1. Kodi ninavwa avi naganizela vya choonadi ineyo nifunjedile iyo?

 ATHU a Yehova kanokonda choonadi yofwanyeya m’Mawu a Mulungu. Vyevyo ninawelenga iyo m’Mawae vinolimbi-a iroromelwi-u. (Arom. 10:17) Ninororomela ira Yehova ugarati-a pingo Waikiristu ira ‘ulimbikisenga noteteza choonadi.’ (1 Tim. 3:15) Ninosangalala teto gonjela ‘anayo kanasogolela’ vaari vi-u kafotokozanga choonadi ya m’Baibulo koma teto niva-a malangizo ogwilizana na vyevyo Mulungu unafuna liye. — Aheb. 13:17.

2. Mogwilizana na Yakobo 5:19, kodi chin’ni ineyo inaniireele vanduli vofunjeda choonadi?

² Komave, ngakale ira ninoiziwa choonadi koma teto ninoiziwa funeya o-arela malangizo a gulu la Mulungu, ninokoza olochiwa. (Welengani Yakobo 5:19.) Satana unofunechecha ira ni-iye roromela Baibulo koma teto malangizo anayo ninawachela iyo kumela ugulu la Mulungu. — Aife. 4:14.

3. Chifukwa n’ni ninafuneya indechecha choonadi? (Aifeso 6:13, 14)

³ Welengani Aifeso 6:13, 14. Chineneveva, Mdyerekezi unoza a-indi-ede chito vyonama vofuna sokoneza athu a mitundu detene ira kasusane na Yehova. (Chiv. 16:13, 14) Ninoiziwa teto ira Satana unoesaesa ira asokoneze athu a Yehova. (Chiv. 12:9) Eno ninokoza panga pama vinjinji vifunji-a ira ni-iyani-enga choonadi na makundo onama, era eno nivwelenga choonadiyo. (Arom. 6:17; 1 Pe. 1:22) Panga vyevi kuwewo unanitandize ira nize nivulumuwe va chisauso ilukulu.

4. Kodi ninakambilana n’ni mukhanila?

 ⁴ Mukhanila ninokambilana makalelo ambiili anayo kananitandize ira ni-iyani-enga choonadi yokumela m’Baibulo koma teto arela malangizo anayo gulu la Mulungu linaniva-aathu. Era eno ninokambilana vyongo taaru vyevyo ninapange iyo ira ni-indecheche choonadi.

MAKALELO ANAYO KANANITANDIZE IRA NIZINDIKILENGA CHOONADI

5. Kodi ova Yehova unanitandiza avi zindikila choonadi?

⁵ Ova Yehova. Ova Yehova mofwanelela unonitandiza ira nimukondenga vinjinji moi kaninapange iliyetene ineyo inamukumudwi-e. Ninofunechecha funjeda ira niwandenga iyani-a vaari va vyofwanelela na vyo-ofwanelela koma teto vaari va choonadi na makundo onama nayolinga yoi nimusangalasenga Yehova. (Miya. 2:3-6; Aheb. 5:14) Kaninafuneya lola ira niovenga vinjinji athu kwaranya mwemo ninamukondela iyo Yehova chifukwa thawi dinjinji vyevyo athu kanakondaathu kavinasangalasa Mulungu.

