KHANI YOFUNJEDA 24
NYIMBO 24 Bwerani Kuphiri la Yehova
Pitilizani Kala Alendo a Yehova Mpakana Walewale
“Nyo Yehova ngumbaani unoyo unakale mulendo mutentinyu?”— SAL. 15:1.
VYEVYO NINAFUNJEDE IYO
Ninoona vyevyo ninapange iyo ira nipitilize kala afwae a Yehova koma teto vyevyo unaembekezela liye ira niapangelenga afwae.
1. Kodi Salimo 15:1-5 linanitandize avi?
MUKHANI ivirilele noofunjeda ira athu anayo kavipelekile wa Yehova kanokoza kala alendo mutentae yopipilisa ngati kanaesaesa kala nae va usamwali. Koma kodi ninapange avi ira nikale nae vausamwali? Salimo 15 linofotokoza vinjinji va khani inela. (Welengani Salimo 15:1-5.) Salimoli linofotokoza makundo anayo kananitandize ira nikale va usamwali na Mulungu.
2. Kodi chin’ni ineyo mwina yapangi-ile Davide romola tenti ya Yehova?
2 Salimo 15 linowambeela na mawu oyi: “Nyo Yehova ngumbaani unoyo unakale mulendo mutentinyu? Ngumbaani unoyo unakale m’mwangwinyu opatuleya?” (Sal. 15:1) Voonga vya “tenti” ya Yehova, mwina Davide aganizela vya ihema ineyo va thawiyo yali wu Gibiyoni. Liye ooromola teto vya ‘mwango opatuleya’ wa Mulungu mwina voganizela vya mwango wa Zioni wu Yelusalemu. Va mwango unola, unoyo uli makilomita angasene umwela wa Gibiyoni, pavevo Davide a-elilevo liye tenti ineyo mwali likasa la pangano mpakana va thawi ineyo kachisi amangiwile liye. — 2 Sam. 6:17.
3. Chifukwa n’ni ninafuneya panga chidwi na vyevyo vili mu Salimo 15? (Onani teto ithuzithuzi.)
3 Pi vyoona ira Aizaraeli anjinji kataloliwa tumikela vaihema ngakale teto volowa muwari mwiwa mwemo mwakala likasa. Komave atumiki etene ororomeleya a Yehova kookoza kala alendo mu tentae yopipilisa voesaesa ira kakale afwae. Ndipo vyevi pivyevyo etene iyene ninafuna iyo. Mu Salimo 15 muromoliwa makalelo anayo ninafuneya iyo kaana ira nikaleve afwae a Yehova.
Aizaraeli muthawi ya Davide koowanda ona m’maganizo mwiwa mwemo kala mulendo mutenti ya Yehova watantauzaathu (Onani ndima 3)
MUENDENGA MO-OLAKWI-A VYONGO NDIPO MUPANGENGA VYAPAMA
4. Kodi ninaiziwa avi ira keda badiziwa kai wokwakwanela ira Yehova asangalalenga na iyo? (Yesaya 48:1)
4 Lemba la Salimo 15:2, linaonga ira fwae wa Mulungu unafuneya ‘enda mo-olakwi-a vyongo, ndipo unopanga vyongo vyapama.’ Mawu oyi ‘enda’ koma teto ‘panga’ kanatantauza panga vyongo vimo-iviwavyene. Koma kodi pivyowandeya ‘enda mo-olakwi-a yongo’? Inde. Pivyoona ira kavili muthu wangwilo, koma Yehova unokoza niona ira nili muthu ‘wo-olakwi-a vyongo’ ngati ninaesaesa muvwela. Navipeleka nobadiziwa ninakala ira nikede ambeelavo enda na Mulungu. Umbuwelani ira wale, keda kala Muizaraeli kawapangi-a ira muthu akale mulendo wa Yehova. Vookala athu amo-iwa anayo katapanga vyongo ‘kumela vati va murima ndipo katapanga vyongo vyofwanelela.’ (Welengani Yesaya 48:1.) Mwizaraeli ororomeleya afuneya funjeda malamulo a Yehova nowa-arelanga. Malambwano teto ira Mulungu asangalalenga na iyo, vanofuneya vinjinji kwaranya keda badiziwa nosonkananga na pingo. Ninafuneya pitiliza ‘panga vyongo vyapama.’ Kodi ninapange avi vyevi?
