Ndabaliwe mu 1927 mu taoni imo-i yowandamana na Chicago, Illinois, wu U.S.A. Mu banja li-u nalimo a-ima 5 miyo, Jetha, Don, Karl, na Joy. Etene noofunechecha nitumikelanga Yehova na murima wetene. Jetha oovolowa kalasi yanambin’li ya Sukulu ya Giliyadi mu 1943. Don oodowa tumikela wu Beteli ya wu Brooklyn, New York, mu 1944, Karl mu 1947, Joy mu 1951. Visazo viwa vyapama koma teto vya makolwanga, vyoondilimbikisa ira ndipangenga vinjinji votumikela Yehova.

Ababa na am’ma koomeliwana welenga Baibulo koma teto koomeliwana Mulungu moi koonikami-a iyo a-ima ira nikale na chikondi yofwanafwana. Ababa koodowa wu usilikali vakondo yowambeela ya vailambo wetene, koma kangazilewo koo-iya omeliwana vyachalichi. Vevo kasangalalaathu ira koozawo ukondo kangali a moyo, am’ma koawandela ababa ira: “A Karl, Tiyemoni nidowe wu chalichi ngati mwemo napangelecha iyo wale.” Ababa koosomeda ira: “Ndinakeda uveleelani koma ndadowa kandinavolowa mu chalichimo.” Am’ma kowafuka ira: “Chifukwa n’ni?” Ababa koosomeda ira: “Va thawi ineyo ndali miyo ukondo, asogoleli a vipembezo vyofwanafwana koodalisa vida vya asikilali anayo kavazana. “Ndiye kodi Mulungu aakami-enga asilikali a mbali detene?”

Dambo limo-i am’ma kangali wu chalichi, a Mboni da Yehova ambin’li koofiya vawani-u. Aliwa kowava-a ababa mabuku men’li a ingelezi a muru oyi Light, Anayo kanafotokoza vya buku la Chivumbuluso. Ababa koosangalala vinjinji moi koowachela mabukwayo. Am’ma kangaonile mabukwayo koowambeela awelenga. Eno dambo limo-i am’ma koona mu nyuzipepala a Mboni da Yehova kaitanelanga athu anayo kafuna funjeda Baibulo vo-indi-eda chito mabukwale. Am’ma koosakula dowawo. Kangafiile, zimai mʼmo-i okalamba oo-ula isewo. Am’manga koomuoni-a zimaiyo limo-i mwa mabukwale nomufuka ira, “Kodi munofunjeda bukuli uno? Zimaile oosomeda ira, Ee, volowani.” mulungu o-arela am’manga koonitukula iyo a-ima etene moi vanduli viwa noowambeela dowawo mulungu uliwetene.

Dambo limo-i nangali va misonkano, m’bali unoyo asogolela oondivepa ira ndiwelenge lemba la Salimo  144:15, lelo linaonga ira athu anayo kanalambela Yehova kanokala osangalala. Lemba leli loondisangalasa vinjinji. Mavesi amo-i anayo kandisangalasile mba ala — 1 Timoteyu 1:11, lelo linaonga ira Yehova ngu “Mulungu waimwemwe” koma teto la Aifeso 5:1, lelo linanilimbikisa ‘musazi-eda Mulungu.’ Ndoona ira ndinafuneya sangalalanga chifukwa yotumikela Mulenganga koma teto muyamikela chifukwa ya mwai ofunjeda choonadi. Moi vyongo vin’livi viikala vyofuneya vinjini vamoywanga.

Pingo unoyo wali owandamana na wewo nakala iyo wali wu Chicago, wewo wali ulendo wolapa makilomita 32. Ngakale ira vyali eno, noodowaove moi ndooiziwa vyongo vinjinji vya m’Baibulo. Ndinoumbuwela ira va thawi imo-i, unoyo asogolela misonkano oopeleka mwai wa Jetha ira asomede. Ndangavwile vyevyo asomodile liye ndooviwandela ira: ‘Ndinoiziwa ira yosomeda chineyo. Dambo leli ndaakale ira ndivenyi-a ndanda ndoosomeda.’ Ndiye keda kumela dambo leli ndoowambeela kozeela misonkano na yolinga yoi ndisomedenga. Yofuneya vinjinji chi yoi miyo na abalanga, nookala va usamwali wapama na Yehova. Eno miyo ndoobatiziwa mu 1941.

