KHANI YOFUNJEDA 14
NYIMBO 56 Inuyo Panokha Muzikonda Kwambiri Choonadi
“Niesaese Mwakama Ira Nikale Oulukula Mwauzimu”
“Tiyemoni niesaese mwakama ira nikale oulukula mwauzimu.”— AHEB. 6:1.
VYEVYO NINAFUNJEDE IYO
Mukhanila ninofunjeda mwemo Mkiristu oulukula mwauzimu unaganizela liye koma teto mwemo unapangela liye vyongo mogwilizana na vyevyo Mulungu unafuna liye ira asakulenga vyoira mwazelu.
1. Kodi Yehova unafuna ira nipangenga n’ni?
BALIWA wa mwana inakalecha imo-i mwa vyongo vyosangalasa vinjinji wa makolwae. Ngakale ira makolo kanomukonda vinjinji mwaniwa n’ng’onong’ono, katinafuna ira akedenga kalave eno mpakana walewale. Ndipo kanokoza dandaula vinjinji ngati mwaniwoyo kanaulukula. Mofwanafwana na vyevi, Yehova unosangalala naambeela mu-arela Yesu, koma liye kanafuna ira nikedenga kala a-ima mwauzimu. (1 Akor. 3:1) M’malomwiwa unafuna ira nikale ‘Akiristu alukulualukulu.’ — 1 Akor. 14:20.
2. Kodi ninakambilana n’ni mukhanila?
2 Kodi kala Mkiristu oulukula mwauzimu unatantauza n’ni? Kodi ninapange avi ira niulukule mwauzimu? Kodi yodja yotakuna chiyofuneya avi ira niulukule mwauzimu? Nanga chifukwa n’ni ninafuneya pewa vidalila? Mukhanila, ninokambilana mayankho a mafuso anala.
KODI KALA MKIRISTU OULUKULA MWAUZIMU UNATANTAUZA N’NI?
3. Kodi kala Mkiristu olimba unatantauza n’ni?
3 M’Baibulo, mawu Aigiriki anayo kamasuleliwe ira athu “alukulualukulu,” kanokoza tantauza teto athu “olimba mwauzimu.” a (1 Akor. 2:6) Mofwanafwana na mwana unoyo unapitiliza ulukula mpakana angakalile mulukulu, na-iyene ninafuneya pitiliza ulukula mwauzimu mpakana ningakalile Akiristu olimba. Koma ngakale ningafiile vevo, kaninafuneya iya dowa vasogolo. (1 Tim. 4:15) Mkiristu uliwetene ngakale n’ng’onong’ono unokoza kala olimba mwauzimu. Koma kodi chin’ni ineyo inatonyi-eda ira Mkiristu ngolimba mwauzimu?
4. Kodi ninamuiziwe avi Mkiristu olimba mwauzimu?
4 Mkiristu olimba mwauzimu uno-arela makundo etene a Mulungu ndipo kanera sakula vyongo vimo-i vyevyo unafuna liye arela. Pivyoona ira muthu unoyo kai wangwilo, unokoza lakwi-anga vyongo vimo-i. Koma dambo lililetene unoesaesa ira aganizelenga koma teto panga vyongo vyevyo Yehova unafuna liye. Liye unowara umuthu usha ndipo unoesaesa ira maganizwae kafwanafwanenga vinjinji na maganizo a Mulungu. (Aife. 4:22-24) Unovifunji-a ira asakulenga vyoira mwazelu vo-arela malamulo a Yehova na makundwae. Eno kanafuneya malamulo anjinji omuwandela vyoira. Asakulanga vyoira, unoesaesa ira akwakwaneli-ede vyevyo usakulile liyevyo. — 1 Akor. 9:26, 27.
