KHANI YOFUNJEDA 14
“Mweranga Eno, Etene Kanoza Kaiziwe Ira Muli Ofunjedanga”
“Mweranga eno, etene kanoza kaiziwe ira muli ofunjedanga, akala munawomeluwana.” — YOH. 13:35.
NYIMBO 106 Khalani Achikondi
VYEVYO NINAFUNJEDE IYO a
What has been the impact on many non-Witnesses as they observe the love among Jehovah’s people? (See paragraph 1)
1. Chin’ni eneyo inairi-a chidwi athu anjinji anayo kazile vamisonkano di-u? (Onani teto ithuzithuzi.)
YEREKEZELANI ira banja limo-i lidowa wu Nyumba ya Umwene dowa sonkana na Mboni da Yehova wa thawi yowambeela. Aluwa koosangalala vinjinji chifukwa yoona mwemo kaawacheleleathu koma teto chikondi eneyo abali na arongola kanatonyi-edanaathu. Vevo kanawelelaathu waniwa, mu-iyana unamuwandela mamunaeyo ira, ‘Ndiona ira a Mboni da Yehova mbo-iyana vinjinji na athu amo-i teto ndoosangalala sonkana nawo.’
2. Kodi amo-i kakumudwile chifukwa n’ni?
2 Chikondi eneyo ili vaari va Akiristu oona choiri-a chidwi vinjinji. Komave a Mboni da Yehova kai athu angwilo. (1 Yoh. 1:8) Eno vevo ninaambeela iyo aiziwa pama abali na arongoli-u, pavevo teto ninaambeela iyo iziwa vinjinji vyofooka viwa. (Arom. 3:23) Pivyovwi-a chisoni ira amo-i kookumudwa chifukwa ya vyolakwa vyaafwiwa.
3. Kodi chizindikilo ya o-arela oona a Yesu chin’ni? (Yohani 13:34, 35)
3 Kaganizelani teto lemba lelo linasogolela khanila. (Welengani Yohani 13:34, 35.) Kodi chizindikilo ya o-arela oona a Kiristu chin’ni? Chi chikondi, ookala ungwilo. Onani teto ira Yesu kaawongile ira: ‘Mweranga eno, nyo munoza muiziwe ira muli ofunjedanga.’ M’malo mwiwa eere: “Mweranga eno, etene kanoza kaiziwe ira muli ofunjedanga.” Eno Yesu ootonyi-eda ira masiki athu anayo katili mupingo wa Chikiristu kanoza kazindikile o-arelaye chifukwa kanotonyi-edana chikondi yookaana dyera.
4. Kodi athu amo-i kanafune iziwa n’ni vyokuza Akiristu oona?
4 Athu amo-i anayo kai a Mboni da Yehova kanokoza fuka ira: ‘Kodi chikondi inaiziwi-a avi o-arela oona a Yesu? Kodi Yesu aatonyi-edile avi chikondi anamarumiwaye? N’nga kodi vinawandeye avi ira nimusazi-edenga Yesu malambwano?’ Masiki teto iyo anayo nili a Mboni ninoira pama ganizela vyosomeda vya vyofuka vyevi. Panga vyevi unokoza nikami-a ira niwomeluwanenga vinjinji simbwasimbwa vevo nichimwelane iyo. — Aife. 5:2.
CHIFUKWA N’NI CHIKONDI ILI CHIZINDIKILO YA AKIRISTU OONA OKA?
