1-2. Kodi atumiki a Yehova ororomeleya kanagumane na mavuto aavi?

 MAVUTO alukulu kanokoza chenja moywi-u mwazizizi. Mwaisazo, m’bali m’mo-iwa wororomeleya zina lae Luis a oofwanyeya na Khansa yoopi-a. Adokotala koomuwandela ira unakala na moyo wa medi doyeva baasi. Monika na mamunae kootumikela Yehova limo-i. Vanduli viwa dambo limo-i ooiziwa ira mamunae unoyo ali ndimuwa, oopanga machimo alukulu mobisa wa chaka dinjinji. Murongola m’mo-iwa wo-oteliwa zina lae Olivia afuneya venyao waniwa chifukwa ya lipevo lelo la-alile vang’ono fiya udela liwa. Angawelele waniwa afwanyile ira lipevolo liwononga nyumbae. Wathawi yoyeva moyo wa athu niaromolile iywala woochenja vinjinji. Kodi nyo mowambeela gumanavo na mavuto ngati anala? Kodi moogumana na mavuto anayo kapangi-ile ira moywinyu uchenje?

² Ngakhale ira iyovano nili atumiki orormeleya a Yehova, mofwanafwana na athu etene, ninogumana na mavuto koma teto marenda. Thawi dimo-i ninoruni-iwa kapena zuzumi-iwa na athu oidana na athu a Mulungu. Yehova kananiteteza ira kanigumane na mavuto, koma unonilonjeza ira unoza anitandize. (Yes. 41:10) Liye anitandiza ninopitilizave kala osangalala, ninosakula vyongo mwa zelu koma teto ninokalave ororomeleya wa liye ngakhale vevo vinakaleathu vyorucha panga eno. Mukhanila, ninokambilana ndila 4 dedo Yehova una-indi-eda liye chito nagumana na mavuto alukulu va moywi-u. ninoona teto vyevyo ninapange iyo ira anitandizenga.

 YEHOVA UNOZA AUTETEZENI

3. Kodi nagumananga na mavuto alukulu vinakala vyorucha panga n’ni?

³ Vuto lelo linakalavo. Nagumana na vuto lilukulu, vinokoza kala vyorucha ira niganizenga pama koma teto sakula vyopanga mwazelu. Chifukwa n’ni? Vinokala vyovoreya vinjinji m’murimani ndipo ninokoza da nkhawa vinjinji. Vinokoza kala ngati ninaenda unde wangali ifunga moi kaninaona wewo ninadowa iyo. Kaganizelani mwemo arongola ambin’li anayo niaromolile iyo walale koovwela kangagumanile na mavuto alukulu. Olivia aongile ira: “lipevo lakopolo lingaonongile nyumbanga ndoosokonezeya vinjinji.” Vofotokoza vya mamunae apangile liye, Monika aongile ira: “Ndookumudwa vinjinji. Ndavivwa ngati ‘m mo-iwa undilata m’murimani. Kandaanda panga vyongo pamapama kandaroromela vyevyo vyapangeilevyo.” Kodi Yehova unanilonjeza ira unaza anitandiza avi nakaana nkhawa?

4. Kodi Yehova unanilonjeza n’ni va Afilipi 4:6, 7.?

⁴ Vyevyo Yehova unapanga liye. Liye unonilonjeza ira unoza aniva-e “murendele wa Mulungu” oromoliwa m’Baibulo. (Welengani Afilipi 4:6, 7.) muthu akaana murendele unola murima na maganizwae vinokala m’malo chifukwa yoi uli va usamwali wapama na Yehova. Murendele unola ngoi “athu katinawande uvwechecha” ndipo ngodabwi-a kwaranya mwemo ninaganizele iyo. Kodi nyo teto muriminyu owambeela kalavo m’malo mungapempelile wa Yehova mokumela vati va murima? Moovwa eno chifukwa ya “murendele ya Mulungu.”

5. Kodi murendele wa Mulungu unateteza avi maganizo na mirima di-u?

⁵ Lemban’le linoonga teto ira murendele wa Mulungu “unoza uteteze mirima dinyu na maganizwinyu.” Mawu anayo kamasuleliwe ira “teteza” kanoonga vya asilikali anayo kalondela taoni ira katiukeliwe na adani. Athu amumzindoyo koogona mwamurendele voiziwa ira asilikali kanolondela va geti. Murendele wa Mulungu unoteteza murima na maganizwi-u, iyo teto ninokala o-ogwedezeya voiziwa ira nili otetezeya. (Sal. 4:8) Mofwanafwana na Hana, ninokalave na murendele wa murima ngakhale vingakalile ira vyongo kavichenjile va thawi ineyo. (1 Sam. 1:16-18) Ndipo nakala o-ogwedezeya, thawi dinjinji vinokala vyo-orucha ira niganizenga pama koma teto nisakulenga vyopanga mwazelu.

