1. Salimo 18:46 kodi Davide amuyerekezele Yehova na n’ni?

 MUILAMBWELA mavuto amwazizizi kanokoza sokoneza kapena chenja moywi-u. Koma murimi-u unokala m’malo voiziwa ira nikaana Yehova Mulungu unoyo unanitandize. Mukhani ivirilele noumbuchiwa ira Yehova ngu Mulungu wa moyo ndipo ngokozeya nitandiza. Liye anitandiza vinonisimikizela ira “Yehova ngwa moyo.” (Welengani Salimo 18:46.) Koma Davide angakede romola ira Yehova ngwa moyo, Davide oomuromola Mulungu ira tanthwe langa. Chifukwa n’ni liye amuyerekezele Yehova Mulungu wa moyo na tanthwe lelo kaliina moyo?

2. Kodi ninafunjedavo n’ni va vyevyo Davide aongile liye ira Yehova ngu “Tanthwe langa”?

² Mukhanila, ninoona chifukwa iwa Yehova unaerekezeliwa liye na tanthwe koma teto vyevyo fanizoli linanifunji-aathu vyokuza liye. Ninofunjeda teto vyevyo vinapange iyo ira nimudalilenga monga tanthwe li-u. Vomari-a ninoona mwemo ninasazi-edele iyo makalelo a Yehova.

CHIFUKWA N’NI YEHOVA UNAROMOLIWA IRA TANTHWE?

3. Kodi mawu oyi “tanthwe” kana-indi-edeliwa chito avi m’Baibulo? (Onani teto ithuzithuzi va takuru lowambeela.)

³ Baibulo linomuerekezela Yehova na tanthwe vofuna nitandiza vwechecha makalelo anayo una liye. Thawi dinjinji mawu anala kanafwanyeya mukhani domutamanda dotonyi-eda ira kavali ofwanafwana na liye. Malo owambeela vevo Yehova unaromoliwa liye ira “tanthwe” pava Dotoronomo 32:4. Koma teto vopempela Hana oonga ira “kavali tanthwe lofwanafwana na Mulungwi-u.” (1 Sam. 2:2) Habakuku oomuromola teto Yehova ira “tanthwe langa.” (Hab. 1:​12) Unoyo alembile Salimo 73 oomuromola teto Mulungu ira “tanthwe la murimanga.”  (Sal. 73:26) Koma teto Yehova mwinyailo ooviromola ira tanthwe. (Yes. 44:8) Tiyemoni nikambilane makalelo maralu anayo kanapangi-a Yehova kala tanthwe koma teto vyevyo ninapange iyo ira nimuonenga ngati “tanthwe li-u.”— Doto. 32:31.

4. Kodi Yehova unakala avi malo otawelavo? (Salimo 94:22)

⁴ Yehova mbamalo otawelavo. Mofwanafwa na tanthwe lilukulu lelo muthu unavitalewo liye chifukwa ya lipevo la kopolo, Yehova unoniteteza vathawi ineyo ninagumana iyo na mavuto. (Welengani Masalimo 94:22.) Liye unoniteteza ira mavutwi-u katiwononge usamwali-u na liye. Unonilonjeza ira unoza amali-e iliyetene ineyo inapangi-a ira nikaanenga khawa koma teto mavuto etene. — Ezek. 34:25, 26.

5. Kodi ninapange avi ira Yehova akale malwi-u otawelavo?

⁵ Ndila imo-i ineyo ninadowelena iyo wa Yehova ngati Tanthwe li-u, kupempela wa liye. Napempela, Yehova unoniva-a murendelae unoyo unateteza maganizo na murimi-u. (Afil. 4:​6, 7) Isazo vakhanila ngu m’bali Artem, unoyo amangiwile chifukwa ya vyevyo unaroromela liye. Liye oofukiwa mafuso vakwikwi vakwikwi na muthu wa khaza unoyo amuopopi-a koma teto munyaswi-a. Artem aongile ira: “Thawi detene kandiitana ndokaana m’khawa ndopempela wa Yehova. Ndomuvepa ira andiva-e murendele wa m’murima koma teto zelu.” Ngakale ira muthuyo apanga vyetene vyevyi, murimanga wali m’malo. “Chifukwa yoi Yehova oonditandiza, ndipo vyakala ngati ndiimela useli wachisi la libwe.”

