KHANI YOFUNJEDA 46
NYIMBO 49 Tizikondweretsa Mtima wa Yehova
Kodi Munoesaesa Ira Mukale Mtumiki Okami-a?
“Va-a unonipangi-a kala osangalala vinjinji kwaranya wachela.”— VYO. 20:35.
VYEVYO NINAFUNJEDE IYO
Khanila inolimbikisa vinjinji abali obatiziwa ira kaesaese kala atumiki okami-a.
1. Kodi namarumiwa Paulo aaona avi atumiki okami-a?
ATUMIKI okami-a kano-inda chito dinjinji mupingo. Namarumiwa Paulo oowayamikela vinjinji alombwana ororomeleyala. Mwaisazo, mukalatae yodowa wa Akiristu awu Filipi, liye oopeleka moni wa andimuwa na atumiki okami-a. — Afil. 1:1.
2. Kodi m’bali Luis unavwa avi chifukwa yokala mtumiki okami-a?
2 Abali anjinji obatiziwa, kaya okalamba kapena azombwe, kanosangalala vinjinji kakala atumiki okami-a. Mwaisazo, Devan an’na chaka 18 vevo a-eliwe liye kala mtumiki okami-a. Koma m’bali Luis a-eliwe kala mtumiki okami-a angan’na chaka da m’ma 50. Vofotokoza mwemo avwela liye, m’bali Luis aongile ira: “Ndaaganizela chikondi ineyo pingo wanditonyi-edaathu, ndinoona ira ngumwai ulukulu kala mtumiki okami-a. Mu pumwemo teto abali anjinji kanavivwelaathu.”
3. Kodi ninakambilana vyofuka viivi?
3 Ngati muli m’bali obatiziwa, kodi munoesaesa ira mukale mtumiki okami-a? Kodi chin’ni inaulimbikiseni ira mufunenga kala mtumiki okami-a? Kodi Baibulo linaonga ira mbamakalelo aavi anayo munafuneya nyo kaana ira mukale mtumiki okami-a? Mukhanila ninokambilana vyosomeda vya vyofuka vyevi. Koma yowambeela, tiyemoni nikambilane chito dedo atumiki okami-a kana-indaathu.
KODI ATUMIKI OKAMI-A KANA-INDA CHITO DIIVI?
4. Kodi atumiki okami-a kana-inda chito diivi? (Onani teto ithuzithuzi.)
4 Mtumiki okami-a unakala m’bali obatiziwa unoyo una-eliwa na andimuwa ira aakami-enga chito dimo-i mupingo. Atumiki okami-a amo-i kanoonechecha ira ofalisa kookaana magawo okwakwanela olaleela koma teto mabuku oyi ka-indi-edenga chito muutumiki. Amo-i kanosakaeda koma teto samalela va Nyumba ya Umwene. Atumiki okami-a kanowachela alendo koma teto kanosamalela vipangizo monga maikolofoni koma teto oni-a mavidiyo vamisonkano. Ngakale ira thawi dinjinji kano-inda chito dedi, yowambeela aliwa kanafuneya kala athu anayo kanamuomeliwana Yehova koma teto arela makundwae olungama. Aliwa kanafuneya teto aomeliwana vinjinji abali na arongoliwa.(Mat. 22:37-39) Kodi m’bali obatiziwa unapange avi ira akale mtumiki okami-a?
Atumiki okami-a kano-arela Yesu katumikelanga amo-i (Onani ndima 4)
5. Kodi m’bali unapange avi ira akale mtumiki okami-a?
5 Baibulo linofotokoza makalelo anayo muthu unafuneya liye kaana ira akale mtumiki okami-a. (1 Tim. 3:8-10, 12, 13) Ira mukale mtumiki okami-a munafuneya funjeda makalelo anala noesaesanga atonyi-eda. Koma yowambeela, munafuneya saela ineyo inaupangi-ani funa kala mtumiki okami-a.
CHIFUKWA N’NI MUNAFUNA KALA MTUMIKI OKAMI-A?
6. Chin’ni inaulimbikisani ira mutumikelenga abali na arongolinyu? (Mateyu 20:28; onani teto yavatakuru lowambeela.)
6 Yesu oopeleka isazo yapama vinjinji. Liye oopanga vyongo chifukwa yoomeliwana Ababae koma teto athu. Chikondi inela yoomulimbikisa inda chito mwatindi ngakale dooneya ngati donyozeya. (Welengani Mateyu 20:28; Yoh. 13:5, 14, 15) Ngati nyo teto munapanga vyongo chifukwa ya chikondi, Yehova unoza audaliseni ira mukwakwaneli-ede yolinginyu yofuna kala mtumiki okami-a. — 1 Akor. 16:14; 1 Pe. 5:5.
