1. Chin’ni inazecha m’maganizo mwinyu mwaganizela vya Yehova?

 KODI moowambeela ganizelavo ira Yehova ngoi avi? Kodi chin’ni inazecha m’maganizo mwinyu mwaonganga na liye mpempelo? Ngakale ira kaninawande muona, Baibulo linomufotokoza mundila do-iyana-iyana. Mwaisazo, Yehova unoromoliwa ira “zuwa koma teto ishango” koma teto “mulo oononga.” (Sal. 84:11; Aheb. 12:29) Unofotokoziwa teto ira uli ngati libwe la safiro, isulo yowala koma teto zirilimbo. (Ezek. 1:26-28) Vyongo vimo-i vyokuza Yehova vyevyo vifotokoziwevi vinokoza nidabwi-a vinjinji kapena nipangi-a mantha.

2. Kodi chin’ni inapangi-echa athu amo-iwa ona ira Yehova kanaakonda?

² Voi Yehova kaninawande muona, mwina vinokoza nirucha roromela ira unonikonda. Athu amo-iwa kanoganiza ira Yehova kanaakonda chifukwa ya vyongo vyotakala vyevyo vyaaireelevo mundulimu. Mwina teto athu amo-iwa katinatonyi-ediwevo chikondi na ababiwa. Yehova unovwechecha mwemo ninavwela iyo ndipo unoiziwa mwemo vyevi vinapangi-elaathu ira vikale vyorucha kala vausamwali na liye. Eno vofuna nitandiza, liye unonifotokozela makalelwae osangalasa zela m’Mawae.

3. Chifukwa n’ni ninafuneya funjeda vyokuza chikondi ya Yehova?

³ Ikalelo ilukulu ya Yehova chi chikondi. (1 Yoh. 4:8) Baibulo linaonga ira Mulungu ngu chikondi. Vyongo vilivyetene vyevyo unapangecha liye, unavipanga chifukwa ya chikondi. Chikondi yae chiyakopolo vinjinji moi unoitonyi-eda ngakale wa athu anayo katinamukonda. (Mat. 5:44, 45) Mukhanila ninokambirana vya Yehova na chikondi yae. Nafunjedanga vinjinji vyokuza Mulungu, pavevo teto ninaambeela iyo mukonda vinjinji.

 YEHOVA UNONIKONDA VINJINJI

4. Kodi munavwa avi chifukwa ya chikondi ilukulu ya Yehova? (Onani teto ithuzithuzi.)

⁴ Baibulo linaonga ira “Yehova ngwachikondi ilukulu.” (Yak. 5:11) M’Baibulo liye unovierekezela na muzimai wachikondi. (Yes. 66:12, 13) Kaganizelani vya muzimai unoyo unasamalela mwanae mwachikondi. Unomutukula m’mandani mwae nomuongi-anga mwachikondi koma teto mooma murima. Aulanga kapena teto ona voreya, muzimai unoonechecha ira umuva-a vyevyo unafuneya liye. Na-iyene naonanga voreya kaninakaikela ira Yehova unonitonyi-eda chikondi. Olemba masalimo aongile ira: “Nkhawa dingandiinjivele, moonditonthoza koma teto ndisangalasa.” — Sal. 94:19.

5. Kodi munalimbikisiwa avi mwaganizela vya chikondi yororomeleya ya Yehova?

⁵ Yehova ngororomeleya. (Sal. 103:8) Liye kana-iya nikonda nalakwi-a vyongo. Aizarayeli koomukumudwi-a Yehova moweli-edaweli-eda. Koma liye ootonyi-eda ira oowakonda vinjinji athu o-olapa anala voawandela ira: “Ndoowambeela uona ira uli wantengo wavadimu, oolemekeziwa ndipo ndinoukonda.” (Yes. 43:4, 5) Chikondi ya Yehova kichenjile. Thawi detene kanikaikelenga ira unonikonda. Ngakale nilakwi-e vinjinji vyongo, Yehova kana-iya nikonda. Nalapa koma teto welela wa liye, ninoza nione ira unonikonda. Liye unonilonjeza ira ‘unoza anikululukele na murima wetene.’ (Yes. 55:7) Baibulo linofotokoza ira liye akululuka vinakalecha ira ‘nyengo dosisimula diza kumela wa Yehova.’ — Vyo. 3:19.

6. Kodi lemba la Zekariya 2:8, linanifunji-a n’ni vyokuza Yehova?

⁶ Welengani Zakariya 2:8. Voi Yehova unonikonda, unovwechecha mwemo ninavwela iyo ndipo unokala okozeya niteteza. Naonanga voreya naliyene teto unoona voreya. Eno pivyovweya pempelanga wa liye ira: “Nditetezeni ngati mwana wa liso linyu.” (Sal. 17:8) Liso tilantengo wavadimu koma teto chi imo-i mwa viwalo vyofuneya teteziwa vinjinji. Eno Yehova anierekezelanga na mwana wa liso lae, vinakala ngati unaonga ira, ‘Uliwetene ofuna uporechani unaporecha yongo yantengo wavadimu wa miyo.’

