1. Kodi atumiki a Mulungu awale kafwanya avi kopolo?

 THAWI dinjinji Baibulo linofotokoza vya alombwana anayo kan’na iroromelo yolimba. Koma kai thawi detene vevo aliwa kavivwaathu eno. Mwaisazo, thawi dimo-i Mwene Davide aviona ngati ali ‘wakopolo ngati mwango,’ koma thawi dimo-i ‘oosokonezeya,’ kapena ira kaana mantha. (Sal. 30:7) Ngakale ira Samisoni ookaana kopolo davadela mokami-iwa na zimu wa Mulungu, ooiziwa ira mo-okami-iwa na Mulungu ‘unokoza fooka nokala ngati athu etene.’ (Owel. 14:5, 6; 16:17) Alombwana ororomeleyala kookaana kopolo chifukwa yoi Yehova ngunoyo aava-a kopolodo.

2. Chifukwa n’ni mtumwi Paulo aongile ira akala ofooka pavevo teto akala liye wakopolo? (2 Akorinto 12:9, 10)

² Mtumwi Paulo naliyene ooiziwa ira afuneya va-iwa kopolo na Yehova. (Welengani 2 Akorinto 12:9, 10.) Mofwanafwana na etene iyene, Paulo oogumana teto na mavuto monga marenda. (Agal. 4:13, 14) Thawi dimo-i liye oovuteya panga vyongo vyofwanelela. (Arom. 7:18, 19) Ndipo thawi dimo-i ookumudwa kapena ova. (2 Akor. 1:8, 9) Komave, vevo Paulo akala liye ofooka pavevo teto akala liye wakopolo. Kodi vyevi vyawandeya avi? Yehova oomuva-a kopolo dedo afuneela liye ira avilele mavutwae.

3. Kodi ninakambilana mafuso aavi mukhanila?

³ Yehova unolonjeza ira na-iyene unokoza niva-a kopolo. (1 Pe. 5:10) Koma kaninaembekezele wachela kopolodi ningakede garati. Mwaisazo, injini inokami-a ira galimoto iyende.  Komave, diraiva unafuneya pangavo yongo ira galimotweyo iyende. Mofwanafwana na vyevi, Yehova ngokozeya niva-a kopolo dedo ninafuneya iyo. Komave ninafuneya pangavo yongo ira niwachele kopolodo. Ndiye kodi Yehova univa-ile vyongo viivi ira nifwanye kopolo? Nanga ninafuneya panga n’ni ira niwachele kopolodo? Ira nifwanye mayankho a mafuso anala, tiyemoni nikambilane mwemo Yehova apelekele liye kopolo wa namaongela Yona, Mariya unoyo ali m’mae wa Yesu koma teto mtumwi Paulo. Ninoona teto mwemo Yehova unapitilizela liye peleka kopolo wa atumikae malambwano.

4. Kodi ninapange avi ira Yehova aniva-enga kopolo?

⁴ Ndila imo-i ineyo ninafwanyele iyo kopolo kumela wa Yehova kupempela. Vosomeda mapempelwi-u, Yehova unokoza niva-a “kopolo yokwaranya yobaliwana.” (2 Akor. 4:7) Ninokoza limbikisiwa nawelenganga Mawae koma teto aganizela. (Sal. 86:11) Vale Mawu a Yehova ofwanyeya m’Baibulo “mbakopolo.” (Aheb. 4:12) Mwapempelanga wa Yehova koma teto welenga Mawae, munoza mufwanye kopolo doukami-ani vilela, kalave osangalala koma teto panga pamapama utumiki worucha. Tiyemoni nione mwemo Yehova apelekele liye kopolo wa namaongela Yona.

