Mafuso Okumela wa Owelenga
Kodi mawu oyi “Munoza Muwaing’anele” ofwanyeya va Salimo 12:7, kanaonga vya “ovuteya” (vesi 5) kapena “mawu a Yehova” (vesi 6)?
Khani yetene inatonyi-eda ira mawu amuvesi leli kanaonga vya athu.
Va Salimo 12:1-4, ninawelengecha ira “Athu ororomeleya kanoza kamale vaari va athu.” Sopano tiyemoni nikambirane Salimo 12:5-7, anayo kali mavesi anayo vakumele fuso leli, Mawuwa mboi:
“‘Yehova unaonga ira: ‘Chifukwa yoi ovuteya kanopondeleziwa,
Chifukwa yozuzuma wa moyo wa athu osauwa’,
Ndinoza ndimaruwe nopangavo yongo.
‘Ndinoza ndiavulumuche wa athu anayo kanaanyoza.’
Mawu a Yehova mbowela.
Kali ngati siliva osefiwa mung’anjo yateya thawi dokwakwana 7.
Nyo Yehova munoza muwaing’anele.
Uliwetene wa aliwa munoza mumuteteze wu m’badwo ula mpakana walewale.”
Vesi 5 linofotokoza vyevyo Mulungu unaze liye apangele athu ovuteya. Liye unoza aavulumuche.
Vesi 6 Linoenjedela ira “Mawu a Yehova mbowela. Kali ngati siliva osefiwa.” Vi vinatonyi-eda mwemo Akiristu etene ovipeleka kanavwelaathu voonga vya Mawu a Mulungu. — Sal. 18:30; 119:140.
Sopano tiyemoni nikambirane vesi lo-arela, va Salimo 12:7 vanaonga ira: “Nyo Yehova munoza muwaing’anele. Uliwetene wa aliwa munoza mumuteteze wu m’badwo ula mpakana walewale.” Kodi mawu oyi “munoza muwaing’anele” kanaonga vya mbaani?
Voi mawu amuvesi 7 kanaza vanduli wa mawu amuvesi 6 oyi “mawu a Yehova,” athu amo-iwa kanokoza ganizanga ira vyevi vinatantauza ira Mulungu ‘unoing’anela mawae.’ Ninoiziwa ira liye ukala aing’anelanga kapena ira teteza Baibulo, ngakale ira athu oruni-a koesaesa liwononga koma teto runi-a ira kalifwanyeyenga. — Yes. 40:8; 1 Pe. 1:25.
Komave, vyevyo teto vesi 5 linafotokozaathu pivyoona. Yehova ukala atandizanga koma teto vulumucha “ovuteya” na “opondeleziwa” ndipo unopitilizave panga vyevi. — Yobu 36:15; Sal. 6:4; 31:1, 2; 54:7; 145:20.
Ndiye kodi mawu oyi “munoza muwaing’anele” amuvesi 7 kanatantauza n’ni?
Khani yetene mu Salimo leli inatonyi-eda ira mawu oyi “munoza muwaing’anele” kanaonga vya athu.
Va Salimo 12:1 na 2 kanofotokozavo vya “athu ororomeleya” anayo kakalile kanami-iwanga. Vanduli viwa va vesi 3 ninofwanyavo mawu otonyi-eda ira Yehova unoza alange athu anayo kana-indi-eda chito lumi liwa voonga vyongo vyotakala. Salimo leli linonisimikizela ira Mulungu unoza atandize athwae chifukwa mawae mbowela.
Eno vesi 7 linaonga ira Yehova ‘unoza aaing’anele’ kapena ira teteza athu anayo kanavuti-iwa na athu otakala.
Mawu oyi “munoza muwaing’anele” kanofwanyeya m’malemba a Chimasorete. Baibulo la Septuagint lino-indi-eda teto chito mawu oyi “munoza muwaing’anele” maulendo ambiili muvesi 7, tonyi-eda ira kanaongave vya athu ororomeleya anayo kanavuteya koma teto pondeleziwa. Vomari-a vesi 7 linaonga ira “uliwetene” wa ororomeleyayo ‘unoza ateteziwe wu m’badwo ula,’ anayo mba athu anayo kanalimbikisa vyotakala. (Sal. 12:7, 8) Baibulo la Chiaramu lomasulela Malemba a Chiheberi mbali yowambeela ya vesi 7 koo-indi-eda teto chito mawu oyi “munoza muwaing’anele” ndipo kanovweya teto ira: “Nyo Mbwiyeni, munoza muteteze olungama, “munoza muwaing’anele” wu m’badwo otakalola mpakana walewale.” Vyevi vinopeleka umboni umo-iwa teto otonyi-eda ira Salimo 12:7, kalinaonga vya mawu a Mulungu.
Vachifukwa inela, vesili linopeleka chiyembekezo wa “athu ororomeleya” ira Mulungu unoza apangevo yongo ira aatandize.
