1. Kodi nafunjedile n’ni va sonkano wavachaka wa mu 2023?

 VA SONKANO wavachaka wa 2023, a voofotokoziwa vyongo vimo-i vyevyo vichenjile va makundo anayo naroromela iyo koma teto vookala vilengezo vyosangalasa vyokuza chito yolaleela. Mwaisazo, noofunjeda ira athu amo-i kanoza kakaena mwai okala umbali ya athu a Yehova ngakale vanduli voi Babulo Mulukulu uonongiwa. Noowandeliwa teto ira ambeela mu Novembala 2023, ofalisa katinafuneya teto peleka maola etene anayo kafanyileathu mu utumiki. Kodi chenja wewu unatantauza ira chito yolaleela kai yofuneya kwenikweni? Naari, kai eno.

2. Chifukwa n’ni ninafuneya inda mwachangu chitwi-u yolaleela? (Maliko 13:10)

² Dambo lililetene laviranga, thawi yoi nilaleele inakala iyevanga vinjinji. Ninaonga eno chifukwa yoi thawi yoi mapeto kafiye, inakala iandamelanga. Kaganizelani vyevyo Yesu aongile liye vyokuza chito yolaleela m’malambo omari-a. (Welengani Maliko 13:10.) Mogwilizana na vyevyo Mateyu alembile liye, Yesu oowonga ira uthenga wapama unoza ulaleiwe vailambo yetene yavati wewo uli athu “mapeto” ka-anafiye. (Mat. 24:14) Mawu anala, kanaonga vya mapeto ailambo yotakala ya Satanela. Yehova ugarati-a ‘dambo na ola’ lelo vyevi vinazeathu viireye. (Mat. 24:36; 25:13; Vyo. 1:7) Dambo lililetene laviranga ninakala niandamelanga thawi inela. (Arom. 13:11) Eno, panopa  ninafuneya pitiliza laleela mpakana mapeto kafiye.

3. Chin’ni inanilimbikisa ira nilaleelenga?

³ Naganizelanga vya utumiki-u, ninokoza panga pama vifuka fuso lofuneya li: Chifukwa n’ni ninalaleela uthenga wapama? Mwachidule, chikondi chineyo inanilimbikisa ira nilaleelenga. Na-indangana chito yolaleela ninotonyi-eda ira ninokonda uthenga wapama, ninokonda athu ndipo kwaranya vyetene, ninokonda Yehova na zina lae. Tiyemoni nikambilane vyongo vyevi iliyetene vaekiwa.

NINOLALEELA CHIFUKWA NINOKONDA UTHENGA WAPAMA

4. Kodi ninavwa avi nawachela uthenga wapama?

⁴ Kodi munoumbuwela mwemo mwavwele nyo mungawachelile uthenga wapama, mwina okuza baliwa wa mwana kapena teto ouiziwi-ani ira mulembiwa chito ineyo mwaifuna nyo vinjinji? Mookaikela moofunechecha wandela uthenga wapamola abalinyu koma teto afwinyu. Kodi pumwemo teto mwavwele nyo mungavwile uthenga wapama wa Umwene wa Mulungu, unoyo ngu uthenga wapama vinjinji kwaranya uliwetene?

5. Kodi mwavwile avi mungavwile uthenga wa choonadi okumela m’Mawu a Mulungu ulendo owambeela? (Onani teto vithuzithuzi.)

⁵ Kaganizelani mwemo mwavwele nyo mungavwile ulendo owambeela choonadi ya m’Mawu a Mulungu. Moofunjeda ira Babinyu waudimu unoukondani, unofuna ira mukale m’banja lae la athu anayo kanamulambela, unoza amali-e mavuto na vyovoreya vyetene, ndipo munokoza kala na chiyembekezo yozaonana nawili na abalinyu anayo katatiile koma teto moofunjeda vyongo vimo-i vinjinji. (Maliko 10:29, 30; Yoh. 5:28, 29; Arom. 8:38, 39; Chiv. 21:3, 4) Makundo achoonadi anayo mwafunjedile nyo anala kooufiyani vamurima. (Luka 24:32) Moowomeliwa vinjinji vyevyo mwafunjedile nyoovyo moi moofunechecha muwandela muthu uliwetene. — Erekezelani na Yeremiya 20:9.