5. Kodi vwela Yehova va vyongo vyetene unatangani-avo n’ni?
5 Wa Yehova ‘enda mo-olakwi-a vyongo’ koma teto ‘panga vyongo vyapama,’ unatantauza vinjinji ookala keda fwanyeya kapena panga vinjinji vamisonkano. (1 Sam. 15:22) Ninafuneya esaesa ira nimuvwelenga Mulungu va iliyetene ngakale vevo nili iyo waeki-u. (Miya. 3:6; Nam. 12:13, 14) Chipama esaesa muvwela Yehova ngakale va vyongo vyooneya ngati ving’ono ng’ono. Panga vyevi unotonyi-eda ira ninomukonda ndipo liye unosangalala na iyo. — Yoh. 14:23; 1 Yoh. 5:3.
6. Mogwilizana na Aheberi 6:10-12, kodi yofuneya vinjinji chin’ni posa vyevyo nikalile iyo nipanganga mundulimu?
6 Yehova unoyamikela vinjinji vyongo vyapama vyevyo namupangele iyo mundulimu. Komave, vyevyo vaekiwa kai vyokwakwanela ira nipitilizeve kala mutenti ya Yehova. Likundo leli linoonela pama va Aheberi 6:10-12. (Welengani.) Yehova kanadiwala vyevyo namupangele iyo mundulimu koma unafuna nimutumikelenga na murima wetene mpakana vamapeto. Liye unoza akale fwi-u mpakana walewale “ngati kaninagome.” — Agal. 6:9.
MUONGENGA VYOONA M’MURIMANI MWINYU
7. Kodi onga vyoona m’murima mwi-u unatangani-avo n’ni?
7 Ira muthu asomedeliwe kala mulendo mutenti ya Yehova unafuneya “onga vyoona m’murima mwae.” (Sal. 15:2) Veva kavinatantauza keda pewa nama. Yehova unafuna ira thawi detene nikalenga oona murima. (Aheb. 13:18) Vyevi pi vyofuneya “chifukwa Yehova unotakaleliwa na muthu waipha maso, koma athu oongowa murima unokalanawo va usamwali wolimba.”— Miya. 3:32.
8. Kodi chiikalelo iivi ineyo ninafuneya iyo pewa?
8 Athu anayo ‘kanaonga vyoona m’murimani mwiwa,’ katinaerekezela kala ovwela kakala vagulu nophwanyanga malamulo a Mulungu kakala vaekiwa. (Yes. 29:13) Kanopewa panga vyongo mwaipa maso. Muthu waipa maso unowambeela kaikela ngati malamulo a Yehova kali azelu. (Yak. 1:5-8) Muthu woi eno kanavwela Yehova va vyongo vyevyo unaviona liye ira pi ving’onong’ono. Aona ira kagumanile na mavuto chifukwa ya oovwelawo, unolimba murima nopitilizangave phwanya malamulo a Mulungu ndipo lambela wae unakala wachinyengo. (Nam. 8:11) Koma iyo ninofuna kala oona murima va vyongo vyetene.
9. Kodi ninafunjedavo n’ni va vyevyo Yesu apangile liye angagumanile na Natanayeli? (Onani teto ithuzithuzi.)
9 Ninokoza ona upama wokala oona murima naganizela vyevyo vyaireile Yesu angagumanile wowambeela na Natanayeli. Filipo angamuzilena Natanayeli wa Yesu, vooireya yongo imo-iwa yopangi-a chidwi. Ngakale ira Yesu ali anagumanevo na Natanayeli, liye aongile ira: “Onani mwiizaraeli ndithu, unoyo mwa liye Kamuli chinyengo.” (Yoh. 1:47) Yesu mwina oona ira amo-iwa mwa ofunjedae kali oona murima koma aona teto ira Natanayeli ali oona murima vinjinji. Mofwanafwana na etene iyene, Natanayeli kaali wangwilo. Koma oesaesa pewa chinyengo. Yesu oopanga chidwi na vyevi ndipo oomuyamikela Natanayeli. Vinokala vyosangalasa vinjinji ngati Yesu unanionenga eno.
