KODI vinouruchani ira mufunjedenga Baibulo vaekinyu mulungu uliwetene koma teto ira musangalalenga vofunjedavo? Etene iyene thawi dimo-i vyevi vinoniireela. Koma kaganizelani vyongo vimo-i vyevyo ninapanga iyo thawi detene, monga amba. Ira muthu a-ambe vanafuneya thawi koma teto tindi koma a-amba unovivwa pama muthuthu. Ninokoza erekezela funjeda Baibulo ‘no-amba ma-inje a Mawu a Mulungu.’ (Aife. 5: 26) Tiyemoni nione makundo amo-i anayo kananikami-e vakhani inela.

• Mupangenga ndandanda. Funjeda Baibulo chi imo-i mwa ‘vyongo vyofuneya vinjinji’ vyevyo Mkiristu kanafuneya nyalanyaza. (Afil. 1: 10) Ira mu-arelenga ndandandinyu, mui-elenga vamalo anayo munaonenga nyo moorucha monga vakoma kapena vafelemu. Kapena teto munokoza chela alamu va ipangizo inyu yamakono ira iulenga thawi yofunjeda yanga-alile vang’ono.

• Musakulenga thawi koma teto ndila yofunjedela ineyo inakale yapama wa nyo. Kodi nyo munokoza omeliwa funjeda ndila imo-i va mulungu wa thawi yolapa kapena wa maulendo angasene moduladula? Munokoza panga vyoi mufunjedenga mogwilizana na mwemo vyongo vililiathu va moywinyu. Akala munaona ira munokaana ulesi thawi yofunjeda yakwakwana, munokoza shishedela funjedanga wa maminisi 10 oka. Funjeda wa thawi yoyeva eni unokoza ukami-ani vinjinji iyana nokedanga garati oofunjeda. Moi mwina mwaambeela funjeda munoza mulimbikisiwe ira mupitilize. — Afil. 2:13.

• Musakulenga khani yoi mufunjede thawi yofunjeda ya-anafiye. Mwagarati vati noganizelanga vyoi mufunjede thawi ineyo, kamuna-indi-ede chito pama thawinyu. (Aife. 5: 16) Munokoza panga pama sakula khani ineyo munafuna nyo funjeda noilemba vamo-i viwa vene. Yofuka imo-iwene yaza m’maganizo mwinyu muilembenga. Mwamari-a Funjeda ulendo uliwetene muenjedelenga vyongo vyevyo munafuna nyo ira muze mufujede.

• Mukalenga okozeya chenja. Mushishenga chenga vyongo vimo-i vandandandinyu monga injiva wa thawi kapena teto khani dedo munafunjede nyo. Yofuneya kai, injiva wa thawi kapena khani dedo munafunjedenyo koma ira mufunjedenga mulungu uliwetene.

Ninopindula vinjinji nafunjedanga mulungu uliwetene. Usamwali-u na Yehova unolimba, ninolimbikisiwa panga vyongo mwazelu koma teto ninosangalala. — Yos. 1:8.