5. Kodi Mkiristu unoyo kai olimba mwauzimu unagumane na mavuto aavi? (Aifeso 4:14, 15)
5 Koma muthu unoyo kanaulukula mwauzimu, unokoza roromelanga mo-orucha vyongo “vyachinyengo” koma teto “vyonama” vyevyo vinafalisiwa ndipo unokoza pusi-iwa na athu ampatuko. b (Welengani Aifeso 4:14, 15.) Liye unokoza apangelanga sanje athu amo-iwa, kangananawo, kapena lunduwa mombaraanya ndipo thawi dinjinji, unokoza panga vyongo vyotakala ngati ugumanile na chiyeso.— 1 Akor. 3:3.
6. Kodi ulukula mwauzimu ninaerekezele nan’ni? (Onani teto ithuzithuzi.)
6 Monga mwemo niongele iyo wale, Malemba kanoerekezela ulukula mwauzimu na mwemo mwana unaulukulela liye nokala muthu mulukulu. Mwana kanaiziwa vyongo vinjinji eno vanafuneya muthu mulukulu ira amusogolelenga koma teto amutetezenga. Mwaisazo, muzimai unokoza mu-inda muwono mwanae n’ng’onong’ono ira alupe sewu. Koma mwanole aulukula, muzimaiyo unokoza mulola ira alupe ekave sewu, koma unomuumbucha ira aing’anenga mbali detene a-analupe. Ndiye mwanoyo aulukula unopewa vyongo ngati vyevi vaekave. Mofwanafwana na mwana unoyo unafuneya muthu mulukulu ira amutandizenga pewa vyongo vyoopi-a, Akiristu anayo kai olimba mwauzimu kanafuneya Akiristu olimba mwauzimu ira kaatandizenga pewa vyongo vyevyo vinaononge usamwaliwa na Yehova koma teto ira kasakulenga vyoira mwazelu. Koma mo-iyana na vyevi, Mkiristu olimba mwauzimu afuna sakula vyoira, unoganizela makundo a m’Baibulo ira aiziwe maganizo a Yehova vakhaniyo ndipo unopanga vyongo mofwanelela.
Akiristu anayo kali o-olimba mwauzimu kanafuneya funjeda indi-eda chito makundo a m’Baibulo ira kasakulenga vyoira mwazelu (Onani ndima 6)
7. Kodi Akiristu olimba mwauzimu kanofuneya tandiziwa na athu amo-iwa?
7 Kodi vyevi vinatantauza ira Mkiristu olimba mwauzimu kanafuneya tandiziwa na muthu uliwetene? Naari. Thawi dimo-i athu olimba mwauzimu kanofuneya teto tandiziwa. Khani chiyoi muthu o-oulukula mwauzimu unokoza embekezelanga ira athu amo-iwa kamuwandelenga vyoira kapena musakulela vyoira vakhani dedo unafuneya liye sakula ekave. Koma Mkiristu olimba mwauzimu avepa athu amo-iwa azelu kapena oiziwa vyongo vinjinji ira kamutandize, unoiziwa ira udindo osakula vyoira ngwae chifukwa uliwetene unafuneya “tukula katundwae.” — Agal. 6:5.
8. Kodi Akiristu olimba mwauzimu kana-iyana mundila diivi?
8 Athu alukulualukulu kanooneya mo-iyana. Mofwanafwana na vyevi, Akiristu olimba mwauzimu kano-iyana vakhani ya makalelo monga zelu, limba murima, va-a koma teto ganizela athu amo-iwa. Enjedela vevo, Akiristu ambiili olimba mwauzimu kagumana na vyongo vyofwanafwana kanokoza sakula vyongo vyo-iyana koma vyongo vyetene vingali vyogwilizana na makundo a m’Malemba. Vyevi vinoireya makamaka vakhani dokuza chikumbumtima. Chifukwa ya likundo leli, aliwa katinaweluza athu amo-iwa kaona ira koosakula mo-iyana. Ineyo kanafunaathu vinjinji kukalave ogwilizana. — Arom. 14:10; 1 Akor. 1:10.
KODI NINAPANGE AVI IRA NIKALE OULUKULA MWAUZIMU?
