1. Pelekani isazo yotonyi-eda chifukwa iwa ninafuneya mu-arela Yehova, unoyo uli Onisogolela.

 KAEREKEZELANI ira mu-olowa munkhalango. Munkhalangomo mukala vyongo vinjinji vyoopi-a monga vinyama vyolusa, vilombo ving’onong’ono vyoi vinokoza uva-ani marenda, vyomela vyapoizoni koma teto mazenje oyi munokoza gwelamo. Munokoza yamikela vinjinji ngati munakale na muthu ousogolelani unoyo unaiziwa pama malo etene anayo nayolinga yoi mupewe vyongo vyoopi-avi. Ilambwela ili ngati nkhalango inela. Mukala vyongo vinjinji vyoopi-a vyevyo vinasokoneze usamwali-u na Yehova. Koma nikaana Onisogolela wapama, unoyo uli Yehova. Liye unonisogolela ira nivire mundila yapama mpakana nafiye wewo ninadowa iyo, wewo uli muilambo isha, mwemo ninaze iyo niwachele moyo o-omala.

2. Kodi Yehova unanisogolela avi?

² Kodi Yehova unanisogolela avi? Ndila ilukulu unanisogolela zela m’Mawae Baibulo. Koma teto liye uno-indi-eda chito athu. Mwaisazo, uno-indi-eda chito “kapolo ororomeleya na wazelu” unoyo unaniva-a yodja yauzimu ineyo inanitandiza ira nisakulenga vyoira mwazelu. (Mat. 24:45) Yehova uno-indi-eda chito teto alombwana amo-iwa ofwanelela ira kanisogolelenga. Oing’anela madela koma teto andimuwa mupingo, kanonilimbikisa koma teto niva-a malangizo anayo kananitandiza vilela muthawi yoruchela. Ninomuyamikela vinjinji Yehova chifukwa yoi unoniva-a malangizo odalileya m’malambo omari-ala. Malangizwala kanonitandiza ira nipangenga vyevyo unasangalalana liye koma teto ira nipitilize enda vandila yodowa umoyo o-omala.

3. Kodi ninakambilana n’ni mukhanila?

³ Komave, thawi dimo-i vinokoza niruchanga ira ni-arele malangizo a Yehova, makamaka kapelekiwanga na athu oyi kai angwilo. Chifukwan’ni? Chfukwa mwina malangizwayo katinagwilizane  na vyongo vyevyo ninaviomeliwana iyo. Kapena teto ninokoza onanga ira malangizwayo kai azelu ndipo ninokoza ganizanga ira katikumele wa Yehova. Vathawi ngati inela, ninafuneya roromela vinjinji ira Yehova ngunoyo unasogolela athwae koma teto ira arela malangizwayo unokoza pangi-a ira nifwanye madaliso. Vofuna nitandiza ira nidalilenga vinjinji madaliso a Yehova, khanila inofotokoza (1) mwemo Yehova aasogolelela liye athwae wale, (2) mwemo unanisogolelela liye malambwano, koma teto (3) madaliso anayo ninafwanya iyo na-arelanga malangizwae thawi detene.

MWEMO YEHOVA AASOGOLELELA LIYE AIZARAELI

4-5. Kodi Yehova atonyi-edile avi ira oomu-indi-eda chito Mose vosogolela Aizaraeli? (Onani ithuzithuzi yavatakuru lowambeela.)