5. Kodi mawu a Yesu a va Yohani 15:12, 13 kanatapulela n’ni?
5 Yesu oosambaula movweya pama ira o-arelaye kanoza kaiziweyenga na chikondi yavadela. (Welengani Yohani 15:12, 13.) Onani ira Yesu oolamula ira: “Muwomeluwane n’nga mwemo miyo teto ndiuwomeluweni miyo.” Kodi vyevi vinatapulela n’ni? N’nga mwemo Yesu asambaulele liye, ila chi chikondi yololela vuteela amo-i, eneyo inairi-a Mkiristu kala okozeya masiki mukhwela Mkiristu fwaye akala vanafuneele panga vyevyo. b
6. Kodi Mawu a Mulungu kanatonyi-eda avi ira chikondi chofuneya?
6 Mawu a Mulungu kanotonyi-eda ira chikondi chofuneya vinjinji. Va mavesi anayo athu anjinji kanaawomeluwanaathu, vanokala teto mavesi n’nga oyi: “Mulungu ngu chikondi.” (1 Yoh. 4: 8) “Umuwomeluwengana fwawo n’nga mwemo unaviwomeluwanawe weka.” (Mat. 22:39) “Chikondi inovu-elela machimo oinjiva.” (1 Pe. 4:8) “Chikondi kinamala.” (1 Akor. 13:8) Mavesi anala na amo-i kanafuneela kami-a uliwetene ona funeya wokaana ikalelo yoiri-a chidwila koma teto itonyi-eda.
7. Chifukwa n’ni Satana kanairi-e ira athu kakale ogwilizana koma teto katonyi-edanenga chikondi ya imbarimbari?
7 Athu anjinji kanofuka ira: ‘Kodi vinawandeye avi iziwa chipembezo yoona? Vipembezo vyetene vinoonga ira vinofunji-a imbarimbari, koma vinofunji-a vyo-iyana vakhani yokuza Mulungu.’ Satana ukwakwani-a sokoneza athu vogarati-a vipembezo vinjinji vyonama. Koma liye kanakwakwani-e garati-a gulu lavailambo yetene la Akiristu oomeluwana. Yehova eka ngonoyo unawande ira vyevi. Teto vi pivyovweya. Athu oka anayo Yehova uwadalisile liye koma teto ava-a muzimwaye mbanayo kanakaena chikondi ya imbarimbari vaari viwa. (1 Yoh. 4:7) Ndiye kodi pivyodabwi-a ira Yesu awongile ira o-arelaye oona kanoza kaiziweyenga na chikondi yookaana dyera?
8-9. Kodi athu amo-i kakuziwe avi voona chikondi eneyo a Mboni da Yehova kanatonyi-edanaathu?
8 Monga mwemo Yesu awongele liye, athu anjinji kookwakwani-a zindikila o-arelaye voona chikondi ya imbarimbari voona chikondi eneyo kanatonyi-edanaathu. Mofwanafwani-a, m’bali m’mo-i zina laye Ian unoumbuwelave sonkano owambeela onoyo afwanyeilewo liye, onoyo waireile m’bwalo la masika vakwikwi na waniwa. Ian ali angadowile dowa onela masika ubwalolo unga-alile medi dingasi ira sonkano uireye. Liye ere: “Vyevyo vyaireile va sonkanoyo na vathawi ya masikeyo vyali vyo-iyana vinjinji. A Mbonayo kali aulemu teto koowara pama koma teto a-imiwa kali a makalelo apama.” Liye oowenjedela ira: “Kwaranya vyetene, athwayo kaoneya okhutila koma teto ira kali vamurendele, vyevyo miyo teto ndafuna miyo. Kandinaumbuwela khani iliyetene eneyo yakambiwe vasonkanola, koma ndinoumbuwelave mwemo a Mbonala kairelaathu vyongo.” c Ninotonyi-eda makalelo anala chifukwa yoi ninowomeluna kumela vati vamurima. Voi ninowomeluwana abali na arongoli-u, ninowawomela murima koma teto ninowalemekeza.
9 M’bali m’mo-i zina laye John ooira teto chidwi vinjinji angadowile umisonkano da pingo wathawi yawambeela. Liye eere: “Kandana yoonga wona mwemo athwiwa kairelaathu vyongo momasuwa teto kakeda kala n’nga mbaathu angwilo. Ndoosimikiza ira ndifwanya chipembezo yoona chifukwa ya chikondi eneyo katonyi-edanaathu vaari viwa.” d Moweli-edaweli-eda vyoireya n’nga vyevi vikala vitonyi-edanga ira athu a Yehova mba Akiristu aimbarimbari.
