1-2. Kodi chin’ni eneyo inaireya thawi dinjinji muthu abadiziwanga, n’nga munafuneela ganizela vya n’ni?

 KODI moowambeela onavo gulu la athu anayo kanadowa wobadiziwa? Podi ira moovwa kasomedanga mosimikiza vyofuka vin’li vyevyo kafukiweathu kaanabadiziwe. Moowona teto abaliwa na afwiwa kasangalalanga. Vevo kakumaathu mwiko, moowona kove diwa dangali da imwerumweru koma teto moovwa athu kaimbanga m’mandani. Ninokoza onga ira mulungu uliwetene athu masauzande kanovipeleka badiziwa nokala Mboni da Yehova Mulungu.

² Kodi vyongo vili avi na nyo? Akala munafuna badiziwa iziwani ira muli muthu wavadela vinjinji mu ilambwela chifukwa ‘munosaelasaela Yehova.’ (Sal. 14:1, 2) Khanila ilembeliwe nyo kaya muli ndimuwa kapena n’ng’onong’ono. Komave iyo teto anayo nabadiziwe wale ninofuna simikiza murima ira ninopitilizave tumikela Yehova mpakana walewale. Eno tiyemoni nitapanye viralu mwa vifukwa vinjinji vyevyo vinaniiri-a tumikela Yehova.

3. Chifukwa n’ni atumiki a Yehova kanaomeliwana imbarimbari na chilungamo? (Salimu 119:128, 163)

³ Yehova oolamula athwaye ira ‘kawomeliwenga imbarimbari.’ (Zak. 8:19) Yesu oolimbikisa o-arelaye ira kasaelenga chilungamo. (Mat. 5:6) Vyevi vinatonyi-eda ira muthu unafuneela kala ofunechecha panga vyofwanelela, vyapama koma teto vyochena vamaso va Mulungu. Kodi nyo munoomeliwana imbarimbari na chilungamo? Kaninakaikela ira munoira eeno. Munoidanana vyonama koma teto vyongo vyetene vyotakala. (Welengani Salimu 119:128, 163.) Vyonama vinotonyi-eda  makalelo a Satana onoyo ngolamulela wa ilambwela. (Yoh. 8:44; 12:31) Imo-i mwa vyolinga vya Satana kutakali-a zina lochena la Yehova Mulungu. Liye ukala afalisanga vyonama vyokuza Mulungwi-u keda kumela vevo amuchimwi-ile liye Adamu na Hava m’munda wa Edeni. Satana ooiri-a ira athu kaonenga n’nga Yehova Ngolamulela wovikonda koma teto wachinyengo onoyo unaimana athu vyongo vyapama. (Gen. 3:1, 4, 5) Vyonama vyaye vikala viiri-anga athu anjinji ira kamuonenga molakweya Yehova. Athu kasakula ira ‘katiwomeliwenga imbarimbari,’ Satana unowairi-a ira kairenga vyo-olungama vilivyetene koma teto makalelo otakala. — Arom. 1:25-31.

4. Kodi Yehova utonyi-edile avi ira ngu “Mulungu wa imbarimbari”? (Onani ithuzithuzi.)

⁴ Yehova ngu “Mulungu wa imbarimbari,” teto mofunechecha unofunji-a imbarimbariyo wa athu anayo kanamuwomeliwana. (Sal. 31:5) Unowakami-eda ira katipusi-iwe na vyonama vya Satana. Yehova unofunji-a teto atumikaye kala oona murima koma teto achilungamo. Vyevi vinokami-a ira amo-i kaalemekezenga koma teto kakalenga na murendele wa m’murima. (Miya. 13:5, 6) Kodi nyo muona liye auirelangani vyevi vevo mwafunjeda nyo Baibulo? Mufunjeda ira ndila da Yehova ti dapama vinjinji wa athu etene tangani-avo teto nyo. (Sal. 77:13) Eeno munofuna panga vyevyo Mulungu unaona liye ira pi vyachilungamo. (Mat. 6:33) Munofuna kala umbali ya imbarimbari koma teto simikizela ira vyevyo Satana aongile liye vyokuza Mulungwi-u Yehova pivyonama. Kodi munaire avi vyevi?

5. Kodi munasakule avi kala umbali ya imbarimbari na chilungamo?

⁵ Vyevyo munasakula nyo va moywinyu vinakala n’nga munaonga ira: ‘Ndinokoonda vyonama vya Satana koma teto ndinoomeliwana imbarimbari. Ndinafuna ira Yehova akale Olamulelanga teto ndinafuna ira ndiirenga vyevyo liye unawona liye ira pivyofwanelela.’ Kodi munaire avi vyevi? Munokoza ira vyevi vovipeleka wa Yehova m’pempelo era eeno tonyi-eda vowela vipelekawinyuwo vobadiziwa. Omeluwana imbarimbari na chilungamo chi chifukwa ilukulu eneyo inauiri-eni ira musakule badiziwa.