6. Kodi ninafunjeda n’ni va vyevyo vyamuireele Ernest na Rose?

 ⁶ Kaganizelani vyevyo vyamuireele m’bali m’mo-iwa zina lae Ernest. b Liye angan’na chaka dotamangela 10, ababae kootatiya. Ernest aongile ira: “Ndoovifuka ira: ‘Kodi aliwa kadowile udimu? Kodi kandinaza ndiaona mpakana walewale?’ Ndoosilila a-ima amo-iwa anayo kan’na ababiwa.” Thawi dinjinji Ernest ookokora vamanda a babae nopempelanga ira: “Chonde Mulungu, ndinafuna ndiiziwe wewo uli ababanga.” Vangavirile chaka dotamangela 17 kumela vevo ababae katatiileathu, muthu m’mo-iwa oomuvepa ira afunjedenga na liye Baibulo ndipo liye oosomeda. Liye oosangalala iziwa ira okhwa katinaiziwa iliyetene, moi kali ngati kanaagona ndipo Baibulo linolonjeza ira Mulungu unoza aavenyi-e. (Nam. 9:5, 10; Vyo. 24:15) Vamapeto viwa, oofwanya mayankho a mafuso anayo kamuvuti-ile wa chaka dinjinji. Ernest oosangalala na makundo a choonadi anayo afunjeda liye. Naliyene teto mu-iyanae Rose oowambeela funjeda ndipo oosangalala awandela amo-i vyevyo ufunjedile liyevyo. Aliwa koobadiziwa mu 1978 ndipo koolaleela mwakhama choonadi yantengo wavadimu wa abaliwa, afwiwa koma teto athu etene anayo kafuna avuruwana. Vyo-arelavo viwa pivyoi Ernest na Rose kootandiza athu okwaranya 70 iziwa Yehova mpakana fiya vobadiziwa.

7. Kodi inaireya chin’ni nakondanga na murima wetene choonadi yofwanyeya m’Baibulo? (Luka 6:45)

⁷ Onga vyoona, nakondanga makundo a m’Baibulo na murima wetene, ninofunechecha wandela uliwetene vyevyo nifunjedile iyo. (Welengani Luka 6:45.) Ninovivwa ngati ofunjeda a Yesu, anayo kaongile ira: “Kanina-iye onga vya vyongo vyevyo navionile iyo novivwa.” (Vyo. 4:20) Ninokonda vinjinji choonadi moi ninofunechecha wandela amo-iwa mwemo ninawandele iyo.

NINOLALEELA CHIFUKWA NINOKONDA ATHU

8. Kodi chin’ni inanilimbikisa ira niwandelenga athu uthenga wapama? (Onani bokosi loi “ Mukondenga Athu — Muwafunji-enga.”) (Onani teto ithuzithuzi.)

⁸ Mofwanafwana na Yehova na Mwanae, na-iyene teto ninokonda athu. (Miya. 8:31; Yoh. 3:16) Ninovwela chisoni athu anayo “katinamuiziwa Mulungu” ndipo “katin’na chiyembekezo.” (Aife. 2:12) Aliwa kanogumana na mavuto anjinji ndipo vinakala ngati kali muzenje lodii-a. Koma iyo nikaana go-i unoyo ninaavochele iyo ira kakumemo, unoyo ngu uthenga wapama wa Umwene wa Mulungu. Chifukwa yoi ninowakonda koma teto avwela chisoni, ninoesaesa ira niawandele uthenga wapamola. Uthenga unola unowava-a chiyembekezo, atandiza ira kakale na moyo wapama panopa  koma teto unowava-a chiyembekezo yozafwanya “moyo weniweni,” unoyo ngu moyo o-omala muilambo isha ya Mulungu. — 1 Tim. 6:19.