10. Kodi pivathawi iivi vevo ninakaana iyo mwayi otonyi-eda ira ninowomeluwana abali-u? (Onani mawu a m’phedi.)
10 N’nga nisambaulele iyo umaambeelelo ule, kavali Mkiristu onoyo ngwangwilo. Thawi dimo-i abali-u kanoza onga kapena ira vyongo vyonikumudwi-a. e (Yak. 3:2) Vathawi n’nga enela ninokaana mwayi otonyi-eda ira ninowawomeluwana. Va khanila, kodi ninafunjede n’ni va isazo ya Yesu? — Yoh. 13:15.
KODI YESU ATONYI-EDE AVI IRA OOWOMELUWANA ANAMARUMIWAYE?
Jesus dealt lovingly with the apostles when they manifested undesirable traits (See paragraphs 11-13)
11. Kodi mba makalelo otakala aavi anayo Yakobo na Yohani katonyi-edeathu? (Onani teto ithuzithuzi.)
11 Yesu kaayembekezela ira o-arelaye kanongoira vyongo mo-olakwi-a iliyetene. M’malo mwiwa, mwachikondi liye oowakami-a iya makalelo otakala nayolinga yoi Yehova asangalalenganawo. Vathawi imo-i anamarumiwaye ambin’li, Yakobo na Yohani, koowandela am’miwa ira kamuvepe Yesu ira aze aava-e malo avadimu mu Umwene wa Mulungu. (Mat. 20:20, 21) Va Yakobo na Yohani kootonyi-eda nyada novikuza. — Miya. 16:18.
12. Kodi anayo katonyi-edile makalelo otakala kali Yakobo na Yohani ba-i? Sambaulani.
12 Yakobo na Yohani kai anamarumiwa oka anayo katonyi-edile makalelo otakala. Konani vyevyo anamarumiwa amo-iwayo teto kairileathu: “Ofunjeda 10 amo-iwale kangavwile vyevi, koolunduwa na alombwana ambin’li avaibalayo.” (Mat. 20:24) Mwina anamarumiwa amo-iwayo kookangana na Yakobo na Yohani. Mwina amo-i mwa aluwa kaonga ira: ‘Kodi nyo munaviona n’nga mbaani ira mufiye vovepa malo avadimu mu Umwene wa Mulungu? Iyo teto nino-inda chito mwatindi na Yesu koma teto nili ofwanelela mwayi wavadelola.’ Kaya vyongo vyali avi, likundo la imbarimbari ti loi anamarumiwala koolola ira vyevyo viiri-e ira ka-iye womeluwana vathawila.
13. Kodi Yesu airile n’ni va vyevyo anamarumiwaye kalakwi-aathu? (Mateyu 20:25-28)
13 Ndiye kodi Yesu airile n’ni vakhanila? Liye kaalunduwele. Kawongile ira unofwanya anamarumiwa amo-iwa apama, oviyevi-a vinjinji koma teto anayo kanatonyi-edanenga chikondi thawi detene. M’malo mwiwa, liye oowakami-a moleza murima chifukwa yoi aluwa koofunechecha ira vyofwanelela. (Welengani Mateyu 20:25-28.) Liye oopitiliza iranawo vyongo mwachikondi masiki ira enela kayali thawi yowambeela kapena yomari-a ira aluwa kakangane vakhani yoi ndimuwa mbaani vaari viwa. — Malik. 9:34; Luk. 22:24.