6. Kodi va Salimu 45:4 vali vifukwa vyiivi vyouiri-ani muomeluwana Yesu Kiristu?

⁶ Chifukwa n’ni munamuomeluwana Yesu Kiristu? Konani vifukwa vimo-i vyapama va Salimu 45:4. (Welengani.) Yesu unoomeluwana imbarimbari, viyevi-a koma teto chilungamo.  Akala munaomeluwana imbarimbari na chilungamo pivyovweya ira munomuomeluwana teto Yesu Kiristu. Kaganizelani mwemo Yesu airele liye vyongo molimba murima vokala umbali yaimbarimbari na chilungamo. (Yoh. 18:37) Koma kodi Yesu unatonyi-eda avi ira unolimbikisa ikalelo yoviyevi-a?

7. Chin’ni inauri-ani chidwi noviyevi-a wa Yesu?

⁷ Yesu unolimbikisa ikalelo yoviyevi-a muvyoira vyaye. Mofwanafwani-a, liye unoonechecha ira ulemelelo wetene unodowa wa Babaye ookala waliye. (Malik. 10:17, 18; Yoh. 5:19) Kodi nyo munavwa avi mwaganizela viyevi-a woi eni? Kodi kavinauiri-ani ira mumuomeluwengana Mwana wa Mulungu koma teto musazi-eda? Pivyo-oira fuka. Chifukwa n’ni Yesu uli oviyevi-a? Chifukwa unowomeluwana koma teto sazi-eda Babaye onoyo ngoviyevi-a. (Sal. 18:35; Aheb. 1:3) Kodi vyevi kavinauiri-ani ira mumuomeluwengana Yesu onoyo unatonyi-eda vinjinji makalelo a Yehova?

8. Chifukwa n’ni ninamuomeluwana Yesu n’nga Mweni-u?

⁸ Ninomuomeluwana Yesu n’nga Mweni-u chifukwa Ngolamulela wapama vinjinji. Yehova oomufunji-a Mwanayela teto oomu-ela ira alamulelenga. (Yes. 50:4, 5) Kaganizelani teto chikondi yololela vuteela amo-iwa eneyo Yesu atonyi-edile liye. (Yoh. 13:1) N’nga Mweni-u, Yesu ngofwanelela ira mumuomeluwengana. Liye oosambaula ira athu anayo kanamuomeluwana, anayo aaromon’le liye ira mba afwaye, kanotonyi-eda chikondiyo vovwela malamulwaye. (Yoh. 14:15; 15:14, 15) Ngumwayi ulukulu kala afwaye a Mwana wa Mulungu.

9. Kodi ubadizo wa Akiristu unafwanafwana avi nawa Kiristu?

⁹ Limo-i mwa malamulo a Yesu ti loi o-arelaye kanafuneela badiziwa. (Mat. 28:19, 20) Liye oopeleka isazo va khanila. Komave ubadizwaye uno-iyana mundila dimo-i na wa o-arelaye. (Onani bokosi loi  “Iyana wa Ubadizo wa Yesu na wa O-arelaye.”) Koma mundila dimo-i ngofwanafwana. Vevo abadiziwe liye, Yesu oovipeleka panga yofuna ya Babaye. (Aheb. 10:7) Mofwanafwana na vyevi, o-arela a Kiristu kanobadiziwa vofuna tonyi-eda vowela ira koovipeleka wa Yehova Mulungu. Va sopano yongo yofuneya vinjinji vamoywiwa inakala panga yofuna ya Mulungu ookala yeewa. Eeno aliwa kanakala kasazi-edanga isazo ya Mbwiiwa.

10. Chifukwa n’ni muomeluwana Yesu unafuneela uiri-ani badiziwa?

¹⁰ Munosomedela Yesu n’nga Mwana obaliwa eka wa Yehova koma teto Mwene onoyo Mulungu umusakule liye ira aze anilamulele. Ninoiziwa ira Yesu ngoviyevi-a teto unosazi-eda ndendende makalelo a Babaye. Moofunjenda ira oodji-a andala, oolimbikisa ofooka koma teto ooili-a obulela. (Mat. 14:14-21) Muona teto mwemo munasogolela liye pingwaye malambwano. (Mat. 23:10) Teto munoiziwa ira unoza aire vinjinji kwaranya vevo musogolomu monga Mwene wa Umwene wa Mulungu. Ndiye kodi munatonyi-ede avi ira munomuomeluwana? Munokoza ira vyevyo volandela isazwaye. (Yoh. 14:21) Munokoza ambeela novipeleka wa Yehova vanduli viwa badiziwa.

