1. Kodi paradaizo wauzimu chin’ni, nanga ninafuneya kala osimikiza pangan’ni?

 MALAMBWANO vailambwela vikala paradaizo unoyo muli athu anjinji anayo katanganisiwe nopanga vyongo vyapama. M’paradaizola muli athu mamiliyoni anjinji anayo kali vamurendele weniweni. Athu anayo kali m’paradaizola katinafuna venyamo. Aliwa kanafuna ira athu amo-i teto anjinji kavolowemo. Unola-i ngu paradaizo wauzimu. a

2. Kodi yopangi-a chidwi na paradaizo wauzimu chin’ni?

² Pivyopangi-a chidwi ira Yehova ukoza paradaizo wabata unola muilambo ineyo Satana upangi-ile liye ira vakale idani koma teto vakale athu otakala na oopi-a. (1 Yoh. 5:19; Chiv. 12:12) Mulungwi-u wachikondi unoiziwa mavuto anayo kali muilambwela ndipo unoniteteza ira nipitilize mutumikela mosangalala. Mawaye kanofotokoza ira paradaizo wauzimu uli ngati “malo otawelawo” otetezeya koma teto uli ngati “dimba lo-eleliwa pama.” (Yes. 4:6; 58:11) Motandiziwa na Yehova, athu anayo kali m’paradaizola kanokala osangalala koma teto kanovivwa ira mbotetezeya m’malambo omari-a oruchala. — Yes. 54:14; 2 Tim. 3:1.

3. Kodi lemba la Yesaya 65 lakwakwaneli-ediwe avi muthawi ya Aizaraeli?

³ Yehova oofotokoza zela mwa Mneneri Yesaya mwemo moyo wa athu anayo kanaze kakale m’paradaizola unazeathu ukalele. Muchaputala 65, ya buku la Yesaya munokoza fwanyamo vyevyo afotokozile liye vyokuza paradaizo unola, vyevyo vyakwakwaneli-ediwe ulendo owambeela mu 537 B.C.E. Vathawi ineyo, Ayuda anayo kalapile koomasuliwa wu ukapolo ndipo koowelela waniwa. Yehova oodalisa athwae ndipo oowatandiza koza nawili mzinda wa Yerusalemu ira ukale oriya koma teto ira  kamange nawili kachisi unoyo ali likulu lolambela oona. — Yes. 51:11; Zek. 8:3.

4. Kodi lemba la Yesaya 65 linakwakwaneli-ediwa avi malambwano?

⁴ Kwakwaneli-ediwa wanambili wa ulosi wa Yesaya unola waambeele mu 1919 C.E. vevo atumiki a Yehova a malambwano kamasuliweathu uukapolo wa Babulo Mulukulu. Vanduli viwa paradaizo wauzimu oowambeela fala vailambo yetene. Olaleela Umwene atindi koogarati-a mipingo dinjinji ndipo kootonyi-eda makalelo apama. Alombwana na a-iyana anayo vowambeela kali achiwawa koma teto anayo katonyi-eda makalelo ngati avinyama, koowambeela “wara umuthu usha unoyo walengiwe mogwilizana na chifunilo ya Mulungu.” (Aife. 4:24) Pivyoona ira madaliso anjinji anayo Yehova afotokozile liye kanoza kakwakwaneli-ediwe usogolo muilambo isha. Komave panopa vikala madaliso anjinji anayo ninafwanya iyo. Tiyemoni nione mwemo ninapindulela iyo chifukwa yokala m’paradaizo wauzimu koma teto chifukwa iwa kaninafuneya kumamo.

MWEMO VYONGO VILILIATHU M’PARADAIZO WAUZIMU

5. Mogwilizana na lonjezo la va Yesaya 65:13, kodi pivyongo viivi vyevyo ninasangalalana iyo m’paradaizo wauzimu?

⁵ Athu kookaana thanzi koma teto kanosisimuliwa. Ulosi wa Yesaya unotonyi-eda ira vikala iyana ulukulu vaari va athu anayo kali m’paradaizo wauzimu na anayo katili m’paradaizo unola. (Welengani Yesaya 65:13.) Yehova unopeleka na murimae wetene wa atumikae vyetene vyevyo kanafuneyaathu ira kapitilize kalanae vausamwali. Unoniva-a zimu owela, Mawae koma teto yodja yauzimu yoinjiva nayolinga yoi nidjenga, . . . ning’wenga, . . . [koma teto] nisangalalenga.” (Erekezelani na Chivumbuluso 22:17.) Koma athu anayo kanakala unde wa paradaizo unola “kanokaana ndala . . . , kanokaana thona . . . , [koma teto] kanonyaswa.” Aliwa katinafwanya vyongo vyevyo vinaatandize kala vausamwali na Mulungu.— Amosi 8:11.