Filipo ooza wa Yesu na Natanayeli, unoyo mwa liye kamwali chinyengo. Kodi mu pumwemo teto nilili iyo? (Onani ndima 9)
10. Chifukwa n’ni ninafuneya pewa indi-eda chito molakweya paso yoonga? (Yakobo 1:26)
10 Makundo anjinji a mu Salimo 15 kanokuza mwemo ninapangela iyo vyongo na afwi-u. Salimo 15:3 linaonga ira mulendo mutenti ya Yehova “kanamupangela fwae yotakala iliyetene, ndipo kananyoza afwae.” Indi-eda chito mawi-u molakweya unokoza nilepeli-a kala alendo mu nyumba ya Yehova.— Welengani Yakobo 1:26.
11. Kodi miseche chin’ni, nanga chin’ni ineyo inaireela muthu wamiseche oyi kanalapa?
11 Wolemba masalimo ooromola teto vyokuza miseche. Kodi miseche chin’ni? Mwachidule kuwonga vyongo vyonama koma teto vyotakala vyevyo vinaononge limbli la muthu m’mo-iwa. Muthu wamiseche unoyo kanalapa unochosiwa mupingo. — Yer. 17:10.
12-13. Kodi pivyotakala vimo-i viivi vyevyo ninapangele iyo afwi-u mo-oiziwa? (Onani teto ithuzithuzi.)
12 Salimo 15:3 linoniumbucha ira mulendo munyumba ya Yehova kanapangela afwae vyongo vyotaka ndipo kananyoza amo-i. Kodi muthu unapangele avi amo-iwa vyotakala?
13 Ninokoza pangela amo-iwa vyotakala vofalisa vyongo vyonama vyokuza aliwa. Mwaisazo: (1) murongola u-iya utumiki wathawi detene, (2) banja limo-iliwa kalinatumikela teto va Beteli kapena (3) m’bali kanatumikela teto ngati ndimuwa kapena m’tumiki wokami-a. Kodi chipama keda ganizela vyevyo vipangi-ile chenjawo koma teto awandelanga amo-iwa vyevyo ninaganiza iyovyo? Vanokoza kala vifukwa vyevyo vipangi-ile chenja wewu vyevyo na-anaviiziwa iyo. Umbuwelani ira mulendo mutenti ya Yehova, “kanamupangela fwae yotakala iliyetene, ndipo kananyoza afwae.”
Miseche dinokoza pangi-a ira nifalise khani dokuza athu amo-iwa (Onani ndima 12-13)
MULEMEKEZENGA ATHU ANAYO KANAOVA YEHOVA
14. Kodi alendo a Yehova kanapewa avi “athu onyakavala”?
14 Salimo 14:4 linaonga ira fwae wa Yehova “kanagwilizana na muthu uliwetene wonyakavala.” Kodi ninapange avi vyevi? Voi kanili angwilo, kaninaiziwe ngati muthu uli wonyakavala kapena ira wotakala. Chifukwa n’ni ninaonga eno? Mwina mwachibadwa ninokoza kondanga athu amo-iwa chifukwa ya makalelwiwa notakaleliwanga na athu amo-iwa. Eno ninafuneya pewa gwilizana na athu anayo Yehova unaona liye ira “mbonyakavala.” (1 Akor. 5:11) Athu anala kanatangani-avo anayo kanapanga vyongo vyotakala oolapa, anayo kananyoza vyevyo ninaroromela iyo kapena teto anayo kanafuna sokoneza usamwali-u na Yehova. — Miya. 13:20.
15. Kodi ninatonyi-ede teto avi ira ninolemekeza “athu anayo kanaova Yehova”?
15 Lemba la Salimo 15:4 linonilimbikisa ira nilemekezenga “athu anayo kanaova Yehova.” Eno ninoesaesa fwanya ndila dotonyi-eda oma murima koma teto ulemu wa afwae a Yehova. (Arom. 12:10) Moi avi? Ndila imo-i ineyo inafwanyeya va Salimo 15:4 chiyoi muthu unoyo ngu mulendo mutenti ya Yehova, “kanachenja vyevyo ulonjezile liye ngakale ira vyongo kavili pama wa liye.” Ookwakwaneli-eda vyevyo nilonjezile iyo unokoza voreya athu amo-iwa. (Mat. 5:37) Mwaisazo Yehova unoembekezela ira afwae kalemekezenga lumbilo laukwati. Unosangalala teto makolo kakwakwaneli-edanga vyevyo kalonjezileathu a-imiwa. Konda Mulungu koma teto afwi-u, unoza unilimbikise ira niesaesenga kwakwaneli-eda vyevyo nilonjezile iyo.
