1. Kodi Yesu aawanden’le ofunjedaye n’ni vyokuza ‘thawi ya mapeto,’ n’nga aachenjezile n’ni?

 UNGA-AN’LE malambo oyeva ira Yesu aphiwe, ofunjedaye 4 koomufuka ira: “Izindikilo . . . ya mapeto a thawiila inaza ikala n’ni?” (Mat. 24:3) Ofunjedayo podi ira koofuna iziwa vyevyo vinaakami-e iziwa thawi eneyo Yerusalemu na kachisaye vinazeathu viwonongiwe. Vosomeda Yesu kaakede onga vyoonongiwa wa Yerusalemu na kachisaye, koma oowonga teto vyokuza “mapeto a thawiila,” anayo iyo ninakalamo iyo. Voonga vya thawi ya mapeto Yesu eere: “Onga vya dambolo kapena ola liwa, kalivo onoyo unaiziwa, masiki angelo a udimu kapena Mwana, koma Baba eka.” Vanduli viwa oochenjeza ofunjedaye etene ira ‘kakale cheru’ teto ‘kakale maso.’

2. Chifukwa n’ni vyali vyofuneya ira Akiristu a muthawi ya anamarumiwa kakaleve maso?

² Akiristu a Chiyuda a muthawi ya anamarumiwa kafuneela kala maso ira kavulumuwe. Yesu oowawandela o-arelaye vyevyo vyaa-kami-e iziwa ira Yerusalemu na kachisaye vi-an’le vang’ono onongiwa. Liye eere: “Mwaza muwona magulu a khondo kangarungunuwile Yerusalemu, muze muiziwe ira wonongiwa waye uwandamela.” Vathawiyo aliwa kafuneela vwela chenjezo la Yesu loi “kaze kaambeele tawela umwangoni.” (Luk. 21:20, 21) Anayo kavwele chenjezoli koovulumuwa vevo Aroma kaonongileathu Yerusalemu.

3. Kodi ninatapanya n’ni mukhanila?

³ Eeniva ninakala muthawi ya mapeto a ilambo yotakalela. Eeno na iyene ninafuneela kala oganiza pama koma teto kala maso. Mukhanila ninotapanya eneyo inanikami-e kalave  oganiza pama naonanga vyoireya vya muilambwela. Ninoona teto vyevyo ninaire iyo ira nisamalenga na vyevyo ninaira iyo koma teto mwemo nina-indi-edele iyo chito pama thawi yo-alela.

4. Chifukwa n’ni ninafuneela ira chidwi na mwemo vyoireya vya muilambwela vinakwakwaneli-edaathu vyoro-eda vya m’Baibulo?

⁴ Viikala vifukwa vyapama vyoniiri-a kaana chidwi na mwemo vyoireya vya muilambwela vinakwakwaneli-edaathu vyoro-eda vya m’Baibulo. Mofwanafwani-a, Yesu ooromola vyongo vyo-iyana-iyana vyevyo vinanikami-a iziwa ira mapeto a ilambo ya Satanela kali vakwikwi. (Mat. 24:3-14) Namarumiwa Petulo oonilimbikisa ira niirenga chidwi na mwemo vyoro-eda vinakwakwaneli-ediwaathu na yolinga yoi iroromelo yi-u ikale yolimba. (2 Pe. 1:19-21) Buku lomari-a la m’Baibulo linaambeela na mawu oyi: “Chivumbuluso yopelekiwa na Yesu Kiristu, eneyo Mulungu amuva-ile liye, ira awoni-e akapolwaye vyongo vyevyo vinafuna ireya chineneveva.” (Chiv. 1:1) Eeno ninoira chidwi vinjinji na vyevyo vinaireya muilambwela ira nione mwemo vinakwakwaneli-edaathu vyoro-eda vya m’Baibulo. Teto ninofunechecha tapanya na amo-i vyoireya vyevyi. ⁵ Natapanyanga vyoro-eda vya m’Baibulo nirambelenga sambaula vya m’maganizo mwi-u. Chifukwa n’ni? Chifukwa kaninafuna onga iliyetene eneyo inasokoneze mgwilizano mupingo. Mofwanafwani-a, mwina ninokoza vwa olamulela a mu vilambo kasambaulanga vyevyo kanaireathu ira kamali-e vuto limo-iliwalene koma teto zi-a murendele na chitetezo. M’malo mokeda sambaula maganizwi-u ira vyevyi vinokwakwaneli-eda yoro-eda ya va 1 Atesalonika 5:3, ninafuneela sambaula mogwilizana na vyevyo vifalisiwe chineneveva. Naonganga vyongo mogwilizana na vyevyo gulu la Yehova lifalisileathu m’mabukwi-u, ninokami-a ira pingo upitilize kala wogwilizana koma teto ukale “na maganizo amo-i.” ​ — 1 Akor. 1:10; 4:6.

