1-2. Kodi Mkiristu unafwanafwana avi na nyumba yolapa? (1 Akorinto 15:58)

 MUCHAKA dam’ma 1970, wu Tokyo muilambo ya Japan woomangiwa nyumba yosanjikiza 60 dowa mudimu. Athu anayo kaona nyumbela imangiwanga kookumbanya chifukwa munzindola mooireya vivomerezi vakwikwi vakwikwi. Kodi chisisi ya nyumbela yali vaavi? Akaswiri anayo kamangile nyumbela kaimangile mundila yoi ikale yolimba koma teto ira iwandenga tekenyeya koma o-oonongeya. Kodi Akiristu kanafwanafwana avi na nyumba inela?

² Mkiristu unafuneela kala o-otekenyeya koma vathawi imo-ive ineyo unafuneela kala ololela. Liye unafuneela kala olimba koma teto o-otekenyeya va khani yo-arela malamulo a Yehova na makundwae. (Welengani 1 Akorinto 15:58.) Liye unakala ‘okozeya vwela’ koma teto unopitiliza kala ororomeleya. Komave unafuneela kala ‘ololela’ akala pivyowandeya kapena teto akala vanafuneela panga eno. (Yak. 3:17) Mkiristu unoyo unaona vyongo mofwanelela va khani dedi unopewa kwimi-a vinjinji kapena lekelela vyongo. Mukhanila ninokambirana mwemo ninakalele iyo o-otekenyeya. Ninokambirana teto ndila 5 dedo Satana una-indi-eda liye chito vofuna sokoneza yolinga yi-u yoi nikale o-otekenyeya koma teto mwemo ninapewele iyo misampa dae.

3. Kodi mbamalamulo aavi okumela wa Opeleka Malamulo Mulukulu anayo ninafwanya iyo va Vyoira 15:28, 29?

³ Monga Opeleka Malamulo Mulukulu, thawi detene Yehova ukala ava-anga athwae malamulo ovweya pama. (Yes. 33:22) Mofwanafwani-a, bungwe lolamulela la mu thawi ya anamarumiwa loofotokoza ira Akiristu kanafuneela kala olimba mundila taarudi: (1) pewa lambela mafano nolambelanga Yehova eka, (2) lemekeza patuleya wa magazi koma teto (3) arelanga makundo  a m’Baibulo okuza makalelo apama. (Welengani Vyoira 15:28, 29.) Kodi Akiristu malambwano kanapitilize avi kala o-otekenyeya va vyongo viraru vyevi?

4. Kodi ninatonyi-eda avi ira nili ovipeleka wa Yehova eka? (Chivumbuluso 4:11)

⁴ Ninopewa lambela mafano, nolambelanga Yehova eka. Liye oolamula Aizarayeli ira kavipelekenga wa Yehova eka. (Doto. 5:6-10) Vevo ashishiwa liye na Mdyerekezi, Yesu oofotokoza movweya pama ira ninafuneela mulambelanga Yehova eka. (Mat. 4:8-10) Eno kanina-indi-eda chito mafano volambela. Kaninalemekeza teto vinjinji athu mpakana kalanga ngati ninana alambela, kaya mbaasogoleli achipembezo, andale, kapena teto akaswiri a masika na athu amo-iwa ochuka. Ninokala umbali ya Yehova koma teto mulambelanga liye ekave chifukwa ngunoyo ‘alengile vyongo vyetene.’ — Welengani Chivumbuluso 4:11.

