1. Mogwilizana na Aheberi 12:1, kodi ninafuneela panga n’ni ira nidowe nafiye umapeto wa mpikisano odowa wachela moyo o-omala?

 BAIBULO linoerekezela moyo wa Akiristu na mpikisano otamanga. Anayo kawinile kanova-iwa mphoto ya moyo o-omala. (2 Tim. 4:7, 8) Ninafuneela panga vyetene vyevyo ninawande iyo ira nipitilize tamanga chifukwa kwaranya wale letene, vano nili umapeto wa mpikisano unola. Namarumiwa Paulo, unoyo awinile va mpikisano odowa wachela moyo oofotokoza ineyo inanikami-e ira niwine. Liye aniwanden’le ira “nikurule yonyemela iliyetene . . . teto nitamange movilela mpikisano unoyo kani-eleleathula.” — Welengani Aheberi 12:1.

2. Kodi mawu oyi nikurule yonyemela iliyetene kanatapulela n’ni?

² Vevo Paulo alembile liye ira “nikurule yonyemela iliyetene,” kodi atapulela ira kavali iliyetene ineyo Mkiristu unafuneela liye tukula? Naari, kaatapulela eno. M’malomwiwa atapulela ira ninafuneela tatila iliyetene yo-ofuneya. Vyongo vyevi vinokoza nilepeli-a tamanga pama koma teto nipangi-a ira ninyemeliwe. Ira nivilele, mombaraanya ninafuneela zindikila koma teto tatila yonyemela iliyetene yo-ofuneya ineyo inapangi-e ira nifooke. Komave vevo ninapanga iyo vyevi, kaninafuneela tatila vyongo vyevyo ninafuneela iyo tukula chifukwa napanga eno ninokoza vipangi-a kala o-ofwanelela va mpikisano unola. (2 Tim. 2:5) Ndiye kodi ninafuneela tukula vyongo viivi?

3. (a) Mogwilizana na Agalatiya 6:5, kodi ninafuneela tukula n’ni? (b) Kodi ninakambirana n’ni mukhanila, nanga chifukwa n’ni?

³ Welengani Agalatiya 6:5. Paulo ooromola yongo imo-iwa  ineyo ninafuneela iyo tukula. Liye alembile ira “uliwetene unafuneela tukula katundwae.” Veva Paulo awonga vya vyevyo Yehova unaembekezela liye ira uliwetene apangenga monga ntumikae, vyongo vyoi muthu m’mo-iwa kananipangele. Mukhanila ninokambirana ira “katundwi-u” unatangani-avo vyongo viivi koma teto mwemo ninamutukulele iyo. Ninoona teto vyongo vimo-i vyo-ofuneya vyoi mwina nivitukula koma teto ninofunjeda mwemo ninavitatilele iyo. Tukula katundwi-u koma teto tatila vyongo vyevyo vili vyo-ofuneya, unonikami-a ira niwine mpikisanwi-u odowa wachela moyo o-omala.

4. Chifukwa n’ni ninaonge ira vyevyo nalonjezile iyo ira ninoza nitumikele Yehova mpakana walewale kai vyonyemela? (Onani teto ithuzithuzi.)

⁴ Lonjezo loi ninoza nitumikele Yehova mpakana walewale. Vevo navipelekile iyo wa Yehova, noomulonjeza ira ninoza nimulambelenga koma teto panga yofuna yae. Ninafuneela kwakwaneli-edanga lonjezo li-uli. Panga vyongo mogwilizana na vyevyo nalonjezile iyo ira ninoza nitumikele Yehova, nguudindo ulukulu. Koma kai onyemela. Moi Yehova anilengile ira nipangenga yofuna yae. (Chiv. 4:11) Liye anilengile mu ifwanafwani-edo yae koma teto na  murima oyi nifunenga mulambela. Vyo-arelavo viwa pivyoi ninokalanae va usamwali koma teto ninosangalala vopanga yofuna yae. (Sal. 40:8) Kwaranya vyetene, napanganga yofuna ya Mulungu koma teto musazi-eda Mwanae, ‘ninosisimuliwa.’ — Mat. 11:28-30.