6. Kodi ninafunjeda n’ni va 2 Petulo 3:​11-​13?

⁶ Welengani 2 Petulo 3:11-13. Namarumiwa Petulo oonikami-a ira nikalenga na maganizo ofwanelela nawelenganga vyoro-eda vya m’Baibulo. Oonilimbikisa ira ‘niumbuwelenga thawi detene kalavo wa dambo la Yehova.’ Chifukwa n’ni? Kai chifukwa yoi ninakeda funa iziwa “dambo na ola” lelo Yehova unaze liye avaze khondo ya Armagedo. Koma chifukwa yoi ninofuna indi-eda chito thawi eneyo i-an’lela ira nikale athu ‘a ikalelo yochena teto niirenga chito dotonyi-eda ira nili ovipeleka wa Mulungu.’ (Mat. 24:36; Luk. 12:40) M’mawu amo-i ninokoza onga ira ninofuna panga vyofwanelela koma teto onechecha ira ninoira tindi votumikela Yehova chifukwa yoi ninomuwomeliwana vinjinji. Ira vyevyi viwandeye, ninafuneela samala na vyevyo ninaira iyo.

7. Kodi ninatonyi-ede avi ira ninosamala na mwemo ninairela iyo vyongo? (Luka 21:34)

⁷ Yesu oowandela ofunjedaye ira kanafuneela kala osamala ookala na vyoireya vya muilambwela vyoka koma na mwemo kanairelaathu vyongo. Likundo leli linooneela pama va chenjezo lelo apelekile liye va Luka 21:34. (Welengani.) Valembali Yesu eere: “Samalani.” Muthu onoyo unasamala, unokala cheru na vyongo vyevyo vinasokoneze  usamwalaye na Yehova teto unoyesayesa virambela. Airanga vyevyi unopitiliza panga vyongo vyevyo vinairi-e Mulungu muwomeliwana. — Miya. 22:3; Yud. 20, 21.

8. Kodi namarumiwa Paulo apelekile malangizo oyi avi wa Akiristu?

⁸ Namarumiwa Paulo oolangiza Akiristu ira kasamalenga na vyevyo kanairaathu. Mofwanafwani-a, oowandela Akiristu a wu Ifeso ira: “Samalani vinjinji ira mwemo munayendela nyo kai n’nga anthu ookaana zelu, koma n’nga azelu.” (Aife. 5: 15, 16) Thawi detene Satana unoyesayesa ira awononge usamwali-u na Yehova. Eeno Baibulo linonilangiza ira nipitilize “zindikila ifunelo ya Yehova” na yolinga yoi nivititi-ede umisampa daye. — Aife. 5:17.

9. Kodi ninaiziwe avi vyevyo Yehova unafuna liye ira niirenga?

⁹ Baibulo kalinaromola vyongo vyetene vyevyo vinasokoneze usamwali-u na Yehova. Thawi detene ninafuneela sakula eki-u vyoira va khani dedo kadisambauliwe mwachindunji m’Malemba. Ira nisakule vyongo mwazelu ninafuneela iziwa kapena ira zindikila “ifunelo ya Yehova.” Ninokoza ira vyevyo akala thawi detene ninafunjeda koma teto ganizela modii-a Mawu a Mulungu. Nayesayesanga vwechecha ifunelo ya Yehova koma teto kaana “maganizo a Kiristu,” pavevo teto ninayenda iyo “n’nga azelu” masiki ira kavali malamulo oniwandela vyoira vakhani iliyetene. (1 Akor. 2:14-16) Thawi dimo-i vinakala vyo-orucha iziwa vyongo vyofuneela virambela, koma thawi dimo-i vinokala vyorucha.

10. Kodi pi vyongo vimo-i vyiivi vyevyo ninafuneela iyo virambela?

¹⁰ Vyongo vimo-i vyevyo ninafuneela iyo rambela ku kopana, lezela, dja vinjinji, onga mawu anayo kanakumudwi-a amo-i, onela vyosangalasa vya chiwawa, vyolava na vyongo vimo-i. (Sal. 101:3) Mudani-u Mdyerekezi thawi detene unosaelasaela mipata doi awononge usamwali-u na Yehova. (1 Pe. 5:8) Akala kaninakale maso, Satana unokoza zala m’mirimani mwi-u mbewu da sanje, chinyengo, dyera, idani, vikuza koma teto lunduwa. (Agal. 5:19-21) Vowambeela vyongo vyevyi vinokoza oneya n’nga vyo-oopi-a. Koma akala kaninairevo yongo mombaraanya vidula m’murimani mwi-u, vinokoza pitiliza ulukula n’nga yomela yopha teto vinokoza ambeeli-a mavuto. — Yak. 1:14, 15.

