1-2. Kodi Zadoki ali mbaani? (1 Limbili 12:22, 26-28)

 EREKEZELANI ira munoona gulu la athu okwaranya 340 000 anayo kasonkanile ira kamu-ele Davide kala mwene wa Izarayeli. Wamalambo maralu, udela laumimwango vakwikwi na wu Heburoni unovweya phokoso la athu anayo kanaonga, anayo kanateya koma teto imba nyimbo dotamanda. (1 Lim. 12:39) Vagulu la athulo vikala muzombwe m’mo-iwa zina lae Zadoki unoyo kaali oiziweya wa athu anjinji. Koma Yehova unafuna ira iyo niiziwe vyoi liye ali vagulu leli. (Welengani 1 Limbili 12:22, 26-28.) Kodi Zadoki ali mbaani?

² Zadoki ali wasembe unoyo a-inda chito na Abiyatara unoyo ali Ndimuwa wa Asembe. Zadoki ali wamasomphenya unoyo awanda zindikila vyevyo Mulungu unafuna liye ndipo oova-iwa zelu davadela. (2 Sam. 15:27) Athu kafuna malangizo azelu kadowa wa Zadoki. Liye teto ali muthu olimba murima. Mukhanila, ninokambilana vinjinji vya ikalelo yae inela.

3. (a) Chifukwa n’ni atumiki a Yehova kanafuneya kala olimba murima? (b) Kodi ninakambilana n’ni mukhanila?

³ M’malambo omari-ala, Satana unoukela vinjinji athu a Mulungu. (1 Pe. 5:8) Ninafuneya kala olimba murima vevo ninaembekezela iyo ira Yehova amuononge Satana na ilambo yotakalela. (Sal. 31:24) Tiyemoni nikambilane ndila taaru dedo ninasazi-edele iyo limba murima wa Zadoki.

MUKALENGA UMBALI YA UMWENE WA MULUNGU

4. Chifukwa n’ni atumiki a Yehova kanafuneya limba murima ira kakale umbali ya Umwene wa Mulungu? (Onani teto ithuzithuzi.)

⁴ Athu a Yehova iyo, ninoesaesa kala umbali ya Umwene wa Mulungu. Koma ira nipange vyevi ninafuneya kala olimba murima. (Mat. 6:33) Mwaisazo, muilambo yotakalela ninafuneya kala olimba murima ira ni-arelenga makundo a  makalelo apama a Yehova koma teto laleela uthenga wapama wa Umwene. (1 Ates. 2:2) Ninafuneya teto limba murima ira kanivolowele ndale da muilambwela ineyo athuwa kai ogwilizana. (Yoh. 18:36) Atumiki anjinji a Yehova kanogumana na mavuto avyachuma, kanozuzumi-iwa ndipo amo-iwa kano-eliwa mundende chifukwa yokoonda volowela ndale kapena volowa usilikali.

5. Chifukwa n’ni Zadoki afuneya kala olimba murima ira amutandize Davide?

⁵ Zadoki kaadowile wu Heburoni ira adowe akede sangalala ira Davide u-eliwa kala mwene. Oodowa wewo angatukulile vida vyae koma teto angali okozeya vaza kondo. (1 Lim. 12:38) Liye ali ofunechecha mutandiza Davide vakondo yolimbana na adani a Izaraeli. Ngakale ira mwina Zadoki kaan’na luso lovazela kondo, koma ali olimba murima.

6. Kodi isazo yapama ya Davide yamutandizile avi Zadoki? (Sal 138:3)

⁶ Kodi Zadoki unoyo ali wasembe, afunjedile waani kala olimba murima? Liye akala na athu oka anayo kali akopolo koma teto olimba murima. Ndipo visazo viwa vyoomutandiza vinjinji. Mwaisazo, limba murima wa Davide vevo ‘asogolela liye Aizaraeli ukondo,’ oolimbikisa Aizaraeli etene ira kakale umbalae. (1 Lim. 11:1, 2) Thawi detene Davide oodalila Yehova ira amutandize volimbana na adanae. (Sal. 28:7; welengani Salimo 138:3.) Vookala teto alombwana amo-iwa anayo kamutandiza Zadoki kala olimba murima. Mwaisazo, vookala Yehoyada na mwanae Benaya unoyo ali msilikali wakopolo, koma teto vookala asogoleli 22 anayo kali umbali ya Davide. (1 Lim. 11:22-25; 12:26-28) Athu etene anala koosakula kala umbali ya Davide na umwenae.

