KHANI YOFUNJEDA 19
NYIMBO 22 Ufumu Umene Ukulamulira Ubwere
Kodi Ninaiziwa N’ni Vakhani ya Mwemo Yehova Unaze Liye Aweluzele Athu Usogolo?
“Yehova . . . kanafuna ira muthu uliwetene aze aonongiwe.”— 2 PE. 3:9.
VYEVYO NINAFUNJEDE IYO
Khanila inonitandiza ira niroromelenga ira Yehova unoza aweluze athu mwachilungamo.
1. Chifukwa n’ni ninaonge ira panopa ninakala muthawi yosangalasa?
NINAKALA muthawi yosangalasa vinjinji. Dambo lililetene ninoona maulosi a m’Baibulo kakwakwaneli-ediwanga. Mwaisazo, ninoona “mwene waumpoto” na “mwene waumwela” kakanganelanga ulamulilo. (Dan. 11:40) Ninoona teto uthenga wapama ulaleeliwanga vailambo yetene ndipo athu mamiliyoni kanosakula tumikela Mulungu. (Yes. 60:22; Mat. 24:14) Ninowachela teto yodya yauzimu yoinjiva “vathawi yofwanelela.” — Mat. 24:45-47.
2. Kodi nikale osimikiza vyan’ni, nanga ninafuneya zindikila n’ni?
2 Yehova unopitiliza nitandiza ira nivwecheche pama vyongo vyofuneya vyevyo vinaireye chineneveva. (Miya. 4:18; Dan. 2:28) Kaninakaikela ira vevo chisauso ilukulu inazeathu iambeelenga, ninaza nikala niiziwanga vyetene vyofuneya ira nikaleve ororomeleya vathawi yorucha inela. Komave ninafuneya zindikila ira vikala vyongo vimo-i vyokuza usogolo vyoi kaninaviiziwa. Mukhanila, yowambeela ninokambilana chifukwa iwa nichenjile mwemo nafotokozela iyo vimo-i mwa vyongo vyevi. Vanduli viwa ninokambilana vyevyo ninaviiziwa iyo vyokuza vimo-i mwa vyongo vyevyo vinaireye usogolo koma teto mwemo Babi-u waudimu unaze liye apangele vyongo.
VYEVYO KANINAVIIZIWA
3. Kodi vowambeela naonga ira Yehova unaza a-iya alini peleka mwai wa athu ira kakale umbalae, nanga chifukwa n’ni naonga vyevyo?
3 Vowambeela nafotokoza ira chisauso ilukulu yaza ikeda ambeela, athu katinaza kakala na mwai woi kaambeele roromela Yehova ira kaze kavulumuwe va Aramagedo. Nafotokoza vyevi chifukwa naganiza ira iliyetene yokuza Igumula yaimelela vimo-iviwavyene muthawi ineyo ninakala iywela. Mwaisazo, naganiza ira monga mwemo Yehova a-eyele liye isewo ya ingalawa Igumula yaanaambeele, va chisauso ilukulu unoza a-eye teto isewo kapena ira kanaza alola ira uliwetene wa muilambo ya Satanela aambeele mutumikela. — Mat. 24:37-39.
4. Kodi panopa ninoona ira khani ya Igumula inaimelela vyongo vimo-iviwavyene? Fotokozani.
4 Kodi nionenga ira iliyetene ineyo yaireile muthawi ya Igumula yaimelela vyongo vimo-iviwavyene? Yankho ti loi iyayi. Chifukwa n’ni? a Chifukwa kavali Malemba anayo kanafotokoza vyevi. Pivyoona ira Yesu ooerekezela “malambo a Nowa” na vyoireya vya m’malambo omari-a. Koma kaatonyi-edile ira iliyetene ineyo yaireile muthawi ya Nowa, monga eiwa wa isewo ya ingalawa, ookaana tantauzo limo-iliwalene. Komave vyevi kavinatantauza ira kaninafunjedevo yongo va khani ya Igumula yamuthawi ya Nowa.
5. (a) Kodi Nowa apangile n’ni Igumula yaanaireye? (Aheberi 11:7; 1 Petulo 3:20) (b) Vakhani ya chito yolaleela, kodi vyevyo vinaireya malambwano vinafwanafwana avi na vyevyo vyaireya muthawi ya Nowa?
