Nicolas na Céline koogumana na vuto la tundu umo-iwa. Aliwa koosomedela ofesi ya tambi ingaavepile ira katamele mupingo umo-iwa. Aliwa kaongile ira: “Vowambeela noosangalala vinjinji koma vanduliviwa noowambeela asauwela afwi-u. Nali naanaambeele lemeelana vinjinji na abali amupingo usha.” a Ngakale ira vanokala mavuto ngati anala, kodi chin’ni inanitandize ira nisangalalengave natamela mupingo usha? Kodi athu amo-iwa kanatandize avi? Nanga munapange avi ira mulimbikisiwenga koma teto limbikisa amo-iwa mupingo usha unola?

MAKUNDO 4 ANAYO KANAUTANDIZENI

1. Mudalilenga Yehova. (Sal. 37:5) Murongola Kazumi wawu Japan, ootama mupingo mwemo akalilemo liye chaka 20, vevo mamunae achenjiwe liye ira adowe a-indenga chito udela limo-i. Ndiye kodi liye apangile n’ni ira ‘Yehova amusogolele vandilae’? Liye aongile ira: “Moweli-edaweli-eda ndoomufotokozela Yehova vya mantha anayo ndan’na miyo, nkhawa danga koma teto ira ndooviona ira ndili mekave. Thawi iliyetene ndapanga vyevi, liye oondiva-a kopolo dedo ndafuneela miyo.”

Kodi munapange avi ira mudalilenga vinjinji Yehova? Mofwanafwana na mbewu ineyo inafuneya ma-inje na vyodja vimo-i vyamuteya ira iulukule, iroromelo yi-u teto inafuneya vyongo vimo-i ira iulukule. Nicolas oofwanya ira ganizela vinjinji vya athu monga Abulahamu, Yesu na Paulo, anayo kalolele iya vyongo vinjinji ira katumikele Mulungu, oomutandiza ira aroromeleya vinjinji ira Yehova unomutandiza. Funjeda Baibulo thawi detene unokoza utandizani ira mulemeele vyongo vyevyo vichenjile  koma teto ira mufwanye vyongo vyevyo munalimbikisena nyo athu amo-iwa mupingwinyu usha.

2. Mupewenga vierekezela. (Nam. 7:10) Jules angatamile kuma wu Benin dowa wu United States afuneya chenja ira alemeele ikalelo imo-iwa. Liye aongile ira: “Ndafuneya ira ndimufotokozelenga muthu uliwetene unoyo ndigumanilena miyo ulendo owambeela yongo iliyetene yokuza miyo.” Voi ikalelo yali yo-iyana na vyevyo alemeele liye, oowambeela apewa abali na arongola. Koma angaaiziwile pama, oochenja mwemo aaonela liye. Liye aongile ira: “Sopano ndiiziwa ira udela lililetene vailambwela athu mbofwanafwana. Aliwa kanakedecha onga kapena panga vyongo mo-iyana. Panga vyongo na athu mogwilizana na vyevyo kalemeeleathu kofuneya vinjinji.” Eno mupewenga erekezela pingwinyu wawale na usha. Mpainiya m’mo-iwa zina lae Anne-Lise, aongile ira: “Kandatamile nayolinga yoi ndidowe ndafwanye vyongo vyofwanafwana na vyevyo nda-iile miyo, koma ndatamile ira ndidowe ndafunjede vyongo visha.”

Andimuwa kanafuneya samala ira katierekezelenga pingwiwa wawale na usha. Ngati abali kanapanga vyongo mo-iyana mupingo ushoyo, kai thawi detene vevo vinakalaathu ira kanaalakwi-a. Chizelu iziwa pama mwemo vyongo vililiathu mupingo ushoyo mwaanapeleke maganizwinyu. (Nam. 3:1, 7b) Isazo inyu yapama inokoza tandiza abali mupingomo m’malo mowakakamiza ira kakedenga arela maganizwinyu. — 2 Akor. 1:24.

3. Mupangenga vyongo vinjinji na aliwa. (Afil. 1:27) Tama kogomi-a ndipo unafuneya thawi injinji. Koma ngati vili vyowandeya, keda ambeela vevo mufiile nyo, musonkanenga na aliwa vamaso na vamaso. Ndipo ngati abali na arongola mupingo ushoyo katinauonani kapena ngati kanakeda uonani mwa vo na vo, kodi kanautandizeni avi? Lucinda na a-imae ambiili aa-iyana, anayo katamele mu taoni ilukulu wu South Africa, aongile ira: “Afwanga koondilangiza ira ndinafuneya ndiwaledenga vinjinji na abali na arongola mupingo ushola, volowanga muutumiki limo-i na aliwa koma teto ndisomedenga vamisonkano. Nooawandela teto abali ira kanokoza indi-edanga chito nyumbi-u vopangelamo misonkano dokozeela muutumiki.”

Esaesa panga vyongo vyokuza lambela “mogwilizana” na abali na arongola amupingwinyu usha, unoza uutandizeni ira mupitilize “roromela uthenga wapama.” Anne-Lise, unoyo nimuromolile iyo walele oolimbikisiwa na andimuwa ira aesaesenga laleela na muthu uliwetene mupingo. Kodi vyo-arelavo viwa vyali vyoi avi? Liye aongile ira: “Ndoozindikila ira vyevi vyoonditandiza ira ndilemeele mombaraanya.” Koma teto vipeleka vo-indana chito yosamalela va Nyumba ya Umwene unokoza tonyi-eda ira sopano muwambeela ona ira unola ngu pingwinyu. Mwapanganga vyongo vinjinji limo-i na abali na arongola, aliwa kanoza kaambeele umasuwelani ndipo munoza muwambeele aona ira mbaathu a m’banja linyu lauzimu.