5. Chifukwa n’ni namaongela Yona afuneya va-iwa kopolo?

⁵ Namaongela Yona afuneya va-iwa kopolo. Liye oothawa utumiki worucha unoyo Yehova amuva-ile liye. Chifukwa ya vyevi, vanyanja vooambeela lipevo lakopolo ndipo liye koma teto athu anayo agwelilena liye mungalaweyo ka-alile vang’ono khwa. Angavochediwe munyanja, mo-oembekezeleya afwanyeile angali m’mbani mwa somba ilukulu. Kodi munaganiza ira Yona avwile avi angali m’mbani mwemo mwali dima vinjinji? Kodi liye aona ira basi unakhwela mwemo? Kapena kodi aona ira Yehova umutatila? Yona mwina ookaana mantha vinjinji.

6. Mogwilizana na Yona 2:1, 2, 7, kodi chin’ni yakami-ile Yona fwanya nawili kopolo angali m’mbani mwa somba?

⁶ Kodi Yona apangile avi ira afwanye kopolo vevo ali liye ekaeka m’mbani mwa somba ilukulu? Yongo yofuneya ineyo apangile liye wali pempela. (Welengani Yona 2:1, 2, 7.) Ngakale ira Yona kaavwele Yehova, kaakaikela ira liye unovuruwana pempelo lae lotonyi-eda viyevi-a koma teto lapa. Yona ooganizela teto Malemba. Chifukwa n’ni ninaonga eno? Mupempelo lae lofwanyeya va Yona 2, mukala mawu anjinji anayo kanafwanyeya teto mubuku la Masalimo. (Mwaisazo, erekezelani Yona 2:2, 5 na Salimu 69:1; 86:7.) Pivyovaela oneya ira Yona ooiziwa pama malembala. Ndipo ganizela malemba vathawi yoruchela, woomusimikizela ira Yehova unomukami-a. Eno Yehova oomuvulumucha ndipo liye ali okozeya dowa inda chito ineyo amurumile liye. — Yona 2:10–3:4.

7-8. Kodi m’bali m’mo-i wa wu Taiwan afwanyile avi kopolo angagumanile na mavuto?

⁷ Khani ya Yona inokoza nikami-a vevo ninagumana iyo na mavuto o-iyana-iyana. Isazo vakhanila ngu m’bali m’mo-iwa wa wu Taiwan, zina lae Zhiming, b unoyo unabulela marenda alukulu. Enjedela vevo, athu am’banja lae kanomuruni-a vinjinji chifukwa ya iroromelo yae. Koma liye unofwanya kopolo dokumela wa Yehova vopempela koma teto funjeda Mawae. Liye aongile ira: “Thawi dimo-i mavuto kaambeela, ndinoova moi maganizwanga katinakala m’malo ndipo vinokala vyorucha funjeda vameka.” Koma liye unororomela Yehova ira amukami-e. Ooenjedela  ira: “Yowambeela ndinopempela wa Yehova. Era eno ndino-ela mahedifoni novuruwananga nyimbo da Umwene. Thawi dimo-i ndinoimbana mwavativati mpakana maganizwanga kangagarateile. Vanduliviwa ndinoambeela funjeda.”

⁸ Funjeda vaeka umukami-a Zhiming mundila yoi kaaiembekezela. Mwaisazo, angapangiwe opaleshoni ilukulu, nesi oomuwandela ira maselwae ofiila mboyeva moi afuneya eliwa magazi. A-anapangiwe opaleshoniyo, Zhiming oowelenga khani yokuza murongola m’mo-iwa unoyo apangiwevo opaleshoni ngati ineyo. Maselo ofiila a murongoloyo kootita vinjinji kwaranya aye. Koma murongoloyo kaasomedile eliwa magazi ndipo oochila pamapama. Khani inela yoomukami-a Zhiming ira akaleve ororomeleya.