6. Kodi ova athu wapangi-ile avi ira asogoleli 10 a Izarayeli kapotoze choonadi?

⁶ Naovanga vinjinji athu kwaranya Yehova ninokoza olochiwa va choonadi. Isazo vakhanila, mbaasogoleli a mafuko 12 anayo kadowile dowa ona ilambo ineyo Mulungu alonjezile liye ira unoza apeleke wa Aizarayeli. Asogoleli 10 koowaova vinjinji Akanani kwaranya mwemo kamukondelaathu Yehova. Aliwa kooawandela Aizarayeli afwiwa ira: “Kaninawande dowa limbana na athwayo, chifukwa mbakopolo kwaranya iyo.” (Num. 13:27-31) Pivyoona ira malinga na mwemo athu kaonelaathu, Akanani kali akopolo vinjinji kwaranya Aizarayeli. Koma vevo kaongileathu ira Aizarayeli katinakwakwani-e dowa gonji-a adaniwa, kootonyi-eda ira kataganizela vya Yehova. Asogoleli 10 anala,  kafuneya ganizela vyevyo Yehova afuna liye ira Aizarayeli kapange. Kafuneya teto ganizela vyevyo Yehova aliliye angakede apangela wene. Kaapange vyevi, koozindikila ira kopolo da Akanani dali doyeva vinjinji voerekezela na kopolo do-okaana malile da Yehova. Mo-iyana na asogoleli ookaana iroromelwayo, Yoswa na Kalebe koofuna sangalasa Yehova. Aliwa koowandela athwayo ira: “Ngati Yehova unasangalala na iyo, unoza anivolochi-e muilambweyo noipeleka wa iyo.” — Num. 14:6-9.

7. Kodi ninapange avi ira niovenga vinjinji Yehova? (Onani teto ithuzithuzi.)

⁷ Ira nimuovenga vinjinji Yehova, ninafuneya kala ofunechecha ira nimusangalasenga va iliyetene ineyo ninasakule iyo panga. (Sal. 16:8) Mwawelenganga khani da m’Baibulo muvifukenga ira, ‘Kodi miyo ndaakalevo vathawi inela, ndasakula panga n’ni? Mwaisazo, kaerekezelani ira munaavwa vevo asogoleli a mafuko 10 a Aizarayeli kaongaathu vyongo vyo-olimbikisa. Kodi moororomela vyevyo kaongaathu nowambeela ova athu, kapena mootonyi-eda ira munokonda Yehova vopanga vyongo vyomusangalasa? Aizarayeli etene kataroromele choonadi ineyo Yoswa na Kalebe kaongaathu. Vyo-arelavo viwa pivyoi etene kootatila mwai odowa volowa Muilambo Yolonjeziwa. — Num. 14:10, 22, 23.

8. Kodi ninafuneya esaesa kala na ikalelo iivi, nanga chifukwa chin’ni?

⁸ Viyevi-a. Yehova unoulula choonadi yae wa athu oviyevi-a. (Mat. 11:25) Iyo nooviyevi-a nolola ira nifunji-iwe choonadi. (Vyo. 8:30, 31) Koma ninafuneya kala osamala ira kaniambeele vikuza. Nyada unokoza nipangi-a onanga ira maganizwi-u mbazelu kwaranya makundo a m’Malemba koma teto malangizo anayo gulu la Yehova linaniva-aathu.

9. Kodi ninapange avi ira nikaleve oviyevi-a?

⁹ Ira nikaleve oviyevi-a, ninafuneya umbuwelanga ira nili ang’onong’ono vinjinji voerekezela na Yehova. (Sal. 8:3, 4) Ninafuneya teto pempela ira nikale na murima oviyevi-a koma teto nilolenga ira liye anifunji-enga. Yehova unoza anitandize ira nionenga ira maganizwae, anayo ninaafunjeda iyo kumela m’Baibulo koma teto mugulu lae, mbofuneya vinjinji kwaranya maganizo a athu. Mwawelenganga Baibulo, munoza mufwanye umboni osimikizela ira Yehova unokonda athu oviyevi-a o-okala athu onyada kapena ovikuza. Ninafuneya esaesa ira nikaleve oviyevi-a nawachela utumiki unoyo unapangi-a ira nioneyenga vinjinji wa athu.