14. Kodi vyongo vyali avi vathawi eneyo anamarumiwa a Yesu kaulukulaathu?
14 Pivyookaiki-a ira Yesu ooganizela ikalelo eneyo anamarumiwayo kaulukuleleathu. (Yoh. 2:24, 25) Vevo aluwa kaulukulaathu, asogoleli a chipembezo kooiri-a athu onanga ira yofuneya vinjinji kutchuka koma teto kaana udindo. (Mat. 23:6; yerekezelani na khani yoi “Sunagoge Anali Malo Amene Yesu ndi Ophunzira Ake Ankakonda Kulalikira” eneyo ili mu Nsanja ya Olonda ya April 1, 2010 tsamba 16-18.) Asogoleli achipembezo a Chiyuda kooviona ira mbolungama vinjinji. f (Luk. 18:9-12) Yesu ooiziwa ira vyevi vyookoza kuza mwemo anamarumiwayo kavionelaathu koma teto kaonelaathu amo-i. (Miya. 19:11) Liye kaayembekezela ira aluwa kanongoira vyongo mo-olakwi-a iliyetene moi oowalezela murima kalakwi-a vyongo. Yesu ooiziwa ira aluwa kookaana mirima dapama, eno oowakami-a moleza murima ira ka-iye nyada koma teto vikuza, koma kakale achikondi.
KODI NINAMUSAZI-EDE AVI YESU?
15. Kodi ninafunjede n’ni vakhani yokuza Yakobo na Yohani?
15 Ninokoza funjeda vinjinji vakhani ya Yakobo na Yohani. Aliwa koolakwi-a vovepa malo avadimu mu Umwene. Anamarumiwa amo-iwayo teto koolakwi-a volola ira vyevi visokoneze mgwilizanwiwa. Komave Yesu ooira vyongo mooma murima koma teto mwachikondi na anamarumiwa 12 etene anayo. Kodi ninafunjedavo n’ni? Khani kinakala va vyevyo amo-i kanairaathu, koma inakala va vyevyo iyo ninairecha iyo amo-i kalakwi-a vyongo. Ndiye kodi chin’ni inanikami-e? Nakumudwa chifukwa ya vyevyo Mkiristu m’mo-i uirile liye ninokoza vifuka ira: ‘Chifukwa n’ni ndinadandaula na vyevyo uirile liye? Kodi vyevi vinatonyi-eda ira ndikaana ikalelo imo-iwene eneyo ndinafuneela miyo ichenja? Kodi mwina muthu onoyo undikumudwi-ilela unolimbanana vuto limo-iliwalene? Masiki ira vikala vifukwa vyovweya vyokumudwela, kodi nditonyi-ede chikondi ya imbarimbari vokeda nyalanyaza khaniyo?’ Nayesayesanga panga vyongo mwachikondi na amo-i, pavevo teto ninatonyi-eda iyo vinjinji ira nili o-arela oona a Yesu.
16. Kodi ninafunjede n’ni teto va isazo ya Yesu?
16 Isazo ya Yesu inonifunji-a teto ira niyesayesenga avwechecha Akiristu afwi-u. (Miya. 20:5) Pivyoona ira Yesu oowanda iziwa vyevyo vili m’murimani mwa muthu. Iyo kaninawande ira vyevyo. Komave ninokoza leza murima abali na arongoli-u kanikumudwi-a. (Aife. 4:1, 2; 1 Pe. 3:8) Ira vyevi kunakale worucha akala ninaaiziwa pama. Tiyemoni nione isazo.
17. Kodi oing’anela dela m’mo-i apindulile avi chifukwa yoyesayesa ira amuiziwe pama Mkiristu fwaye?
17 Oing’anela dela m’mo-i onoyo atumikelevo wu East Africa unoumbuwelave m’bali m’mo-i onoyo amuona liye ira kaali ooma murima. Ndiye kodi oing’anela deloyo airile n’ni? Liye eere: “M’malo momupewa, ndooganiza vyoi ndimuiziwe pama.” Vyevi vyoomukami-a oing’anela deloyo iziwa mwemo m’baliyo aleliwele liye koma teto mwemo vyevyo vyamukuzeleathu. Oing’anela deloyo oowenjedela ira: “Ndangavwechechile mwemo m’baliyo ayesayesele liye ira achenje vyongo va moywaye koma teto vyevyo ayesayesile liye panga ira agwilizanenga na abali na arongola ndooira naye chidwi, moi ookala fwanga wavamurima.” Eno nayesayesanga avwechecha abali na arongoli-u, vinakala vyo-orucha ira niawomeluwengana.
