MURU 38
Muonenga Ira Moyo Chimphaso Yamtengo Wavadimu
Iyo athu ninowanda panga koma teto sangalala na vyongo vyo-iyana-iyana chifukwa yoi nikaana moyo. Ngakale ira ninogumana na mavuto, koma thawi dinjinji ninowanda sangalala na vyongo vimo-i vamoywi-u. Ndiye kodi ninatonyi-ede avi ira ninoyamikela Yehova chifukwa yoniva-a mphaso ya moyo? Nanga chifukwa n’ni ninafuneela panga vyevi?
1. Chifukwa n’ni ninafuneela yamikela Yehova chifukwa yoniva-a moyo?
Moyo chimphaso yokumela wa Babi-u wachikondi, Yehova. Eeno ninafuneela muyamikela chifukwa ya mphaso inela. Baibulo lini liye “ngulipara la moyo” tapulela ira ngunoyo alengile vyamoyo vyetene. (Salimo 36:9) Linoonga teto ira: “Nguliye unoyo unava-a athu etene moyo, mwela na vyongo vyetene.” (Vyoira 17:25, 28) Yehova unoniva-a vyongo vyetene vyofuneela ira nikaena moyo. Wenjedela vevo, Yehova unoniva-a vyongo vimo-i vyo-iyana-iyana ira nisangalalenga na moyo. — Welengani Vyoira 14:17.
2. Kodi ninatonyi-ede avi ira ninoyamikela Yehova chifukwa yoniva-a mphaso ya moyo?
Yehova oona ira muli wamtengo wavadimu, kumela vevo m’minyu alandile liye vambani. Mupempelo lelo Yehova alolile liye ira lilembiwe m’mawae, mtumikaye Davide oomuwandela Yehova ira: “Maswinyu koondiona vevo ndali miyo ndaanabaluwe.” (Salimo 139:16) Yehova unoona ira moywinyu ngwamtengo wavadimu vinjinji. (Welengani Mateyu 10:29-31.) Yehova vinomuvoreya vinjinji aonanga muthu m’mo-iwa achosanga mwadala moywae kapena wa muthu m’mo-iwa. a (Ekisodo 20:13) Vinomuvoreya teto vinjinji napanganga mwadala vyongo vyevyo vina-ele moywi-u vangozi, kapena nalepelanga arela malangizo anayo kanatiti-eda moywi-u koma teto wa athu amo-iwa. Naesaesanga samalela moywi-u koma teto nalemekezanga moyo wa athu amo-iwa, ninotonyi-eda ira ninoyamikela mphaso ya moyo ineyo ili yamtengo wavadimu.
FUNJEDANI VYOWENJEDELEYA
Onani ndila dimo-i dedo munatonyi-edele nyo ira munoyamikela mphaso ya moyo.
3. Musamalelenga thanzi linyu
Thawi detene ninoesaesa ira vyevyo Yehova unafuna liye chifukwa noomulonjeza ira nineenge mutumikela na moywi-u wetene. Nairanga vyevi ninakala ngati ninapeleka matutwi-u monga sembe wa Mulungu. Welengani Aroma 12:1, 2, era eeno tapanyani vyofuka vyo-arelavi:
-
Chifukwa n’ni munafuneela samalela thanzi linyu?
-
Nanga pivyongo vyiivi vyevyo munaire nyo votonyi-eda ira munosamalela thanzi linyu?
4. Niesaesenga pewa vyongo vyevyo vina-ele moywi-u na wa athu amo-iwa vagozi
Baibulo linawonga ira ninafuneela pewa vyongo vyevyo vina-ele moywi-u na wa athu amo-iwa vangozi. Onelani VIDIYO ira muone vyongo vyevyo munaire nyo ira mupewe ngozi.
Welengani Miyambo 22:3, era eeno tapanyani mwemo nyo na athu amo-iwa munapewele nyo ngozi . . .
-
mwakala wani.
-
mwakala uchito.
-
mwapanganga masika o-iyana-iyana.
-
mwaendi-anga kapena gwela vyongo vimo-i monga galimoto, njinga, ngalawa, ngolo na vimo-i.
