Mukhaniyo noofunjeda ira viikala khani imo-i yoka yofuneya vinjinji ineyo inakuza athu na angelo. Khaniwa kuweli-iwa wa zina la Yehova. Khani yokuza ulamulilo wa Yehova, kapena ira vofuna iziwa ngati Mulungu unalamulela pama kapena naari, chi mbali imo-i ya khani ilukulu inela. Mofwanafwana na vyevi, khani yoi athu kanokoza kala ororomeleya wa Mulungu kapena naari, chi mbali imo-iwa teto ya khani ilukulu inela.

Chifukwa n’ni vathawiila ninafotokoza vinjinji ira khani ilukulu chiyokuza zina la Yehova koma teto weli-iwa wa zina lae? Tiyemoni nikambilane vifukwa viraru.

Yowambeela, Satana ootakali-a zina la Yehova, kapena ira limbili lae, m’munda wa Edeni. Yofuka ineyo Satana amufukile liye Hava moenjela yatonyi-eda ira ngati Yehova ali Mulungu wa umbombo, unoyo amuva-ile Adamu na Hava malamulo ookaana chilungamo. Vanduli viwa Satana mwachindunji ooruni-a vyevyo Yehova aongile liye moi vopanga vyevyo ootonyi-eda ira Mulungu ngonama. Veva liye oonyoza zina la Yehova. Eno ookala “Mdyerekezi,” zina lelo linatapulela “wonama.” (Yoh. 8:44) Chifukwa yoi Hava oororomela yonama ya Satana inela, kaavwele Mulungu vyevyo vinatonyi-eda ira kaafuna ira Mulunguyo akale olamulelae. (Gen. 3:1-6) Mpakana vano, Satana unonyozave zina la Mulungu nofalisanga vyonama vyokuza liye. Wa athu anayo kanaroromela vyonamavi thawi dinjinji vinokala vyorucha vwela Yehova. Eno wa athu a Mulungu, nyoza zina lowela la Yehova kai chilungamo teto kotakala vinjinji. Inela chichifukwa ilukulu ineyo inapangi-a mavuto na vyotakala vyetene vailambwela.

Yanambili, ira akami-e vyolengiwa vyae vyetene, Yehova ngosimikiza murima ira asimikizele ira zina lae tilowela. Inela chiyongo yofuneya vinjinji wa Yehova. Eno liye unoonga ira: “Ndinoza ndiweli-e zina langa lilukulu.” (Ezek. 36:23) Moi Yesu ootonyi-eda pama yongo yofuneya vinjinji ineyo atumiki ororomeleya etene a Yehova kanafuneelaathu romola m’mapempelwiwa vevo aongile liye ira: “Zina linyu liweli-iwe.” (Mat. 6:9) Moweli-edaweli-eda, Baibulo linotonyi-eda funeya wolemekeza zina la Yehova. Kaganizelani visazo vyoyeva vi: “Muva-eni Yehova ulemelelo wofwanelela zina lae.” (1 Lim. 16:29; Sal. 96:8) “Imbani nyimbo dotamanda zina lae.” (Sal. 66:2) “Ndinoza ndilemekeze zina linyu mpakana walewale.” (Sal. 86:12) Imo-i mwa thawi dedo Yehova aongile liye eka kumela udimu, wali ukachisi wu Yerusalemu, wewo Yesu aongile liye ira: “Babani lemekezani zina linyu.” Vosomeda Yehova eere: “Ndililemekeza moi ndinoza ndililemekeze.” — Yohani 12:28. a

Yanararu, thawi detene yolinga ilukulu ya Yehova inaza ikalanga yogwilizana na zina lae,  kapena ira limbili lae. Kaganizelani vi: Chin’ni inaze iireye vanduli va vyoshisha vyomari-a vyevyo vinaze viireye Ulamulilo wa chaka 1000 wa Kiristu waza umala? Kodi athu koma teto angelo kanoza kapitilize gawaneya  va khani ilukulu yokuza weli-iwa wa zina la Yehova? Ira nifwanye yosomeda tiyemoni niganizele mbali mbin’li da khani ilukulu inela, dedo dili roromeleya wa athu koma teto ulamulilo wa Yehova. Kodi athu anayo katonyi-ede ira mbororomeleya kanoza kapitilize shishiwa ira katonyi-ede nawili ira mbororomeleya? Naari. Aliwa kanoza kakale angwilo koma teto kangashishiwe wale mokwakwanela moi kanoza kawachele moyo o-omala. Kodi athu koma teto angelo kanoza kapitilize kaikela ngakale teto gawaneya vakhani yoi Yehova ngolamulela wapama? Naari. Vofiya va thawiyo, etene udimu na vailambo yavati kanoza kagwilizane koma teto somedela ira Yehova ngofwanelela lamulela. Koma nanga bwanji khani yokuza zina la Yehova?

Vofiya va thawiyo, zina la Yehova linaza likala lingaweli-iwe. Komave linoza lipitilize kala lofuneya vinjinji wa atumikae etene ororomeleya udimu na vailambo yavati. Chifukwa n’ni? Chifukwa aliwa kanoza kaone Yehova apitilizanga panga vyongo vyodabwi-a. Kaganizelani vi: Chifukwa yoi moviyevi-a Yesu unoza aweli-ede ulamulilo wa Yehova, ‘Mulungu unoza akale vyongo vyetene wa uliwetene.’ (1 Akor. 15:28) Vanduli va vyevi, athu vailambo yavati kanoza kasangalale na “ufulu waulemelelo wa a-ima a Mulungu.” (Arom. 8:21) Teto Yehova unoza akwakwaneli-ede yolingae ineyo ukalile liye angan’na wa thawi indendai yoi etene udimu na vailambo yavati kaze kakale banja lilukulu logwilizana. — Aife. 1:10.

Kodi vyetene vyevi vinaza vikuza avi banja la Yehova udimu na vailambo yavati? Mookaikela, ninoza nikale ofunechecha pitiliza tamanda zina loriya la Yehova. Olemba masalimo Davide oosogoleliwa lemba ira: “Adaliseye Yehova Mulungu . . . Lidaliseye zina lae laulemelelo mpakana walewale.” (Sal. 72:18, 19) Ninoza nipitilize fwanya vifukwa visha mpakana walewale, vyonipangi-a lemekeza Yehova.

Zina la Yehova linoimelela iliyetene yokuza liye. Eno linoniumbucha simbwasimbwa vyokuza chikondae. (1 Yohani 4:8) Thawi detene ninoza niumbuwelenga ira chikondi yoomupangi-a ira anilenge, apeleke sembe ya dipo koma teto ira atonyi-ede ira ulamulilwae ngolungama koma teto wachikondi. Komave ninoza nipitilize ona Yehova atonyi-edanga chikondi wa vyolengiwa vyae. Ninoza nifunecheche kala va usamwali wolimba na Babi-u koma teto imba nyimbo dotamanda zina lae mpakana walewale. — Sal. 73:28.