7. Chifukwa n’ni kaninafuneya kaikela vyoi Yehova unonikonda?

⁷ Yehova unafuna ira niiziwenga vyoi unokonda muthu uliwetene vaekave. Koma unoiziwa ira chifukwa ya vyevyo vyaniireelevo  mundulimu, mwina ninokoza kaikelanga ngati unanikonda. Mwina teto panopa ninogumana na mavuto anayo kanapangi-e ira nikaikelenga vyoi Yehova unonikonda. Ndiye kodi chin’ni inanitandize ira kanikaikelenga vyevi? Ineyo inanitandize kufunjeda mwemo unatonyi-edela liye chikondi wa Yesu, ozoziwa koma teto wa etene iyene.

MWEMO YEHOVA UNATONYI-EDELA LIYE CHIKONDI YAE

8. Chifukwa n’ni Yesu kaakaikela ira Ababae kanomukonda?

⁸ Yehova na Mwanae kookala limo-i wa chaka dinjinji ndipo vyevi vipangi-a ira kakondanenga vinjinji. Usamwaliwa ngwawale vinjinji kwaranya usamwali uliwetene. Va Mateyu 17:5, Yehova oofotokoza mwemo unamukondela liye Yesu. Yehova ookoza onga ira, ‘Ula ngunoyo unandisangalasa.’ Koma vofuna nitonyi-eda mwemo unamukondela liye Yesu, aongile ira, “ula ngu Mwananga unoyo ndinamukonda miyo.” Yehova oosangalala vinjinji na Yesu koma teto vyongo vyevyo Yesuyo a-alile liye vang’ono ira avipange vathawi ineyo. (Aife. 1:7) Ndipo Yesu kaakaikela ira Ababae kanomukonda. Oowona ira chikondi ya Yehova chiyeniyeni ndipo ooivwa chikondiyo m’murimani mwae. Liye oofotokoza moweli-edaweli-eda kumela vati vamurima ira Ababae kanomukonda. — Yoh. 3:35; 10:17; 17:24.

9. Kodi mbamawu aavi anayo kanatonyi-eda ira Yehova unowakonda ozoziwa? Fotokozani. (Aroma 5:5)

⁹ Yehova unotonyi-eda teto ira unowakonda ozoziwa. (Welengani Aroma 5:5.) Mawu anayo kamasuleliwe ira “unotonyi-eda ira unonikonda” kanokoza masuleliwa teto ira “unonikutulela chikondi yae.” Buku limo-i lofotokoza mawu a m’Baibulo laongile ira chikondila “inazecha ngati inje.” Mawu anala mbakopolo ndipo kanatonyi-eda ira Yehova unowakonda vinjinji ozoziwa. Ozoziwa kanoiziwa ira Mulungu “unowakonda.” (Yuda 1) Mtumwi Yohani oofotokoza mwemo aliwa kanavwelaathu vevo alembile liye ira: “Kaganizelani vya chikondi ilukulu ineyo Baba unitonyi-ede liye voniromola ira a-imae. Ndipo nili a-imae.” (1 Yoh. 3:1) Kodi Yehova unaakonda ozoziwa oka? Iyayi, liye unonikonda etene iyene.

10. Kodi chindila ilukulu iivi ineyo Yehova atonyi-edile liye ira unonikonda?

¹⁰ Kodi ndila ilukulu ineyo Yehova utonyi-edile liye ira unonikonda chiivi? Dipo chindila ilukulu vinjinji ineyo utonyi-edile liye chikondi kwaranya uliwetene. (Yoh. 3:16; Arom. 5:8) Yehova oolola ira Mwanae wantengo wavadimu akhwe nayolinga yoi athu etene kakululukiwe machimwiwa koma teto kakale afwae. (1 Yoh. 4:10) Naganizelanga vinjinji ntengo ogwela unoyo Yesu apelekile liye pavevo ninavwechecha iyo mwemo aliwa kanakondelaathu muthu uliwetene vaeka. (Agal. 2:20) Dipo kalakede pelekiwa chifukwa yoi tilelo lafuneya mogwilizana na chilungamo ya Yehova, koma chimphaso ineyo aliwa kapelekileathu chifukwa ya chikondiwa. Yehova utonyi-eda ira unonikonda vomupeleka sembe Yesu, unoyo uli wantengo wavadimu wa liye. Liye oolola ira Mwanae avuteye koma teto aphiwe chifukwa ya iyo.