7. (a) Kodi pivisazo vyamalambwano viivi vyevyo vinanitandize ira nikale olimba murima? (b) Mogwilizana na vidiyo, kodi ninafunjeda n’ni vaisazo ya M’bali Nsilu?

⁷ Ninolimbikisiwa koma teto fwanya kopolo naganizelanga visazo vya athu anayo molimba murima kasimikizile kala umbali ya  ulamulilo wa Yehova. Mwaisazo, Mweni-u Kiristu Yesu ookoonda volowela ndale damuilambo ya Satanela. (Mat. 4:8-11; Yoh. 6:14, 15) Thawi detene Yesu oodalila Yehova ira amuva-e kopolo. Vikala teto visazo vya malambwano vya azombwe anjinji anayo ka-eliwe mundende chifukwa ya vyevyo kanaroromelaathu koma teto chifukwa yokoonda volowela usilikali. Munopanga pama welenga khani diwa va jw.org. a

MUTANDIZENGA ABALINYU

8. Kodi pivathawi iivi vevo andimuwa kanafuneyeathu limba murima ira katandize abaliwa?

⁸ Thawi detene atumiki a Yehova kanotandizana. (2 Akor. 8:4) Komave aliwa thawi dimo-i kanafuneya limba murima ira kapange vyevi. Mwaisazo wakala kondo, andimuwa kanozindikila ira abali na arongoliwa kanafuneya limbikisiwa, va-iwa vyongo vyofuneya vamoyo koma teto yodja yauzimu. Chifukwa yokonda khosa, aliwa kanololela ela moywiwa vangozi ira kapeleke tandizo lofuneya wa abaliwa. (Yoh. 15:12, 13) Kapanganga vyevi kanakalecha kamusazi-edanga Zadoki vakhani yolimba murima.

9. Mogwilizana na 2 Samueli 15:27-29, kodi Davide amuvepile Zadoki ira apange n’ni? (Onani teto ithuzithuzi.)

⁹ Moyo wa Davide wali vangozi. Mwanae Abisalomu ali angasimikizile murima ira amuwake umwene. (2 Sam. 15:12, 13) Veva Davide afuneya venyawo wu Yerusalemu mombaraanya. Liye oawandela atumikae ira: “Kozeyani mombaraanya! Tiyemoni nitawe, chifukwa kalivo unoyo unavulumuwe m’mandani mwa Abisalomu.” (2 Sam. 15:14) Vevo liye na atumikae kanyamukaathu, Davide oozindikila ira vafuneya muthu m’mo-i oyi a-ale ira amuwandelenga vyevyo Abisalomu unakozenga liye. Eno oomutumiza Zadoki na asembe amo-iwa mu mzindoyo ira kadowe ka-inde chito inela. (Welengani 2 Samuweli 15:27- 29.) Aliwa kafuneya panga vyongo mosamala vinjinji chifukwa vyevyo Davide aawandelile liye ira kadowe kapangevi, vyali vyoopi-a koma teto vyali vyo-ela moywiwa vangozi. Abisalomu ali wankhanza, ovikonda koma teto oowapangela chinyengo ababae enieni. Ndiye kakedani ganizela vyevyo apange liye aakale ira oozindikila vyoi Zadoki na asembe amo-iwa ka-alile nayolinga yoi kaonenga vyevyo unakoza liye era eno kadowe kamuwandelenga Davide.

10. Kodi Zadoki na afwae kamutetezile avi Davide?

¹⁰ Davide oomuvepa Zadoki koma teto fwae m’mo-iwa ororomeleya zina lae Husai ira kamutandize vakhani inela. (2 Sam. 15:32-37) Vo-arela malangizwayo, Husai oopangi-a ira Abisalomu aambeele muroromela. Ndipo Husai oopeleka malangizo ovazela kondo anayo kapelekile mpata wa Davide ira avulumuwe. Vanduliviwa Husai oomuwandela Zadoki na Abiyatara vyevyo akozile liyevyo. (2 Sam. 17:8-16) Eno alombwana ambiilayo kootumiza utenga wa Davide. (2 Sam. 17:17) Yehova oomutandiza Zadoki na asembe amo-iwayo ira kamuteteze Davide. — 2 Sam. 17:21, 22.