6. Kodi lemba la Yoweli 2:21-24 linaromola vyongo viivi vyevyo Yehova univa-ile liye, nanga vinanipinduli-a avi?

⁶ Mu ulosi unoyo Yoweli alembile liye, oo-indi-eda chito vyongo vyofuneya vamoyo monga tirigu, vinyu koma teto makura a maolivi vofuna tonyi-eda ira Yehova unopeleka na murima wetene wa athwae vyongo vyevyo kanafuneyaathu, tangani-avo yodja yauzimu. (Yow. 2:21-24) Liye unopanga vyevi zela m’Baibulo, mabuku ofotokoza Baibulo, saiti-u, misonkano da pingo, dadela koma teto dachigawo. Ninokoza dja yodja yauzimu inela dambo lililetene ndipo vyo-arelavo viwa pivyoi ninokala athanzi koma teto ninosisimuliwa.

7. Kodi chin’ni ineyo inanipangi-a ira nikale na “chimwemwe m’murimani”? (Yesaya 65:14)

⁷ Athu kanosangalala koma teto kanokala okutila. Athu a Mulungu “kanokuwa mosangalala” chifukwa yoyamikela vyevyo Yehova uwapangele liye. (Welengani Yesaya 65:14.) Ninokaana “chimwemwe m’murimani” chifukwa ya makundo olimbi-a iroromelo, malonjezo ofwanyeya m’Mawu a Mulungu koma teto chiyembekezo ineyo inawandeya chifukwa ya sembe ya dipo la Kiristu. Ninosangalala vinjinji nakambilananga vyevi na abali na arongoli-u. — Sal. 34:8; 133:1-3.

8. Kodi mbamakalelo ofuneya ambiili aavi anayo kanafwanyeya m’paradaizo wauzimu?

⁸ Chikondi na mgwilizano vaari va athu a Yehova mbamakalelo alukulu alukulu anayo kanafwanyeya m’paradaizo wauzimu. Mgwilizano unola unotonyi-eda mwemo moyo unazeathu ukalele muilambo isha, vevo atumiki a Yehova kanazeathu kakondanenga vinjinji koma teto gwilizana kwaranya panopa. (Akol. 3:14) Murongola m’mo-iwa oofotokoza vyevyo  aonile liye angagumanile na athu a Yehova ulendo owambeela. Liye aongile ira: “Ndali nda-anakalevo osangalala ngakale m’banja langa. Thawi ineyo ndaonile miyo athu katonyi-edananga chikondi pavevo ndagumanile miyo na a Mboni da Yehova.” Uliwetene unoyo unafuna kala osangalala koma teto okutira unafuneya volowa m’paradaizo wauzimu. Kaya athu kanaganiza vyoi avi vyokuza atumiki a Yehova, aliwa kookaana mbili yapama wa Yehovoyo koma teto wa athu etene anayo kanamulambela. — Yes. 65:15.

9. Kodi lemba la Yesaya 65:16, 17 linalonjeza n’ni vya mavuto anayo ninagumanana iyo?

⁹ Athwiwa kanokala o-otekeseya koma teto odekha. Lemba la Yesaya 65:14 linaonga ira anayo kanasakula kala unde wa paradaizo wauzimu, kanoula chifukwa yovoreiwa murima ndipo ‘kanoula mokuwa chifukwa yothweya murima.’ Koma bwanji vya vyongo vyetene vyevyo vinapangi-a ira athu a Mulungu kaonenga voreya koma teto vuteya? Chineneveva vyevi ‘vinodiwaleya [ndipo] vinoza vibiseye ira [Mulungu] kavione nawili.’ (Welengani Yesaya 65:16, 17.) Yehova unoza achose mavuto etene ndipo vavira thawi kaninaza niumbuwela nawili ululu uliwetene unoyo ninavwa iyo chifukwa ya mavuto.

10. Chifukwa n’ni ninayamikela kala na abali na arongoli-u? (Onani teto ithuzithuzi.)

¹⁰ Ngakale panopa mirima di-u dinokala m’malo nafwanyeya umisonkano wewo ninadiwala iyo mavuto anayo ninagumanana iyo muilambo yotakalela. Ninotandiza ira athu etene mupingo kakalenga o-otekeseya natonyi-edanga makalelo monga chikondi, chimwemwe, murendele, oma murima koma teto faasa, anayo kali makalelo anayo ninakaana iyo motandiziwa na zimu wa Mulungu. (Agal. 5:22, 23) Ngumwayi ulukulu kala mugulu la Mulungu. Athu etene anayo kanapitiliza kala m’paradaizo wauzimu kanoza kaone kwakwaneli-ediwa wa lonjezo la Mulungu lokuza “udimu usha na ilambo yavati isha.”