5 Nowa angavwile uthenga ochenjeza wa Yehova, ootonyi-eda iroromelo vopanga ingalawa. (Welengani Aheberi 11:7; 1 Petulo 3:20.) Mofwanafwana na vyevi, athu anayo kanavwa uthenga wapama wa Umwene kanafuneya arela vyevyo kanafunjedaathu. (Vyo. 3:17-20) Petulo aongile ira Nowa “oolaleela vya chilungamo ya Mulungu.” (2 Pe. 2:5) Komave monga mwemo naonele iyo mukhani ivirilele, kaninaiziwa ngati liye aesaesile laleela wa muthu uliwetene vailambo yavati Igumula yaanafiye. Malambwano teto nino-indana mwakhama chito yolaleela ineyo inaireya vailambo yetene. Komave, ngakale ningaesaesile avi, kaninawande wandela muthu uliwetene uthenga wapama mapeto kaanafiye. Chifukwa n’ni?
6-7. Chifukwa n’ni kai vyowandeya wandela muthu uliwetene uthenga wapama mapeto kaanafiye? Fotokozani.
6 Kaganizelani vyevyo Yesu aongile liye vyokuza chitwi-u yolaleela. Liye oowongelaatu ira uthenga wapama unoza ulaleiwe “vailambo yetene yavati wewo uli athu, ira ukale umboni wa athu amitundu detene.” (Mat. 24:14) Malambwano, ulosila unokwakwaneli-ediwa vinjinji kwaranya wale. Uthenga wa Umwene unofalisiwa muviongelo vyokwaranya 1 000 ndipo saiti-u ya jw.org, inotandiza athu anjinji vailambo yetene ira kavwe uthenga wapama.
7 Yesu ooawandela teto ofunjedae ira katinaza kamari-a “zungulila mizinda detene,” kapena ira laleela wa muthu uliwetene, liye aanaze. (Mat. 10:23; 25:31-33) Mawu a Yesu anala kanokwakwaneli-ediwa teto malambwano. Athu anjinji kanakala m’madela anayo chitwi-u chiyoruni-iwa. Koma teto a-ima mahandiredi kanobaliwa va minisi iliyetene. Ninopanga vyetene vyevyo ninawande iyo ira nilaleele uthenga wapama wa athu a fuko lililetene, iongelo iliyetene na tundu uliwetene. (Chiv. 14:6) Koma vyoona viwa pivyoi kaninawande wandela muthu uliwetene uthenga wapama mapeto kaanafiye.
8. Kodi ninakale na fuso liivi vakhani ya mwemo Yehova unaze liye aweluzele athu usogolo? (Onani teto vithuzithuzi.)
8 Kumela va vyevyo nikambiranile iyovi, mwina ninokoza kala na fuso loi: Nanga bwanji vya athu anayo katikalile na mwai ovwa uthenga wapama chisauso ilukulu yaanafiye? Kodi Yehova na Mwanae, unoyo u-eliwe ira akale oweluza, kanaza kaaweluze avi? (Yoh. 5:19, 22, 27; Vyo. 17:31) Lemba losogolela khanila liongile ira Yehova “kanafuna ira muthu uliwetene aze aonongiwe.” M’malomwiwa, unafuna ira “athu etene kalape.” (2 Pe. 3:9; 1 Tim. 2:4) Eno ninafuneya iziwa ira Yehova kaniululele vyetene vyevyo unaze liye apange, va khani yoweluza athu anayo katinavwe uthenga wapama. Ndipo kanafuneya niwandela vyevyo upangile liye na vyevyo unaze liye apange.
Kodi Yehova unaza apanga n’ni na athu anayo katan’na mwai ovwa uthenga wapama chisauso ilukulu yaanaambeele? (Onani ndima 8) c
9. Kodi Yehova uniululele vyongo viivi zela m’Mawae?
9 Zela m’Mawae, Yehova uniululela vimo-i vyevyo unaze liye apange. Mwaisazo, Baibulo linoniwandela ira Yehova unoza avenyi-e “o-olungama” anayo katan’na mwai ovwa uthenga wapama ira kachenje vyoira viwa. (Vyo. 24:15; Luka 23:42, 43) Koma vyevi vinozi-a teto mafuso amo-i ofuneya.