11. Kodi ti vuto limo-i lo-ooneya liivi lelo ninafuneela iyo lirambela, n’nga chifukwa n’ni?

¹¹ Vuto limo-i lelo ninafuneela iyo lirambela kugwilizana na athu otakala. Kaganizelani vyoireya n’nga vi. Niyerekezele ira muna-inda chito na muthu onoyo kai Mkiristu fwinyu. Vofuna mukami-a fwinyuyo ira aonenga mofwanelela a Mboni da Yehova, munoyesayesa kala ooma murima koma teto mukami-a. Koma teto thawi dinjinji auvepani ira mwadjele limo-i yodja ya mutana munosomedela. Va-anavire thawi, muwambeela panga vyevyi vakwikwivakwikwi. Vanduli viwa fwinyuyo uwambeela wonga khani do-ofwanelela dedo vowambeela munoidanana. Vira wa thawi mufiya vokeda vilemeela moi kamunaviidanana teto. Vanduli viwa dambo limo-i fwinyuyo u-uvepani ira mwaeluka mwang’wele limo-i yong’wa teto musomedela. Vang’ono na vang’ono muwambeela ona ira munogwilizana vinjinji na fwinyuyo. Vyera eeno, kodi munaganiza ira vanalande thawi indendayi moi avi ira muwambeele landela vyoira vyaye? Pivyoona ira ninofuna womela murima koma teto lemekeza athu etene. Koma niumbuwelenga ira ninolandela vyoira vya athu anayo ninawaledana iyo vinjinji. (1 Akor. 15:33) Nasamalanga na mwemo  ninairela iyo vyongo n’nga mwemo Yesu anilangizele liye, ninoza nirambele gwilizana na athu nayo katina-arela makundo a Yehova. (2 Akor. 6:15) Ninoza nione vuto lelo linakalevo teto ninoza nilirambele.

12. Kodi ofunjeda a Yesu kafuneela ira n’ni voyembekezela ira mapeto kafiye?

¹² Ofunjeda a Yesu katafuneya kedanga garati vevo kayembekezelaathu ira mapeto kafiye. Liye oowava-a chito yoi ka-indenga. Oowalamula ira kalaleelenga uthenga wapama “mu Yerusalemu, wu Yudeya wetene na wu Samariya, mpakana umagomelo wa ilambo yavati.” (Vyo. 1:6-8) Enela yali chito ilukulu vinjinji. Aliwa koo-indi-eda chito pama thawiwa vevo kavipelekaathu vo-inda chitwela.

13. Chifukwa n’ni ninafuneela indi-eda chito pama thawi-u? (Akolose 4:5)

¹³ Welengani Akolose 4:5. Ira nisamalenga na mwemo ninairela iyo vyongo, ninafuneela ganizela mwemo nina-indi-edela iyo chito thawi-u. “Vyongo vyo-oyembekezeleya” vinokoza gwela etene iyene. (Nam. 9:11) Mofwanafwani-a ninokoza tatiya mo-oyembekezeleya.

14-15. Kodi ninaire avi ira ni-indi-edenga chito pama thawi-u? (Aheberi 6:11, 12) (Onani teto ithuzithuzi.)

¹⁴ Ninokoza indi-eda chito pama thawi-u  voira ifunelo ya Yehova, koma teto limbi-a usamwali-u na liye. (Yoh. 14:21) Ninafuneela kala “olimba, o-osusa, okala na vyoira vinjinji thawi detene mu chito ya Mbwiye.” (1 Akor. 15:58) Nairanga vyevyi, mapeto kafiya, kaya mbamapeto a moywi-u kapena a ilambo yotakalela, kaninaza niviimba mulandu ira kaniirile vinjinji votumikela Yehova. — Mat. 24:13; Arom. 14:8.

¹⁵ Malambwano, Yesu unopitiliza sogolela ofunjedaye vevo kanalaleelaathu vya Umwene wa Mulungu vailambo yetene. Liye unokwakwaneli-eda vyevyo alonjezile liye. Zela mugulu la Yehova, Yesu unonifunji-a mwemo ninalaleelele iyo koma teto vonikami-a vo-inda chitwela. (Mat. 28:18-20) Ninoira mbali-u na-indanga mwatindi chito yolaleela nofunji-a athu koma teto kalave maso vevo ninayembekezela iyo ira Yehova aononge ilambo yotakalela. Na-arelanga malangizo ava Aheberi 6:11, 12, idedi-edo yi-u inoza ikale “yosimikizeya mpakana mapeto.”— Welengani.

16. Kodi nili osimikiza murima panga n’ni?

¹⁶ Yehova oogarati-a dambo na thawi eneyo unaze liye aononge ilambo yolamuleliwa na Satanela. Dambolo laza lifiya, Yehova kanaza alepela kwakwaneli-eda vyoro-eda vyaye vyetene vyevyo alembile liye m’Mawaye. Thawi dimo-i ninokoza onanga n’nga mapeto kanochedwa. Komave dambo la Yehova ‘kalinaza lichedwa.’ (Hab. 2:3) Eeno tiyemoni nikale osimikiza murima ira ‘ninoza nidedi-ede Yehova’ koma teto tonyi-eda ira ‘ninoyembekezela moleza murima Mulungu wa chipulumuso yi-u.’​ — Mik. 7:7.