Vo-indi-eda chito isazo, Yesu oofunji-a atumwae funeya otumikela amo-iwa moviyevi-a m’malo moviona ngati avadimu (Onani ndima 6)
7. Chifukwa n’ni m’bali unafuneya pewa murima onyada?
7 Athu amuilambwela kanosilila athu anayo kanafuna kala avadimu. Koma kai mwemo vililiathu mugulu la Yehova. M’bali unoyo unapanga vyongo chifukwa ya chikondi ngati Yesu, kanalakalaka malo avadimu, kopolo kapena udindo. Muthu oyi eno akala na udindo mupingo kanalolenga inda chito dooneya ngati donyozeya vokami-a athu a Yehova. Unokoza onanga ira chitodo kai dofwanelela wa liye. (Yoh. 10:12) Yehova kanadalisa muthu unoyo unapanga vyongo chifukwa yonyada. — 1 Akor. 10:24, 33; 13:4, 5.
8. Kodi mba malangizo aavi anayo Yesu apelekile liye wa anamarumiwae?
8 Thawi dimo-i ngakale ofunjeda a Yesu koofuna maudindo va vifukwa vyolakweya. Isazo vakhanila ngu Yakobo na Yohani. Aliwa koomuvepa Yesu ira aze aava-e malo avadimu mu Umwenae. Yesu kaayamikele ira aliwa koopanga pama vepa vyevi. M’malomwiwa liye oawandela anamarumiwa etene 12 ira: “Uliwetene unoyo unafuna kala mulukulu vaari vinyu unafuneya kala mtumikinyu, teto unoyo unafuna ira akale oowambeela vaari vinyu unafuneya kala kapolo wa etene.” (Maliko 10:35-37, 43, 44) Abali anayo kanakaana murima ofuna tumikela amo-i, kanokami-a vinjinji mupingo. — 1 Ates. 2:8.
KODI CHIN’NI INAULIMBIKISENI IRA MUTUMIKELENGA ABALI NA ARONGOLINYU?
9. Kodi munapange avi ira mukaena murima ofuna tumikela amo-i?
9 Mookaikela, munomuomeliwana Yehova moi munofuna tumikela athu amo-i. Koma mwina kamun’na murima ofuna kala mtumiki okami-a. Ndiye kodi munapange avi ira mukale na murima ofuna tumikela amo-i? Muganizelenga isangalalo ineyo munafwanye nyo chifukwa yotumikela abali na arongolinyu. Vale Yesu eere: “Va-a unonipangi-a kala osangalala vinjinji kwaranya wachela.” (Vyo. 20:35) Vi pivyevyo apangile liye. Yesu oosangalala vinjinji chifukwa yotumikela amo-i moi nanyen’ne munoza musangalale vinjinji.
10. Kodi Yesu atonyi-edile avi ira oofuna tumikela amo-i? (Maliko 6:31-34)
10 Tiyemoni nione isazo yotonyi-eda ira Yesu oowomeliwa tumikela amo-i. (Welengani Maliko 6:31-34.) Vathawi imo-iwa, liye na ofunjedae koogoma moi koodowa waekiwa ira kadowe kavume. Koma gulu la athu loofiya wewo mombaraanya noembekezelanga ira Yesu aafunji-e. Yesu ookoza koonda ira ugoma. Chifukwa liye na ofunjedae “katan’na thawi yoi kavume koma teto thawi yoi kadje yodja. Kapena, liye ookoza keda afunji-a vyongo vyoyeva noawandela ira kadowenga. Koma chifukwa yoomeliwana athu, liye “oowambeela afunji-a vyongo vinjinji.” Moi oopitiliza afunji-a ngakale ira thawi yoomala.” (Maliko 6:35) Liye oopanga vyevi ookala chifukwa yoi pivyevyo afuneya liye panga, koma “oowavwela chisoni.” Liye oofuna afunji-a chifukwa yoi oowaomeliwana. Yesu oosangalala vinjinji chifukwa yotumikela athu amo-i.