5. Kodi chin’ni inaukami-eni kwakwaneli-eda lonjezo linyu loi munoza mutumikele Yehova mpakana walewale? (1 Yohani 5:3)

⁵ Kodi munatukule avi katundula? Viikala vyongo vin’li vyevyo vinaukami-eni. Yowambeela, pitilizani esaesa ira mumuomeliwengana vinjinji Yehova. Munokoza panga vyevi mwaganizelanga vyapama vyevyo ukalile liye aupangelangani koma teto madaliso anayo unaze liye auva-eni usogolo. Mwamuomeliwangana vinjinji Mulungu, pavevo teto vinazeathu vikale vyo-orucha ira mumuvwelenga. (Welengani 1 Yohani 5:3.) Yanambili, mumusazi-edenga Yesu. Liye ookwakwani-a panga yofuna ya Mulungu chifukwa oovepa Yehova ira amukami-e koma teto ooganizela vinjinji madaliso anayo unaze liye afwanye usogolo. (Aheb. 5:7; 12:2) Mofwanafwana na Yesu, muvepenga Yehova ira auva-eni kopolo teto thawi detene muganizelenga idedi-edo yoza fwanya moyo o-omala. Vevo munamuomeliwana nyo vinjinji Mulungu koma teto musazi-eda Mwanae, munoza mukwakwaneli-ede lonjezo linyu loi munoza mumutumikele mpakana walewale.

6. Chifukwa n’ni ninafuneela kwakwaneli-edanga maudindwi-u m’banja? (Onani teto ithuzithuzi.)

⁶ Maudindwi-u m’banja. Vampikisanwi-u odowa wachela moyo, ninafuneela muwomeliwana vinjinji Yehova na Yesu kwaranya mwemo ninawomeliwana iyo abali-u. (Mat. 10:37) Komave vyevi kavinatapulela ira ninyalanyazenga maudindwi-u m’banja ngati mbanayo kananipangi-a ira kanimusangalasenga Mulungu na Kiristu. M’malomwiwa, ira nikale osomedeleya wa Mulungu na Kiristu, ninafuneela kwakwaneli-eda maudindwi-u m’banja. (1 Tim. 5:4, 8) Napanganga vyevi ninoza nikale osangalala. Moi Yehova oopanga vyoi banja likalenga losangalala ngati mulombwana na mu-iyanae kanawomeliwana koma teto lemekezana, makolo kawomeliwanga koma teto funji-a a-imiwa koma teto a-ima kavwelanga makolwiwa. — Aife. 5:33; 6:1, 4.

7. Kodi munakwakwaneli-ede avi udindwinyu m’banja?

⁷ Kodi munatukule avi katundula? Kaya udindwinyu ngoi avi m’banja, mu-indi-edenga chito zelu dofwanyeya m’Baibulo m’malo mopanga vyongo vokeda landela mwemo munavwela nyo, ikalelo kapena vyevyo athu anayo kani mbaakaswiri kanaongaathu. (Miya. 24:3, 4) Mu-indi-edenga chito pama mabukwi-u. Mabukwala kanofotokoza vyevyo munapange nyo ira mu-arelenga makundo a m’Baibulo. Mwaisazo, mukhani doi “Makundo Okami-a Mabanja” mukala makundo anayo kanakami-e mabanja, makolo koma teto a-ima va mavuto anayo kanagumananaathu malambwano. b Mukalenga osimikiza arela makundo a m’Baibulo, ngakale vevo athu am’banja linyu katinaa-arela. Vyevi vinoza vikami-e banjalo koma teto Yehova unoza audaliseni. — 1 Pe. 3:1, 2.