5. Chifukwa n’ni ninavwela lamulo la Yehova lokuza patuleya wa moyo na magazi?

⁵ Ninovwela lamulo la Yehova lokuza patuleya wa moyo na magazi. Chifukwa n’ni? Yehova unaonga ira magazi kanaimelela moyo, unoyo uli mphaso yantengo wavadimu ineyo aniva-ile liye. (Lev. 17:14) Vathawi yowambeela ineyo Yehova alolile liye ira athu kadjenga vinyama, oowalamula ira katidjenga magazi. (Gen. 9:4) Liye ooweli-eda nawili lamuloli vevo apelekile liye Chilamulo ya Mose wa Aizarayeli. (Lev. 17:10) Moi oosogolela teto bungwe lolamulela la muthawi ya anamarumiwa ira lipeleke lamulo loi Akiristu etene ‘kapitilize pewa . . . magazi.’ (Vyo. 15:28, 29) Ninokala o-otekenyeya vovwela lamulo leli, nasakulanga likami-edo lamirombwe loi niwachele. b

6. Kodi ninafuneela panga n’ni ira ni-arelenga makundo a Yehova a makalelo apama?

⁶ Nino-arela na murima wetene makundo a Yehova a makalelo apama. (Aheb. 13:4) Vo-indi-eda chito mawu a fanizo, namarumiwa Paulo oonilangiza ira ‘nipangi-e viwalo vya thuthu li-u kala vyokhwa,’ tatauza ira ninafuneela panga vyetene vyevyo ninawande iyo ira kanilakalakenga vyongo vyotakala. Ninopewa ing’ana kapena panga vyongo vyevyo vinapangi-e ira nipange chiwelewele. (Akol. 3:5; Yobu 31:1) Eno nagumana na vyoshisha, thawi ineyo ninopewa ganizela kapena panga vyongo vyevyo vinaononge usamwali-u na Mulungu.

7. Kodi ninafuneela simikiza murima panga n’ni, nanga chifukwa n’ni?

⁷ Yehova unoembekezela ira ‘nimuvwelenga mokumela vati vamurima.’ (Arom. 6:17) Malangizwae kanonikami-a iyo moi thawi detene ninafuneela avwela. (Yes. 48:17, 18; 1 Akor. 6:9, 10) Ninopanga vyetene vyevyo ninawande iyo ira nimusangalasenga Yehova koma teto kalanga na maganizo anayo olemba masalimo an’na liye, unoyo awongile ira: “Ndisimikiza murima arela malangizwinyu, mpakana walewale, ndithu wa moywanga wetene.” (Sal. 119:112) Komave Satana unofuna nifooki-a. Kodi una-indi-eda chito ndila diivi vopanga vyevi?

8. Kodi Satana una-indi-eda chito avi zuzumi-iwa vofuna nifooki-a?

⁸ Zuzumi-iwa. Mdyerekezi unonizuzumi-a vofuna sokoneza yolinga yi-u yoi nikale o-otekenyeya. Yolingae ‘kuni-olocha,’ kapena ira ononga usamwali-u na Yehova. (1 Pe. 5:8) Akiristu owambeela koowopopi-iwa, vaziwa koma teto phiwa chifukwa yoi kali kangasimikizile murima kalave olimba. (Vyo. 5:27, 28, 40; 7:54-60) Satana unopitilizave panga vyevi malambwano. Ninoona umboni wa vyevi,  naona mwemo abali na arongoli-u kanazuzumi-iwelaathu wu Russia na vilambo vimo-iviwa koma teto ukeliwa na athu oruni-a.

9. Pelekani isazo yotonyi-eda ira ninafuneela kala osamala na vyoshisha vyo-ooneela.

⁹ Vyoshisha vyo-ooneela. Enjedela vozuzumi-a mwachindunji atumiki a Yehova, Satana uno-indi-eda chito “vyoira vyachinyengo.” (Aife. 6:11) Mofwanafwani-a, kaganizelani vyevyo vyamuireele m’bali m’mo-iwa zina lae Bob, unoyo agonati-iwe muchipatala voembekezela ira apangiwe opereshoni. Liye oowandela madokotala ira mulimwetene mwemo vinakaleleathu kanafuneela eliwa magazi. Dokotala unoyo apanga opereshoniyo, oosomedela ira unoza apange vyevyo usakulile liye. Komave, mazulo oyi opereshoniyo inaireya dambo lo-arela, dokotala m’mo-iwa oodowa dowa gumana na Bob, athu a m’banja lae kangadowile waniwa. Dokotaloyo oomuwandela Bob ira, ngakale ira va opereshoniyo katinamu-ela magazi, aliwa kanoza kasunge magazi amo-iwa na yolinga yoi kaze kamuva-e akala vanaze vafuneele magazi. Mwina dokotaloyo awona ira Bob unokoza chenja maganizwae voona ira athu a m’banja lae katilivo. Komave m’balila kaachenjile maganizo moi awongile ira mulimwetene mwemo vinakaleleathu, kanaza alola eliwa magazi.