11. Kodi Yesu aakami-ile avi athu anayo aafunji-a liye? (Onani teto ithuzithuzi.)
11 Va utumikae, Yesu oofunji-a athu koma teto ava-a vyofuneya va moyo. Liye oopeleka yodja moi ooawandela ofunjedae ira kaagawele athwayo yodja. (Maliko 6:41) Vopanga vyevi liye afuna aafunji-e ofunjedae ira katumikelenga amo-i. Liye ootonyi-eda ira chito dedo atumiki okami-a kana-indaathu tidofuneya. Vinaoneya ira anamarumiwala koosangalala vinjinji inda chito limo-i na Yesu yopeleka yodja mpakana athwayo “koodja norumbala.” (Maliko 6:42) Unola kawali ulendo owambeela ira Yesu a-ele vasogolo vyofuna vya amo-i. Vamoywae wetene ootumikela amo-i. (Mat. 4:23; 8:16) Yesu oosangalala vinjinji funji-a athu koma teto akami-a fwanya vyongo vyofuneya. Nyo teto munoza musangalale vinjinji akala munaesaese ira mukale mtumiki okami-a.
Muomeliwana Yehova koma teto funechecha tumikela amo-i unoza uulimbikiseni ira mutumikelenga abali na arongolinyu (Onani ndima 11) a
12. Chifukwa n’ni kaninafuneya ganiza ira kaninawande panga ilietene vokami-a pingo?
12 Akala munaona ira kamun’na luso limo-iliwalene lavadela, kamutatile murima. Chifukwa mookaikela mukaana makalelo amo-iwa anayo kanakami-e athu mupingo. Welenga malangizo a Paulo ava 1 Akorinto 12:12-30 koma teto ipempelela khaniyo, unokoza ukami-ani. Mawu a Paulo kanotonyi-eda ira mofwanafwana na mtumiki wa Yehova uliwetene, nyo muli ofuneya mupingo. Akala vano kamuli ofwanelela kala mtumiki okami-a, kamutatile murima. M’malomwiwa, mukedenga panga vyetene vyevyo munawande nyo votumikela Yehova koma teto abali na arongolinyu. Iziwani ira andimuwa kanouva-ani vyoira mogwilizana na vyevyo munakwakwani-e nyo. — Aroma 12:4-8.
13. Kodi chi chifukwa imo-i iivi ineyo inapangi-e ira muthu ava-iwe maudindo?
13 Yongo imo-iwa ineyo inaukami-eni ira mufunenga kala mtumiki choi makalelo anayo kanafuneya ira muthu akale mtumiki okami-a mbofuneya wa Akiristu etene. Akiristu etene kanafuneya kala vausamwali wapama na Yehova nosangalalanga chifukwa yova-a athu amo-i vyongo koma teto kala isazo yapama wa amo-i. Ndiye kodi pivyongo viivi vyevyo m’bali unapange liye ira akale mtumiki okami-a?
VYEVYO MUNAPANGE NYO IRA MUKALE MTUMIKI OKAMI-A
14. Kodi mawu oyi ‘ookaana chibwana’ kanatapulela n’ni? (1 Timoteyu 3:8-10, 12)
14 Sopano tiyemoni nikambilane makalelo anayo kafokotoziwe va 1 Timoteyu 3:8-10, 12. (Welengani.) Mtumiki okami-a unafuneya kala ‘ookaana chibwana.’ Muwu oyi “ookaana chibwana” kanokoza tapulela teto ira “olemekezeya.” Vi kavinatapulela ira kamunafuneya teya kapena panga mthabwala. (Nam. 3:1, 4) M’malomwiwa munafuneya panga tindi vokwakwaneli-eda udindwinyu. Athu mupingo kaiziwa ira muli ororomeleya, kanowambeela ulemekezani.
15. Kodi mawu oyi ‘ororomeleya’ koma teto oyi ‘oomeliwa fwanya phindu mwachinyengo’ kanatapulela n’ni?
15 “Kala ororomeleya.” Mawu anala kanatonyi-eda ira munafuneya kala oona murima koma teto ororomeleya. Muesaesenga panga vyevyo muongile nyo moi kamunanami-e athu amo-i. (Miya. 3:32) Kamukale “oomeliwa fwanya pindu mwachiyengo.” Mawu anala kanatonyi-eda ira munafuneya kala oona murima vakhani da bizimezi kapena ndalama. Kamunaza mufwanyelavo mwai vausamwalinyu na Akiristu amo-i ira mufwanye ndalama.
16. (a) Kodi mawu oyi ‘oong’wa walwa vinjinji’ kanatapulela n’ni? (b) Kodi mawu oyi kala na ‘ikumbumtima yowela’ kanatapulela n’ni?
16 ‘Oong’wa walwa vinjinji.’ Vi vinotonyi-eda ira kamunafuneya ng’wa walwa vinjinji kapena iziweyanga monga idakwa. Munafuneya kala na “ikumbumtima yowela.” Mawu anala kanatonyi-eda ira munafuneya arelanga makundo a Yehova. Ngakale ira kamuli angwilo, munokala na murendele unoyo unaza chifukwa yoi muli vausamwali na Yehova.