6. Kodi ninapange avi ira murendele wa Mulungu unitandize? (Onani teto ithuzithuzi.)

⁶ Vyevyo ninafuneya iyo panga. Mwapanikizeya na mavuto, muitanenga asilikali ira  ‘kautetezeni.’ Kodi munapange avi vyevi? Mupempelenga m’pakana mungavwile ira mukaana murendele wa Mulungu. (Luka 11:9; 1 Ates. 5:17) Luis unoyo nimuromon’le iyole oofotokoza vyevyo liye na mu-iyanae Ana kapangileathu ira kavilele kangaiziwile ira u-alile na medi doyeva ira akale na moyo. Liye aongile ira: “Va thawi ngati inela, vinokala vyorucha vinjinji sakula vyoira va khani yatandizo la murombwe koma teto khani dimo-i. Koma pempela unitandiza ira nikale na murendele va thawi yoruchela.” Luis na mu-iwanae kaongile ira koopempela mokumela vati vamurima ndipo moweli-edaweli-eda ira Yehova aava-e murendele wa m’murima na m’maganizo koma teto zelu ira kawandenga sakula pama vyoira ndipo koona ira oowatandiza. Nyo teto mwagumana na mavuto mulimbi-edenga pempela ndipo munoza muone murendele wa Yehova utetezanga muriminyu na maganizwinyu. — Arom. 12:12.

YEHOVA UNOZA AUTANDIZENI IRA KAMUGWEDEZEYE

7. Kodi ninavwe avi nagumana na mavuto alukulu?

⁷ Vuto lelo linakalavo. Nagumananga na mavuto alukulu ninovwa voreya m’murimani, maganizwi-u kanosokonezeya ndipo kaninapanga vyongo ngati mwemo ninapangela iyo thawi detene. Ninokoza kala ngati sitima ineyo inandunyeliwa wu na wu na lipevo lakopolo. Ana unoyo nimuromon’le iyole aongile ira Luis angatatiile ooganiza vinjinji. Liye aongile ira: “Thawi dimo-i ndaviona ngati wachebechabe ndipo ndoovivwela chisoni. Koma vanduli viwa ndoolunduwa vinjinji ndaganizela ira udowa.” Wonjedela vevo, Ana akeda viona ira uli ekave koma teto akala wokumudwa chifukwa afuneya sakula vyopanga va khani dedo Luis kaavuteyana. Thawi dimo-i akeda vivwa ngati uli vanyanja vevo vali lipevo lakopolo. Kodi Yehova unanitandiza avi navwanga eni?

8. Kodi Yehova unanisimikizela n’ni va Yesaya 33:6?

⁸ Vyevo Yehova unapanga liye. Liye unonisimikizela ira unoza anitandize ira kanigwedezeye. (Welengani Yesaya 33:6.) Sitima yagumana na lipevo lakopolo vanyanja, inowambeela ndunyiwa wu na wu ndipo vinokala vyoopi-a. Koma sitima dimo-i dinokaana vyongo vimo-i mbali mwiwa vyevyo vinatandiza ira sitima igarateye vanyanja. Vyongo vyevyo vinatandiza ira sitimeyo kigwedezeye, pivyevyo vinapangi-a ira athu anayo kagwelile kakale otetezeya. Koma vyongo vinjinji vyevyo vinatandiza ira sitimela kigwedezeye vino-inda pama chito sitimeyo yaendanga. Mofwanafwana na vyevyo, Yehova unoza anitandize ira kanigwedezeye ngati ninapitilizave  mutumikela mororomeleya vevo ninagumana iyo na mavuto.

