Mafuso Okumela wa Owelenga
Kodi “Iyana” oromoliwa va Yesaya 60:1, ngu mbaani, nanga ‘aimelele’ moi avi koma teto awoni-ile avi “wala”?
Lemba la Yesaya 60:1 linaonga ira: “Kaimelela iyanawe! Oni-a wala wawo, chifukwa wala wawo ufiya. Ulemelelo wa Yehova uumoneela.” Khani yetene inotonyi-eda ira “iyanola” ali Zioni kapena Yelusalemu, unoyo ali likulu la Yuda va thawi ineyo. a (Yesaya 60:14; 62:1, 2) Mzindola waimelela tundu wa Izaraeli. Mawu anayo Yesaya aongile liye, kanozi-a mafuso meeli: Lowambeela, chi alini vevo Yelusalemu ‘aimelele liye’ koma teto oni-a wala, nanga apangile avi vyevi? Lanambili, kodi mawu a Yesaya anala kanokwakwaneli-ediwa muthawi-u?
Chi alini vevo Yelusalemu ‘aimelele liye’ koma teto oni-a wala wae, nanga apangile avi vyevi? Vathawi ineyo Ayuda kaliathu uukapolo wu Babulo wa chaka 70, Yelusalemu na kachisae ali angali dembe. Koma Ababulo kangagonji-iwe na Amedi na Aperisiya, Aizaraeli anayo kakala m’madela olamuleliwa na Ababulo koomasuliwa ira kawelele waniwa nodowa weli-eda lambela oona. (Ezara 1:1-4) Ambeela mu 537 B.C.E., athu ororomeleya anayo ka-alile m’mafuko etene 12 koowelela. (Yes. 60:4) Aliwa koowambeela peleka sembe wa Yehova, panga vikondwelelo koma teto manga nawili kachisi. (Ezara 3:1-4, 7-11; 6:16-22) Veva ulemelelo wa Yehova oowambeela nawili moneela Yelusalemu, tantauza athu a Mulungu anayo kawelele waniwa. Vanduli viwa naaliwene teto koowambeela wala vaari va athu amitundu dimo-i anayo katamuiziwa Yehova.
Koma maulosi a Yesaya oonga vyoweli-ediwa, kali kangakede kwakwaneli-ediwa vang’ono vathawiyo. Aizaraeli anjinji katapitilizile vwela Mulungu. (Nehe. 13:27; Mala. 1:6-8; 2:13, 14; Mat. 15:7-9) Vanduli viwa, koofiya vomukoonda Yesu Kiristu, unoyo ngu Mesiya. (Mat. 27:1, 2) Mu 70 C.E., Yelusalemu na kachisae oowonongiwa nawili.
Yehova oovaela onga ira vyevi vinoza viireye. (Dan. 9:24-27) Eno, kayali yolinga yae ira Yelusalemu wavailambo yavati akwakwaneli-ede mbali iliyetene ya ulosi wava Yesaya chaputala 60, oonga vyoweli-eda.
Kodi mawu a Yesaya kanokwakwaneli-ediwa muthawi-u? Ee, koma kanokwakwaneli-ediwa teto va iyana opipilisa, unoyo ngu “Yelusalemu waudimu.” Voonga vya iyanola, mtumwi Paulo alembile ira: “Ngu m’mi-u”. (Agal. 4:26) Yelusalemu waudimu chimbali ya udimu ya gulu la Mulungu, la angelo ororomeleya. “A-ima” ngu Yesu limo-i na Akiristu ozoziwa okwakwana 144 000, anayo mofwanafwana na Paulo, kan’na chiyembekezo yaudimu. Aliwa kanopanga “tundu owela,” unoyo ngu “Izaraeli wa Mulungu.” — 1 Pe. 2:9; Agal. 6:16.
Kodi Yerusalemu waudimu ‘aimelele’ avi, nanga aoni-ile avi “wala”? Liye oopanga vyevi zela mwa a-imae ozoziwa vailambo yavati. Tiyemoni nione fwanafwana wa vyevyo vyaaireele na vyevyo vyaloseliwe va Yesaya chaputala 60.