10. Kodi zelu da athu ti doophi-a avi? (1 Akorinto 3:19, 20)

¹⁰ Zelu da athu. Akala ninaona vyongo volandela zelu da athu ninokoza iya arela makundo a Yehova. (Welengani 1 Akorinto 3:19, 20.) Thawi dinjinji “zelu damuilambwela” dinopangi-a ira athu kativwelenga Mulungu. Akiristu amo-iwa awu Pegamo na Tiyatira koowambeela iwona khani yokuza lambela mafano koma teto chiwelewele ngati mwemo athu anjinji a mu mzindoyo kaiwonelaathu. Yesu oosumulula mwakopolo mipingo dedi chifukwa yolekelela ikalelo ya chiwelewele. (Chiv. 2:14, 20) Malambwano teto ninokanyi-ediwa ira niwonenga vyongo molakweya. Abali-u kapena teto afwi-u kanokoza nikanyi-eda kapena nilimbikisa ira nipange vyongo vyevyo vinapangi-e ira kanimuvwele Yehova. Mofwanafwani-a, aliwa kanokoza niwandela ira kavali vuto panga vyevyo ninafuna iyo koma teto ira makundo a m’Baibulo a makalelo apama mbawale.

11. Kodi ninafuneela pewa n’ni vevo ninaesaesa iyo kala o-otekenyeya?

¹¹ Thawi dimo-i ninokoza onanga ira malangizo anayo Yehova unaniva-a liye mbo-okami-a. Mwina teto mpakana ninokoza shishiwa ira ‘nipitilile vyongo vyolembiwa.’ (1 Akor. 4:6) Asogoleli a chipembezo amuthawi ya Yesu kookaana vuto leli, moi vopanga vyevi aliwa koochimwa. Voenjedela malamulo ewaewa mu Chilamulo, aliwa kootukuli-a athu katundu mulukulu. (Mat. 23:4) Yehova unoniva-a malangizo ovweya pama zela m’Mawae koma teto mugulu lae. Kanin’na vifukwa vyovweya vyoenjedela makundwi-u va malangizo anayo unaniva-a liye. (Miya. 3:5-7) Eno kaninapitilila vyevyo vyalembiwe m’Baibulo kapena teto peleka malamulo wa Akiristu afwi-u va khani dedo uliwetene unafuneela liye sakula ekave.

12. Kodi Satana una-indi-eda chito avi “chinyengo yo-okaana chito”?

¹² Chinyengo. Satana uno-indi-eda chito “chinyengo yo-okaana chito” na makundo anayo kali maziko a moyo wa ilambwela vofuna olocha nomwalani-a athu. (Akol. 2:8) Muthawi ya anamarumiwa, vyevi vyootangani-avo zelu da athu, miyambo da Chiyuda, dosempana na malemba koma teto chiphunziso yoi Akiristu ka-arelenga Chilamulo ya Mose. Vyevi vyali vyachinyengo chifukwa vyoopangi-a ira athu katiganizelenga vya Mwinyailo wa zelu unoyo uli Yehova. Satana uno-indi-eda chito mawailesi, TV kapena teto malo owaledela a va intaneti vofuna falisa khani donama dedo asogoleli andale kanalimbikisaathu. Noowona umboni wa vyevi va  thawi ya mulili wa COVID-19. c A Mboni da Yehova anayo kavwela malangizo opelekiwa na gulu li-u katakaana nkhawa ngati mwemo vyaliliathu na athu anayo kavuruwana makundo onama. — Mat. 24:45.