11. Kodi chifukwa ilukulu youiri-ani badiziwa chin’ni, n’nga chifukwa n’ni munawonga eeno?

¹¹ Kodi chifukwa ilukulu yoniiri-a badiziwa inafuneela kala n’ni? Yesu ooromola lamulo lilukulu vinjinji la Mulungu vevo awongile liye ira: “Umuwomeliwengana Yehova Mulungwawo na murimawo wetene, moywawo wetene, maganizwawo etene na kopolo dawo detene.” (Malik. 12:30) Kodi mu pumwemo ililiathu chikondinyu wa Mulungu?

12. Chifukwa n’ni munamuomeluwana Yehova? (Onani ithuzithuzi.)

¹² Viikala vifukwa vinjinji vyouiri-ani muomeluwana Yehova. Mofwanafwani-a, muufiya vovwechecha  pama ira liye ngu “kasupe wa moyo” koma teto ira ngonoyo unaniva-a “mphaso iliyetene yapama na yangwilo.” (Sal. 36:9; Yak. 1: 17) Iliyetene eneyo ninasangalalana iyo inakumela wa Mulungwi-u ova-a koma teto wachikondi.

13. Chin’ni inairi-a ira dipo likale mphaso yantengo yavadimu?

¹³ Dipo chi mphaso yantengo wavadimu eneyo Yehova aniva-ile liye. Chifukwa n’ni ninawonga eeno? Kaganizelani vya usamwali wapama vinjinji wa Yehova na Mwanaye. Yesu eere: ‘Baba unondiomeluwana’ koma teto “ndinomuomeluwana Baba.” (Yoh. 10:17; 14:31) Usamwalila oolimba vinjinji chifukwa kookala limo-i wachaka mabiliyoni. (Miya. 8:22, 23, 30) Ndiye kaganizelani mwemo vyamuvoreeleathu Mulungu volola ira Mwanayela avuteye koma teto khwa. Yehova unowomeluwana vinjinji athu tangani-avo nyo moi mpakana oololela peleka Mwanaye omuomeluwana monga sembe na yolinga yoi nyo koma teto athu amo-i muze mukale na moyo mpakana walewale. (Yoh. 3:16; Agal. 2:20) Enela-i chi chifukwa ilukulu vinjinji youiri-ani muomeluwana Mulungu.

14. Kodi chi yolinga yapama iivi eneyo munafuneela nyo kaana vamoywinyu?

¹⁴ Chikondinyu wa Yehova iwulukula vevo mukan’le nyo mufunjedanga vinjinji vyokuza liye. Mookaikela munofuna kalanaye vausamwali olimba va thawi ila koma teto mpakana walewale. Moi pivyowandeya. Mooma murima liye unoulimbikisani ira muirenga vyongo vyosangalasa murimaye. (Miya. 23:15, 16) Munokoza ira vyevi ookala na mawu oka koma na vyoira  vinyu. Vyevyo munaira nyo va moywinyu vinokoza tonyi-eda akala munamuomeluwana Yehova. (1 Yoh. 5:3) Enela chi yolinga yapama vinjinji eneyo munasakule nyo vamoywinyu.

15. Kodi munatonyi-ede avi ira munomuomeluwana Yehova?

¹⁵ Kodi munatonyi-ede avi ira munomuomeluwana Yehova? Yowambeela munafuneela peleka pepelo vaekinyu lotonyi-eda ira munovipeleka wa Mulungu oona eka. (Sal. 40:8) Era eeno munafuneela tonyi-eda vowela vipelekawo vobadiziwa. N’nga mwemo nisambaulele iyo umaambeelelo wa khanila, thawila inokala yosangalasa koma teto yofuneya vinjinji vamoywinyu. Munowambeela moyo usha ookala okeda panga vyofuna vinyu vyoka koma vya Yehova. (Arom. 14:8; 1 Pe. 4:1, 2) Enela inokoza oneya n’nga khani ilukulu teto pumwemo ililiathu. Koma ira vyevi unou-ulelani mwayi woi mukayena moyo wapama. Moi avi?

16. N’nga mwemo lemba la Salimu 41:12 linatonyi-edelaathu, kodi Yehova unaza airele n’ni athu anayo kanavipeleka ira kamutumikele?