VYEVYO NINAPANGE IYO IRA NI-INDECHECHE CHOONADI

10. Kodi Yehova ukalile amu-indi-edanga chito mbaani ira apeleke malangizo wa athwae?

¹⁰ Muroromelenga malangizo okumela ugulu la Mulungu. Wale Yehova oomu-indi-eda chito Mose, vanduliviwa oomu-indi-eda teto chito Yoswa vopeleka malangizo wa Aizarayeli. (Yos. 1:16, 17) Aizarayeli kaaonanga athu anala monga omuimelela Yehova Mulungu, koodalisiwa. Vangavirile chaka dinjinji, pingo Waikiristu oogarati-iwa ndipo atumwi 12 mbanayo kapeleka malangizo. (Vyo. 8:14, 15) Vanduliviwa mugulu la athu opeleka malangizwayo mookala teto andimuwa awu Yerusalemu. Chifukwa yo-arela malangizo a alombwana ororomeleyala, “athu mupingo koopitiliza kala na iroromelo yolimba ndipo chiwelengelo yooenjedeleya dambo na dambo.” (Vyo. 16:4, 5) Malambwano ninodalisiwa na-arelanga malangizo okumela ugulu  la Yehova. Koma kodi Yehova unavwa avi ngati kaninaavwela athu anayo uwasakulile liye ira kanisogolelenga? Ninofwanya yankho la fuso leli voganizela vyevyo vyaireile vevo Aizarayeli kadowaathu ira kavolowe Muilambo Yolonjeziwa.

11. Kodi chin’ni yaaireele Aizarayeli anayo katamulemekeza Mose unoyo Mulungu amusakulile liye ira aasogolelenga? (Onani teto ithuzithuzi.)

¹¹ Vathawi imo-iwa, Aizarayeli kangali vaulendo odowa volowa Muilambo Yolonjeziwa, alombwana amo-iwa otchuka koomususa Mose koma teto udindo unoyo Yehova amuva-ile liye. Aliwa koowonga ira: “Gulu letene leli [o-okala Mose ekave] tilowela, ndipo Yehova uli vaari viwa.” (Num. 16:1-3) Pivyoona ira Yehova oowona ira ‘gulu letene lelo’ lali lowela, koma liye ali angamusakulile Mose ira asogolelenga athwae. (Num. 16:28) Vosusana na Mose, athu oruni-ayo kasusana na Yehova. M’malo moganizela vyevyo Yehova afuna liye, kooganizela vinjinji vyevyo aliwa kafunaathu. Aliwa koofuna ira kakaena kopolo dinjinji koma teto kakale otchuka. Mulungu oopha athu anayo kasogolela ira athu kaukelenga koma teto oopha athu masauzande anjinji anayo kali umbaliwa. (Num. 16:30-35, 41, 49) Malambwano teto, ninoiziwa ira Yehova kanasangalala na athu anayo katinalemekeza malangizo okumela ugulu lae.

12. Chifukwa n’ni ninafuneya roromela gulu la Yehova?

¹² Ninafuneya pitiliza roromela gulu la Yehova. Ngati vanafuneya chenja vyevyo ninaroromela iyo va makundo amo-iwene a m’Baibulo kapena ndila ineyo nina-indela iyo chito da Umwene, athu anayo kananisogolela katinazengeleza chenja. (Miya. 4:18) Aliwa kanopanga vyevi chifukwa kanofunechecha sangalasa Yehova. Aliwa kanoesaesa sakula vyoira vo-indi-eda chito Mawu a Mulungu chifukwa m’Baibulo pumwemo muli makundo etene anayo Akiristu kana-arelaathu.

13. Kodi mawu oyi “isazo ya mawu olondola” kanatantauza n’ni, nanga ninafuneya panga n’ni?

 ¹³ “Indechechave isazo ya mawu olondola.” (2 Tim. 1:13) Mawu oyi “isazo ya Mawu olondola,” kanatantauza makundo a m’Baibulo anayo Akiristu kanaroromelaathu. (Yoh. 17:17) Iliyetene ineyo ninaroromela iyo inakumela va makundo anala. Gulu la Yehova linifunji-a ira ni-indechechenga makundo anala. Napanganga vyevi ninoza nidalisiwe.