Ndinoumbuwela vinjinji msonkano wa mu 1942 unoyo waireile wu Cleveland, Ohio. Athu amo-iwa anayo kali m’malo okwaranya 50 wu United States koolumikiziwa zela vafoni. Banja li-u limo-i na mabanja amo-iwa, nakala mumatenti vakwikwi na malo a msonkano. Vevo khondo yanambin’li yaulukulaathu a Mboni da Yehova kooruni-iwa vinjinji. Mazulo uliwetene ndoona abali kaimechanga magalimoto zungulila malo anayo nagona iyo moi kowaimeli-a moing’ana unde. Aliwa koogwilizana ira mugalimoto iliyetene mugonenga muthu ira akalenga mulonda ma-iyu wetene. Akala vanaze adani, Abalayo kafuneya kari-a nyale da galimotodo koma teto uli-a mabozina na yolinga yoi kawasokoneze adanayo. Vyevi vyoopangi-a ira athu amo-iwa kaze ira kawakami-e. ‘Ndoona ira athu a Yehova Kanokala okozeya va yongo iliyetene.

Vangavirile chaka dingasidene, Ndangaganizele vyevyo vyaireile va sonkanoyo, ndoozindikila ira am’ma katakumbanya kapena ova. Aliwa koomuroromela vinjinji Yehova koma teto gulu lae. Kandinaza ndidiwala isazo iwa yapama.

Wanga-alile malambo oyeva ira msokanola uireye, am’manga koolembi-a upainiya ogarateya. Aliwa koovuruwana mwachelu khani davansokanola dedo dafotokoza vyokuza utumuki wa thawi detene. Msonkanola wangamalile, niwelelanga vande am’ma koonga ira, “Ndoosangalala ndangapitilizile panga upainiya koma kandinakwakwani-e panga vyevyo nosamalelanga pama vande” Kangaongile vyevyo koonivepa ira niwakami-e. Noosomedela akami-a moi koomuva-a mwana uliwetene subi imo-i kapena men’li ira asamalelenga mamawa uliwetene. Nadowa usukulu, aliwa kootanganisiwa vinjinji koma katadiwala nisamalela. Nawelawo usukulu thawi yamutana koonisamalela. Malambo amo-iwa naweluka noovolowa mu utumiki na aliwa. Moi wa miyo vyevi vyoondikami-a vyechecha vyevyo apainiya kanapangaathu.

Ndaambeele upainiya ndangan’na chaka 16. Vathawiila ababa katali a Mboni komave aliwa koopanga chidwi na vyevyo vyaireya vamoywanga. Dambo limo-i mazulo ndoawandela ira miyo ndiikala  ndisaelanga muthu oyi ndifunjedenga Baibulo na liye koma mpakana vano kandinamufwanye. Eno nangafwasile ndowafuka ababa ira, “Munokoza sangalala ira nifunjedenga Baibulo?” Ndiye aliwa kangaganizele wa thawi koosomeda ira, “ kavili vuto”. Eno phuzilo langa lowambeela, kali ababa. Funjeda na ababa wali mwai wamtengo wavadimu.

Nafunjeda buku la ingelezi loi “The Truth Shall Make You Free.” Vevo nafunjeda iyo, ndoozindikila ira ababa koondikami-a ira ndikale ofunjeda koma teto mphuzisi wapama. Mwaisazo, dambo limo-i nifunjedanga, noowelenga ndima imo-i moi aliwa koonga ira: “Ndiona vyevyo bukuli linaongaathu koma weyo unaiziwa avi ira vyevyo bukuli linaongaathu pivyoona?” Yofuka inela yoondirucha ira ndisomede eno ndoawandela ira, “ Vathawiila kandinakwakwani-a someda, koma ndinoza ndiusomedeni va phuziro lo-arela”. Moi va phuzilo lo-arela ndoowasomeda. Ndoofwanya mavesi ogwilizana na likundo lelo nakambilana iyo. Eno keda kumela dambo leli ndoowambeela kozeela pama phuzilo teto ndoosaela pama vyongo. Vyevi vyookami-a ira usamwalanga na ababa ukale olimba. Ababa koo-arela vyevyo kafunjedaathu moi koobatiziwa mu 1952.

Ndoovenyavo vande ndangan’na chaka 17. Jetha a ookala mmishonale, koma Don atumikela va Beteli. Etene koomeliwana utumikiwa moi vyevi vyoondilimbikisa. Eno ndoofukedela utumiki wa va beteli koma teto Sukulu ya Giliyadi moi khaniyo ndakede i-iya m’mandani mwa Yehova. Mu 1946 pa vevo ndaitaniwe miyo ira ndidowe va Beteli.

Miyo ndiikala ndipanganga mautumiki o-iyana-iyana va Beteli teto ndiifunjeda vyongo vinjinji visha. Va cha 75 dedo ndikalile miyo ndipanganga utumiki va Beteli ndikami-ana va chito yosindikiza mabuku koma teto welengela ndalama. Ndiifunjeda teto gula koma teto tumiza vyongo wu madela amo-iwa. Kwaranya vyetene, ndinosangalala na maphuzilo anayo ninaachela iyo va Beteli zela mu maporogalamu monga lambela wa mamawa, khani, na maporogalamu amo-iwa.

