MAWU anayo kamasuleleathu ira “galeta” mu Baibulo la Dziko Latsopano kanokoza tanthauza mitundu do-iyana-iyana da magaleta. (Vyo. 8:28, 29, 38) Koma vinaoneya ira muthu wau Itiyopiyola, agwelile galeta loulukulelavo kwaranya la kondo kapena lopangela mpikisano. Chifukwa n’ni ninaonga eno.

Muthu wau Itiyopiyola ali wa udindo ulukulu ndipo ooenda ulendo olapa. Liye “ookaana udindo ulukulu ndipo ootandiza kandake, mfumukazi yau Itiyopiya. Ooing’anela teto chuma yetene ya mfumukazila.” (Vyo. 8:27) Ilambo ya Itiyopiya yapatikizavo ilambo ineyo panopa inaiziweya ira Sudan koma teto wu m’mwela wa ilambo ya Iguputu. Ngakale ira mwina ndunela kaaendile va galetali ulendo wetene unola, vinaoneya ira ootukula katundu chifukwa ulendola wali olapa. Amo-iwa mwa magaleta anayo ka-indi-ediwa chito wale votukula athu kookaana denga koma teto mataala 4. Buku limo-i loonga ira magaleta oyi eno, kookaana malo okwakwanela elamo katundu, koowanda enda ulendo olapa koma teto muthu oowanda kalamo momasuwa.

Muthu wau Itiyopiya unola ali awelenganga vevo Filipo amugumanilena liye. Khaniyo inaonga ira Filipo “ootamanga noendanga m’mbali mwa galetalo ndipo oomuvwa awelenganga mogweli-a mawu ulosi wa mneneli Yesaya.” (Vyo. 8:30) Magaleta ogwelamo athu katatamanga vinjinji. Chifukwa yoi galetalo laenda vang’onovang’ono vyali vyowandeya ira nduneyo iwelengenga koma teto Filipo awande endanawo novwa vyevyo awelenga liye.

Muthu wau Itiyopiyola “oovepa Filipo ira agwele nokalanae limo-i mugaletamo.” (Vyo. 8:31) Galeta la mpikisano, ogwela mugaletamo era imelela. Koma galeta lotukula athu mookala malo oyi Filipo koma teto nduneyo kanokoza garati vati.

Mogwilizana na vyevyo ninawelenga iyo mubuku la vyoira chaputala 8 koma teto umboni ofwanyeya m’mabuku a mbili ya wale, mabukwi-u kookala katonyi-edanga vithuzi vyotonyi-eda nduna yau Itiyopiya ingagwelile galeta lilukulu kwaranya la kondo kapena la mpikisano.