10. Kodi mbamafuso amo-iwa aavi anayo ninakaena iyo?
10 Kodi athu etene anayo kanaze kakhwe va thawi ya chisauso ilukulu katinaza kakala na chiyembekezo yoi kaze kavenyi-iwe? Malemba kanofotokoza movweya pama ira athu osusa anayo Yehova na gulu lae la kondo kanazeathu kaaononge va Aramagedo katinaza kavenyi-iwa. (2 Ates. 1:6-10) Koma bwanji vya athu anayo kanaze kakhwe va thawiyo chifukwa ya ukalamba, marenda, ngozi kapena phiwa na athu afwiwa? (Nam. 9:11; Zak. 14:13) Kodi amo-iwa mwa athu anala kanoza kakale mugulu la athu “o-olungama” anayo kanaze kavenyi-iwe muilambo isha? Kaninaiziwa.
VYEVYO NINAIZIWA IYO
11. Kodi va Aramagedo athu kanaza kaweluziwa volandela n’ni?
11 Ninoiziwa vinjinji vyevyo vinaze viireye usogolo. Mwaisazo, ninoiziwa ira va Aramagedo, athu kanoza kaweluziwe volandela na mwemo kapangelaathu vyongo na abalae a Kiristu. (Mat. 25:40) Anayo kanaze kaweluziwe ira ti khosa, mbanayo katandizile ozoziwa koma teto Kiristu. Ninoiziwa teto ira amo-iwa mwa abalae a Kiristu kanaza kakala kangali vailambwela vevo chisauso ilukulu inazeathu iambeelenga ndipo kanoza kalandiwe dowa udimu Aramagedo inga-alile vang’ono ambeela. Vathawi ineyo abalae a Kiristu kaliathu vailambwela, pivyowandeya ira athu amirima dapama kakaena mwayi owatandiza va chito ineyo kana-indaathu. (Mat. 25:31, 32; Chiv. 12:17) Chifukwa n’ni iziwa vyevi uli ofuneya?
12-13. Kodi amo-iwa kanaza kapanga n’ni kaza kaona ira “Babulo Mulukulu” uonongiwa? (Onani teto vithuzithuzi.)
12 Ngakale chisauso ilukulu yaza iambeela, mwina amo-iwa anayo kanaze kaone onongiwa wa “Babulo Mulukulu” kanoza kaumbuwele ira a Mboni da Yehova koowongavo vya vyongo vyevi. Ndiye kodi amo-iwa anayo kanaze kaone vyevi kanoza kachenje mirima diwa? — Chiv. 17:5; Ezek. 33:33.
13 Vyevi vinoza vikale vyofwanafwana na vyevyo vyaireile wu Iguputo muthawi ya Mose. Umbuwelani ira “gulu la athu a mitundu do-iyana-iyana” lookuma wu Iguputo limo-i na Aizaraeli.” Mwina amo-iwa mwa athu anala koowambeela roromela Yehova kangaonile ira vyevyo Mose achenjezile liye vyokuza Milili 10 vinoireya. (Ekis. 12:38) Ngati vyevi vinaze viireye Babulo Mulukulu angaonongiwe, kodi ninoza nikumudwe voona ira athu koowambeela tumikela Mulungu unga-alile thawi yoyeva ira mapeto kafiye? Naari! Ninofuna musazi-eda Babi-u waudimu unoyo uli “wachifundo na ooma murima, o-olunduwa sanga koma teto wachikondi yororomeleya yoinjiva koma teto choonadi.” b— Ekis. 34:6.
Amo-iwa anayo kanaze kaone onongiwa wa “Babulo Mulukulu” kanoza kaumbuwele ira a Mboni da Yehova koowongavo vya vyongo vyevi (Onani ndima 12-13) d
14-15. Kodi venyi-iwa wa muthu unadalila ira akhwile alini kapena teto ira akala waani? Fotokozani. (Salimo 33:4, 5)
14 Thawi dimo-i ninovwa athu amo-iwa kaonganga ira, “Vinokala pama balanga angakhwile chisauso ilukulu yaanaambeele ira akaena chiyembekezo yoi aze avenyi-iwe.” Mwina aliwa kanokoza onga vyevi kangan’na vyolinga vyapama. Koma-i venyi-iwa wa muthu kunalandela ira ukhwile vathawi iivi. Yehova ngoweluza olungama ndipo thawi detene unoweluza mwachilungamo. (Welengani Salimo 33:4, 5.) Eno nikale osimikiza ira “Oweluza wailambo yetene” yavati unoza apange vyofwanelela. — Gen. 18:25.