⁴ Yehova oomusakula Mose ira asogolele Aizaraeli vokuma wu Iguputo. Ndipo liye oowava-a umboni ooneya pama, otonyi-eda ira liye ngunoyo aasogolela vomu-indi-eda chito Mose. Mwaisazo, tana oowasogolela vo-indi-eda chito chipilala ya murambo ndipo ma-iyu oowasogolela vo-indi-eda chito chipilala ya mulo. (Ekis. 13:21) Mose oo-arela chipilaleyo ineyo yamusogolele liye na Aizaraeli ira kadowe kafiye wu Nyanja Yofiila. Athwayo kookaana mantha vinjinji voganiza ira kanosauwela ovolowela chifukwa usogolo uwa wali nyanja ndipo unduli uwa wali asilikali a Iguputo. Aliwa kaganiza ira Mose oolakwi-a vowazi-a wu Nyanja Yofiila. Koma kaalakwi-ile. Yehova ngunoyo aasogolela athwayo vomu-indi-eda chito Mose. (Ekis. 14:2) Vanduli viwa liye oowavulumucha mundila yodabwi-a vinjinji.— Ekis. 14:26-28.

⁵ Va chaka 40 do-arela, Mose oopitiliza dalila chipilala ya murambo vosogolela athu a Mulungu muchipululu. a Wathawi yoyeva, Yehova oopangi-a ira chipilala ya murambo iimele vadimu va chihema ya Mose, Aizaraeli etene kaonanga. (Ekis. 33:7, 9, 10) Yehova oowongi-ana na Mose zela muchipilaleyo ndipo Mose oopeleka malangizo a Yehovayo wa athu. (Sal. 99:7) Aizaraeli kookaana umboni okwakwanela otonyi-eda ira Yehova oomu-indi-eda chito Mose vowasogolela.

6. Kodi Aizaraeli anjinji kapangile n’ni vevo Yehova aasogolela liye? (Numeri 14:2, 10, 11)

⁶ Pivyovwi-a chisoni ira Aizaraeli anjinji katasomedele umboni oyi Yehova oomu-indi-eda chito Mose ngati omuimelela. (Welengani Numeri 14:2, 10, 11.) Moweli-edaweli-eda, aliwa kookoonda somedela vyoi Mose arumiwe na Yehova. Vachifukwa inela, Yehova kaalolile ira Aizaraeli anala kadowe kavolowe Muilambo Yolonjeziwa.— Num. 14:30.

7. Romolani visazo vya athu anayo ka-arele malangizo a Yehova. (Numeri 14:24) (Onani teto ithuzithuzi.)

⁷ Komave, vookala Aizaraeli amo-iwa anayo ka-arela malangizo a Yehova. Mwaisazo, thawi imo-iwa Yehova aongile ira: “Kalebe . . . ukala andi-arelanga na murima wetene.” (Welengani Numeri 14:24.) Mulungu oomudalisa Kalebe ndipo angafiile muilambo ya Kanani, oomulola ira asakule dela lelo unafuna liye kala. (Yos. 14:12-14) Aizaraeli anayo kaloliwe volowa Muilambo Yolonjeziwayo, koopeleka isazo yapama vo-arela malangizo a Yehova. Vevo Yoswa asakuliwe liye ira avolowe m’malo mwa Mose, ira aasogolelenga, aliwa ‘koomulemekeza vinjinji m’malambo etene a moywae.’ (Yos. 4:14) Vyo-arelavo viwa vyali vyoi, Yehova oowadalisa vowava-a ilambo ineyo aalonjezile liye. — Yos. 21:43, 44.

8. Fotokozani mwemo Yehova asogolelela liye athwae muthawi ya mamwene. (Onani teto ithuzithuzi.)

⁸ Vangavirile chaka dinjinji, Yehova oosakula oweluza ira kasogolelenga athwae. Vanduli viwa, muthawi ya mamwene, Yehova oosakula aneneri ira kapelekenga malangizo wa athwae. Mamwene ororomeleyala koo-arela malangizo a aneneri  anala. Mwaisazo, Davide oovwela moviyevi-a angazuzuliwe na mneneri Natani. (2 Sam. 12:7, 13; 1 Lim. 17:3, 4) Mwene Yehosafati oororomela malangizo a mneneri Yahaziyeli ndipo oowalimbikisa athu a wu Yuda ira ‘karoromelenga aneneri a [Mulungu].’ (2 Lim. 20:14, 15, 20) Mwene Hezekiya angamaliwe zelu, oovepa malangizo wa mneneri Yesaya. (Yes. 37:1-6) Thawi detene mamwene ka-arelanga malangizo a Yehova, koodalisiwa ndipo tundu wetene wookala wotetezeya. (2 Lim. 20:29, 30; 32:22) Veva uliwetene oowanda ona ira Yehova uno-indi-eda chito anenerayo vosogolela athwae. Komave mamwene anjinji koma teto athu amo-iwa katavwela aneneri a Yehova. — Yer. 35:12-15.