¹⁶ Yehova ngova-a vinjinji. Vo-olandela vyevyo nyo munamuva-a nyo, liye thawi detene unouva-ani vyongo vinjinji. (Malik. 10:29, 30) Liye unoza auva-eni moyo osangalasa, watanthauzo koma teto wokhutirisa masiki vathawi ila muilambo yotakalela. Teto ila chi chiyambi chabe. Moyo onoyo mwaambeen’le nyo mwangakede badiziwa kun’na malile. Munokoza pitilizave tumikela Babinyu omuwomeluwana mpakana walewale. Chikondi vaari va nyo na Babinyu inoza ipitilizeve ulukula, teto vogomi-eda viwa munoza mukaena moyo n’nga liye, mpakana walewale. — Welengani Salimu 41:12.

17. Kodi chin’ni eneyo munamuva-e nyo Yehova eneyo liye kan’na?

¹⁷ Mwavipeleka koma teto badiziwa munokaana mwayi wopeleka wa Babinyu yongo yantengo wavadimu vinjinji. Liye uuva-ani iliyetene yapama eneyo munasangalalana nyo. Votonyi-eda yamikela nyo teto munokoza muva-a Munyailo waudimu na ilambwela imo-iwene eneyo liye kan’na, eneyo kufunechecha winyu mutumikela movipeleka. (Yob. 1:8; 41:11; Miya. 27:11) Onola  ngu moyo wapama vinjinji onoyo munakaena nyo. Mookayikela, muomeluwana winyu Yehova chichifukwa yapama vinjinji youiri-ani badiziwa.

18. Kodi munavifuke vyofuka viivi?

¹⁸ Ndiye kodi munasomede avi yofuka ila, Kodi munobadiziwa? Munosomeda ekinyu yofuka enela. Komave vinokala pama vifuka ira, ‘Kodi ndinadedi-a n’ni?’ (Vyo. 8:36) Umbuwelani vifukwa viraru vyevyo nitapanyile iyo. Yowambeela choi munowomeluwana imbarimbari koma teto chilungamo. Vifukeni ira, ‘Kodi ndinofuna za ona thawi eneyo uliwetene unazeliye awonganga imbarimbari koma teto panga chilungamo?’ Yanambili choi munomuomeluwana Yesu Kiristu. Vifukeni ira, ‘Kodi ndinofuna ira Mwana wa Mulungu akale Mwenanga koma teto ndinofuna arela isazo yaye?’ Yanararu koma teto yokwaranya vyetene choi munomuomeluwana Yehova. Vifukeni ira, ‘Kodi ndinofuna sangalasa murima wa Yehova vomutumikela n’nga Mulungwanga?’ Akala vyosomeda vinyu va vyofuka vyevi pivyoi inde, ndiye chifukwa n’ni kamunafuna badiziwa? Munadedi-a n’ni? — Vyo. 16:33.

19. Chifukwa n’ni kamunafuneela zengeleza vakhani yobadiziwa? Pelekeni isazo. (Yohani 4:34)

¹⁹ Akala munazengeleza badiziwa kaganizelani isazo eneyo Yesu a-indi-edele liye chito. (Welengani Yohani 4:34.) Va lembali Yesu ooyerekezela panga yofuna ya Babaye na yodja. Chifukwa n’ni? Chifukwa yoi yodja chiyapama wa etene iyene. Yesu unoiziwa ira vilivyetene vyevyo Yehova unaniwandela liye ira niire vinakala vyapama wa iyo. Yehova kanafuna ira niire iliyetene eneyo inaniporeche. Kodi vyevyo Yehova unafuna liye ira nyo muire vinatangani-avo badiziwa? Inde. (Vyo. 2:38) Eeno munokoza kala osimikiza ira vwela lamuloli kokami-a wanyo. Akala kamunazengeleze dja yodja yapama vinjinji, kodi viikala chifukwa iliyetene eneyo inauiri-eni ira muzengeleze badiziwa?

20. Kodi ninaza nitapanye n’ni mukhani yo-arela?

²⁰ Kodi munadedi-a n’ni? Anjinji kanokoza someda ira, “Kandinakozeye.” Likundo ti loi sakula ira muvipeleke wa Yehova koma teto badiziwa, chi khani yofuneya vinjinji va moywinyu. Eeno vanofuneela thawi, ganizela mosamala koma teto tindi ira mukale okozeya. Koma akala munafunechecha badiziwa, kodi munaire avi vathawi ila ira mukozeele? Ninoza nitapanye yosomeda ya yofuka enela mukhani yo-arela.