KHANI YOFUNJEDA 25
NYIMBO 7 Yehova Ndiye Mphamvu Zathu
Mumuumbuwelenga Yehova Unoyo ngu “Mulungu Wamoyo”
“Yehova ngwamoyo” — SAL. 18:46.
VYEVYO NINAFUNJEDE IYO
Khanila inonitandiza ona ira ninopindula ira “Mulungu unoyo ninamulambela iyo ngwamoyo.”
1. Kodi chin’ni inatandiza athu a Yehova ira kapitilizengave mulambela ngakale ira kanogumana na mavuto?
BAIBULO linaonga ira “thawi ineyo ninakala iyola chiavadela koma teto yorucha.” (2 Tim. 3:1) Enjedela va mavuto anayo uliwetene unagumanana liye muilambwela, athu a Yehova kanoruni-iwa koma teto zuzumi-iwa. Chin’ni inanitandize ira nitumikelengave Yehova ngakale vevo ninagumana iyo na mavuto anala. Yongo imo-i ineyo inanitandiza kuiziwa ira Yehova ‘Mulungu ngwamoyo.’ — Yer. 10:10; 2 Tim. 1:12.
2. Chifukwa n’ni ninaonge ira Yehova ngu Mulungu wamoyo?
2 Yehova unoona mavuto anayo ninagumanana iyo ndipo thawi detene unofunechecha nitandiza. (2 Lim. 16:9; Sal. 23:4) Umbuwela ira Mulungu ngwamoyo unokoza nitandiza limbana na vuto lililetene lelo ninagumanena iyo. Tiyeni nione mwemo iziwa vyevyi wakami-edeleathu Mwene Davide.
3. Kodi Davide atantauza n’ni vevo aongile liye ira “Yehova ngwamoyo”?
3 Davide oomuiziwa Yehova ndipo oomudalila. Vevo Mwene Sauli na adanae kafunaathu mupha, Davide oopempela wa Yehova ira amutandize. (Sal. 18:6) Mulungu angasomedile pempelo lae nomuvulumucha, Davide aongile ira: “Yehova ngwamoyo.” (Sal. 18:46) Voonga mawu anala, Davide kaatantauza ira akeda iziwa ira Mulungu ukalawo. Buku limo-i laongile ira, Davide oororomela ira Yehova “ngu Mulungu wamoyo unoyo unatandizecha athwae thawi detene. Vyevyo vyaireile vamoyo wa Davide vyoomusimikizela ira Yehova ngu Mulungu wamoyo ndipo vyoomulimbikisa ira apitilize mutumikela koma teto mutamanda. — Sal. 18:28, 29, 49.
4. Kodi iziwa ira Yehova ngu Mulungu wamoyo unanitandiza avi?
4 Roromela ira Yehova ngu Mulungu wamoyo unokoza nitandiza ira nimutumikelenga na murima wetene. Ninoza nifwanye kopolo ira nivilelenga maesero koma teto ira nipangenga vinjinji vomutumikela. Ninoza nikale teto ofunechecha pitiliza kala nae vausamwali.
MULUNGU WAMOYO UNOZA AUVA-ENI KOPOLO
5. Chin’ni inanitandize ira nikale olimba murima nagumananga na mavuto? (Afilipi 4:13)
5 Ninokoza vilela maesero a tundu uliwetene kaya ang’onong’ono kapena alukulu ngati ninaumbuwela ira Yehova ngwamoyo ndipo unofunechecha nitandiza. Ndipo kavali vuto lelo kanawande limali-a. Liye ngu Mulungu Wakopolo Detene ndipo unokoza niva-a kopolo ira nivilele. (Welengani Afilipi 4:13.) Eno nikaana vifukwa vyovweya vyonipangi-a roromela ira ninokoza vilela vuto lililetene. Naona mwemo Yehova unanitandizela liye va mavuto ang’onong’ono ang’onong’ono, kaninakaikela ira unoza anitandize teto va mavuto alukulu.
6. Kodi Davide angali n’ng’onong’ono agumanile na vyongo viivi vyevyo vyapangi-ile ira aroromelenga vinjinji Yehova?
6 Kaganizelani vyevyo vyaireile vamoyo wa Davide, vyevyo vyapangi-ile ira aroromelenga Yehova. Angali n’ng’onong’ono, imbalangondo na phodogoma vyoo-inda khosa da ababae dedo aweta liye. Vathawi detene dedi, Davide oolimba murima notamangi-a vilombovyo ndipo oovulumucha khosado. Koma Davide kaaganiza vyoi upangile vyevi na kopolo dae. Ooiziwa ira Yehova ngunoyo umutandizile. (1 Sam. 17:34-37) Thawi detene Davide ooumbuwela vyevyo vyaireilevi. Ganizela vyevyi oomutandiza roromela ira Mulungu wamoyo unoza amutandize teto usogolo.