4. Mufwanyenga afwinyu asha. (2 Akor. 6:11-13) Panga chidwi na athu amo-iwa unokoza  utandizani ira mufwanye afwinyu asha. Eno misonkano daanaambeele kapena damala, mufwanyenga thawi yoi muwaledenga na athu amo-iwa nayolinga yoi muwaiziwe pama. Muesaesenga ira muiziwe maziniwa. Umbuwela mazina a athu koma teto kala owaledeya, unokoza tandiza ira amo-iwa kafunenga waleda na nyo ndipo vi vinotandiza ira mufwanye afwinyu anjinji apama.

M’malo moganiza ira munafuneya panga vyongo vyavadela ira athu kaukondengani, mulolenga ira abali na arongola kaiziwe mwemo vyongo vililiathu vamoywinyu. Mupangenga vyevyo Lucinda aongile liye. Liye aongile ira: “Panopa nikaana afwi-u anjinji apama chifukwa yoi naambeele ngu iyo aitanela wani-u.”

“MUWACHELANENGA”

Athu amo-iwa kanoova volowa mu Nyumba ya Umwene ineyo ili yozaala na athu oyi katinaaiziwa. Ndiye kodi munapange avi ira mutandize athu anayo kakede tamela wene mupingo mwinyu? Mtumwi Paulo aongile ira: “Muwachelanenga. Ngati mwemo Kiristu aniwachelele liye.” (Arom. 15:7) Vomusazi-eda Kiristu, andimuwa kanokoza tandiza athu anayo kakede tamela wene mupingo mwiwa ira kavivwenga ira koowacheliwa. (Onani bokosi loi “ Kodi Munapange Avi Ira Tama Kukale Orucha?”) Komave etene mupingo, tangani-avo a-ima, kanokoza tandiza athu anayo kazile mupingo mwiwa ira kafwanye afwiwa asha.

Wachela alendo, unotangani-avo aitanela wani-u, koma teto atandiza va vyongo vyo-iyana-iyana. Mwaisazo, murongola m’mo-iwa oopatula thawi yovolowa mutaoni na murongola unoyo ali angakede tamela wene mupingo mwiwa, ira adowe amuoni-e malo o-iyana-iyana a taoniyo koma teto ira amuoni-e malo ogwelela basi. Vyevyo apangile liyevyo vyoomutandiza fwaeyo ira alemeele mombaraanya.

VINONIVA-A MWAI OULUKULA MWAUZIMU

Serebo aulukulanga, unosuwa maulendo angasene ira mapepelwae kamasuwe ira aambeele purumuwa.  Mofwanafwana na vyevi, nanyen’ne mwatamela mupingo usha, munafuneya kala ngati musuwa vopewa vyongo vilivyetene vyevyo vinaulepeli-eni tumikela Yehova momasuwa. Nicolas na Céline kaongile ira: “Tama unonifunji-a vyongo vinjinji. Ninafuneya kala na makalelo asha ira nilemeelane na athu koma teto nilemeele malo asha.” Jean-Charles, unoyo nimuromolile iyo umaambeelelo ule, oofotokoza mwemo tama watandizeleathu banja lae. Liye aongile ira: “Tama utandiza ira a-imi-u kapangenga pama vyongo mupingo. Vangakede mala medi doyeva, mwani-u wa-iyana oowambeela kamba khani vamisonkano damuwari mwa mulungu ndipo mwani-u wamulombwana ookala ofalisa o-obadiziwa.”

Bwanji ngati kamunawande tamela umalo amo-iwa, monga dowa tumikela wewo unafuneya olaleela anjinji? Munopanga pama arela malangizo anayo nikambilanile iyo mukhanila mungali mupingo mwinyu mwemo. Mudalilenga Yehova ndipo mupangenga vinjinji mupingo volaleela na athu amo-iwa, fwanya afwinyu asha koma teto pitiliza gwilizana na afwinyu awale. Munokoza tandiza teto anayo kali asha kapena tandiza athu anayo kanavuteya vowava-a vyevyo kanafuneyaathu. Voi chikondi chiikalelo ineyo inaiziwi-a Akiristu oona, panga vyevi unoutandizani ira mulimbi-e usamwalinyu na Yehova. (Yoh. 13:35) Kalani osimikiza ira ‘Mulungu unosangalala na sembe ngati dedi.’— Aheb. 13:16.

Ngakale ira vanokala mavuto amo-iwa, Akiristu anjinji vyongo vinowaendela pama katamela mupingo umo-iwa, ndipo nanyen’ne teto vinokoza uendelani pama. Anne-Lise aongile ira: “Tamela mupingo umo-iwa, oonditandiza ira ndiiziwane na athu anjinji.” Kazumi oowonga mosimikiza ira: “Watamela mupingo umo-iwa unoona Yehova autandizanga mundila ineyo kunaiganizelevo.” Jules aongile ira: “Afwanga anayo ndifwanyile miyo kanonditandiza ira kandivionenga monga mulendo. Panopa ndinoona ira ndili wamupingo mwemu, ndipo vinoza vindiruche ira nditamemo.”