Akiristu ozoziwa kafuneya ‘imelela’ chifukwa kali mudima opipilisa vathawi ineyo mpatuko wafalikeleathu atumwi etene kangakwile. (Mat. 13:37-43) Eno, aliwa kali muukapolo wa Babulo Mulukulu, unoyo uli vipembezo vyetene vyonama. Ozoziwa kali kangali muukapolo mpakana “mapeto a thawiila,” anayo kambeelile mu 1914. (Mat. 13:39, 40) Vangavirile thawi yoyeva, mu 1919, aliwa koomasuliwa ndipo thawi ineyo koowambeela oni-a wala vo-inda chito yolaleela mwatindi. b Wachaka detene dedi, athu okumela m’mitundu detene kookala ka-arelanga wala wewu tangani-avo athu a Izaraeli wa Mulungu anayo ka-alile, anayo kali “mamwene” oromoliwa va Yesaya 60:3. — Chiv. 5:9, 10.
Usogolowu, Akiristu ozoziwa kanoza kaoni-e vinjinji wala wa Mulungu. Kodi kanaza kapanga avi vyevi? Kaza kamari-a utumikiwa vailambo yavati, aliwa kanoza kakale mbali ya “Yelusalemu musha” kapena mkwatibwi wa Kiristu, tantauza ira kanoza kakale mamwene na asembe 144 000. Mzinda opipilisola unoyo unatita kumela udimu wa Mulungu, unoza ukale likulu la mbali yaudimu ya gulu la Yehova, lelo lili “Yelusalemu waudimu.” — Chiv. 14:1; 21:1, 2, 24; 22:3-5.
Yelusalemu Musha unoza apange vinjinji vokwakwaneli-eda lemba la Yesaya 60:1. (Erekezelani na Yesaya 60:1, 3, 5, 11, 19, 20 na Chivumbuluso 21:2, 9-11, 22-26.) Yelusalemu wavailambo yavati ali likulu la boma la Izaraeli wawale, eno naliyene Yelusalemu Musha limo-i na Kirisitu kanoza kakale boma na ulamulilo usha. Kodi Yelusalemu Musha unatita avi “kumela udimu wa Mulungu”? Unopanga vyevi vopanga vyongo vyevyo vinakuza ilambo yavati. Athu oova Mulungu okumela m’mitundu detene kanoza ‘kamoneeliwe nowala wae.’ Aliwa kanoza kamasuliwe teto uuchimo nokhwa. (Chiv. 21:3, 4, 24) Vyo-arelavo viwa pivyoi vyongo vyetene vinoza viweli-ediwe ngati mwemo Yesaya na aneneri amo-iwa kaongeleathu. (Vyo. 3:21) Weli-ediwa ulukulu oowambela vevo Kiristu akalile liye Mwene ndipo unaza umala mu Ulamulilo wa Chaka 1 000.
a Va Yesaya 60:1, Baibulo la Dziko Latsopano lino-indi-eda chito mawu oyi “iyana” o-okala “Zioni” kapena “Yelusalemu,” chifukwa mawu Achiheberi anayo kamasuleliwe ira “imelela” koma teto “oni-a wala,” kanotonyi-eda ira unoyo unawandeliwoyo ngu iyana, ngati mwemo teto vililiathu na mawu oyi “weyo.”
b Weli-ediwa olambela oona wewo waireile mu 1919, kuwewo unafotokoziwa teto va Ezekieil 37:1-14 na Chivumbuluso 11:7-12. Ezekieli oowongelaatu ira Akiristu etene ozoziwa kanoza kamasuliwe uukapolo vanduli vathawi yolapa. Ulosi wava Chivumbuluso unoonga vyobaliwa opipilisa wa gulu ling’onong’ono la abali ozoziwa anayo kaambeele nawili sogolela vanduli vokala thawi yolapa ka-awandanga tumikela Yehova pamapama chifukwa yoi koomangiwa mookaana chilungamo. Mu 1919, aliwa koo-eliwa kala “kapolo ororomeleya koma teto wazelu.” — Mat. 24:45; onani buku loi A Adoração Pura de Jeová É Restaurada! Takuru 118.