7. Kodi ona vyongo mofwanelela wamutandizile avi Davide ira awane na Goliyati?
7 Vangavirile thawi yoyeva, Davide angali muzombwe oodowa wu msasa wa Aizarayeli. Liye aafwanyile asilikalae kangan’na mantha chifukwa msilikali wakopolo wa Afilisiti ali anyozanga asilikali a Izarayeli. (1 Sam. 17:10, 11) Asilikalae kookaana mantha chifukwa kaganizela mwemo muthuyo mwaoneela liye koma teto mawu onyoza anayo aonga liye. (1 Sam. 17:24, 25) Koma Davide, aona vyongo mo-iyana. Liye aona ira Goliyati kaakeda nyoza asilikali a Aizarayeli, koma ‘anyoza asilikali a Mulungu wamoyo.’ (1 Sam. 17:26) Davide ooganizela vinjinji vya Yehova. Liye oororomela ira Mulungu unoyo amutandizile vevo aweta liye viweto unokoza mutandiza teto vathawila. Voi oororomela ira Mulungu unomutandiza, oodowa dowa wana na Goliyati ndipo oowina kondweyo. — 1 Sam. 17:45-51.
8. Chin’ni inanitandize ira kanikaikelenga ira Yehova unonitandiza nagumana na mavuto? (Onani teto ithuzithuzi.)
8 Na-iyene ninokoza vilela maesero ngati ninaumbuwela ira Mulungu wamoyo ngokozeya ira anitandize. (Sal. 118:6) Ninokoza roromelanga vinjinji vyevi naganizela vyevyo apangilevo liye wale. Muwelengenga khani da m’Baibulo dotonyi-eda mwemo avulumuchele liye atumikae. (Yes. 37:17, 33-37) Koma teto muwelengenga noonela malipoti ava jw.org otonyi-eda mwemo Yehova unatandizela liye abali na arongoli-u malambwano. Enjedela vevo, muganizelenga mwemo autandizeleni liye nyo. Ngakale ira kamunaromole mavuto alukulu alukulu monga wana na phodogoma kapena imbalangondo. Ninaonga eno chifukwa Yehova ukala auirelangani vyongo vinjinji vamoywinyu. Ooukokani ira mukale nae vausamwali. (Yoh. 6:44) Ndipo panopa, ngu liye unoyo unautandizani ira mupitilizeve kala mu choonadi. Eno munopanga pama muvepa ira auumbucheni thawi ineyo asomedile liya mapempelwinyu, utandizani vathawi yofwanelela koma teto usamalelani vathawi yorucha. Ganizela vyevi unokoza utandizani ira muroromelenga ira Yehova unoza apitilize utandizani.
Vyevyo ninapanga iyo nagumana na maesero vinomukuza Yehova (Onani ndima 8-9)
9. Kodi niaonenga avi mavuto anayo ninagumanana iyo? (Miyambo 27:11)
9 Roromela ira Yehova ukalawo unokoza nitandiza ira nionenga mofwanelela maesero anayo ninagumanana iyo. Chifukwa n’ni ninaonga eno? Ninaonga eno chifukwa ninoambeela ona mavuto anayo ninagumanana iyo monga mbali ya khani ilukulu ineyo ilivo vaari va Yehova na Satana. Mdyerekezi unaonga ira nagumana na mavuto ninokoza iya tumikela Yehova. (Yob. 1:10, 11; welengani Miyambo 27:11.) Koma nakwakwani-a vilela mavutwayo ninotonyi-eda ira ninomukonda Yehova ndipo ninoruni-a yonama ya Mdyerekezi. Kodi nyo munoruni-iwa na andimuwa andimuwa a boma, munogumana na mavuto avyachuma, athu katinavuruwana utenga wapama kapena munogumana na maesero amo-iwa? Muumbuwelenga ira vyevyo munagumanana nyo vinouva-ani mwai oyi musangalase murima wa Yehova. Muumbuwelenga teto ira Mulungu kanaza alola ira muesiwe mpakana fiya voi kamunawande vilela. (1 Akor. 10:13) Liye unoza auva-eni kopolo ira muvilele.