9. Kodi vyongo vyo-indi-eda chito vofufuza vinatandize avi ira niganizenga pama? (Onani teto ithuzithuzi.)

⁹ Vyevyo ninafuneya iyo panga. Mwagumana na mavuto muesaesengave panga vyongo vyokuza lambela. Pivyoona ira kamunapangenga ngati vowambeela, koma Yehova unovwechecha. (Yerekezelani na Luka 21:1-4.) Vyongo vimo-i vyevyo munafuneyanyo panga kufunjeda vaekunyu koma teto ganizela modii-a vyevyo mufunjedilenyovyo. Chifukwa n’ni? Yehova uno-indi-eda chito gulu lae voniva-a makundo a m’malemba anayo kananitandize ira niganizenga pama. Ira mufwanye vyevyo vinautandizeni, munokoza indi-eda chito vyongo vyotandiza vofufuza monga pulogalamu ya va JW Library, buku la Watch Tower Publications Index koma teto Buku la Mboni za Yehova Lofufuzira Nkhani. Monika unoyo nimuromon’le iyo walele aongile ira a-indi-eda chito vyongo vyofufuzelavi aona ira upanikizeya na mavuto amo-iwene. Mwaisazo, liye oofufuza mawu oyi “lunduwa.” Thawi dimo-i teto oofufuza mawu oyi “o-ororomeleya” kapena “roromeleya.” Vanduli viwa oowelenga m’pakana angambeele teto vivwa pama. Liye aongile ira: “Ndaambeela fufuza ndookaana nkhawa koma ndapitiliza welengawo vyakeda kala ngati Yehova undikumbarela. Ndawelenganga ndoozindikila ira Yehova unovwechecha mwemo ndinavwela miyo ndipo teto ira unonditandiza.” Nyo teto Yehova unokoza utandizani m’pakana mungaambeele vwa pama. — Sal. 119:143, 144.

YEHOVA UNOZA AUTANDIZENI

10. Kodi ninavwe avi nagumana na mavuto alukulu?

¹⁰ Vuto lelo linakalavo. Vapangeya vuto limo-iliwa lilukulu, malambo amo-i munokoza kalanga ofooka koma teto na nkhawa. Ninokoza vwanga ngati kaswiri wotamanga unoyo uporeile ndipo unaachigama. Munokoza vuteyanga inda chito dimo-i dedo vowambeela kadauruchani kapena teto munokoza funanga panga vyevyo voambeela vyausangalasani. Ninokoza kala ngati Eliya, unoyo afuna kedanga gona o-ovenya. (1 Mam. 19:5-7) Kodi Yehova unalonjeza ira unaza apanga n’ni nafooka?

11. Kodi Yehova unanitandiza teto vo-indi-eda chito ndila diivi? (Salimo 94:18)

¹¹ Vyevyo Yehova unapanga liye. Liye unonilonjeza ira unoza anitandize. (Welengani Salimo 94:18.) Muthu otamanga unoyo uporeile unofuneya tandiziwa ira aende.  Iyo teto ninafuneya tandiziwa ira nipitilize tumikela Yehova. Va thawi ngati inela, Yehova unonisimikizela ira: “Miyo, Yehova Mulungwawo, ndii-inda ndanda lawo lamanda, Miyo unoyo ndinauwandela ira ‘Kuove. Miyo ndinoza ndiutandize.’” (Yes. 41:13) Mwene Davide oona Yehova amutandizanga mwa ndila inela. Liye angagumanile na mavuto koma teto ophopi-iwa na adani, oowandela Yehova ira: “Ndanda linyu lamanda linonditandiza.” (Sal. 18:35) Koma kodi Yehova unanitandiza avi?

12. Kodi Yehova una-indi-ede chito mbaani ira anitandize vevo nifookile iyo?

¹² Thawi dinjinji Yehova unonitandiza volimbikisa athu amo-i ira kanitandize. Mwaisazo, Davide angafookile, Yonatani unoyo ali fwae ooza zamutandiza koma teto muwandela mawu olimbikisa. (1 Sam. 23:16, 17) Yehova oosakula teto Elisa ira alimbikise Eliya. (1 Mam. 19:16, 21; 2 Mam. 2:2) Malambwano teto Yehova unokoza indi-eda chito athu am’banja li-u, afwi-u kapena teto andimuwa ira kanitandize. Komave vimo-iviwa vyanivoreya kaninafuna waleda na athu, ninakedecha funa garati vaeki-u. Vyevi kai vyailendo. Koma kodi ninapange avi ira Yehova anitandize?