6. Chifukwa n’ni thawi detene ninafuneya roromela Yehova? (Yesaya 26:3, 4)

⁶ Yehova ngodalileya. Mofwanafwana na tanthwe lelo kalinasusa, Yehova thawi detene unokozeya ira anitandize. Ninafuneya mudalila chifukwa liye ngu tanthwe la muyaya.” (Welengani Yesaya 26:3, 4.) Liye unoza akalevo thawi detene ira akwakwaneli-ede malonjezwae, ira asomede mapempelwi-u koma teto aze anitandize. Ninokoza mudalila teto Yehova chifukwa yoi unokala ororomeleya wa athu anayo kanamutumikela. (2 Sam. 22:26) Liye kanaza adiwala vyevyo ninapanga iyo ndipo unoza aniva-e mphoto. — Aheb. 6:​10; 11:6.

7. Kodi inaireye chin’ni naroromelanga vinjinji Yehova? (Onani teto ithuzithuzi.)

⁷ Yehova unokala tanthweli-u namudalilanga namurima wetene. Ninomuroromela ira vyongo vinoniendela pama namuvwelanga ngakale vathawi yorucha. (Yes. 48:17, 18) Naona anitandizanga pavevo teto ninamuroromelanga iyo vinjinji. Ninororomela ira Yehova yeka ngonoyo unanitandiza vilela mavuto ngakale kangali alukulu vinjinji. Ngakale ira kalivo uliwetene onitandiza, ninozindikila ira Yehova ngodalileya. M’bali Vladimir aongile ira: “Vathawi ineyo nda-eeliwe miyo mundende pavevo ndaona miyo ira usamwalanga na Yehova ngolimba vinjinji. Ndoofunjeda roromela Yehova chifukwa ndalimekave ndipo kalivo uliwetene unoyo anditandize.”

8. (a) Chifukwa n’ni ninaonge ira Yehova kanachenja? (b) Kodi ona ira Yehova ngu tanthwe li-u unanitandiza avi? (Salimo 62:6, 7)

 ⁸ Yehova kanachenja. Mofwanafwana na tanthwe lilukulu, Yehova unokala chimozimozi thawi detene. Liye kanachenja makalelwae koma teto yolinga yae. (Mal. 3:6) Adamu na Hava kangakondile muvwela mu Edeni, Yehova kaachenjile vyolinga yae. Mogwiliza na vyevyo Mtumwi Paulo alembile liye, Yehova “kanavikoonde.” (2 Tim. 2:​13) Vyevyi vinatantauza ira kaya vaireile vyongo vyoi avi, kaya athu amo-iwa kapange vyoi avi, Yehova kanaza achenja makalelwae, yolinga yae koma teto makundwae. Voi Yehova kanachenja ninoiziwa ira liye unoza anitandize vathawi yorucha koma teto unoza akwakwaneli-ede malonjezwae usogolou. — Welengani Salimo 62:6, 7.

9. Kodi ninafunjedavo n’ni va vyevyo vyamuireele Tatyana?

⁹ Ninoona ira Yehova ngu tanthwe li-u naganizelanga makalelwae koma teto yolinga yae. Panga vyevyi unonitandiza ira kanisokonezeye maganizo nagumana na maeselo. (Sal. 16:8) Vi pivyevyo vyamuireele murongola m’mo-iwa zina laye Tatyana onoyo ali vandende yo-ovenyavo vande chifukwa ya vyevyo unaroromela liye. Liye aongile ira: “Ndakala mekave. Vowambeela vyali vyorucha. Ndipo thawi dinjinji ndookumudwa.” Koma angaganizele gwilizana vaari va mayeselwae na yolinga ya Yehova oowanda vilela ndipo maganizwae kookala m’malo. Liye aongile ira: “Vwechecha chifukwa iwa vi vyaireya oonditandiza umbuwela ira ndinagumana na mavuto anala chifukwa yotumikela Yehova. Vyevyi vinditandiza ira kandiganizelenga vinjinji vya miyo.”