MULUNGU WAMOYO UNOZA AUVA-ENI MPHOTO
10. Kodi Mulungu wamoyo unaza aapangela n’ni athu anayo kanamulambela?
10 Yehova unopeleka mphoto wa anayo kanamulambela. (Aheb. 11:6) Panopa liye unoniva-a murendele koma teto unonitandiza ira nikale osangalala ndipo unoza aniva-e moyo oomala usogolo. Ninororomela ira liye unofunechecha niva-a mphoto ndipo ukaana kopolo dopangela vyevi. Namuroromelanga vinjinji, ninopitiliza mutumikela na murima wetene ngati mwemo atumikae awale kapangelaathu. Vyevi pivyevyo teto Timoteyu apangile liye. — Aheb. 6:10-12.
11. Kodi chin’ni yamulimbikisile Timoteyu ira a-indenga chito mwatindi mupingo? (1 Timoteyu 4:10)
11 Welengani 1 Timoteyu 4:10. Timoteyu oororomela vinjinji ira Mulungu wamoyo unoza amuva-e mphoto. Chichifukwa iwa apanga tindi votumikela Mulungu. Kodi liye apanga avi vyevyi? Mtumwi Paulo oomulimbikisa ira aesaese kala mphunzisi wapama va chito yolaleela koma teto mupingo. Liye afuneya teto kala isazo yapama wa Akiristu afwae, azombwe na achikulile. Oova-iwa teto chito yorucha ineyo yatangani-avo peleka malangizo akopolo koma achikondi wa athu anayo kanafuneye malangizwayo. (1 Tim. 4:11-16; 2 Tim. 4:1-5) Ngakale ira thawi dimo-i athu katayamikela vyevyo apanga liye, Timoteyu kaakaikela ira Yehova unoza amuva-e mphoto. — Arom. 2:6, 7.
12. Kodi chin’ni inalimbikise andimuwa ira ka-indenga chito diwa mwatindi? (Onani teto ithuzithuzi.)
12 Malambwano teto andimuwa mupingo kanoiziwa ira Yehova unoona koma teto yamikela chito yapama ineyo kanapangaathu. Enjedela vosamalela khosa da Mulungu, funji-a koma teto laleela, andimuwa anjinji kanotandiza teto vachito monga domangamanga koma teto peleka tandizo vaireya ngozi. Andimuwa amo-iwa teto kali m’Magulu Oendela Obulela kapena M’makomiti Oongi-ana na Achipatala. Andimuwa anayo kanavipeleka inda chito dedi kanoiziwa ira Yehova ngu mwinyailo wa pingo o-okala muthu. Vachifukwa inela, aliwa kano-inda chito diwa movipeleka ndipo kanororomela vinjinji ira Mulungu unoza aava-e mphoto chifukwa ya vyevyo kanapangaathu. — Akol. 3:23, 24.
Mulungu wamoyo unoza auva-eni mphoto mwaesaesanga panga vinjinji mupingo (Onani ndima 12-13)
13. Kodi Yehova unavwa avi chifukwa ya vyevyo ninapanga iyo vomutumikela?
13 Kai vyowandeya ira muthu uliwetene akale ndimuwa. Koma etene iyene ninokoza muva-a Yehova yongo imo-iwene. Mulungwi-u unoyamikela vinjinji naesaesanga ira nimutumikelenga mwa tindi. Liye unoona napelekanga vyongo vi-u votandiza vachito ya vailambo yetene, ngakale vingali vyoyeva. Unosangalala naesaesa imecha muwono ira nisomede vamisonkano ngakale ira nili amanyazi. Koma teto unosangalala nanyalanyazanga vyolakwa vya athu amo-iwa nowakululukela. Ngakale mungaonile ira kamunapanga vinjinjii votumikela iziwani ira Yehova unoyamikela vyevyo munapanga nyo. Unoukondani chifukwa ya vyevyo munapanga nyo ndipo unoza auva-eni mphoto. — Luka 21:1-4.
