Kodi muwelenga mosamala magazini ya Sanja ya Olonda ya chaka ila? Kashishani someda vyofuka vyo-arelavi:

Kodi Yehova upelekile isazo yapama iivi va khani ya mwemo ninafuneela iyo pangela vyongo na a-iyana?

Liye unopanga na aliwa vyongo moosakula moi kanaomeliwana alombwana kwaranya a-iyana. Mulungu unowavuruwana a-iyana, unoganizela mwemo kanavwelaathu koma teto vyevyo vinaapangi-a ira kakaengana nkhawa. Liye unowaroromela moi oowava-a udindo o-inda chitwae. — w24.01, taku. 15-16.

Kodi nina-arele avi likundo la va Aifeso 5:7, loi: “Kamupangenga vyevyo aliwa kanapangaathu”?

Namarumiwa Paulo oonichenjeza ira kanigwilizanenga na athu anayo kananipangi-e iya vwela makundo a Yehova. Athu anayo ninagwilizanana iyo kai athu okayo anayo ninaaledana iyo vamaso na vamaso koma teto anayo ninawaledana iyo va foni kapena va Intaneti.— w24.03, taku. 22-23.

Kodi ninafuneya pewa khani donama diivi?

Ninafuneya pewa khani donama dokumela wa afwi-u dedo katidisaelile, dokumela m’mauthenga anayo athu amo-iwa kananitumizeleathu dokumela wa athu ampatuko anayo kanaesa bisa vyolinga viwa. — w24.04, taku. 12.

Kodi pivyongo viivi vyevyo naanaviiziwa iyo, nanga pivyongo viivi vyevyo ninaviiziwa iyo va khani ya mwemo Yehova munaze liye muweluzele Mwene Solomu, athu anayo kakwile wu Sodomu na Gomora koma teto kakwile va Igumula?

Iyo kaninaiziwa akala Yehova aaweluzile ira kakwe kapena katize kavenyi-iwe. Koma ninoiziwa ira liye unoiziwa vyetene moi ngwachifundo ilukulu. — w24.05, taku. 3-4.

Kodi likundo loi Mulungu ngu “Thantwe” linanisimikizela vya n’ni? (Doto. 32:4)

Yehova mbamalo otawelawo otetezeya. Liye ngororomeleya moi thawi detene unokwakwaneli-eda malonjezwae. teto liye kanachenja makalelwae koma teto vyolinga vyae. — w24.06, taku. 26-28.

Kodi chin’ni inaukami-eni ira mulemeele pingo usha?

Muroromelenga Yehova, chifukwa unokoza ukami-ani ngati mwemo aakami-ele liye atumikae mundulimu. Mupewenga erekezela vyevyo vyaireya mupingo winyu wawale na vyevyo vinaireya mupingo winyu usha. Mupangenga vyongo vinjinji koma teto muesaesenga fwanya afwinyu asha. — w24.07, taku. 26-28.

Kodi ninafunjeda n’ni va mafanizo ofwanyeya muchaputala 25 ya Mateyu?

Fanizo la khosa na mbudi linonilimbikisa kala ororomeleya. Fanizo la anamwali 10 linonilimbikisa kala maso koma teto okozeya. Teto fanizo la matalente linonilimbikisa kala atindi. — w24.09, taku. 20-24.

Kodi likonde la kachisi wa Solomu lali lolapa moi avi?

M’mipukutu dimo-i, mawu a va 2 Limbili 3:4, kanaonga vya “miono 120,” vyevyo vinatapulela ira lali lolapa mamita 53 dowa mudimu. Koma muvyolemba vimo-i vyororomeleya lembali linaonga ira “miono 20” anayo kali mamita 9 dowa mudimu. Nambala yanambin’li inela inaoneya ira inokoza kala yogwilizana na mwemo machisi a kachisi unola kaliliathu. — w24.10, taku. 31.

Kodi mawu oyi mtumiki okami-a akale lombwana wa iyana m’mo-i kanatapulela n’ni? (1 Tim. 3:12)

Unafuneya tela iyana m’mo-i teto kanafuneya panga iwerewere. Koma teto kanafuneya kopana na a-iyana amo-iwa. — w24.11, taku. 19.

Chifukwa n’ni kaninaonge ira lemba la Yohani 6:53 linatonyi-eda vyevyo vinafuneya ireya vamwambo wa Yodja ya Mazulo ya Ambwiye?

Va Yohani 6:53 Yesu oonga ira athu kanafuneya dja thuthu lae nong’wa magazae. Liye oonga mawu anala wu Galileya mu 32 C.E moi aawandela Ayuda anayo kafuneya muroromela. Koma mwambo wa Yodja ya Mazulo ya Ambwiye auwambeeli-ile vangavirile chaka imo-i wu Yelusalemu. Va Yesu aonga na athu anayo kanaze kalamulele limo-i na liye udimu. — w24.12, taku. 10-11.