9. Kodi ulukula mwauzimu unakedecha ireya vaekiwa? Fotokozani.
9 Vavira thawi, mwana unoulukula ndipo unokala muthu mulukulu, koma ulukula mwauzimu kunaireya vaekiwa. Isazo pivyevyo vyaaireele abali awu Korinto. Aliwa koowachela uthenga wapama, koobadiziwa, koowachela zimu owela ndipo koofunjeda vinjinji kumela wu malangizo a mtumwi Paulo. (Vyo. 18:8-11) Komave ngakale ira vali vangavirile chaka dinjinji kumela vevo kabadiziweathu, anjinji kali ka-anaulukuleve mwauzimu. (1 Akor. 3:2) Kodi ninapange avi ira vyongo ngati vyevi kaviniireele?
10. Kodi ninapange avi ira nikale oulukula mwauzimu? (Yuda 20)
10 Ira nifiye voulukula mwauzimu, yowambeela ninafuneya kaana murima ofuna kala olimba mwauzimu. Athu anayo kanasakula kala “o-oiziwa vyongo” koma teto pitilizangave kala a-ima mwauzimu, katinadowa vasogolo. (Miya. 1:22) Kaninafuna ira nikale ngati athu alukulualukulu anayo kanadalilave makolwiwa ira kaasakulelenga vyoira. M’malomwiwa ninoonechecha ira ninopitilizave ulukula mwauzimu. (Welengani Yuda 20.) Ngati munapanga khama ira muulukule mwauzimu, mumuvepenga Yehova ira auva-eni “murima ofuna panga vyongo vyevyo unafuna liye koma teto kopolo dopangela vyongovyo.” — Afil. 2:13.
11. Kodi pivyongo viivi vyevyo Yehova univa-ile liye ira vinitandize ulukula mwauzimu? (Aifeso 4:11-13)
11 Yehova kanaembekezela ira ninerenga ulukula eki-u mwauzimu. Eno univa-a abusa na aphunzisi mupingo, anayo kafunji-iwe pama ira kanitandizenga nayolinga yoi nikale ‘achikulile’ mwauzimu mpakana fiya “va usinkhu wa muthu mulukulu ngati mwemo Kiristu alili liye.” (Welengani Aifeso 4:11-13.) Yehova unoniva-a teto zimu owela ira unitandizenga kala na “maganizo a Kiristu.” (1 Akor. 2:14-16) Koma teto Mulungu ooawandela athu ira kalembe mabuku 4 a Uthenga Wapama ira anitonyi-ede mwemo Yesu apangela liye vyongo angali vailambo yavati, mwemo aganizela liye koma teto mwemo aongela liye. Nasazi-edanga mwemo Yesu aganizela liye koma teto mwemo apangela liye vyongo, ninokala Akiristu olimba mwauzimu.
MWEMO YODJA YOTAKUNA INANITANDIZELEATHU
12. Kodi “makundo owambeela okuza Kiristu” mbaavi?
12 Ira niulukule mwauzimu, ninafuneya funjeda vinjinji o-okala “makundo owambeela okuza Kiristu oka.” Isazo ya makundo owambeela inela chi chiphunziso yokuza lapa, iroromelo, ubadizo novenyi-iwa wa athu okhwa. (Aheb. 6:1, 2) Anala mbamakundo amo-i owambeela anayo Akiristu kanaaroromelaathu. Chi chifukwa iwa mtumwi Paulo afotokozile makundo anala vevo alaleela liye gulu lelo lasonkanile va Pentekoste. (Vyo. 2:32-35, 38) Ninafuneya somedela makundo owambeelela anala ira nikale ofunjeda a Kiristu. Mwaisazo, mtumwi Paulo oochenjeza ira muthu uliwetene unoyo unakoonda chiphunziso yovenyi-iwa wa athu okhwa ukoonda vyongo vyetene vyevyo Akiristu kanaroromelaathu. (1 Akor. 15:12-14) Koma kaninafuneya kala okutila na makundo owambeela oka a choonadi.