MWEMO YEHOVA AASOGOLELELA LIYE ATHWAE MUTHAWI YA ATUMWI

9. Kodi Yehova amusakulile mbaani ira asogolelenga Akiristu muthawi ya atumwi? (Onani teto ithuzithuzi.)

⁹ Va Pentekosite wa mu 33 C.E., Yehova oogarati-a pingo Waikiristu. Kodi aasogolela avi Akiristu anala? Liye oomusakula Yesu ira akale muru wa pingo. (Aife. 5:23) Koma Yesu kaakeda sogolela ofunjeda uliwetene vaekave. M’malomwiwa, liye oo-indi-eda chito atumwi na andimuwa wu Yerusalemu ira kasogolelenga mipingo. (Vyo. 15:1, 2) Voosakuliwa teto andimuwa ira kasogolelenga mipingo. — 1 Ates. 5:12; Tito 1:5.

10. (a) Kodi Akiristu anjinji amuthawi ya atumwi kapanga avi kava-iwa malangizo? (Vyoira 15:30, 31) (b) Chifukwa n’ni wale athu amo-iwa katavwela athu anayo Yehova aa-indi-eda liye chito? (Onani bokosi loi “ Chifukwa Iwa Athu Amo-iwa Kanakoonda Somedela.”)

¹⁰ Kodi Akiristu amuthawi ya atumwi koo-arela malangizo? Anjinji koovwela koma teto arela malangizo. Ndipo ‘koosangalala chifukwa ya mawu olimbikisa’ anayo kawachelaathu. (Welengani Vyoira 15:30, 31.) Ndiye kodi Yehova unasogolela avi athwae malambwano?

MWEMO YEHOVA UNANISOGOLELELA LIYE MALAMBWANO

11. Pelekani isazo yotonyi-eda mwemo Yehova ukalile liye atandizelanga athu omuimelela malambwano.

¹¹ Yehova unopitiliza sogolela athwae malambwano. Liye unopanga vyevi vo-indi-eda chito Mawae koma teto Mwanae, unoyo uli muru wa pingo. Kodi vikala umboni wotonyi-eda ira malambwano, Yehova uno-indi-eda chito athu omuimelela? Inde. Mwaisazo, kaganizelani vyevyo vyaireile muchaka dam’ma 1800. Charles Taze Russell na afwae koowambeela zindikila ira chaka ya 1914 inaza ikala yofuneya chifukwa chithawi  ineyo Umwene wa Mulungu unazeathu ugarati-iwe. (Dan. 4:25, 26) Maulosi a m’Baibulo mbanayo kaatandizile iziwa vyevi. Kodi Yehova oowasogolela vevo aliwa kafufuzaathu m’Baibulo? Mookaikela oowatandiza. Vyevyo vyaireile mu 1914, vyoosimikizela ira Umwene wa Mulungu wali ungaambeele lamulela. Muchaka inela, Kondo Yowambeela Yavailambo Yetene yoowambeela, koma teto wookala mulili wa marenda o-iyana-iyana, vivomelezi koma teto ndala. (Luka 21:10, 11) Yehova oo-indi-eda chito alombwana a murima wapama anala ira kasogolelenga athwae.

12-13. Vathawi ya Kondo Yanambili Yavailambo Yetene, kodi abali osogolela kakozile vyoi avi vakhani yolaleela nofunji-a?