14. Kodi Akiristu amo-iwa kapangile n’ni ira ka-iye arela “isazo ya mawu olondola”?

¹⁴ Kodi chin’ni inaireye ngati nina-iye arela isazo ya “mawu olondola”? Kaganizelani isazo ila. Muthawi ya atumwi, Akiristu amo-iwa koofalisa mphekesela yoi dambo la Yehova lali lingafiile. Mwina vookala kalata ineyo yaongile vyevi ndipo athu kaganiza ira yalembiwe na Paulo. Akiristu amo-iwa awu Tesalonika koowambeela roromela koma teto falisa vyevi kaanafufuze. Aakale ira aliwa kooumbuwela vyevyo Paulo aafunji-ile liye vathawi ineyo aliliye limo-i na aliwa, katapusi-iwa na vyevi. (2 Ates. 2:1-5) Liye oolangiza abalayayo ira katikedenga roromela vilivyetene vyevyo kavwileathu. Vofuna atandiza ira vyevi kavize viaireele nawili usogolo, Paulo oomari-a kalatae yanambili yodowa wa Atesalonika na mawu oyi: “Wachelani monanga, unoyo miyo Paulo ndilembile miyo na ndanda langa. Thawi detene ndinalembecha eni m’makalatanga etene, ira muiziwe vyoi ngu miyo unoyo ndilembile. Mu pumwemo ndinalembela miyo.” — 2 Ates. 3:17.

15. Kodi ninaviteteze avi ukhani donama dedo dinaoneye ngati dolondola? Pelekani isazo. (Onani teto ithuzithuzi.)

¹⁵ Kodi ninafunjeda n’ni va mawu a Paulo odowa wa Atesalonika? Navwa yongo imo-iwene ineyo kinagwilizana na vyevyo ninafunjeda iyo m’Baibulo kapena mphekesela, ninafuneya panga vyongo mwazelu. Muilambo ineyo vowambeela yaromoliwa ira Soviet Union, adani-u koofalisa kalata yooneya ngati ikumele ulikulu li-u. Kalateyo yoolimbikisa abali amo-iwa ira kapange gulu limo-iliwa lene lavadela loi liviimelelenga vaekiwa. Onga vyoona kalateyo yaoneya ngati  ikumele ulikulu li-u. Koma abali ororomeleya katapusi-iwe. Aliwa koozindikila ira uthenga wamukalateyo kunagwilizana na vyevyo kakalileathu kafunji-iwanga. Malambwano teto adani-u kano-indi-eda chito ndila damakono vofuna nisokoneza koma teto vofuna nipangi-a ira kanigwilizanenga. M’malo molola ira uliwetene achenje maganizwi-u anayo kali olondola, ninokoza viteteza voganizela mosamala ngati vyevyo nivwile iyo kapena vyevyo niwelengile iyo vinagwilizana na makundo a choonadi anayo ninaaiziwa iyo wale. — 2 Ates. 2:2; 1 Yoh. 4:1.

16. Mogwilizana na Aroma 16:17, 18, kodi ninafuneya panga n’ni ngati athu amo-iwa kanapanga vyongo vyosemphana na choonadi?

¹⁶ Pitilizani gwilizana na athu anayo kali ororomeleya wa Yehova. Mulungu unafuna ira nimulambelenga mogwilizana na abali na arongoli-u. Ninokoza pitilizave kala ogwilizana ngati ni-indechechile choonadi. Uliwetene unoyo unapanga vyongo vyosemphana na choonadi, unopangi-a ira athu mupingo katigwilizanenga. Chi chifukwa iwa Mulungu unanilangiza ira ‘niapewenga.’ Ngati kaninapange eno, ninokoza fwanyeya ira nipusi-iwa va choonadi. — Welengani Aroma 16:17, 18.

17. Kodi zindikila koma teto indechecha choonadi unanitandiza avi?

¹⁷ Nazindikila choonadi koma teto i-indechecha, ninokala vausamwali wapama na Yehova koma teto ninokala na iroromelo yolimba. (Aife. 4:15, 16) Kaninapusi-iwa na vyonama koma teto viwembu vya Satana ndipo Yehova unoza apitilize niteteza va chisauso ilukulu. Pitilizani indechecha choonadi “ndipo Mulungu wamurendele unoza akale na nyo.” — Afil. 4:8, 9.