9. Kodi ninochenjeza amo-i ira usogolowu unaireya n’ni, nanga chifukwa n’ni? (Ezekieli 33:7, 8)

⁹ Konda athu unonipangi-a teto ira niachenjezenga ira mapeto a ilambo yotakalela kali vakwikwi. (Welengani Ezekieli 33:7, 8.) Ninovwela chisoni athu, tangani-avo abali-u anayo katinatumikela Mulungu. Athu anjinji kanakeda panga vyongo viwa vya dambo na dambo, mo-oiziwa ira usogolowu unoza “chisauso ilukulu ineyo kinaireyevo ambeela va chiyambi ya ilambo mpakana peeno, ndipo kinaza iireya nawili.” (Mat. 24:21) Ninofuna ira aliwa kaiziwe vyevyo vinaireye va thawi ya chiweluzo, vevo yowambeela vipembezo vyetene vyonama vinazeathu vichosiwe ndipo vanduli viwa maboma etene kanoza kaonongiwe va kondo ya Aramagedo. (Chiv. 16:14, 16; 17:16, 17; 19:11, 19, 20) Ninopempela ira athu anjinji kavwe uthengi-u ochenjeza unola nosakula tumikela Yehova panopa. Koma bwanji vya athu anayo katinafuna vwela chenjezoli panopa, tangani-avo abali-u anayo ninaakonda iyo?

10. Chifukwa n’ni pivyofuneya vinjinji ira nipitilizeve chenjeza athu?

¹⁰ Monga naonele iyo mukhani ivirilele, mwina Yehova unokoza zavulumucha athu anayo kanaze kachenje maganizwiwa vanduli voona onongiwa wa Babulo Mulukulu. Ngati chi eno, ndiye kuti pivyofuneya vinjinji ira panopa nipitilize achenjeza. Ganizelani vi: Vyevyo ninaawandele iyo panopa, kanokoza zaviumbuwela va thawi ineyo. (Erekezelani na Ezekieli 33:33.) Mwina kanokoza teto umbuwela vyevyo naawandelile iyo nosakula ira kaambeele tumikela Mulungu thawi ya-anamale. Mofwanafwana na oing’anela ndende wawu Filipi, unoyo achenjile maganizo vanduli va “ivomelezi yakopolo,” mwina amo-i anayo panopa katinavwela uthengi-u kanoza kachenje vanduli voona vyevyo vinaze viireye Babulo Mulukulu aza aonongiwanga. — Vyo. 16:25-34.

NINOLALEELA CHIFUKWA NINOMUKONDA YEHOVA NA ZINA LAE

11. Kodi ninamuva-a avi Yehova ulemelelo, ulemu na kopolo? (Chivumbuluso 4:11) (Onani teto vithuzithuzi.)

¹¹ Chifukwa ilukulu ineyo ninalaleelela iyo uthenga wapama chiyoi ninomukonda Yehova Mulungu koma teto zina lae lowela. Ninoona ira laleela chindila yotamandela Mulungwi-u unoyo ninamukonda iyo. (Welengani Chivumbuluso 4:11.) Ninogwilizana na murima wetene mawu oyi: Yehova Mulungu ngofwanelela wachela ulemelelo, ulemu na kopolo kumela wa atumikae anayo kanamulambela mororomeleya. Ninomuva-a ulemelelo na ulemu  nawandelanga amo-iwa umboni osimikizeleya oyi liye “ngunoyo alengile vyongo vyetene” koma teto ira nikaana moyo chifukwa ya liye. Ninomuva-a kopolo di-u na-indi-edanga chito thawi, kopolo koma teto vyongo vi-u volaleela mwemo ninawandele iyo mogwilizana na mwemo vyongo vililiathu vamoywi-u. (Mat. 6:33; Luka 13:24; Akol. 3:23) Mwachidule, ninoomeliwa awandela athu amo-iwa vya Mulungwi-u unoyo ninamukonda iyo. Ninolimbikisiwa teto awandela amo-iwa vya zina lae koma teto vyevyo linatantauzaathu. Chifukwa n’ni?