PITILIZANI KALA VAUSAMWALI NA MULUNGU WAMOYO
14. Kodi kala vausamwali na Yehova unanitandize avi ira nikale ororomeleya? (Onani teto ithuzithuzi.)
14 Naroromela ira Yehova ukalawo, vinokoza kala vyo-orucha ira nikale ororomeleya wa liye. Mu pumwemo teto vyaliliathu na Yosefe. Liye ookoonda panga vyachiwelewele chifukwa ooiziwa ira vyopanga vyae vinomukuza Mulungu ndipo kaafuna mukumudwi-a. (Gen. 39:9) Ira nikale vausamwali na Yehova ninafuneya nipempelenga koma teto funjedanga Mawae. Napanganga vyevi usamwali-u na liye unoza ukale olimba vinjinji. Eno mofwanafwana na Yosefe, nakala vausamwali olimba na Yehova, kaninaza nipanga iliyetene ineyo inamukumudwi-e. — Yak. 4:8.
Kala vausamwali na Mulungu wamoyo unokoza utandizani ira mupitilize kala ororomeleya (Onani ndima 14-15)
15. Kodi ninafunjeda n’ni va vyevyo Aizarayeli kapangileathu muchipululu? (Aheberi 3:12)
15 Muthu adiwala ira Yehova ngu Mulungu wamoyo vinakala vyo-orucha ira a-iye kala ororomeleya wa liye. Isazo, pivyevyo Aizarayeli kapangileathu muchipululu. Aliwa kooiziwa ira Yehova ukalawo koma koowambeela kaikela ngati liye unaasamalele. Koofiya mpakana vofuka ira: “Kodi vaari vi-u vano, Yehova ukalavo kapena iyayi?” (Ekis. 17:2, 7) Vyo-arelavo viwa vyali vyoi aliwa koo-iya vwela Mulungu. Pivyovaela iziweya ira kaninafune arela isazo iwa yotakalela. — Welengani Aheberi 3:12.
16. Kodi pivyongo viivi vyevyo vinaese iroromelo yi-u?
16 Muilambwela, pitiliza kala vausamwali na Yehova kai okweeya. Athu anjinji katinasomedela ira Mulungu ukalawo. Ndipo thawi dinjinji athu anayo katina-arela makundo a Mulungu kanooneyanga ngati vyongo vinowaendela pama. Naonanga vyevi viireyanga iroromelo yi-u inokoza esiwa. Ngakale ira kaninafiye vokaikela ira Mulungu ukalawo, ninokoza ambeela kaikela ngati unanitandize. Muthu unoyo alembile salimo 73 naliyene teto oowambeela kaikela vyevi. Oowambeela ona ira athu anayo kanyalanyaza malamulo a Mulungu vyongo vyoowaendela pama. Eno oowambeela kaikela ngati tumikela Mulungu un’na phindu lililetene. — Sal. 73:11-13.
17. Chin’ni inanitandize ira nikaleve vausamwali na Yehova?
17 Kodi chin’ni yamutandizile olemba masalimo ira aambeele nawili ona vyongo mofwanelela? Liye ooganizela vyevyo vinaaireele athu anayo kamudiwalile Yehova. (Sal. 73:18, 19, 27) Ooganizela teto madaliso anayo athu anayo kanatumikela Mulungu kanafwanyaathu. (Sal. 73:24) Na-iyene niganizelenga madaliso anayo Yehova univa-ile liye. Niganizelenga mwemo moywi-u wakaleleathu aakale ira kaninatumikela Yehova. Panga vyevi unokoza nitandiza ira nikaleve ororomeleya mpakana fiya voonga ngati mwemo olemba masalimo aongele liye ira: “Wa miyo, andamela wa Mulungu chiyongo yapama.” — Sal. 73:28.
18. Chifukwa n’ni kaninafuneya ova vyevyo vinaireye usogolo?
18 Ninokoza vilela mavuto anayo ninagumanena iyo m’malambo omari-ala chifukwa ‘ninatumikela Mulungu wamoyo na oona.’ (1 Ates. 1:9) Mulungwi-u unonikonda ndipo thawi detene unerenga nitandiza. Liye ootandizavo atumikae mundulimu ndipo na-iyene teto unerenga nitandiza malambwano. Chineneveva ninoembekezela ira vailambwela vanoireya isauso ilukulu. Koma kaninaza nikala eki-u. (Yes. 41:10) Eno tiyemoni etene iyene “nikale olimba murima ndithu ndipo nionge ira: ‘Yehova ngunoyo unaditandiza. Kandinaza ndiova.’” — Aheb. 13:5, 6.
NYIMBO 3 Ndinu Mphamvu Zathu, Chiyembekezo Chathu Komanso Timakudalirani