11. Mogwilizana na Yesaya 65:18, 19, kodi ninavwa avi naganizela vya paradaizo wauzimu unoyo Yehova anikozele liye?

¹¹ Athwiwa kanokala oyamikela. Yesaya oopitiliza fotokoza chifukwa iwa ninafuneya sangalala m’paradaizo wauzimu. Yehova ngunoyo ukozile paradaizola. (Welengani Yesaya 65:18, 19.) Chi chifukwa iwa unani-indi-eda chito ira nitandize athu ira kakume m’mabungwe a ilambwela anayo katinatandiza athu ira kakale vausamwali na liye, novolowa m’paradaizo wauzimu oriya unola. Ninosangalala chifukwa ya madaliso anayo ninafwanya iyo chifukwa okala  mu choonadi ndipo vi vinonilimbikisa ira niwandelenga amo-iwa vyokuza madaliso anala.— Yer. 31:12.

12. Kodi ninavwa avi chifukwa ya lonjezo la va Yesaya 65:20-24, nanga chifukwa n’ni?

¹² Ninoyamikela teto chiyembekezo ineyo nin’na iyo chifukwa yokala vausamwali wapama na Yehova ndipo ninokala osangalala. Kakedani ganizela vyevyo ninaze iyo nione koma teto panga muilambo isha ya Mulungu. Baibulo linolonjeza ira: “Kunaza ukala mwana mung’onong’ono unoyo unaze akale na moyo malambo oyeva oka kapena muthu wachikulile unoyo kanakwakwani-a chaka dedo muthu unafuneya liye kaana . . . Ninoza nimange nyumba nokalangamo, ndipo ninoza nizale maminda a mphesa nodja vipaso viwa.” Athu “katinaza ka-inda chito mwatindi vachabe” chifukwa “kanoza kadalisiwe na Yehova.” Liye unanilonjeza ira ninoza nikale na moyo wapama koma teto otetezeya. ‘Ka-anamuitane,’ Mulungu unoza aiziwe vyevyo uliwetene unafuneya liye ndipo ‘unoza akwakwaneli-ede vyolakalaka vya yamoyo iliyetene.’ — Yesaya 65:20-24; Sal. 145:16.

13. Kodi lemba la Yesaya 65:25, linafotokoza ira athu kanachenja avi kaambeela tumikela Yehova?

¹³ Athu kanokala mwamurendele koma teto motetezeya. Zimu wa Mulungu utandiza athu anjinji anayo vowambeela kan’na makalelo ngati a vinyama ira kachenje. (Welengani Yesaya 65:25.) Aliwa kooesaesa iya makalelo otakala anayo kan’naathu wale. (Aroma 12:2; Aife. 4:22-24) Komave athu a Mulungu kai angwilo, eno kanolakwi-ave vyongo vimo-i. Ngakale vili eno, Yehova unotandiza “athu amitundu detene” ira kakale ogwilizana ndipo vyo-arelavo viwa pivyoi kanokondana koma teto kali vamurendele. (Tito 2:11) Vi pivyodabwi-a vyevyo Mulungu unoyo uli wakopolo detene, unakwakwani-a liye panga.

14. Kodi vyevyo vyamuireele m’bali m’mo-iwa vyakwakwaneli-ede avi lemba la Yesaya 65:25?

¹⁴ Kodi vinokoza wandeya ira athu kachenje makalelo? Kaganizelani isazo ila. Wachinyamata m’mo-iwa vevo akwakwani-a liye chaka 20 ali angamangiwevo maulendo angasene ndipo oopanga makalelo otakala koma teto oopanga vyachiwawa. Ali angamangiwevo chifukwa yoba galimoto, kotola nyumba da athu koma teto palamula milandu dimo-i dilukulu dilukulu. Kaachedwa ambeeli-a kondo. Angavwile wathawi yowambeela vyokuza choonadi ya m’Baibulo, oowambeela fwanyeya vamisonkano da Mboni da Yehova. Oosimikiza ira ufwanya chifukwa yokalela na moyo, ineyo ili lambela Yehova m’paradaizo wauzimu. Angabadiziwe nokala wa Mboni da Yehova, thawi dinjinji ooganizela mwemo lemba la Yesaya 65:25 linamukuzelaathu. Liye oochenja kuma vokala wachiwawa ngati phodogoma fiya vokala muthu oomeliwa murendele ngati mwana wa khosa.