12. Kodi ninaweli-a avi zina la Yehova nalaleelanga?

¹² Konda Yehova unonilimbikisa teto ira niweli-enga zina lae. (Mat. 6:9) Vyevi vinatantauza ira ninofunechecha wandela amo-iwa ira vyongo vyotakala vyevyo Satana unaonga liye vyokuza Yehova kai vyoona. (Gen. 3:1-5; Yob. 2:4; Yoh. 8:44) Nalaleelanga, ninofunechecha awandela athu etene anayo kanavuruwane vyoona vyokuza Yehova. Ninofuna ira uliwetene aiziwe ira ikalelo yae ilukulu chi chikondi, unolamulela mwachilungamo koma teto ira chineneveva Umwenae unomali-a mavuto etene nozi-a murendele na chimwemwe wa athu. (Sal. 37:10, 11, 29; 1 Yoh. 4:8) Nawandelanga athu vyongo ngati vyevi vyokuza Yehova, ninakala niweli-anga zina lae. Ninosangalala teto chifukwa ninoiziwa ira ninopanga vyongo mogwilizana na zina li-u. Chifukwa n’ni ninaonga eno?

13. Chifukwa n’ni ninasangalala iziweya ira nili Mboni da Yehova? (Yesaya 43:10-12)

¹³ Yehova unisakula ira nikale “Mboni” dae. (Welengani Yesaya 43:10-12.) Chaka doyeva diviriledo, kalata imo-iwa yokumela wu Bungwe Lolamulela yaongile ira: “Mwai ulukulu unoyo uliwetene un’na liye kuiziweya monga wa Mboni da Yehova.” c Chifukwa n’ni vili eno?  Kaganizelani isazo ila. Ngati munafuna ira muthu m’mo-iwa akale mboni va mulandwinyu ukoti, munomusakula muthu unoyo munamuiziwa nyo koma teto muroromela, unoyo un’na mbili yapama moi vinokoza pangi-a ira athu karoromele umboni unoyo unapeleke liye. Eno vonisakula ira nikale Mboni dae, vinatonyi-eda ira Yehova unoniiziwa pama koma teto unoniroromela ira ninerenga wandela amo-iwa ira liye eka ngunoyo uli Mulungu oona. Ninoona ira ngumwai wantengo wavadimu kala Mboni dae, ndipo ninofuna indi-eda chito mpata uliwetene votandiza amo-i ira kaiziwe zina lae koma teto ninoruni-a vyonama vinjinji vyevyo vinaongiwa vyokuza liye. Napanganga vyevi, ninakala nipanganga vyongo mogwilizana na zina li-u, loi Mboni da Yehova. — Sal. 83:18; Arom. 10:13-15.

NINOPITILIZAVE LALEELA MPAKANA MAPETO

14. Kodi pivyongo vyosangalasa viivi vyevyo ninaembekezela iyo usogolowu?

¹⁴ Ninoembekezela vyongo vyosangalasa vinjinji usogolowu. Modalisiwa na Yehova, ninoembekezela ona athu anjinji kafunjedanga choonadi chisauso ilukulu ya-anaambeele. Nisangalala teto iziwa ira ngakale vathawi yorucha vinjinji ya chisauso ilukulu ninoza nione athu anjinji kakumanga muilambo yotakala ya Satanela nowambeela tamanda Yehova limo-i na iyo. — Vyo. 13:48.

15-16. Kodi ninopitiliza panga n’ni ndipo mpakana alini?

¹⁵ Panopa nikaana chito injinji yoi ni-inde. Nikaana mwai ulukulu o-indana chito ineyo kinaza iireya nawili yolengeza uthenga wapama wa Umwene wa Mulungu vailambo yetene. Vathawi imo-ive inela ninafuneya pitiliza chenjeza athu vya vyongo vyevyo vinafuna ireya. Athu kanafuneya kaiziwe ira mapeto ailambo yotakalela kali vakwikwi vinjinji. Ndiye thawi ya chiweluzo yaza ifiya, aliwa kanoza kaiziwe ira uthenga unoyo nalaleela iyo wali okumela wa Yehova Mulungu. — Ezek. 38:23.

¹⁶ Ndiye kodi ninafuneya simikiza murima panga n’ni? Chifukwa yoomeliwa uthenga wapama, athu koma teto kwaranya vyetene chifukwa yomukonda Yehova Mulungu na zina lae, ninopitiliza laleela mofunechecha, mwachangu koma teto mwatindi mpakana Yehova angaongile ira “Baasi mumari-a!”