9. Kodi munapange avi ngati mufookile na vyoshisha vyevyo mugumanilena nyo? (Onani teto vithuzithuzi.)

⁹ Mwagumananga na vyoshisha, kodi munodandaula vinjinji moi munolepela pempela wa Yehova? Kapena munofooka vinjinji moi munolepela funjeda vaekinyu? Muumbuwelenga ira Yehova unovwechecha mwemo vyongo vililiathu va moywinyu. Eno ngakale mungapempelile mwachidule, kamukaikelenga ira liye unouva-ani vyevyo munafuneela nyo. (Aife. 3:20) Ngati munalepela welenga koma teto funjeda vaekinyu chifukwa yamavuto, mushishenga vuruwana vyongo vyoira jambuliwa monga Baibulo kapena mabukwi-u amo-i. Vuruwana nyimbo kapena onela mavidiyo va jw.org unokoza teto ukami-ani. Mwapempelanga wa Yehova koma teto indi-eda chito vyongo vyevyo univa-ile liye, munakala mulolanga ira auva-eni kopolo.

10. Kodi abali na arongoli-u kananikami-a avi fwanya kopolo?

¹⁰ Yehova unokoza niva-a kopolo vo-indi-eda chito abali na arongola. Aliwa kanokoza ‘nikami-a nonilimbikisa’ nagumana na vyoshisha kapena nava-iwa utumiki umo-iwene worucha. (Akol. 4:10, 11) Ninofuna ira afwi-u kanikami-e, simbwasimbwa “vakala mavuto.” (Miya. 17:17) Nafooka, Akiristu afwi-u kanokoza nikami-a fwanya vyongo vyevyo ninafuneya iyo, nikami-a ira kanidandaulenga koma teto ira nipitilizeve kala vausamwali wapama  na Yehova. Tiyemoni nikambilane mwemo athu amo-iwa kamukami-eleathu Mariya, unoyo ali m’mae wa Yesu, ira afwanye kopolo.

11. Chifukwa n’ni Mariya afuneya va-iwa kopolo?

¹¹ Mariya afuneya limbikisiwa. Liye ookaana mantha angawandeliwe na ngelo Gabirieli ira apange utumiki worucha. Mariya kaali vabanja, koma ngeloyo oomuwandela ira unoza akale na vambani. Liye ali a-analelevo mwana, koma afuneya musamalela mwana unoyo unaze akale Mesiya. Koma teto voi ali a-anagonevo na mulombwana, kodi amufotokozela avi Yosefe unoyo aembekezela kalanae vabanja? — Luka 1:26-33.

12. Mogwilizana na Luka 1:39-45, kodi Mariya afwanyile avi kopolo dedo afuneya liye?

¹² Kodi Mariya afwanyile avi kopolo ira akwakwani-e utumiki worucha unola? Liye oodalila amo-iwa ira kamukami-e. Mwaisazo, oomuvepa Gabirieli ira amufotokozele vinjinji vyokuza utumiki unola. (Luka 1:34) Vanduliviwa, liye oodowa wa balae, zina lae Elizabeti, unoyo akala “udela lamimwango” la Yuda. Ulendo unola wali okami-a vinjinji. Elizabeti oomuyamikela Mariya ndipo mosogoleliwa na Yehova, oomufotokozela ulosi wokuza mwana unoyo unaze abaliweyo. (Welengani Luka 1:39-45.) Mariya aongile ira Yehova umupangela “vyakopolo na ndanda lae.” (Luka 1:46-51) Yehova oomuva-a kopolo Mariya vo-indi-eda chito Gabirieli na Elizabeti.