Ndiifunjeda teto vyongo wa dimbilanga wang’onong’ono karl unoyo azile va beteli mu 1947. Liye oofunjeda Baibulo mwatindi koma teto oofunji-a pama. Va thawi imo-iwa ndoomuvepa ira andikami-e kozeela khani ineyo ndafuna miyo kamba. Ndoomufotokozela ira miyo ndiisanja makundo anjinji koma kandinaiziwa mwemo ndinafotokozele miyo. Ndiye liye oondikami-a vondifuka yofuka imo-i woi, “Joel, kodi muru wa khanayo unaonga vya n’ni?” Ndoovwechecha mombaraanya vyevyo atapulela liye. Ndakeda funeya indi-eda chito makundo ogwilizana na muru wa khananga no-iya vimo-i viwavyo. Kandinaza ndidiwala phuzilo lelo ndafwanyile miyo veva.

 Ira muthu asangalalenga na utumiki wa va Beteli, unafuneya i-nda chito yolaleela mwatindi moi vyevi vinomupangi-a ira agumanenga teto na vyongo vimo-i vyolimbikisa. Imo-i mwa vyongo vyosangalasavi ineyo ndinaumbuwela miyo yooireya mazulo amo-iwa wu Bronx muzinda wa New York City. Miyo na dimbilanga noogumana na muzimai m’mo-iwa unoyo ali angaachelilevo magazini ya Sanja ya Olonda na Galamukani! Nangalonjelanile noomuwandela ira, “ Mazulo vano ninana kambilana na athu makundo olimbikisa a m’Baibulo”. Liye oosomeda ira, “Akala chi khani yokuza Baibulo, volowani” Noowelenga koma teto kambilana malemba anjinji okuza Umwene wa Mulungu na ilambo isha. Vinaoneya ira vyevi vyoomusangalasa vinjinji chifukwa mulungu o-arela oitana abalae ira kaze kafunjedena. Vanduli viwa, liye na abalayayo koookala atumiki a Yehova ororomeleya.

Ndangaganizele vyokala vabanja voovira chaka 10 moi ndoomufwanya murongola ofwanelela unoyo ndamutelile miyo. Kodi chin’ni yandikami-ile ira ndimufwanye iyana wapama? Ndooipempelela khanila, moi vanduli viwa Ndoovifuka ira, ‘Kodi ndinafuna za panga n’ni ndaza nditela?’

Vasonkano wa mu 1953 unoyo waireile wu Yankee Stadium, ndoogumana na murongola m’mo-iwa zina lae Mary Aniol. Liye na murongolanga Jetha kali kangavolowile limo-i kalasi yanambin’li ya sukulu ya Giliyadi moi aliwa kapangela limo-i umishonale. Mary oondifotokozela mwemo asangalalela liye na utumikae wu Caribbean koma teto maphuzilo a Baibulo anayo apangi-a liye va chaka detene dedo atumikela liye wewo. Vevo napitiliza iyo iziwana, noozindikila ira nookaana yolinga yofuna mutumikela Yehova. Noowambeela omeliwana vinjinji moi nootelana mu Epulo 1955. Mary ootonyi-eda mu ndila dinjinji ira ali mphaso yokumela wa Yehova moi oondiva-a isazo yapama. Liye oosangala na utumiki uliwetene unoyo niva-iwe iyo. Oo-inda chito mwatindi, oomeliwana athu koma teto thawi detene oo-ela vyongo vya Umwene vamalo owambeela. (Mat. 6:​33) Nootumikela monga oing’anela dela wa chaka taaru, moi mu 1958, noitaniwa ira nidowe va Beteli.

Ndiifunjeda vyongo vinjinji wa Mary. Mwaisazo, nangakede telana wene noogwilizana ira niwelengelenga Baibulo limo-i moi noogwilizana ira niwelengenga mavesi 15 va thawi imo-i. Muthu m’moi amari-a welenga nookambilana malembayo noona mwemo ninaa-ndi-edele iyo chito vamoywi-u. Thawi dinjinji Mary oondifotokozela vyongo vyevyo afunjedile liye wu Sukulu ya Giliyadi koma teto va utumikae wa umishonale. Kambilana mwandila inela oondikami-a ira ndikambenga pama khani danga koma teto ndilimbikisenga pama abali na arongola.— Miya. 25:11.

Iyananga oomeliwana Mary ookwa mu 2013. Ndinofunechecha za onana na liye muilambo isha. Vano ndili osimikiza ira ndinopitiliza funjeda koma teto dalila Yehova na murimanga wetene. (Miya. 3:​5, 6) Ndinosangalala koma teto limbikisiwa ndaganizela vyevyo athu a Yehova kanazeathu kapange muilambo isha. Vyevi vinotangani-avo funjeda vyongo visha kumela wa Mulangizi-u mulukulu. Ndinoyamikela vinjinji chifukwa ya vyongo vinjinji vyevyo ukalile liye andifunji-anga koma teto chifukwa yonditonyi-eda oma murima wae ulukulu.