11. Kodi ninasazi-ede avi limba murima wa Zadoki natandizanga abali-u?

¹¹ Ngati munavepiwe ira mutandize abalinyu vathawi ya mavuto, kodi munatonyi-ede avi limba murima ngati Zadoki? (1) Mu-arelenga malangizo. Vathawi ngati inela munafuneya panga vyongo mogwilizana. Munafuneya arela malangizo okumela wu ofesi ya tambi. (Aheb. 13:17) Thawi na thawi andimuwa kanafuneya onanga vyevyo kakozileathu vakhani yokozeela ngozi koma teto arela malangizo agulu vathawi ya ngozi. (1 Akor. 14:33, 40) (2) Mukalenga olimba murima koma mupangenga vyongo mosamala. (Miya. 22:3) Muwambeelenga ganizela mwaanapange vyongo vimo-iviwa vyene. Muesaesenga ira mukale otetezeya. (3) Mudalilenga Yehova. Muumbuwelenga ira Yehova unoukondani nyo koma teto abalayo, eno unokoza utandizani  ira mupeleke tandizo wa abali koma mungali otetezeya.

12-13. Kodi ninafunjeda n’ni va isazo ya Viktor na Vitalii? (Onani teto ithuzithuzi.)

¹² Kaganizelani isazo ya abali ambiili, Viktor na Vitalii, anayo ka-inda chito yopeleka yodja na ma-inje wa Akiristu afwiwa wu Ukraine. Viktor aongile ira: “Noosaelasaela yodja uliwetene. Thawi dinjinji noovwa athu kaombelananga futi vakwikwi na iyo. Dambo limo-i m’bali m’mo-iwa aongile ira nidowe nalande yodja ushopu wae. Yodja inela yootandiza ofalisa anjinji wathawi yoyeva. Vathawi ineyo nalongeza iyo yodjeyo mugalimoto, bomba loomorela vakwikwi na iyo moi vali mamita 20 kumela vevo nali iyo. Dambo letene lelo ndoopempela wa Yehova ira anditandize kala olimba murima ira ndipitilize tandiza abalanga.”

¹³ Vitalii aongile ira: “Nafuneya limba murima vinjinji. Ulendwanga owambeela ndaendile maola 12. Ndookala ndipempelanga wa Yehova ulendo wetene unola.” Liye aongile teto ira: “Ndoovepa Yehova ira andiva-e zelu koma teto anditandize ira ndikale oviyevi-a. Ndavira m’misewu dedo dali dosomedeleya na boma. Iroromelwanga ilimba vinjinji voona mwemo abali na arongola kanapangelaathu vyongo mogwilizana. Aliwa koochosa vyongo vyevyo vitchingile musewu, chosa koma teto longeza vyodja na vyongo vimo-i mugalimoto koma teto nikozela yodja na malo ogona.”

PITILIZANI KALA OROROMELEYA WA YEHOVA

14. Kodi vinanikuza avi muthu unoyo ninamukonda iyo a-iya tumikela Yehova?

¹⁴ Imo-i mwa vyongo vyevyo vinaesa vinjinji iroromelwi-u koma teto nifooki-a pavevo bali-u kapena fwi-u u-iile liye tumikela Yehova. (Sal. 78:40; Miya. 24:10) Ngati namukonda vinjinji muthuyo, vinakala vyorucha vinjinji ira nisomedele vyevyo viireilevyo. Ngati nanyen’ne teto vyevi vyauireelevoni, isazo ya Zadoki inokoza ulimbikisani ira mukaleve ororomeleya.

