YOMARA na achimwenaye ambin’li Marcelo na Hiver kanakala mu dela limo-i liwa wu Guatemala. Yomara oowambeela funjeda Baibulo na a Mboni teto vangavirile thawi achimwenaye teto koowambeela funjeda. Koma vookala vuto. Etene araru kookaana vuto lo-oona teto kataiziwa welenga vilembo vya athu o-oona. Eeno anayo kaafunji-a Baibulo, kooawelengela ndima koma teto mavesi va phunzilo lililetene.

Vyali teto vyorucha ira kafwanyeyenga va misonkano dapingo. Katakwakwani-a enda ekiwa ulendo wa 40 minisi dowa wu Nyumba ya Umwene yavakwikwi. Koma abali koowonechecha ira kanoakami-a ira kafwanyeyenga va misonkano detene. Aluwa kangaamben’le kamba khani vamisonkano da muwari mwa mulungu, abali koowakami-eda loweza khani diwado.

Mu Mey 2019, misonkano dapingo doowambeela ireela mudela liwa. Vathawiyo banja limo-i lelo laira upainiya wogarateya lootamela mudelalo. Aluwa koosakaeda vyoi kafunji-e athu aralwala lemba nowelenga vilembo vya athu o-oona masiki ira naaluwene teto kataiziwa mwemo kanaireleathu vyevyi. Eeno koodowa wu laibulale ira kafwanye mabuku ofunji-a lemba nowelenga vilembovi koma teto ira kaiziwe mwemo kanafunji-edeleathu amo-i.

Vangavirile medi doyeva, athu aralwayo koowambeela iziwa welenga vilembovi teto vyevyi vyoowakami-eda ira kadowe vasogolo mombaraanya. Vano Yomara, Marcelo na Hiver kanoira upainiya wogarateya teto Marcelo ngu mtumiki wokami-a. Wa mulungu wetene aluwa kanokala otanganisiwa na vyongo vyokuza lambela. Tindi liwa linokami-eda teto amo-i kala a tindi.

Aralwala kanoyamikela vinjinji chikondi ya abali na arongola a mupingo mwiwa. Yomara aongile ira, “Keda ambeela vevo nagumanile iyo na a Mboni, aliwa kookala kanitonyi-edanga chikondi ya imbarimbari.” Marcelo oowenjedela ira, “Nikaana afwi-u apama vinjinji mupingo teto nili m’banja la va ilambo etene loomeliwana koma teto logwilizana.” Yomara na achimwenaye kanodedi-edela mwachidwi za wona Yehova asakaedanga ilambwela kala yapama. — Sal. 37:10, 11; Yes. 35:5.