8. Kodi chin’ni inaukami-eni ngati mwasakulile vyongo molakweya?

⁸ Gumana na vyo-arelavo vya vyosakula vi-u. Yehova ooniva-a ufulu osakula vyoira, moi unafuna ira nisangalalenga na vyo-arelavo vyapama vyoza chifukwa yoi nisakula vyongo mofwanelela. Koma kananiteteza va mavuto oza chifukwa yoi kanisakulile pama. (Agal. 6:7, 8) Eno ninosomedela vyongo vyevyo ninagumanana iyo chifukwa yoi kanisakulile mofwanelela,  niwonga mo-oganiza pama koma teto nipanga vyongo mopupuluma. Chifukwa ya vyevyo nipangile iyo, chikumbumtimi-u inokoza nivuti-anga. Komave iziwa ira ninafuneela gumana na vyo-arelavo vya vyevyo nisakulile iyo, unokoza nilimbikisa ira niulule machimwi-u, nikoze vyevyo nilakwi-ile iyo koma teto kanize niviwelele nawili. Panga vyevi unonikami-a ira nipitilize tamanga va mpikisano odowa wachela moyo.

9. Kodi chin’ni inaukami-eni ngati mwasakulile vyongo molakweya? (Onani teto ithuzithuzi.)

⁹ Kodi munatukule avi katundula? Ngati kamunawande chenja vyevyo musakulile nyo molakweya, musomedelenga mwemo vyongo vililiathu va moywinyu vathawiila. Iziwani ira kamunawande chenja vyevyo vyaireile mundulimu. Kamutatilenga thawi na kopolo dinyu vovilungami-a kapena viimba mulandu kapena teto aimba athu amo-iwa mulandu va vyevyo kamwasakulile pama. M’malomwiwa, musomedelenga vyevyo mwalakwi-ile nyo noesaesanga panga vyevyo munawande nyo ira vyongo vikale pama vathawiila. Ngati munaviimba mulandu chifukwa ya vyevyo mwalakwi-ile nyo, moviyevi-a mupepelenga wa Yehova nosomedela vyevyo mwalakwi-ile nyo koma teto vepa ira aukululukeleni. (Sal. 25:11; 51:3, 4) Mupepesenga wa anayo mwaalakwele nyo. Muvepenga teto ira andimuwa kaukami-eni akala vanafuneela panga eno. (Yak. 5:14, 15) Mufunjedenga va vyevyo mwalakwi-ile nyo teto muesaesenga ira kamuviwelele nawili. Mwapanganga vyevi, munokala osimikiza ira Yehova unoza auireleni chifundo koma teto unoza aukami-eni. — Sal. 103:8-13.

10. Chifukwa n’ni ninaonge ira embekezela vyongo vyoi pivyo-owandeya ngu katundu onyemela? (Agalatiya 6:4)

¹⁰ Embekezela vyongo vyo-owandeya. Naembekezelanga vyongo vyo-owandeya voerekezela na amo-iwa ninokoza vinyemeli-a. (Welengani Agalatiya 6:4.) Ngati thawi detene ninavierekezela na amo-iwa, ninokoza ambeela murima wa sanje koma teto wa mpikisano. (Agal. 5:26) Voesaesa ira nikwakwani-e vyevyo amo-iwa kapangileathu, ninokoza vikanyi-edanga ira nipange vyevyo kaninawande volandela luso koma teto mwemo vyongo vililiathu vamoywi-u. Koma teto ngati “yongo ineyo waiembekezelawe yalepeleya, inobuleli-a murima,” ndiye ninavwe avi ngati ninafunenga panga vyongo vyevyo kaninavikwakwani-e olo vang’ono? (Miya. 13:12) Panga vyevyo unokoza nionongela kopolo di-u koma teto unokoza nipangi-a ira nivuteyenga tamanga va mpikisano odowa wachela moyo o-omala. — Miya. 24:10.

