THAWI dimo-i olemba Baibulo kooweli-eda ndendende mawu amo-ive anayo. Tiyemoni nione makundo maralu anayo kapangi-a ira kapange vyevi.

Thawi ineyo vyongovyo vyalembiweathu. Muthawi ya Aizaraeli, athu anjinji katan’na mabuku ewaewa a Chilamulo. Kakeda vuruwana Chilamulo yawelengiwanga kasonkana wu chihema. (Doto. 31:10-12) Pivyovaela oneya ira vookala vyongo vyosokoneza kavuruwananga kangaimelile wa maola angasene vagulu lilukulu. (Neh. 8:2, 3, 7) Vathawi dedi, weli-eda mawu wali wofuneya vinjinji chifukwa wootandiza athwayo ira kaumbuwelenga mo-orucha malemba koma teto a-indi-edanga chito. Koma teto weli-eda mawu woowatandiza ira kaumbuwelenga makundo etene okuza malamulo anayo Mulungu aava-ile liye.— Lev. 18:4-22; Doto. 5:1.

Mwemo vyalembiweleathu. Mabuku amo-iwa m’Baibulo kalembiwe ngati nyimbo, mwaisazo buku la Masalimo, Nyimbo ya Solomo koma teto buku la Malilo. Thawi dimo-i mawu a nyimbo kooweli-ediwa vofuna sindikiza muru wa nyimbweyo koma teto tandiza ovuruwana ira kaloweze mawuwa. Isazo mba mawu ofwanyeya valemba la Salimo 115:9-11, vevo vanaonga ira: “Aizaraeli nyo, roromelani Yehova, liye ngunoyo unautandizani koma teto chi ishango inyu. Nyo anyumba ya Aroni, roromelani Yehova, liye ngunoyo unautandizani koma teto chi ishango inyu. Nyo anayo munaova Yehova, roromelani Yehova, liye ngunoyo unautandizani koma teto chi ishango inyu.” Kodi muona mwemo weli-eda mawala watandizeleathu oimbayo, ira makundo antengo wavadimu achoonadi anala kagarateye m’mirimani mwiwa?

Ira kasindikize makundo ofuneya. Thawi dimo-i olemba Baibulo kooweli-eda mawu ofuneya. Mwaisazo, Yehova angalamulile Aizaraeli ira katidjenga magazi, oomuwandela Mose ira aweli-ede maulendo angasene chifukwa iwa katinafuneya dja magazi. Mulungu afuna asindikize ira moyo wa yamoyo iliyetene uli m’magazi, kapena ira magazi kanaimelela moyo. (Lev. 17:11, 14 Vanduli viwa, vevo atumwi na andimuwa wu Yerusalemu karomolaathu vyongo vyofuneya pewa ira muthu asangalase Mulungu, kooweli-eda eto nawili funeya wopewa magazi. — Vyo. 15:20, 29.

Yehova kanakeda funa ira nikale na chizolowezi yokedanga weli-eda weli-eda mawu a m’Baibulo. Mwaisazo, Yesu aongile ira: “Wapempelanga kuongenga mawu amo-ive anayo moweli-eda weli-eda.” (Mat. 6:7) Vanduli viwa ooromola vyongo vyevyo ninafuneya iyo pempelela, vyevyo pivyogwilizana na chifuniro ya Mulungu. (Mat. 6:9-13) Eno ngakale ira kaninafuneya weli-eda weli-eda mawu m’mapempelwi-u, pivyololeya pempelela khani imo-iwa moweli-eda weli-eda. — Mat. 7:7-11.

Vachifukwa yapama Mulungu oolola ira mawu kapena viganizo vimo-iviwa vyene m’Baibulo viweli-ediwe. Inela chindila imo-i ineyo Mulangizi-u Mulukulu unanifunji-ela liye ira vyongo viniendele pama. — Yes. 48:17, 18.