11. Kodi ninafunjeda n’ni va Yeremiya 31:3?

¹¹ Malinga na vyevyo nikambiranile iyovi, Yehova kanakeda vivwa m’murimani mwae ira unonikonda koma unoniwandela teto mwemo unanikondela liye. (Welengani Yeremiya 31:3.) Yehova oonikokela wa liye chifukwa yoi unonikonda. (Yerekezelani na Dotoronomo 7:7, 8.) Kavali yongo iliyetene kapena muthu uliwetene unoyo unanimwalani-e na chikondi yae. (Arom. 8:38, 39) Kodi nyo munavwa avi mwaganizela vya chikondi inela? Welengani Salimo 23 ira muone mwemo Davide avwele liye chifukwa ya chikondi ya Yehova koma teto mwemo nanyen’ne munavwele nyo.

 KODI MUNAVWA AVI MWAGANIZELA VYA CHIKONDI YA YEHOVA?

12. Kodi munafotokoze avi mwachidule makundo a mu Salimo 23?

¹² Welengani Salimo 23:1-6. Davide, unoyo alembile Salimo 23, ootonyi-eda ira kaakaikela vyoi Yehova unomukonda vinjinji. Liye oofotokoza vyokuza usamwali olimba unoyo walivo vaari va liye na Yehova, unoyo ali M’busae. Davide oovivwa ira ali otetezeya chifukwa oolola ira Yehova amusogolelenga ndipo oomuroromela va iliyetene. Ooiziwa ira Yehova unerenga mutonyi-eda chikondi moywae wetene. Chifukwa n’ni liye kaakaikela vyevi ngakale vang’ono?

13. Chifukwa n’ni Davide kaakaikela ira Yehova unomukonda?

¹³ “Kandinaza ndisauwela yongo.” Davide oowona ira Yehova unomusamalela chifukwa thawi detene oomuva-a vyevyo afuneya liye. Ooiziwa teto ira Yehova ngu fwae ndipo unosangalala nae. Chichifukwa iwa kaakaikela vyoi kaya agumane na vyongo vyoi avi, Yehova unoza apitilize musamalela. Voi Davide oororomela ira Yehova unomukonda koma teto unoza amusamalele, vyoomutandiza ira kakumbanyenga koma m’malomwiwa asangalalenga. — Sal. 16:11.

14. Kodi chin’ni inatonyi-eda ira Yehova unonisamalela mwachikondi?

¹⁴ Yehova unonisamalela mwachikondi simbwasimbwa vevo ninagumana iyo na mavuto. Claire, a unoyo ukalile atumikelanga va Beteli wa chaka dokwaranya 20, oosauwela vyoira vevo athu a m’banja lae kagumanileathu na mavuto alukulu mo-arana-arana. Ababae koobulela marenda okhwa viwalo, dimbilae oochosiwa mupingo koma teto bizimesi ya  banja liwa yoomala moi banjalo kalan’na malo okala. Ndiye kodi Yehova aatonyi-ede avi chikondi? Claire aongile ira: “Yehova oowonechecha ira athu a m’banja langa kanofwanya vyongo vyofuneya dambo lililetene. Thawi dinjinji Yehova ooniva-a vyongo vinjinji kwaranya vyevyo naembekezela iyo. Ndinoganizela vya thawi ineyo Yehova anitonyi-edile liye chikondi ndipo kandinaza ndidiwala. Ganizela vyevi unditandiza ira ndivilelenga mavuto amo-iwa.”

15. Kodi Yehova amusisimulile avi Davide? (Onani teto ithuzithuzi.)

¹⁵ “Unondisisimula.” Thawi dimo-i Davide ookumbanya vinjinji chifukwa ya mavuto anayo agumanana liye. (Sal. 18:4-6) Koma oosisimuliwa chifukwa Yehova oomutonyi-eda chikondi koma teto musamalela. Vathawi inela, Yehova oomusogolela fwaela umalo “apama vinjinji” koma teto “umalo ovumela a ma-inje anjinji.” Vyevi vyoomutandiza Davide fwanya nawili kopolo ndipo oopitiliza tumikela Mulungu. — Sal. 18:28-32.

16. Kodi chikondi ya Yehova inanisisimula avi?

¹⁶ Malambwano, Yehova unonitonyi-eda chikondi yororomeleya ndipo ngakale ira ninogumana na mavuto anjinji, ‘kanimalilemo’ muilambwela. (Malilo 3:22; Akol. 1:11) Isazo vakhanila ngu Rachel. Vathawi ya mulili wa COVID-19, vyoomuvoreya vinjinji chifukwa mamunae oomu-iya koma teto oo-iya tumikela Yehova. Kodi Yehova amutandizile avi Rachel? Liye aongile ira: “Yehova oonditandiza ira ndivivwenga ira ndinokondiwa. Vookala afwanga anayo kawaleda na miyo, ndizi-eda yodja, nditumizela mameseji na malemba olimbikisa, teya limo-i na miyo koma teto koondiumbucha ira Yehova unondikonda. Thawi detene ndinomuyamikela Yehova chifukwa yondiva-a banja lilukulu la athu okondana.”