13. Chifukwa n’ni ninafuneela kala osamala na vyosokoneza?

¹³ Vyosokoneza. Ninafuneela pitiliza ela maganizwi-u va “vyongo vyofuneya vinjinji.” (Afil. 1:9, 10) Vyongo vyosokoneza vinokoza nionongela thawi koma teto nipangi-a ira kanipangenga chidwi na vyongo vyofuneya vinjinji. Vyongo vyevyo ninapanga iyo thawi detene monga dja, ng’wa, vyosangalasa koma teto chito vinokoza nisokoneza akala niambeele vi-ela vamalo owambeela va moywi-u. (Luka 21:34, 35) Enjedela vevo, dambo lililetene ninovwa khani dokuza mikangano da athu koma teto dandale. Kanilolenga ira nisokoneziwenga na khani dedi. Akala kaninasamale, ninokoza ambeela volowela muvyoireya vyevi m’maganizo na m’murimani mwi-u. Satana uno-indi-eda chito ndila detene dedo niwongile iyodi vofuna sokoneza yolinga yi-u yoi nipangenga vyofwanelela. Tiyemoni nione vyevyo ninaire iyo volimbana na vyoshisha vyaevi ira nikaleve olimba.

14. Kodi chiyongo imo-i iivi ineyo inanikami-e kalave umbali ya Yehova?

¹⁴ Muganizelenga chifukwa iwa mwavipelekile koma teto badiziwa. Mwapangile vyevi chifukwa yofuna kala umbali ya Yehova. Muumbuwelenga ineyo yausimikizeleni ira mufwanya imbarimbari. Moofunjeda makundo aimbarimbari okuza Yehova koma teto moowambeela muomeliwana koma teto mulemekeza vinjinji monga Babinyu waudimu. Mookaana iroromelo moi vyevi vyooukami-ani ira mulape. Muriminyu wooulimbikisani ira mu-iye makalelo otakala koma teto ira muirenga vyongo mogwilizana na yofuna ya Mulungu. Moovwa pama mungaiziwile ira Mulungu ooukululukelani. (Sal. 32:1, 2) Moowambeela fwanyeya vamisonkano koma teto wandela amo-iwa vyongo  vyoiri-a chidwi vyevyo mwafunjeda nyo. Monga Mkiristu ovipeleka koma teto obadiziwa, vano munanaenda vasewu wodowa umoyo moi muli osimikiza ira munopitiliza enda vasewu unola. — Mat. 7:13, 14.

15. Kodi funjeda koma teto ganizela modii-a Mawu a Mulungu kokami-a avi?

¹⁵ Mufunjedenga Mawu a Mulungu koma teto aganizela modii-a. Mofwanafwana na tengo unoyo unakala olimba chifukwa yoi ukaana michichi dovolowa vati, na-iyene ninokoza kala olimba akala nin’na iroromelo chifukwa yofunjeda Mawu a Mulungu. Tengo waulukulanga, michichidiwa dinovolowa vati koma teto dinoinjiva. Mofwanafwana na vyevi nafunjedanga Mawu a Mulungu koma teto aganizela modii-a, ninokaana iroromelo yolimba koma teto ninokala osimikiza ira makundwiwa mbapama vinjinji. (Akol. 2:6, 7) Muganizelenga mwemo malangizo a Yehova kakami-edeleathu koma teto teteza atumikae mundulimu. Mofwanafwani-a, Ezekieli ooira chidwi vevo ngelo aeza liye kachisi unoyo namawongelola amuonile liye m’masomphenya. Masomphenyala koomulimbikisa Ezekieli moi ninofunjedavo teto makundo ofuneya okuza vyevyo ninapange iyo ira ni-arelenga makundo a Yehova okuza lambela waimbarimbari. d (Ezek. 40:1-4; 43:10-12) Na-iyene ninopindula vinjinji nafwanyanga thawi yofunjeda koma teto ganizela vyongo vyodii-a vya m’Mawu a Mulungu.