11. Chin’ni inaukami-eni ira kamuembekezelenga vyongo vyo-owandeya?

¹¹ Kodi munatatile avi yonyemela inela? Kamuembekezelenga ira mupangenga vyokwaranya vyevyo Yehova unaembekezela liye ira mupangenga. Liye kanaembekezela ira mumuva-enga vyongo vyoi kamun’na. (2 Akor. 8:12) Iziwani ira Yehova kanaerekezela vyevyo munapanga nyo na vyevyo athu amo-iwa kanapangaathu. (Mat. 25:20-23) Vyevyo unaona liye ira pivyantengo wavadimu pivyoi munomutumikela na murima wetene, muli ororomeleya koma teto muli ovilela. Moviyevi-a, musomedelenga ira kamunakwakwani-e panga vyongo vimo-i vathawiila chifukwa ya usinkhwinyu, thanzi linyu koma teto mwemo vyongo vililiathu vamoywinyu. Mofwanafwana na Barizilai, mukalenga okozeya koonda mautumiki amo-iwa ngati thanzi linyu kalili pama. (2 Sam. 19:35, 36) Mofwanafwana na Mose, musomedelenga kami-iwa koma teto muwava-enga amo-iwa vyoira ngati vanafuneela panga eno. (Ekis. 18:21, 22) Viyevi-a wewu unokoza ukami-ani ira kamupangenga vyongo vyo-owandeya vyoi vinokoza unyemelani va mpikisano odowa wachela moyo.

12. Kodi vuto linakala la iyo amo-iwa kasakula vyongo molakweya? Fotokozani.

 ¹² Viimba mulandu chifukwa yoi amo-iwa katisakulile pama. Kaninaasakulele amo-iwa vyoira koma teto kai thawi detene vevo ninaateteze iyo ira katigumane na mavuto oza chifukwa yoi koosakula vyongo molakweya. Mwaisazo, mwana unokoza sakula iya tumikela Yehova. Vyevi vinokoza pangi-a ira makolwae kavwe chisoni vinjinji. Komave makolo kaviimbanga mulandu chifukwa yoi mwaniwa usakula vyongo molakweya, kanakalecha katukulanga katundu onyemela. Unola kai katundu unoyo Yehova unafuna liye ira aliwa katukule. — Arom. 14:12.

13. Kodi makolo kanapange avi akala mwaniwa kasakulile vyongo mofwanelela?

¹³ Kodi munatatile avi yonyemela inela? Muumbuwelenga ira Yehova ooniva-a etene iyene ufulu osakula moi unolola ira uliwetene asakulenga vyoira. Vyevi vinotangani-avo sakula mutumikela kapena naari. Yehova unoiziwa ira kamuli likolo langwilo moi unofuna ira mupangenga vyetene vyevyo munawande nyo. Nguudindo wa mwaninyuyo sakula vyoira, o-okala nyo. (Miya. 20:11) Koma mwina munokoza dandaulanga va vyevyo munalakwi-a nyo monga likolo. Akala chi eno, mumuwandelenga Yehova mwemo munavwela nyo teto mumuvepenga ira aukululukeleni. Liye unoiziwa ira kamunawande chenja vyevyo vyaireile. Vathawi imo-ive ineyo, kanaembekezela ira mumuteteze mwaninyuyo ira kaze a-ande vyevyo ufesile liye. Muumbuwelenga ira ngati mwaninyuyo unaesaese ira awelele wa Yehova, liye unoza amuwachele mofunechecha. — Luka 15:18-20.