5. Muonenga ira moyo wa mwana unoyo uli aanabaluwe ngwamtengo wavadimu vinjinji
Davide oosambaula ira Yehova unoira chidwi na iliyetene ineyo inaireya mwana aulukulanga m’mbani mwa m’maye. Welengani Salimo 139:13-17, era eeno tapanyani yofuka yo-arelela:
-
Kodi Yehova unaona ira moyo unaambeela vathawi iivi, vevo m’ma ulandile liye vambani kapena mwana akeda baluwa?
Malamulo anayo Yehova apelekile liye wa Aizarayeli, kootiti-eda m’ma koma teto mwana unoyo uli aanabaluwe. Welengani Ekisodo 21:22, 23, era eeno tapanyani vyofuka vyo-arelavi:
-
Kodi Yehova aona avi muthu unoyo uphile mwana unoyo uli aanabaluwe mwangozi?
-
Nanga unaone avi muthu unoyo uphile mwana unoyo uli aanabaluwe mwadala? b
-
Kodi nyo munaona ira maganizo a Mulungu vakhani inela mbovweya?
Thawi dimo-i ngakale m’ma unoyo unaona ira moyo wa mwana unoyo uli aanabaluwe ngwamtengo wavadimu, unokoza gumana na vuto lelo linamuiri-e ona ira kavuli pangela m’mo-i koma tatila vambani ba-i. Welengani Yesaya 41:10, era eeno tapanyani vyofuka vyo-arelavi:
-
Akala m’ma unakanyi-ediwa ira atatile vambani, kodi unafuneela roromela mbaani ira amukami-ede? Chifukwa n’ni munawonga eeno?
ATHU AMO-IWA KANAONGA IRA: “Muzimai ukaana ufulu wotatila vambani kapena ootatila.”
-
Chin’ni inausimikizelani ira Yehova unoona ira moyo wa m’ma na wamwana unoyo uli aanabaluwe ngofuneya vinjinji?
VYEVYO NIFUNJEDILE IYO
Baibulo linanifunji-a ira ninafuneela omeliwana, lemekeza notiti-eda mphaso ya moyo ineyo Yehova univa-ile liye. Vyevi vinotangani-avo moywi-u koma teto wa athu amo-iwa.
Vyofuka Vyoweli-eda
-
Chifukwa n’ni Yehova unaona ira moyo ngwamtengo wavadimu?
-
Kodi Yehova unavwa avi muthu m’mo-iwa avipha kapena apha muthu m’mo-iwa mwadala?
-
Kodi nyo munoyamikela mphaso ya moyo?
ONANI VIMO-I
Kodi ninatonyi-ede avi ira ninoyamikela Yehova chifukwa yoniva-a mphaso ya moyo?
Fwanyani yosomeda ya yofuka yoi, Kodi Mulungu unomukurumuwela muzimai unoyo atatililevo vambani?
“Kodi Baibulo Limanena Zotani pa Nkhani Yochotsa Mimba?” (Khani yavawebusaiti)
Onani mwemo iziwa maganizo a Mulungu okuza moyo unanikami-eleathu ira nisakulenga vyosangalasa vyoi kavina-ele moywi-u vangozi.
Onani mwemo Baibulo linamukami-edeleathu muthu unoyo un’na maganizo ofuna vipha.
“Kodi Baibulo Lingandithandize Ngati Ndili ndi Maganizo Ofuna Kudzipha?” (Khani yavawebusaiti)
a Yehova unosamalela muthu wamurima wotweya. (Salimo 34:18) Athu oi eeni kanovwa voreya vinjinji m’murimani mwiwa moi kanofuna vipha. Ira muone mwemo malangizo a m’Baibulo kanakami-edeleathu muthu ira a-iye ganizela vyofuna vipha, welengani khani yoi “Kodi Baibulo Lingandithandize Ngati Ndili ndi Maganizo Ofuna Kudzipha?” vagawo loi Onani Vimo-i m’murula.
b Athu anayo katatilile vambani katinafuneela viimba mulandu vinjinji, chifukwa Yehova unokoza akurumuwela. Ira muiziwe vinjinji welengani khani yoi, “Kodi Baibulo Limanena Zotani pa Nkhani Yochotsa Mimba?” m’murula.