13. Kodi chin’ni yaireile murongola m’mo-iwa wa wu Bolivia angavepile Akiristu afwae ira kamukami-e?

¹³ Mofwanafwana na Mariya, nanyen’ne Yehova unokoza uva-ani kopolo zela mwa Akiristu afwinyu. Murongola m’mo-iwa wa wu Bolivia, zina lae Dasuri, afuneya kopolo ngati dedi. Ababae kangabulelile marenda alukulu koma teto gonati-iwa muchipatala, Dasuri ooesaesa asamalela. (1 Tim. 5:4) Panga vyevi kawali okweya. Liye aongile ira: “Thawi dinjinji ndakeda ona ngati kandinakwakwani-a.” Vowambeela, liye kaavepile amo-iwa ira kamukami-e. Liye aongile ira: “Kandafuna ira ndivuti-enga abali. Ndaganiza ira Yehova ngunoyo unandikami-e. Koma ndoozindikila ira vyevyo ndapanga miyovyo vyali ngati ndinalimbana na vutolo vameka.” (Miya. 18:1) Dasuri ooganiza vyowatumizela uthenga afwae nowaiziwi-a mwemo vyongo vyaliliathu. Liye aongile ira: “Kandinawande fotokoza mwemo Akiristu afwanga kandilimbikiseleathu. Koozana yodja uchipatala ndipo koondiwelengela malemba olimbikisa. Vinokala vyolimbikisa vinjinji iziwa ira kanili eki-u. Nili m’banja lilukulu la Yehova lelo tilofunechecha nikami-a, ula na iyo limo-i koma teto nilimbikisa ira nipitilize tumikela Yehova.”

14. Chifukwa n’ni ninafuneya lola ira andimuwa kanikami-enga?

¹⁴ Yehova unoniva-a kopolo vo-indi-eda chito andimuwa. Aliwa kali ngati mphaso dedo Yehova una-indi-eda liye chito vonilimbikisa koma teto nisisimula. (Yes. 32:1, 2) Eno mwakaana nkhawa, muwafotokozelenga andimuwa mavutwinyu. Kauva-angani thandizo muliwachelenga ndipo muliyamikelenga. Yehova unokoza a-indi-eda chito ira kauva-eni kopolo.

15. Kodi Akiristu etene kan’na chiyembekezo yoi avi?

¹⁵ Malonjezo a m’Baibulo kanoniva-a chiyembekezo koma teto kopolo ira nipitilize tumikela Yehova. (Arom. 4:3, 18-20) Akiristu iyo nikaana chiyembekezo yantengo wavadimu yozakaana moyo wo-omala m’Paradaizo vailambo yavati kapena mu Umwene waudimu. Chiyembekezo yi-u inoniva-a kopolo ira niwande vilela vyoshisha, nilaleelenga utenga wapama koma teto nipangenga pama utumiki uliwetene mupingo. (1 Ates. 1:3)  Chiyembekezo inela chineyo yamuva-ile kopolo mtumwi Paulo.

16. Chifukwa n’ni mtumwi Paulo afuneya va-iwa kopolo?

¹⁶ Paulo afuneya va-iwa kopolo. Mukalatae ineyo alembele liye Akiristu a wu Korinto, liye oovierekezela na chiwiya yateya ineyo inakala yo-olimba. Liye ‘oopanikiziwa,’ ‘maliwa zelu,’ ‘zuzumi-iwa’ koma teto ‘gwi-iwa vati.’ Thawi dimo-i, ngakale moywae weniweni wakala vangozi. (2 Akor. 4:8-10) Paulo alembile mawu anala vaulendwae wanararu waumishonale. Ndipo vevo alemba liye mawu anala kaaiziwa ira unogumana teto na mavuto alukulu. Liye oozuzumi-iwa na gulu lachiwawa, oomangiwa, ngalawa yoomutweela koma teto oo-eliwa mundende.

17. Mogwilizana na 2 Akorinto 4:16-18, chin’ni yakami-ile Paulo ira avilele vyoshisha?

¹⁷ Ganizela vya chiyembekezo yae woomukami-a Paulo ira afwanye kopolo doi avilele. (Welengani 2 Akorinto 4:16-18.) Liye oowandela Akiristu a wu Korinto ira ngakale umuthwae “waunde umale,” kanaza awelela munduli. Paulo ooganizela vinjinji vyausogolo. Liye aongile ira chiyembekezo yae yodowa kala na moyo wo-omala udimu yali yaulemelelo ulukulu ndipo yookwaranya mavuto etene anayo agumanana liye. Paulo ooganizela chiyembekezo inela ndipo yoomukami-a ira akalenga “musha dambo na dambo.”