17. Chifukwa n’ni Davide “kaaova yongo”?

¹⁷ “Kandinaova yongo chifukwa nyo muli na miyo.” Thawi dinjinji moyo wa Davide wakala vangozi ndipo adanae kali akopolo. Komave chikondi ya Yehova yoomutandiza ira avivwenga ira ngotetezeya. Thawi detene Davide oowona ira Yehova ali na liye ndipo vyevi vyoomulimbikisa. Eno liye ooimba nyimbo ira: “[Yehova] oondivulumucha uvyongo vyetene vyevyo vyandipangi-a mantha.” (Sal. 34:4) Ngakale ira thawi dimo-i Davide ookaana mantha vinjinji, liye ookalave olimba murima chifukwa yoiziwa ira Yehova unomukonda.

18. Kodi kala osimikiza ira Yehova unonikonda unanilimbikise avi naovanga?

¹⁸ Kodi iziwa ira Yehova unonikonda, unaniva-a avi kopolo nagumana na vyongo  vyopangi-a mantha? Mpainiya m’mo-iwa zina lae Susi, oofotokoza mwemo liye na mamunae kavweleathu mwaniwa angaviphile. Liye aongile ira: “Vyongo vyoopi-a vyaireya, unosokonezeya maganizo ndipo unosauwela yoira. Koma iziwa ira Yehova unonikonda vinjinji unitandiza vivwa ira nili otetezeya.” Rachel unoyo nimuromolile iyo walele, aongile ira: “Dambo limo-i ma-iyu murimanga ungaambeele ndivoreya vinjinji, ndookumbanya ndipo ndookaana mantha. Ndiye ndoopempela mogweli-a mawu wa Yehova ndiulanga. Thawi ineyo ndoovivwa ira liye oogarati-a murimanga vati ngati mwemo muzimai unatonthozela liye mwanae ndipo ndoogona likove. Kandinaza ndidiwala thawi inela.” Ndimuwa m’mo-iwa zina lae Tasos ookala mundende chifukwa yokoonda volowa usilikali. Kodi Yehova atonyi-edile avi ira oomukonda koma teto musamalela? Liye aongile ira: “Yehova oondiva-a vyongo vyokwaranya vyevyo ndafuneya miyo. Vyevi vyoonditandiza ira ndimuroromelenga vinjinji. Koma teto Yehova oo-indi-eda chito zimwae owela unoyo wanditandizile ira ndisangalalenga ngakale ira ndali umalo orucha. Vyevi vyoonditandiza ona ira ndamuroromelanga Yehova pavevo teto ndinavivwenga miyo ira unondikonda. Eno ndoowambeela panga upainiya ogarateya ndangali undende wewo.”

PITILIZANI KALA VAUSAMWALI NA MULUNGU UNOYO ULI WACHIKONDI

19. (a) Kodi iziwa ira Yehova unonikonda unanitandize avi iziwa vyongo vyofuneya romola m’mapempelwi-u? (b) Kodi tilikundo liivi lokuza chikondi ya Yehova lelo linaulimbikisani nyo? (Onani bokosi loi “ Mawu Anayo Kananitandiza Iziwa Ira Yehova Unonikonda Vinjinji.”)

¹⁹ Visazo vyevyo nikambiranile iyovi zinatonyi-eda ira ‘Yehova Mulungu unoyo uli wachikondi’ uli na iyo. (2 Akor. 13:11) Liye unokonda muthu uliwetene vaekave. Kaninakaikela ira thawi detene “unonitonyi-eda chikondi yae yororomeleya.” (Sal. 32:10) Naganizelanga vinjinji mwemo unatonyi-edela liye chikondi yae wa iyo, pavevo teto ninakalecha iyo vausanwali olimba vinjinji na liye. Ninokoza pempela wa liye momasuwa nomufotokozela mwemo ninayamikelela iyo chikondi yae. Ninokoza teto mufotokozela vyongo vyetene vyevyo vinanikumbanyi-a nororomelanga ira unonivwechecha koma teto ngofunechecha nitandiza. — Sal. 145:18, 19.

20. Kodi Yehova unanitandiza avi ira nikale vausamwali na liye?

²⁰ Etene iyene ninokopeya na chikondi ya Yehova ngati mwemo ninakopeelanga iyo na mulo va dambo lelo unde unadidilaathu. Chikondi ya Yehova chiyakopolo koma unoitonyi-eda mooma murima. Eno musangalalenga chifukwa Yehova unoukondani. Vyevi vinipangi-enga etene iyene onga mosangalala ira: “Ndinokonda Yehova.” — Sal. 116:1.