¹² Kaganizelani teto vyevyo vyaireile va Kondo Yanambili Yavailambo Yetene. Vanduli vovwechecha lemba la Chivumbuluso 17:8, abali osogolela ulikulu li-u, koozindikila ira kondweyo kayali chiyambi ya Aramagedo. M’malomwiwa vanduli va kondweyo vookala thawi yamurendele, vyevyo vitandizile ira chito yolaleela ienjedeleye. Eno gulu la Yehova lookoza vyoi vakale Sukulu ya Giliyadi. Koma vathawiyo vyaoneya ngati kavinatandiza. Yolinga ya Sukulu inela yali yoi itandize amishonale ira kalaleelenga koma teto funji-a athu vailambo yetene. Amishonale anala kootumiziwa m’madela o-iyana-iyana ngakale vathawi ya kondo. Enjedela vevo, kapolo ororomeleya na wazelu oopanga vyoi vakale Sukulu ya Utumiki wa Mulungu b nayolinga yofuna tandiza athu etene mupingo ira kalaleelenga koma teto funji-a pama Mawu a Mulungu. Vyevi vyoowatandiza athu a Mulungu ira kakozeele pama chito yolaleela ineyo kafuneyaathu i-inda.

¹³ Malambwano, ninoona umboni woi Yehova oowasogolela athwae vathawi yorucheyo. Keda ambeela vathawi ya Kondo Yanambili Yavailambo Yetene, athu a Yehova muvilambo vinjinji kookala ka-indanga chito yolaleela mo-osokoneziwa. Ndipo chitwela ikala iendanga pama vinjinji.

14. Chifukwa n’ni ninafuneya roromela malangizo okumela ugulu la Yehova koma teto wa andimuwa mupingo? (Chivumbuluso 2:1) (Onani teto ithuzithuzi.)

 ¹⁴ Malambwano, abali a m’Bungwe Lolamulela kanopitilizave dalila malangizo okumela wa Kiristu. Aliwa kanafuna ira malangizo anayo kanapelekaathu wa abali kakalenga ogwilizana na vyevyo Mulungu unafuna liye. Ndipo kano-indi-eda chito oing’anela madela koma teto andimuwa ira kapelekenga malangizwayo umipingo. c Andimuwa ozoziwa kanasogoleliwa na ‘ndanda’ la Kiristu. (Welengani Chivumbuluso 2:1.) Pivyoona ira andimuwa etene kai angwilo ndipo kanolakwi-a vyongo. Mose na Yoswa, thawi dimo-i naaliwene koolakwi-a vyongo, ngati mwemo teto atumwi kapangelaathu. (Num. 20:12; Yos. 9:14, 15; Arom. 3:23) Komave Kiristu unomusogolela kapolo ororomeleya na wazelu koma teto andimuwa, ndipo unopitiliza panga vyevi “malambo etene mpakana munyengo yamapeto a thawiila.” (Mat. 28:20) Eno, nikaana vifukwa vyokwakwanela vyonipangi-a roromela malangizo anayo Yesu unaniva-a liye zela mwa athu anayo uwasakulile liye ira kanisogolelenga.

NINOPINDULA NAPITILIZA ARELA MALANGIZO A YEHOVA

15-16. Kodi mufunjedile n’ni wa athu anayo ka-arele malangizo a Yehova?