10. Kodi ninapange avi ira Yehova akale tanthwe li-u panopa?

¹⁰ Usogolowu, ninoza nigumane na maeselo anayo kanafuneya ira nidalilenga Yehova kwaranya wale. Ila chithawi yoi niroromelenga vinjinji ira Yehova unoza aniva-e iliyetene ineyo ninafuneya iyo ira nipitilize mutumikela mororomeleya. Kodi ninapange avi vyevi? Niwelengenga khani da m’Baibulo koma teto vyokuza atumiki a Yehova amalambwano. Nionenga mwemo Mulungu utonyi-edile liye ira ulingati tanthwe votandiza atumikae. Niganizelenga modii-a khani dedi. Nera eno nionenga ira Yehova ngu tanthwe li-u.

NISAZI-EDENGA MAKALELO A YEHOVA

11. Chifukwa n’ni ninafuneya sazi-eda makalelo Yehova? (Onani bokosi loi “ Vyolinga vyevyo azombwe kanakaenaathu.”)

¹¹ Niikambilana mwemo Yehova munatonyi-eda liye ira uli ngati tanthwe. Sopano tiemoni nikambilane mwemo ninasazi-ede iyo makalelwae. Naesaesanga sazi-eda makalelo anala ninoza nilimbikise vinjinji abali na arongoli-u. Mwaisazo, Yesu oomuva-a Simoni zina loyi Kefa (lelo linamasuleliwa ira “Petulo”), ndipo linotantauza “libwe.” (Yoh. 1:​42) Vyevyi vinatonyi-eda ira liye unoza alimbikise athu amo-iwa mupingo koma teto atandiza kala na iroromelo yolimba. Andimuwa mupingo kanaoyerekezeliwa  na “murisi wa tanthwe lilukulu.” Mawu anala kanotonyi-eda mwemo kanatetezelaathu athu mupingo. (Yes. 32:2). Etene iyene, kaya nili abali kapena arongola, ninokoza limbikisa athu mupingo nasazi-edanga makalelo a Yehova.​ — Aife. 5:1.

12. Kodi ninapange avi ira nikale malo otawelavo wa abali na arongoli-u?

¹² Nikalenga malo otawelawo. Thawi dimo-i ninafuneya peleka malo otawelawo wa abali-u ngati uwireile ngozi da muchilengedwe, vipolowe kapena kondo. Vevo vyongo vinapitilizaathu takala malambo omari-ala, mookaikela ninafuneya tandizananga na abali na arongoli-u. (2 Tim. 3:1). Ninafuneya teto limbikisa abali-u anayo kan’na khawa koma teto atandiza ira usamwaliwa na Yehova ukale olimba. Ndila imo-i ineyo ninapangele iyo vyevi kuwawachela pama va Nyumba ya Umwene ndipo vyevi vinokoza tandiza ira athu mupingo kakondanenga. Muilambwela athu kanopangelana nkhaza ndipo vi vinopangi-a ira amo-iwa kakaanenga khawa koma teto kavivwenga ira katinakondiwa. Eno abali na arongola kafiya va misokhano, ninafuneya panga vyongo vyetene vyevyo vinawande iyo ira niwatandize vivwa ira kanokondiwa koma teto mbotetezeya.

13. Kodi andimuwa kanapange avi ira kakalenga malo otawelavo vathawi ya mavuto? (Onani teto ithuzithuzi.)

¹³ Andimuwa kanokoza kala malo otawelawo wa abali na arongola anayo kanagumana na mavuto o-iyana-iyana. Vaireya ngozi damuchilengedwe kapena vafuneya tandizo la chipatala mombaraanya, andimuwa kanoesaesa ira katandize abali na arongola. Aliwa kanowalimbikisa teto na makundo a Baibulo. Abali na arongola kanomasuwa dowa wa ndimuwa ngati kanaiziwa ira liye ngofaasa, oganizela amo-iwa koma teto unovuruwana. Makalelo ngati anala kanotandiza amo-iwa vivwa ira kanokondiwa ndipo vinokala vyo-orucha ira aliwa ka-arele  malangizo okumela m’Baibulo anayo ndimuoyo unapeleke liye.​ — 1 Ates. 2:​7, 8, 11.

