a mavuto a vailambo yetene.”
-
Kodi Umwene wa Mulungu unaza umali-e mavuto aavi anayo maboma a athu kalepelileathu amali-a?
VYEVY NIFUNJEDILE IYO
Umwene wa Mulungu unoza ukwakwaneli-ede yolinga ineyo Mulungu an’na liye vowambeela. Unoza uiri-e ira ilambo yavatila ikale paradaizo mwemo munaze mukale athu apama anayo kanaze kalambelenga Yehova mpakana walewale.
Vyofuka Vyoweli-eda
-
Kodi Umwene wa Mulungu unaza uiri-a avi ira zina la Yehova liweli-iwe?
-
Chifukwa n’ni munaroromela ira Umwene wa Mulungu unoza ukwakwaneli-ede vyetene vyevyo Baibulo linalanyedaathu?
-
Vamadaliso etene anayo Umwene wa Mulungu unazenaathu, tidaliso liivi lelo nyo munalidedi-edela nyo vinjinji?
ONANI VIMO-I
Saelani ira muiziwe vyevyo Armagedo inatapulelaathu.
“Kodi Nkhondo ya Aramagedo Idzakhala Yotani?” (Khani yavawebusaiti)
Welengani khanila ira muiziwe vyevyo vinaze viireye mu ulamulilo wa Yesu wa chaka 1000 koma teto umagomelo wa ulamulilola.
“Kodi pa Tsiku la Chiweruzo Padzachitika Zotani?” (Nsanja ya Olonda, September 1, 2012)
Onani vyevyo vinakami-e mabanja fwanafwani-eda ira kali m’Paradaizo.
Mukhani yoi “Ndinali Ndi Mafunso Ambiri Omwe Ankandisowetsa Mtendere,” onani vyevyo vyakami-ile muthu m’mo-iwa woukela boma fwanya vyosomeda vya vyofuka vyevyo an’na liye wa thawi indendayi.
“Baibulo Limasintha Anthu” (Nsanja ya Olonda, January 1, 2012)