13. Kodi ninapange avi ira nipindulenga na yodja yotakuna yoromoliwa va Aheberi 5:14? (Onani teto ithuzithuzi.)
13 Mo-iyana na makundo owambeela, yodja yotakuna inotangani-avo malamulo a Yehova koma teto makundwae anayo kananitandiza ira nivwecheche maganizwae. Ira nipindule na yodja inela ninafuneya funjeda Mawu a Mulungu, aganizela modii-a koma teto a-indi-eda chito vamoywi-u. Napanganga vyevi ninoza nisakulenga vyongo vyevyo vinamusangalase Yehova. c — Welengani Aheberi 5:14.
Yodja yotakuna inonitandiza ira nisakulenga panga vyongo vyevyo vinasangalasa Yehova (Onani ndima 13) d
14. Kodi Paulo aatandizile avi Akiristu awu Korinto ira kaulukule mwauzimu?
14 Akiristu anayo katinaulukula mwauzimu kanovuteya sakula vyoira vaireya khani ineyo inafuneya ganizela makundo a m’Baibulo nowa-arela. Athu amo-iwa kanaganiza ira ngati kavali lamulo la m’Baibulo vakhani imo-iwene ndiye kuti kanokoza panga vilivyetene vyevyo kanafunaathu. Amo-iwa kanafuna ira kava-iwe lamulo vakhani dedo kavali lamulo. Mwaisazo, vinaoneya ira Akiristu awu Korinto kafuna ira Paulo aa-elele lamulo vakhani ya yodja ineyo yapelekiwa wa mafano. M’malo mokeda awandela vyoira Paulo oowafotokozela ira uliwetene ukaana ‘ufulu osakula’ mogwilizana na chikumbumtima yae. Liye ookambilana nawo makundo anayo kanatandize ira chikumbumtima ya muthu uliwetene kimuvuti-enga koma teto kakumudwi-enga athu amo-iwa. (1 Akor. 8:4, 7-9) Eno Paulo ootandiza Akiristu awu Korinto ira kaulukule mwauzimu nayolinga yoi ka-indi-edenga chito luso liwa loganiza m’malo modalila athu amo-iwa kapena ira vakhani iliyetene vakale lamulo.
15. Kodi Paulo aatandizile avi Akiristu a Chiheberi ira kaulukule mwauzimu?
15 Ninofunjeda teto likundo limo-iliwa lofuneya va mawu anayo Paulo alembele liye Akiristu a Chiheberi. Amo-iwa mwa Akiristu anala katapitilizile ulukula mwauzimu. Aliwa ‘koowambeela nawili funa mkaka m’malo mwa yodja [yauzimu] yotakuna.’ (Aheb. 5:12) Aliwa katafunjedile koma teto somedela makundo asha anayo Yehova aafunji-a liye zela mupingo. (Miya. 4:18) Mwaisazo, Akiristu anjinji a Chiyuda koolimbikisave Chilamulo ya Mose ngakale ira Chilamulweyo yali ingamali-iwe chaka 30 mundulimu chifukwa ya nsembe ya Kiristu. (Arom. 10:4; Tito 1:10) Chaka 30 dali dokwakwanela ira Akiristu kavwecheche likundo loi katinafuneya arela Chilamulo. Uliwetene unoyo unawelenge kalata ineyo Paulo alembele liye Akiristu a Chiheberi unokoza somedela ira m’bukuli mukala yodja yauzimu yotakuna. Makundo anala mbanayo aliwa kafuneyaathu ira kaaroromelenga ira ndila yolambelela ya Akiristu chiyapama. Koowatandiza teto ira kalaleelenga molimba murima ngakale ira kooruni-iwa na Ayuda. — Aheb. 10:19-23.
MUPEWENGA VIDALILA
16. Enjedela voulukula mwauzimu kodi ninafuneya teto panga n’ni?
16 Kanikedenga esaesa ira niulukule mwauzimu koma niesaesenga teto ira nikaleve oulukula mwauzimu. Ira vyevi viwandeye ninafuneya pewa vidalila. (1 Akor. 10:12) Ninafuneya “pitiliza vifufuza” ira nione ngati ninadowave vasogolo. — 2 Akor. 13:5.