18. Kodi chiyembekezo yamukami-ile avi Tihomir na banja lae fwanya kopolo?

¹⁸ M’bali mʼmo-iwa wa wu Bulgaria, zina lae Tihomir, unofwanya kopolo chifukwa ya chiyembekezo yae. Chaka doyeva divirile mundulimu ng’onong’onwae zina lae Zdravko, ookhwa va ngozi yavasewu. Vyevi vingakede ireya, Tihomir oovuteya vinjinji na chisoni. Ira avilele, liye na athu am’banja lae kooerekezela vyevyo vinaze viireye athu kaza kavenyi-iwanga. Liye aongile ira: “Mwaisazo, ninokambilana malo anayo ninaze iyo nigumane na Zdravko, yodja ineyo ninaze iyo nimupiyele, athu anayo ninaze iyo niaitane vaphwando li-u lowambeela koma teto vyevyo ninaze iyo nimuwandele vyokuza malambo omari-a.” Tihomir aongile ira ganizela vinjinji vya chiyembekezo iwa woova-a kopolo banja lae ira lipitilize  vilela koma teto kaembekezelenga thawi ineyo Yehova unaze liye amuvenyi-e nchimwenae.

19. Kodi munapange avi ira muroromelenga vinjinji malonjezo a Yehova? (Onani teto ithuzithuzi.)

¹⁹ Kodi munapange avi ira chiyembekezo inyu ikale yakopolo? Mwaisazo, ngati munaembekezela moyo wo-omala vailambo yavati, muwelengenga koma teto ganizela vyevyo Baibulo linafotokozaathu vyokuza Paradaizo. (Yes. 25:8; 32:16-18) Muganizelenga mwemo moyo unazeathu ukalele muilambo isha. Muerekezelenga mungali muilambweyo. Kodi munamuonamo mbaani? Nanga munavwa vyongo vyoi avi? M’murimani mwinyu munavwa avi? Ira mukale na vyongo vinjinji vyoviganizela, muing’anenga vithuzithuzi vya m’mabukwi-u vyotonyi-eda Paradaizo kapena onela mavidiyo a nyimbo monga doi, Dziko Latsopano Lomwe Likubwera, Dziko Latsopano Lili Pafupi kapena Ganizirani Nthawiyo. Naganizelanga vinjinji vya chiyembekezo yi-u ya ilambo isha, mavutwi-u kanoza kaoneye ira “mbathawi yoyeva ndipo mbovevuwa.” (2 Akor. 4:17) Chiyembekezo ineyo Yehova auva-ileni liye inokoza ukami-ani ira muvilele vyoshisha.

20. Kodi ninafwanye avi kopolo ngakale vevo ninaona iyo ira nifooka?

²⁰ Ngakale ningaonile ira nifooka, “na thandizo la Mulungu, ninoza niwachele kopolo.” (Sal. 108:13) Yehova upeleka wale vyongo vyevyo vinanikami-e ira nifwanye kopolo. Eno ngati ninafuna ira anikami-e ira nipange pama utumiki-u, nivilele vyoshisha kapena nikaleve osangalala, ninafuneya pempela wa Yehova mokumela vati vamurima koma teto fufuza malangizwae vofunjeda Baibulo vaeki-u. Nilolenga ira abali na arongola kanilimbikisenga. Thawi detene niganizelenga vya chiyembekezo yi-u. Napanga eno ninoza niwachele ‘kopolo dilukulu chifukwa ya kopolo dae daulemelelo, ira niwande vilela vyongo vyetene nokala oleza murima koma teto achimwemwe.’ — Akol. 1:11.