13. Kodi ninafuneya panga n’ni ira Yehova anitandize? (Onani teto ithuzithuzi.)

¹³ Vyevyo ninafuneya iyo panga. Mupewenga murima wo-ofuna waleda na athu. Thawi dinjinji muthu akala vaeka kanaganiza pama chifukwa unakedecha ganizela vyaliye na mavuto nayo unagumanana liye. Iganizelo inela inokoza pangi-a ira kasakule pama vyopanga.(Miya. 18:1) Pivyoona etene iyene ninofuneya kala vaeki-u simbwasimbwa nagumana na mavuto alukulu. Komave nakala waeki-u wa thawi indendai, ninolapelana na athu nayo Yehova unaa-indi-ede liye chito ira kanitandize. Eno mulolenga ira athu a m’banja linyu, afwinyu koma teto andimuwa kautandizeni ngakale ira thawi dimo-i vyevi vinokala vyorucha nagumana na mavuto. Muonenga ira athu anala chindila ineyo Yehova una-indi-ede liye chito ira autandizeni. — Miya. 17:17; Yes. 32:1, 2.

YEHOVA UNOZA AUTOTHOZENI

14. Kodi pivyongo viivi vyevyo vinanipangi-e wova?

¹⁴ Vuto lelo linakalavo. Thawi dimo-i ninokoza wova na vyongo vimo-i. Atumiki amo-i ororomeleya a Mulungu koongavo vya thawi ineyo kaan’naathu nkhawa kapena ngurumeda chifukwa ya adaniwa kapena mavuto  amo-i. (Sal. 18:4; 55:1, 5) Na-iyene teto ninokoza runi-iwa usukulu, uchito, na athu am’banja li-u kapena na boma. Kapena ninokoza bulela mwakayakaya. Va thawi ngati inela ninokoza kala ngati mwana unoyo unasauwela tengo wo-inda. Kodi Yehova unanitandiza avi vathawi ngati inela?

15. Kodi mawu ava Salimo 94:19 kananilimbikise avi?

¹⁵ Vyevyo Yehova unapanga liye. Liye unonitothoza koma teto nilimbikisa. (Welengani Salimo 94:19.) Salimoli linokoza nipangi-a ganizela vya sikana unoyo unalepela gona chifukwa yoova mabingu. Vanduli viwa babae unanaza zamutukula m’mandani mwae m’pakana unanagona. Ngakale ira muzongwe wamabingwiyo unanarumbwave, mwanoyo unoona ira ngo tetezeya chifukwa yoi babae umutukula. Iyo teto ngati ninapanga mantha chifukwa ya maeselo amo-iwene, ninofuna ira Babi-u waudimu akale ngati unitukula m’pakana ni-iye wovawo. Ndiye kodi ninapange avi ira Yehova anitothoze?

16. Kodi ninapange avi ira Yehova anitothozenga? (Onani teto ithuzithuzi.)

¹⁶ Vyevyo ninafuneya iyo panga. Niongenga na Yehova vakwikwi vakwikwi vopempela wa liye koma teto welenga Mawae. (Sal. 77:1, 12-14) Eno nazanigumana na mavuto, yowambeela panga inaza ikala pempela wa Babi-u waudimu. Mumufotokozelenga Yehova vyevyo vinauwiri-ani wova koma teto wudi-ani nkhawa. Mumulolenga ira auwongi-eni koma teto utothozani zela m’malemba. (Sal. 119:28) Munoza muone ira malemba amo-i a m’Baibulo kanonilimbikisa simbwasimbwa nakaana mantha. Mwaisazo, munokoza fwanya mawu olimbikisa m’mabuku a Yobu, Masalimo, Miyambo koma teto mawu a Yesu ofwanyeya muchaputala 6 ya buku la Mateyu. Mwapempelanga wa Yehova koma teto welenga Mawae, liye unoza autothozeni.

17. Kodi kaninafuneya kaikela vyan’ni?

¹⁷ Kanikaikelenga ira Yehova unoza anitandize va thawi ineyo nigumanile iyo na mavuto alukulu. Kanaza ani-iya eki-u. (Sal. 23:4; 94:14) Yehova unolonjeza ira unoza aniteteze, nitandiza ira kanigwedezeye, nilimbikisa, koma teto nitothoza. Voonga vya Yehova lemba la Yesaya 26:3 linaonga ira: “Athu anayo kanauroromelani na murima wetene munoza muwateteze. Munoza muwava-e murendele wo-omala, chifukwa kanaroromela nyo.” Eno muroromelenga Yehova ndipo mulolenga ira autandizeni vo-indi-eda chito ndila do-iyana iyana. Mwera eno munoza mufwanye kopolo ngakale va thawi ineyo munagumana nyo na mavuto alukulu.