15 Pivyovweya teto onga ira venyi-iwa wa muthu ira akale na moyo o-omala kunalandela wewo akala liye. Kai vyovweya ira Yehova aze aweluze athu anjinji ira ti “budi” chifukwa yoi aliwa kakala muvilambo vyoi katan’na mwai oyi kavwe uthenga wapama wa Umwene. (Mat. 25:46) Oweluza olungama wailambo yetene unowaganizela vinjinji athu anala kwaranya iyo. Kaninaiziwa mwemo Yehova unaze liye apangele vyongo vathawi ya chisauso ilukulu. Mwina amo-iwa mwa athu anala kanoza kakale na mwayi ofunjeda vyokuza Yehova, muroromela koma teto ambeela mutumikela vevo unaze liye aweli-enga zina lae. — Ezek. 38:16.
Chisauso ilukulu yaza iambeela, . . . kodi amo-iwa anayo kanaze kaone vyoireya vathawi ineyo kanoza kachenje maganizo?
16. Kodi niiziwile vyongo viivi vyokuza Yehova? (Onani teto ithuzithuzi.)
16 Funjeda Baibulo unitandiza iziwa ira Yehova unoona ira athu mbantengo wavadimu. Liye oopeleka moyo wa Mwanae ira etene iyene nifwanye mwai oyi nize nikale na moyo mpakana walewale. (Yoh. 3:16) Yehova unonikonda vinjinji etene iyene. (Yes. 49:15) Unoiziwa zina la muthu uliwetene vaekave. Ndipo unoniiziwa pama vinjinji moi ngakale ningakhwile, liye unoza anivenyi-e chifukwa unoiziwa iliyetene yokuza iyo. (Mat. 10:29-31) Eno nikaana vifukwa vyovweya vyororomela ira Babi-u wachikondi unoza aweluze muthu uliwetene mwachilungamo chifukwa liye ngwazelu, olungama koma teto wachifundo. — Yak. 2:13.
Nikale osimikiza ira Yehova unoza aweluze muthu uliwetene mwachilungamo chifukwa liye ngwazelu, olungama koma teto wachifundo (Onani ndima 16)
17. Kodi ninaza nikambilana n’ni mukhani yo-arela?
17 Voi sopano nivwechecha pama makundo anala, nionenga ira chitwi-u yolaleela chiyofuneya i-inda mombaraanya kwaranya wale. Chifukwa n’ni ninaonga eno? Nanga chin’ni inanilimbikise ira nilaleelenga uthenga wapama mwatindi? Ninoza nikambilane mayankho a mafunso anala mwasatanesatane mukhani yo-arela.
NYIMBO 76 Kodi Mumamva Bwanji?
a Ira muiziwe chifukwa iwa vakalile chenja wewu, onani khani yoi “Munavomereza Kuti Zimenezi Zichitike” mu Sanja ya Olonda ya Marichi 15, 2015 takuru 7-11.
b Babulo Mulukulu aza aonongiwa, atumiki etene a Yehova kanoza kaesiwe vevo Gogi wawu Magogi unaze liye aukeliwenga. Uliwetene unoyo unaze asakule kala umbali ya athu a Mulungu vanduli voi Babulo Mulukulu uonongiwa, naliyene teto unoza aesiwe.
c MAWU OFOTOKOZELA ITHUZITHUZI: Vithuzithuzi vyotonyi-eda chifukwa iwa athu amo-iwa katinakaena mwai ovwa utengi-u unoyo unalaleeliwa vailambo yetene: (1) Muzimai unakala udela loi ipembezo ilukulu ya wewo inolepeli-a athu vwa uthenga wapama, (2) banja linakala muilambo ineyo munaireya vyandale vyevyo vinapangi-a ira funjeda vyokuza Yehova ukale oruni-iwa koma teto ukale oopi-a, ndipo (3) baba unakala udela lorucha fiyawo.
d MAWU OFOTOKOZELA ITHUZITHUZI: Musikana unoyo a-iile choonadi unoumbuwela vyevyo afunjedile liye vyokuza onongiwa wa “Babulo Mulukulu.” Liye unochenja maganizo ndipo unowelela wa makolwae anayo kali a Mboni. Ngati vyofwanafwana na vyevi vinaireye, nimusazi-edenga Babi-u waudimu unoyo uli wachifundo koma teto ooma murima, nosangalalanga ira muthu ochimwa ulapa.