15. Chifukwa n’ni ninafuna aitana athu amo-iwa ira kavolowe m’paradaizo wauzimu, nanga ninapange avi vyevi?

¹⁵ Lemba la Yesaya 65:13, linaambeela na mawu oyi: “Yehova, Mbwiye Mulukulu uongile ira.” Vesi 25 linamari-a na mawu oyi “unaonga eno Yehova.” Vi vinotonyi-eda ira Mawae kanokwakwaneli-ediwa thawi detene. (Yes. 55:10, 11) Panopa paradaizo wauzimu ukalavo wale. Yehova ukoza ubali wavadela vinjinji. Athwae kanokala mwamurendele koma teto motetezeya ngakale ira kanakala muilambo yozaala na vyachiwawa. (Sal. 72:7) Va chifukwa inela, ninofuna tandiza athu anjinji mwemo ninawandele iyo ira kavolowe m’banja lauzimu leli. Ninokoza panga vyevi vo-inda chito yofunji-a athu.— Mat. 28:19, 20.

 VYEVYO NINAPANGE IYO IRA ATHU AMO-IWA KAVOLOWE M’PARADAIZO WAUZIMU

16. Chin’ni inatandize athu amo-iwa ira kavolowe m’paradaizo wauzimu?

¹⁶ Uliwetene wa iyo ukaana udindo otandiza athu ira kakopeyenga na paradaizo wauzimu. Ira niwande panga vyevi ninafuneya musazi-eda Yehova. Liye kanakanyi-eda athu ira kavolowe m’paradaizola, m’malomwiwa ‘unowakoka’ mwachikondi. (Yoh. 6:44; Yer. 31:3) Athu a mirima dapama anayo kafunjedile vya Yehova koma teto makalelwae apama kanowambeela kalanae vausamwali. Kodi ninapange avi ira makalelwi-u apama kakopenga athu amo-iwa ira kavolowe m’paradaizo wauzimu?

17. Kodi ninatandize avi athu amo-iwa ira kakopeyenga na paradaizo wauzimu?

¹⁷ Ndila imo-i ineyo inanitandize ira nikopenga athu amo-iwa ira kavolowe m’paradaizo wauzimu kukonda Akiristu afwi-u koma teto aomela murima. Athu asha kafiya vamisonkano da pingo ninafuna ira kavivwenga ngati mwemo kavivweleathu athu o-ororomela anayo kafiile vamisonkano wu Korinto. Aliwa kaongile ira: “Vyoona Mulungu uli vaari vinyu.” (1 Akor. 14:24, 25; Zek. 8:23) Eno ninafuneya pitiliza arela malangizo oyi ‘nikalenga mwamurendele vaari vi-u.” — 1 Ates. 5:13.

18. Kodi chin’ni inakope athu ira kavolowe mugulu li-u?

¹⁸ Thawi detene niesaesenga aona abali na arongoli-u ngati mwemo Yehova unaaonela liye. Ninokoza panga vyevi voona makalelwiwa apama anayo kan’naathu o-okala otakala, anayo vavira thawi kanowa-iya. Ninokoza mali-a semphana maganizo uliwetene mwachikondi ngati thawi detene “ninaomelana murima, tonyi-edana chifundo ilukulu koma teto kululukelana na murima wetene.” (Aife. 4:32) Ndiye athu anayo kanafuna pangeliwa vyongo  vyevi kanoza kakopeye novolowa m’paradaizo wauzimu. b

KAMUVENYEMO M’PARADAIZO WAUZIMU

19. (a) Mogwilizana na bokosi loi “ Oovenyamo, Vanduli Viwa Oowelelamo Nawili,” kodi amo-iwa kaongile n’ni kangawelele m’paradaizo wauzimu? (b) Kodi ninafuneya kala osimikiza panga n’ni? (Onani teto ithuzithuzi.)

¹⁹ Ninoyamikela vinjinji kala m’paradaizo wauzimu. Panopa paradaizola ngoriya vinjinji kwaranya wale ndipo mukala athu anjinji anayo kanalambela Yehova. Ninoza nipitilize muyamikela Yehova mpakana walewale chifukwa ya paradaizo unoyo unikozele liyola. Uliwetene unoyo unafuna kala na moyo wapama, sisimuliwa, kala olimba koma teto otetezeya unafuneya volowa m’paradaizola ndipo kanafuneya kumamo. Komave ninafuneya kala osamala chifukwa Satana unofunechecha nichosamo. (1 Pe. 5:8; Chiv. 12:9) Kanilole ira liye apange vyevyo. Tiyemoni nipange vyevyo ninawande iyo ira paradaizo wauzimula akaleve owela, oriya koma teto wamurendele.