18. Kodi ninavifuke vyofuka vyiivi akala Mkiristu fwi-u unichimwele? (Miyambo 26:20)
18 Thawi dimo-i ninokoza ona ira pivyofuneya ira nitapanye na Mkiristu fwi-u onoyo unichimwele. Koma yowambeela ninoira pama vifuka vyofuka n’nga vi: ‘Kodi ndinoiziwa makundo etene okuza khanila?’ (Miya. 18:13) ‘Kodi mwina liye kandichimwele mwadala?’ (Nam. 7:20) ‘Kodi miyo teto ndoowambeela lakwi-avo mwandila enela?’ (Nam. 7:21, 22) ‘Akala ndinatapanye na liye, kodi ndinoiri-a ira khanila iulukule vinjinji m’malo moi imale?’ (Welengani Miyambo 26:20.) Vanduli voganizela vyofuka vyevi, ninokoza ona ira chifukwa yomuwomeluwana bali-uyo nikede nyalanyaza khaniyo.
19. Kodi muusimikiza panga n’ni?
19 Monga gulu, a Mboni da Yehova kanotonyi-eda ira mbofunjeda aimbarimbari a Yesu. Koma teto vaeki-u ninotonyi-eda ira nili wofunjeda waimbarimbari wa Yesu akala ninaawomeluwana abali na arongoli-u masiki ira kanolakwi-a vyongo vimo-i. Nairanga vyevi ninokami-a ira athu etene kazindikile chipembezo yoona koma teto ira naaluwene kaambeele lambela Yehova, onoyo ngu Mulungu wachikondi. Eno tiyemoni nikale osimikiza ira ninopitiliza tonyi-eda chikondi eneyo inaiziwi-a Akiristu oona.
NYIMBO 17 “Ndikufuna”
a Athu anjinji kanofunechecha funjeda imbarimbari chifukwa yoona chikondi yaimbarimbari vaari vi-u. Komave kanili angwilo, eno thawi dimo-i vinokoza kala vyonirucha ira niire vyongo mwachikondi na Akiristu afwi-u. Tiyemoni nitapanye chifukwa iwa chikondi ili yofuneya koma teto mwemo ninamusazi-edele iyo Yesu vakhani yoira vyongo na athu anayo kalakwi-ile vyongo vimo-i.
b Onani buku loi, “Bwera Ukhale Wotsatira Wanga,” muru 17, ndima 10-11.
c Onani khani yoi “Tsopano Ndinapeza Cholinga cha Moyo Wanga,” mu Nsanja ya Olonda ya November 1, 2012, tsamba 13-14.
d Onani khani yoi “Zinthu Zinkaoneka Ngati Zikundiyendera Bwino,” mu Nsanja ya Olonda ya May 1, 2012, tsamba 18-19.
e Khanila kinaonga vya machimo alukulualukulu anayo ninafuneela iyo aiziwi-a andimuwa, n’nga anayo karomoliwe va 1 Akorinto 6:9, 10.
f Lipoti limo-i lawongile ira vangavirile chaka doyeva, rabi m’mo-i awongile ira: “Mu ilambwela muli athu okwakwana 30 olungama n’nga Abulahamu. Akala kalivo 30, miyo na mwananga nili mugulu lelo, akala kalivo 10, miyo na mwananga nili mugulu lelo, akala kalivo 5, miyo na mwananga nili mugulu lelo, akala kalivo ambin’li, ndiye kuti ngu miyo na mwananga, koma akala ulivo m’mo-i, ngu miyo.”