¹⁵ Na-arelanga malangizo a Yehova ninofwanya madaliso ngakale vathawiila. Mwaisazo, Andy na Robyn koo-arela malangizo a kapolo ororomeleya na wazelu onilimbikisa ira nikalenga na moyo okutila. (Mateyu 6:22) Vyo-arelavo viwa pivyoi, aliwa koovipeleka dowa indana chito domangamanga. Robyn aongile ira: “Thawi dinjinji nakala munyumba ding’onong’ono, ndipo nyumba dimo-i teto kadakala na kichini. Ndafuneya guli-a teto vyongo vinjinji vyevyo ndaviomeliwana miyo patikizavo makamera na vyongo vimo-i vyo-indi-eda chito vojambula. Voguli-a vyongovi ndooula. Koma mofwanafwana na Sara, iyana wa Aburahamu, ndali ndangasimikizile murima ira ndinakedenga ing’ana usogolo o-okala ing’ana munduli.” (Aheb. 11:15) Kodi banjali lapindulile avi chifukwa ya vyevyo lasakulileathu? Robyn aongile ira: “Ninosangalala vinjinji voiziwa ira ninomuva-a Yehova vyetene vyevyo nin’na iyo. Na-indanga chito dedo Yehova univa-ile liye, ninoona mwemo moyo unazeathu ukalele muilambo isha.” Andy oosomedela ira: “Ninosangalala chifukwa yo-indi-eda chito thawi koma teto kopolo di-u votandiza vachito da Umwene.”

¹⁶ Kodi ninapindula avi na-arelanga malangizo a Yehova? Marcia angamari-ile maphuzilwae a wu sekondale, oofunechecha arela malangizo anayo kananilimbikisa ira nipangenga vinjinji votumikela Yehova. (Mat. 6:33; Arom. 12:11) Liye aongile ira: “Ndoova-iwa mwai oyi ndidowe ndapange maphuzilo a wu yunivesite wa chaka 4. Koma miyo ndoofunechecha ira ndipange vinjinji votumikela Yehova. Eno ndoosakula vyoi ndidowe usukulu yofunji-a chito damanda na yolinga yoi ndikede funjeda luso lelo  linaze linditandize va utumikanga. Inela chi yongo imo-i mwa vyosakula vyapama vinjinji vyevyo ndasakulile miyo. Panopa ndinosangalala panga upainiya wogarateya ndipo chito ineyo ndina-inda miyo inondiva-a mpata woi malambo amo-iwa nditumikelenga wu Beteli koma teto ndipangenga vyongo vimo-i vinjinji votumikela Yehova.”

17. Kodi ninafwanya madaliso amo-iwa aavi na-arelanga malangizo a Yehova? (Yesaya 48:17, 18)

¹⁷ Thawi dimo-i ninowachela malangizo anayo kananiteteza uvyongo monga konda chuma koma teto vyongo vimo-i vyevyo vinapangi-e ira niphwanye malamulo a Mulungu. Veva teto vyongo vinoniendela pama chifukwa yo-arela malangizo anayo Yehova unaniva-a liye. Ninokaana chikumbumtima yapama koma teto ninopewa mavuto anjinji. (1 Tim. 6:9, 10) Vyo-arelavo viwa pivyoi ninotumikela Yehova na murima wetene ndipo ninofwanya murendele na chimwemwe yoinjiva. — Welengani Yesaya 48:17, 18.

18. Chifukwa n’ni munafuneya kala osimikiza arela malangizo a Yehova?

¹⁸ Mookaikela, Yehova unopitiliza indi-eda chito athu ira kaze kaniva-e malangizo va chisauso ilukulu koma teto mpakana muthawi ya Ulamulilo wa Chaka 1 000. (Sal. 45:16) Tiyemoni nipitilize arela malangizo ngakale ira thawi dimo-i panga vyevi unokoza pangi-a ira ni-iye vyongo vyevyo vinanisangalasa. Vyevi vinoza vikale vyo-orucha ngati panopa nina-arela malangizo a Yehova. Eno tiyemoni thawi detene ni-arelenga malangizo a Yehova patikizavo anayo ninava-iwa iyo zela mwa alombwana anayo kasakuliwe ira kanisogolelenga. (Yes. 32:1, 2; Aheb. 13:17) Napanganga eno, ninokaana vifukwa vyapama vyomuroromela Yehova, unoyo uli Onisogolela, unoyo unanitandiza ira nipewe vyongo vyevyo vinaononge usamwali-u na liye, mpakana nidowe nafiye muilambo isha mwemo ninaze iyo niwachele moyo o-omala.