14. Chifukwa n’ni viimba mulandu vinjinji ngu katundu unoyo ninafuneela iyo mutatila?

¹⁴ Viimba mulandu vinjinji. Pivyovweya ira nachimwa ninoviimba mulandu. Komave viimba mulandu vinjinji kai katundu unoyo Yehova unafuna liye ira nitukule. Viimba mulandu ngu katundu onyemela unoyo ninafuneela iyo tatila. Koma kodi ninaiziwe avi ngati ninaviimba mulandu vinjinji? Ngati niululile chimo li-u, lapa koma teto panga vyetene vyofuneya ira kaniliweli-ede nawili, ninokala osimikiza ira Yehova unikululukela. (Vyo. 3:19) Napanga vyevi,  Yehova kanafuna ira nipitilizenga viimba mulandu. Liye unoiziwa ira kedanga viimba mulandu koopi-a. (Sal. 31:10) Ngati ninakaena chisoni yopitilila malile, ninokoza iya tamanga va mpikisano odowa wachela moyo. — 2 Akor. 2:7.

15. Kodi chin’ni inaukami-eni ira kamuviimbenga mulandu vinjinji? (1 Yohani 3:19, 20) (Onani teto ithuzithuzi.)

¹⁵ Kodi munatatile avi yonyemela inela? Mwaviimbanga mulandu vinjinji, muganizelenga likundo loi Mulungu ‘unokululuka.’ (Sal. 130:4) Liye akululukela anayo kalapile mokumela vati va murima unolonjeza ira: “Machimwiwa kandinaza ndiaumbuwela.” (Yer. 31:34) Vyevi vinatapulela ira Yehova kanaza auimbani mulandu chifukwa ya machimo anayo mwapangile nyo mundulimu. Eno kamuganizenga ira mavuto anayo munagumanana nyo chifukwa yoi moochimwa nguumboni woi kaukululukeleni. Eno kamuvilunduwelenga kapena vilanga chifukwa yoi vyevyo mwalakwi-ile nyo mundulimu mwina pi vyevyo vinapangi-a ira kamupangenga vinjinji votumikela Yehova vathawiila. Yehova kanakeda ganizela machimwinyu, moi nanyen’ne teto kamunafuneela panga eno. — Welengani 1 Yohani 3:19, 20.

16. Monga athu anayo nili va mpikisano otamanga, kodi ninafuneela zindikila n’ni?

¹⁶ Vevo ninatamanga iyo va mpikisano odowa wachela moyo, ninafuneela tamanga ‘mundila yoi nidowe [nawachele] mphoto.’ (1 Akor. 9:24) Ninokoza panga vyevi akala ninazindikile katundu unoyo ninafuneela iyo tukula koma teto vyonyemela vyevyo ninafuneela iyo tatila. Mukhanila, nikambirana visazo vyoyeva vyoka vya vyongo vyevyo ninafuneela iyo tukula koma teto vyevyo ninafuneela iyo tatila. Koma viikala vimo-i vinjinji. Yesu aongile ira ninokoza ‘tanganisiwa nodja vinjinji, nong’wa vinjinji, na nkhawa da moyo.’ (Luka 21:34) Vyongo vyevi koma teto malemba amo-iwa vinoukami-ani iziwa vyongo vyevyo munafuneela nyo chenja vevo munatamanga nyo va mpikisano odowa wachela moyo.

17. Chifukwa n’ni ninakale osimikiza ira ninokoza wina mpikisano odowa wachela moyo?

¹⁷ Ninokala osimikiza ira ninokoza wina mpikisano odowa wachela moyo, chifukwa Yehova unoza aniva-e kopolo dedo ninafuneela iyo. (Yes. 40:29-31) Eno kamuyevi-e liwilo linyu. Mumusazi-edenga namarumiwa Paulo, unoyo atamanga mwatindi ira adowe afwanye mphoto ineyo kamu-eleleathu vasogolo vae. (Afil. 3:13, 14) Kalivo unoyo unautamangeleni mpikisanola, komave Yehova unoukami-ani ira muwine. Liye unoukami-ani teto tukula katundwinyu koma teto tatila vyonyemela vyo-ofuneya. (Sal. 68:19) Voi Yehova uli umbalinyu, munokoza kwakwani-a tamanga movilela koma teto wina.