17. Kodi kalata ineyo Paulo alembele liye Akiristu awu Kolose inatonyi-eda avi funeya opitilizave kala olimba mwauzimu?
17 Mukalatae yodowa wa Akiristu awu Kolose, Paulo oosindika funeya okalave olimba mwauzimu. Ngakale ira aliwa kali oulukula wale mwauzimu, Paulo oowachenjeza ira katipusi-iwe na zelu da athu. (Akol. 2:6-10) Epafura, unoyo vinaoneya ira oowaiziwa pama athu a mupingomo, oowapempelela thawi detene ira “kapitilize kala olimba mwauzimu.” (Akol. 4:12) Kodi ninafunjedavo n’ni? Paulo na Epafura kooiziwa ira vanafuneya khama koma teto tandiziwa na Mulungu ira kakaleve olimba mwauzimu. Aliwa kafuna ira Akiristu awu Kolose kakaleve olimba mwauzimu ngakale ira koogumana na mavuto.
18. Kodi chin’ni inamuireele Mkiristu olimba mwauzimu? (Onani teto ithuzithuzi.)
18 Paulo oochenjeza Akiristu a Chiheberi ira muthu olimba mwauzimu unokoza sokoneza usamwalae na Mulungu. Ngati Mkiristuyo unakaleve wamakani kanalape ira Mulungu amukululukele. Vyosangalasa pivyoi Akiristu a Chiheberi katafiile vevo. (Aheb. 6:4-9) Nanga bwanji vya athu anayo kafookile malambwano, kapena anayo kachosiwe koma vanduliviwa koolapa? Lapa koma teto viyevi-a uwa vinotonyi-eda ira aliwa katili ngati athu anayo Paulo aafotokozile liye ira kanokoza sokoneza usamwaliwa na Yehova. Komave athwayo kawelela wa Yehova kanafuneya tandiziwa. (Ezek. 34:15, 16) Andimuwa kanokoza panga vyoi Mkiristu oiziwa vinjinji aatandize ira kafwanye nawili kopolo mwauzimu.
Yehova unotandiza athu anayo kanafuna fwanya nawili kopolo mwauzimu (Onani ndima 18)
19. Kodi ninafuneya kaana yolinga yoi avi?
19 Ngati munaesaesa ira mukale Mkiristu olimba mwauzimu, munokoza kwakwaneli-eda vyolinga vinyuvyo. Pitilizani dja yodja yotakuna koma teto esaesa ira maganizwinyu kafwanafwanenga vinjinji na maganizo a Yehova. Ngati muli Mkiristu olimba mwauzimu, esaesani ira mukaleve eno mpakana walewale.
KODI MUNASOMEDE AVI?
-
Kodi ulukula mwauzimu unatantauza n’ni?
-
Kodi ninapange avi ira nikale Akiristu oulukula mwauzimu?
-
Chifukwa n’ni ninafuneya pewa vidalila?
NYIMBO 65 Pita Patsogolo!
a Ngakale ira m’Malemba a Chiheberi mawu oyi “olimba” kapena “o-olimba” katinafwanyeyamo, likundoliwa linofwanyeyamo. Mwaisazo, buku la Miyambo lino-iyani-a muthu unoyo uli mung’onong’ono koma teto o-oiziwa vyongo na muthu wazelu unoyo uli ovwechecha vyongo. — Miya. 1:4, 5.
b Onani khani yoi “Samalani Ira Kamupusi-iwe na Khani Donama” va gawo loi “Khani Dimo-i” va jw.org na va JW Library.®
c Onani khani yoi “Vyoi Ndifunjede” m’magazinila.
d MAWU OFOTOKOZELA ITHUZITHUZI: M’bali una-indi-eda chito makundo anayo ufunjedile liye m’Mawu a Mulungu vosakula vyoira.