15. Chifukwa n’ni Zadoki afuneya kala olimba murima ira apitilize kala ororomeleya wa Yehova? (1 Mamwene 1:5-8)

¹⁵ Zadoki oosakula kalave ororomeleya wa Yehova vevo fwae Abiyatara asakulile liye panga vyongo mo-ororomeleya. Vyevi vyaireile umapeto wa ulamulilo wa Davide. Davide anga-alile vang’ono khwa, mwanae Adoniya oofuna waka umwenae ngakale ira Yehova ali angalonjezile ira Solomo ngunoyo unaze akale mwene. (1 Lim. 22:9, 10) Abiyatara oosakula kala umbali ya Adoniya. (Welengani 1 Mamwene 1:5-8.) Vopanga vyevi, Abiyatara ootonyi-eda ira kaali ororomeleya wa Davide na Yehova. Kodi munaganiza ira Zadoki avwile avi chifukwa ya vyevi? Wa chaka dokwaranya 40, liye na Abiyatara kali kanga-indele chito limo-i monga asembe. (2 Sam. 8:17) Vathawi imo-iwa aliwa kootandizana tukula “likasa la Mulungu oona.” (2 Sam. 15:29) Vowambeela etene anala kali umbali ya Davide na umwenae ndipo koopanga vinjinji votumikela Yehova. — 2 Sam. 19:11-14.

16. Kodi chin’ni yamutandizile Zadoki ira akaleve ororomeleya?

¹⁶ Zadoki ookalave ororomeleya wa Yehova ngakale ira Abiyatara oopanga vyongo mo-ororomeleya. Davide ka-iile muroromela Zadoki. Chiwembu ya Adoniya ingaiziweile, Davide oomusakula Zadoki, Natani na Benaya ira kamuzoze Solomo kala mwene. (1 Mam. 1:32-34) Kala vaari va atumiki ororomeleya monga Natani na amo-iwa anayo kali umbali ya Davide, kuwewo wamulimbikisile Zadoki. (1 Mam. 1:38, 39) Solomo angakalile mwene, oomusakula “wasembe Zadoki ira avolowe m’malo mwa Abiyatara.” — 1 Mam. 2:35.

17. Kodi munamusazi-ede avi Zadoki ngati muthu unoyo munamukonda nyo u-iile tumikela Yehova?

 ¹⁷ Kodi ninamusazi-ede avi Zadoki? Ngati muthu unoyo munamukonda nyo u-iile tumikela Yehova, nyo mutonyi-edenga ira munofuna kalave ororomeleya. (Yos. 24:15) Yehova unoza auva-eni kopolo koma teto ulimbikisani. Mumudalilenga vopempela wa liye koma teto pitiliza kala vausamwali na Akiristu afwinyu ororomeleya. Yehova unoona roromeleya winyu ndipo unoza auva-eni mphoto.— 2 Sam. 22:26.

18. Kodi ninafunjeda n’ni va vyevyo vyamuireele Marco na Sidse?

¹⁸ Kaganizelani vyevyo vyamuireele Marco na iyanae Sidse, anayo a-imiwa ambiili aa-iyana ka-iile choonadi. Marco aongile ira: “Makolo kanowakonda a-imiwa kumela vevo kabaliweathu. Aliwa kanopanga iliyetene ineyo kanawandeathu ira kaateteze. Eno kasakula iya tumikela Yehova vinakala vyovoreya vinjinji.” Liye aongile teto ira: “Koma Yehova ukala anitandizanga ira nivilele. Liye ukala aonechechanga ira vevo ndifookile miyo, iyananga akaena kopolo, ndipo vevo iyananga ufookile liye, miyo ndikaena kopolo.” Sidse ooenjedela ira: “Kanakwakwani-e vilela aakale ira Yehova kaniva-ile kopolo dedo nafuneya iyo. Ndoovuteya na maganizo oona ira miyo ngunoyo ndapangi-ile vyongo vyetene vyevyo, eno ndoomuwandela Yehova mwemo ndavwela miyo. Vangavirile thawi yoyeva, murongola m’mo-iwa unoyo nali iyo na-anaonane wa chaka dinjinji ooza zaniona. Liye oondi-inda m’mafudi nondiing’ana ndipo oondiwandela ira, ‘Sidse umbuwela ira vuto kai weyo.’ Motandiziwa na Yehova, ndikwakwani-a pitiliza mutumikela mosangalala.”

19. Kodi muli ofunechecha panga n’ni?

¹⁹ Yehova unafuna ira atumikae etene kakale olimba murima ngati Zadoki. (2 Tim. 1:7) Komave unafuna ira kanikedenga dalila kopolo di-u. Liye unafuna ira nimudalilenga. Eno mwagumana na vyongo vimo-i vyofuna ira mutonyi-ede limba murima, mupempelenga ira autandizeni. Kamukaikelenga ira liye unoza autandizeni ira mukale olimba murima vinjinji ngati Zadoki. — 1 Pe. 5:10.