16. Kodi ninatonyi-ede mundila iivi ira ninolemekeza afwae a Yehova?
16 Ndila imo-iwa teto ineyo ninatonyi-edele iyo ira ninolemekeza afwae a Yehova kukala ochereza koma teto ova-a. (Arom. 12:13) Aleda na abali na arongoli-u unonitandiza ira nigwilizanenga naaliwa vinjinji koma teto nigwilizanenga na Yehova. Ndipo nakala ochereza, ninakala nisazi-edanga Yehova.
NIPEWENGA OMELIWANA NDALAMA
17. Chifukwa n’ni Salimo 15 linaromola khani ya ndalama?
17 Baibulo linaonga ira mulendo wa Yehova “kanangongoli-a ndalamadae ira awachele katapila ndipo kanawachela ipupu ira akoti-e mulandu wa muthu wo-olakwa.” (Sal. 15:5) Chifukwa n’ni mu Salimoli kanaromola ndalama? Chifukwa ngati ninaomeliwa vinjinji ndalama, ninokoza ambeela onanga ira pivyofuneya vinjinji posa athu koma teto usamwali-u na Yehova. (1 Tim. 6:10) Wale athu amo-iwa koowadjela abaliwa osauwa vowaliveli-a katapila va ndalama dedo kaaboli-ileathu. Koma teto oweluza amo-iwa koowachela vipupu ndipo kooweluza athu oolakwa mo-okaana chilungamo. Yehova unoidana na vyongo ngati vyevi.— Ezek. 22:12.
18. Kodi mbamafuso aavi anayo kananitandize iziwa mwemo ninaonela iyo ndalama? (Aheberi 13:5)
18 Vifukeni ira: Kodi thawi detene ndinakeda ganizela vyandalama koma teto vyevyo ndinagule miyo? Kodi ndaboli-a ndalama ndinochedwa weli-a voganizela ira unoyo undiboli-ile ndalamoyo kanadifuna? Kodi kaana ndalama unondipangi-a ira ndivionenga ngati ofuneya koma lepelanga tandiza amo-i? Kodi ndinoona ira abali na arongola amo-iwa kanoomeliwa ndalama chifukwa yoi kokaana ndalamado? Kodi ndinokonda waleda na athu olemela nopewanga athu osauwa?’ Nikaana mwayi ulukulu wokala alendo a Yehova, eno ira nipitilize kala afwae ninafuneya pewa omeliwana ndalama. Napanganga vyevi Yehova kanaza ani-iya.— Welengani Aheberi 13:5.
YEHOVA UNOKONDA ATHU ANAYO MBA AFWAE
19. Chifukwa n’ni Yehova unafuna ira nipangenga vyongo vyetene vyoromoliwa mu Salimo 15?
19 Salimo 15 linomari-a na mawu oyi: “Muthu uliwetene unoyo unapanga vyevi, kanaza agwedezeya.” (Sal. 15:5) Va wolemba Masalimola afotokoza chifukwa iwa Mulungu unafuna ira nipangenga vyetene vyevyo viromoliwile mu Salimoli. Yehova unafuna ira nisangalalenga. Eno unoniva-a malangizo anayo kananitandiza fwanya madaliso koma teto kala otetezeya. — Yes. 48:17.
20. Kodi alendo a Yehova kanaembekezela n’ni?
20 Alendo a Yehova kanoenbekezela vyongo vyapama vinjinji. Ozoziwa anjinji ororomeleya kanoza kawachele “malo anjinji okalamo” anayo Yesu uwakozele liye udimu. (Yoh 14:2) Anayo kan’na chiyembekezo yozakala vailambo yavati kanaembekezela zaona kwakwaneli-ediwa wa malonjezo anayo kali va Chivumbuliso 21:3. Onga vyoona, ninoona ira ngu mwayi ulukulu kala afwae a Yehova koma teto alendo mutentae mpakana walewale.
NYIMBO 39 Tipange Dzina Labwino Ndi Mulungu