14. Kodi ninapange avi ira nikake athu ororomeleya?

¹⁴ Nikalenga odalileya. Ninofuna ira athu amo-iwa kanidalilenga simbwasimbwa vathawi ya mavuto. (Miya. 17:17) Kodi ninapange avi ira nikale athu odalileya? Ninafuneya esaesa tonyi-eda makalelo apama thawi detene. Mwaisazo, niesaesenga kwakwaneli-eda vyevyo nilonjezile iyo koma teto esaesa sunga thawi. (Mat. 5:​37) Muthu m’mo-iwa avuteya, niesaesenga teto mutandiza. Enjedela vevo, nikwakwaneli-edenga chito ineyo niva-iwe iyo koma teto ni-arelenga malangizwayo.

15. Kodi andimuwa ororomeleya kanatandiza avi mpingo?

¹⁵ Andimuwa odalileya kanotandiza vinjinji pingo. Kodi aliwa kanapanga avi vyevi? Ofalisa kanakaana khawa aiziwa ira unokoza onga na andimuwa, simbwasimbwa oing’anela gulu liwa, thawi ilietene. Ofalisa kanovivwa teto ira kanokondiwa kaiziwa ira andimuwa mbo kozeya atandiza. Ndipo andimuwa kapelekanga malangizo okumela m’Baibulo koma teto  mabukwi-u o-okala maganizwiwa, abali na arongola kanowaroromela. Abali na arongola kanororomela teto ndimuwa unoyo kanaulula khani da chisisi koma teto unoyo unapanga vyevyo ulonjezile liye.

16. Kodi iyovano koma teto athu amo-iwa ninapindula avi nakala oochenja vopanga vyongo vyofwanelela?

¹⁶ Kanichenjenga. Ninokoza kala isazo ya pama wa athu amo-iwa ngati kaninachenja vopanga vyongo vyofwanelela koma teto arela makundo a Baibulo vosakula vyoira. Naesaesanga limbi-a iroromelo yi-u koma teto iziwa vyongo vinjinji, ninogarateya mu choonadi. Kaninavuteya sakula vyoira ndipo kaninalandeya mo-orucha na viphuziso vyonama koma teto maganizo amuilambwela. (Aife. 4:​14; Yak. 1:​6-8) Roromela Yehova koma teto malonjezwae unonitandiza ira kanigwedezeye navwa uthenga otakala. (Sal. 112:​7, 8) Ninokoza tandiza athu anayo kanagumana na maeselo.​ — 1 Ates. 3:​2, 3.

17. Kodi andimuwa kanatandiza avi athu amo-i ira kakale odeka?

¹⁷ Andimuwa kanafuneya kala o-opanga vyongo mopitilila malile, oganiza pama, opanga vyongo mwadongosolo koma teto ololela. Alombwana anala kanotandiza athu mupingo kala odeka koma teto roromela vinjinji Yehova vo-inda mwakopolo mawu mororomeleya. (Tito 1:9; 1 Tim. 3:​1-3) Isazo ya andimuwa koma teto maulendwiwa aubusa, kanotandiza ofalisa ira thawi detene kafwanyeenga va misokhano, kavolowenga muutumiki koma teto kafunjedenga vaekiwa. Abali na arongola kagumana na mavuto anayo kanaapangi-a ira kakaena khawa, andimuwa kanowalimbikisa ira kaganizelenga vinjinji vya Yehova koma teto vyolinga vyae.

18. Chifukwa n’ni ninafuneya mutamanda Yehova koma teto esaesa ira nikale na liye vausamwali pakana walewale? (Onani teto bokosi loi “ Vyevyo ninapange iyo ira nikale vausamwali wapama na Yehova.”)

¹⁸ Vanduli vokambilana makalelo a Yehova, ninokoza onga ngati Mwene Davide unoyo aongile ira: “Atamandeye Yehova, tanthwe langa.” (Sal. 144:1) Yehova unoza apitilize kala Mulungu odalileya. Va moywi-u wetene paka ningakalambile, niroromelenga ira unopitiliza nitandiza ira nikalenae vausamwali olimba. Ndipo ninokoza onga ira “liye ngu tanthwe langa.”— Sal. 92:14, 15