16. Kodi kaana murima ogarateya wamukami-ile avi Bob? (Salimu 112:7)

¹⁶ Muesaesenga kaana murima ogarateya. Mwene Davide ootonyi-eda ira kanaza a-iya muomeliwana Yehova vevo aimbile liye ira: “Murimanga ugarateya, nyo Mulungu.” (Sal. 57:7) Na-iyene ninokoza kaana murima ogarateya, kapena ira o-otekenyeya, nororomelanga vinjinji Yehova. (Welengani Salimu 112:7.) Kaganizelani mwemo vyevi vyamukami-edeleathu Bob unoyo namuromolile iyo walele. Angawandeliwe ira vanoza vasungiwe magazi oyi kamu-ele akala vanafuneye magazi, thawi ineyo oosomeda ira akala madokotalayo kanaona ira kanoza kamu-ele magazi, liye unovenyawo uchipatalawo. Vanduli viwa Bob afotokozile ira: “Ndali osimikiza murima moi kandakumbanya.”

17. Kodi ninafunjeda n’ni va vyevyo vyamuireele Bob? (Onani teto ithuzithuzi.)

 ¹⁷ Bob kaatekenyeile chifukwa ali angasakulile wale vyevyo unaire liye aanadowe uchipatalawo. Yowambeela, liye oofuna musangalasa Yehova. Yanambili, ali angafunjedile mosamala vyevyo Baibulo na mabukwi-u kanaongaathu va khani yokuza patuleya wa moyo na magazi. Teto yanararu, liye kaakaikela ira arela malangizo a Yehova woomupangi-a ira afwanye madaliso o-omala. Na-iyene ninokoza kala o-otekenyeya kaya nigumanile na mavuto oyi avi.

18. Kodi isazo ya Baraki inanifunji-a n’ni va khani yororomela Yehova? (Onani ithuzithuzi yavatakuru lowambeela.)

¹⁸ Muroromelenga Yehova. Kaganizelani mwemo roromela malangizo a Yehova wamukami-edeleathu Baraki. Ngakale ira muilambo iwa kamwali vishango na mimwanango, Yehova oomuwandela ira adowe avaze kondo na gulu la asilikali awu Kanani, losogoleliwa na Sisera, lelo lan’na vida vyetene vyakondo. (Owel. 5:8) Namaongela wamu-iyana Debora oomuwandela Baraki ira atite m’mwangoni nodowa uchigwa ira adowe agumane na Sisera, unoyo an’na magaleta 900. Ngakale ira magaleta a Sisera katavuteyenga enda muchigwamo, Baraki oosomedela. Vevo asilikalayo kaambeeleathu tita m’Mwango wa Tabori, Yehova oowambeela rumbwi-a zongwe. Vyevi vyoopangi-a ira magaletayo kalepelenga enda m’madogo, moi Yehova oopangi-a ira Baraki akwaranye vakondweyo. (Owel. 4:1-7, 10, 13-16) Yehova unoza apangi-e ira na-iyene vyongo viniendelenga pama akala ninamuroromela koma teto vwela malangizo anayo unaniva-a liye zela mugulu lae. — Doto. 31:6.

19. Chifukwa n’ni munafuna kalave o-otekenyeya?

¹⁹ Kondwi-u yofuna kala o-otekenyeya inopitiliza va thawi yetene ineyo ninakala iyo muilambo yotakalela. (1 Tim. 6:11, 12; 2 Pe. 3:17) Tiyemoni nikaleve osimikiza ira kanisokoneziwe na vyongo monga zuzumi-iwa, vyoshisha vyo-ooneela, zelu da athu, vyoira vyachinyengo koma teto vyosokoneza. (Aife. 4:14) M’malomwiwa, tiyemoni nikale olimba, o-otekenyeya volambela Yehova moi kani-iye vwela malamulwae. Komave napanganga vyevi, ninafuneela teto kala ololela. Mukhani yo-arela ninoza nikambirane chifukwa iwa Yehova na Yesu kali visazo vyapama va khani yololela.