17. Kodi m’bali unatonyi-ede avi ira ngororomeleya vevo ‘unaesiwa liye ira aoniwe ngati uli ofwanelela’? (1 Timoteyu 3:10; onani teto ithuzithuzi.)
17 “Kashishiwe nayolinga yoi kaaone akala kali ofwanelela.” Mawu anala kanatapulela ira muwambeela wan’le tonyi-eda ira muli ororomeleya moi munokoza samalela pama maudindwinyu. Eno kauva-ani vyoira, mu-arelenga mosamala malangizwiwa koma teto malangizo anayo gulu linapelekaathu. Mwa-indanga pama chito dedo muva-iwe nyo, athu amo-i mupingo kanoona moi kanoyamikela. Andimuwa kanafuneya esaesa funji-a abali obatiziwa. (Welengani 1 Timoteyu 3:10.) Kodi mupingo mwinyu mukala azombwe anayo katinakwakwani-e chaka 20? Kodi kanoesaesa funjeda Baibulo vaekiwa? Kodi kanopeleka ndemanga koma teto volowa muutumiki? Ngati chi eno, muava-enga chito dedo kanakwakwani-eathu panga koma teto dogwilizana na mwemo vyongo vililiathu va moywiwa. Mwapanganga vyevi munakala ira ‘munaaesa ira muaone akala kali ofwanelela.’ Mwapanga eno kanokoza kala atumiki okami-a ka-anakwakwani-e chaka 20.
Andimuwa kapelekanga vyoira wa abali obatiziwa kanakala ira ‘kanaaesa ira kaaone ngati kali ofwanelela’ (Onani ndima 17))
18. Kodi mawu oyi ‘ookaana chifukwa’ kanatapulela n’ni?
18 “Ookaana vifukwa.” Mawu anala kanatapulela kala ookaana mulandu opanga chimo lilukulu. Pivyoona ira thawi dimo-i Mkiristu unokoza imbiwa mulandu onama. Yesu ooimbiwa mulandu onama moi liye aongile ira o-arelae kanoza kagumane teto na vyevyo. (Yoh. 15:20) Komave mwaesaesanga kala na ikalelo yapama ngati Yesu, munoza mukale na limbili lapama mupingo. — Mat. 11:19.
19. Kodi kala mulombwana wa iyana m’mo-i unatapulela n’ni?
19 ‘Mulombwana wa iyana m’mo-i.’ Akala muli va banja, munafuneya arelanga vyevyo Yehova akozile liye vowambeela, vyoi mulombwana akalenga na iyana m’mo-i. (Mat. 19:3-9) Mulombwana unoyo ngu Mkiristu unafuneya pewa iwelewele. (Aheb. 13:4) Koma kai vyoka evi. Liye unafuneya kala ororomeleya moi kanafuneya kopana na a-iyana amo-i. — Yobu 31:1.
20. Kodi mulombwana unoyo ‘ngoing’anela pama’ banja lae unapanga yoi avi??
20 “Oing’anela pama a-imiwa na mabanjiwa.” Akala muli muru wabanja, munafuneya panga tindi vokwakwaneli-eda udindwinyu. Thawi detene mupangenga lambela wa vabanja. Mulaleelenga vakwikwivakwikwi na athu a m’banja linyu. Mukami-enga a-iminyu kala va usamwali wapama na Yehova. (Aife. 6:4) Mulombwana unoyo unakwakwani-a samalela pama banja lae unotonyi-eda teto ira unokoza samalela pama pingo. — Elekezelani na 1 Timoteyu 3:5.
21. Kodi munapange avi ngati vathawi ila kamuli mtumiki okami-a?
21 Akala muli m’bali koma kamuli mtumiki okami-a, ninoulimbikisani ira muganizele pama makundo a mukhanila koma teto ipempelela. Welengani vyevyo muthu unafuneya liye panga ira akale mtumiki okami-a noesaesanga vikwakwaneli-eda. Muganizelenga mwemo munaomeliwela nyo Yehova koma teto abali na arongolinyu. Teto muesaesenga kala na murima ofuna atumikela. (1 Pe. 4:8, 10) Mwaesaesanga ira mukale atumiki okami-a munoza musangalale atumikela abali na arongolinyu mupingo. Yehova audaliseni vevo munaesaesa nyo ira mukale atumiki okami-a. — Afilipi 2:13.
NYIMBO 17 “ Ndikufuna”
a MAWU OFOTOKOZELA VITHUZITHUZI: Umazele, Yesu unatumikela ofunjedae moviyevi-a; umuuono odjana, mtumiki okami-a unakami-a m’bali oulula mupingo.
