KHANI YOFUNJEDA 2
NYIMBO 132 Tsopano Ndife Thupi Limodzi
Alombwana, Mulemekezenga A-iyaninyu
“Nyo teto Alombwana,. . .Muwava-enga Ulemu.” — 1 PE. 3:7.
VYEVYO NINAFUNJEDE IYO
Mukhanila ninokambilana mwemo mawu na vyoira vya mulombwana vinatonyi-edeleathu ira unomulemekeza iyanae.
1. Chifukwa n’ni Yehova auwambeli-ile ukwati?
YEHOVA ngu “Mulungu wa imwemwe,” moi unafuna ira na-iyene teto nisangalalenga. (1 Tim. 1:11) Liye univa-a mphaso dinjinji donikami-a ira nisangalalenga. (Yak. 1:17) Imo-i mwa mphaso dedi ti banja. Mulombwana na iyana katelana kanolonjezana ira kanerenga omeliwana, lemekezana koma teto samalelana. Aliwa kagwilizananga kanokala osangalala vinjinji.— Miya. 5:18.
2. Chin’ni inaireya m’mabanja anjinji malambwano?
2 Koma athu anjinji kanodiwala vyevyo kalonjezileathu va dambo la ukwati. Moi vyo-arelavo viwa pivyoi katinakalecha osangalala. Lipoti la Bungwe Loona vya umoyo Vailambo Yetene liitonyi-eda vachineneeva ira alombwana anjinji kanovaza a-iyaniwa, aongela mawu aibewe kapena azuzumi-a mundila imo-iwene. Alombwanala kanolemekezecha a-iyaniwa kakala vagulu koma kanowazuzumi-a kakala va ekiwa. Teto mabanja anjinji katinaenda pama akala mulombwana unaonela vyolava.
3. Kodi pivyongo viivi vyevyo vinapangi-e ira alombwana kakale ankhaza?
3 Chifukwa n’ni alombwana amo-iwa kanazuzumi-a a-iyaniwa? Mwina kaulukulele m’banja la nkhaza, eno kanoganiza ira kavali vuto apangela amo-iwa nkhaza. Amo-i kanolandela maganizo olakweya oyi mulombwana weniweni unafuneya tonyi-eda kopolo ira alemekeziwenga. Koma alombwana amo-i katafunji-iwe viruni-a. Alombwana amo-i kanokala na maganizo olakweya okuza a-iyana koma teto gonana chifukwa yoonela vyolava. Enjedela veva malipoti kanotonyi-eda ira mulili wa COVID-19 uuenjedela mavuto anala. Komave vyevi kai vifukwa vyovweya vyopangi-a ira alombwana kapangelenga nkhaza a-iyaniwa.
4. Kodi alombwana a Ikristu kanafuneya pewa n’ni?
4 Akristu kanafuneya pewa maganizo olakweya okuza a-iyana. a Chifukwa n’ni ninaonga eno? Ninaonga eno chifukwa vyevyo muthu unapanga liye vinaambeela noganiza. Namarumiwa Paulo oochenjeza Akristu ozoziwa a wu Roma ira “katilandelenga zelu da thawiila.” (Arom. 12:1, 2) Vevo Paulo alembela liye kalatela pingo wa wu Roma, Pingoyo wali wangakalilevo wa thawi indendai. Koma mawu a Paulwala kanotonyi-eda ira amo-i mupingomo kooendela maganizo koma teto makalelo a muilambwela. Chichifukwa iwa aalimbikisile ira kachenje maganizo na makalelwiwa. Malangizo anala mbokami-a teto wa alombwana Aikristu malambwano. Pivyovwi-a chisoni ira amo-i koolandela maganizo a muilambwela moi kanopangela nkhaza a-iyaniwa. b Koma kodi Yehova unafuna ira alombwana kapangenga avi vyongo na a-iyaniwa? Ninofwanya yosomeda ya yofuka inela mulemba lelo linasogolela khanila.
5. Mogwilizana na 1 Petulo 3:7, Kodi alombwana kanafuneya panga vyongo avi na a-iyaniwa?
5 Welengani 1 Petulo 3:7. Yehova unolamula alombwana ira kalemekezanga a-iyaniwa. Mulombwana unoyo unamulemekeza iyanae unopanga vyongo na liye mooma murima koma teto mwachikondi. Mukhanila ninokambilana vyevyo mulombwana unapange liye votonyi-eda ira unomulemekeza iyanae. Koma yowambeela tiyemoni nikambilane makalelo anayo kanatonyi-ede ira mulombwana kanamulemekeza iyanae.
MUPEWENGA MAKALELO ANAYO KANATONYI-EDE IRA KAMUNALEMEKEZA IYANINYU
6. Kodi Yehova unavwa avi alombwana kazuzumi-anga a-iyaniwa? (Akolose 3:19)
6 Muvaza iyaninyu. Yehova unoidana na muthu uliwetene wachiwawa. (Sal. 11:5) Liye unoidana vinjinji na mulombwana unoyo unamuzuzumi-a iyanae. (Nam. 2:16; welengani Akolose 3:19.) Mogwilizana na lemba lelo linasogolela khanila, la 1 Petulo 3:7, akala mulombwana unamuzuzumi-a iyanae unosokoneza usamwalae na Mulungu. Moi Yehova kanasomedenga mapempelwae.
7. Mogwilizana na Aifeso 4:31, 32, Kodi alombwana kanafuneya pewa onga mawu oyi avi? (Onani “tapuleliwa wa mawu amo-i.”)
7 Onga mawu aibewe. Alombwana amo-i kanozuzumi-a a-iyaniwa voonga mawu aibewe koma teto mwauwali. Koma Yehova unoidana “novya murima, lunduwa, lalata, koma teto mawu aibewe.” c (Welengani Aifeso 4:31, 32.) Liye unovwa vyetene vyevyo ninaonga iyo. Moi unokuziwa namwemo mulombwana munaongela liye na iyanae, ngakale vevo kaliathu wa ekiwa. Mulombwana unoyo unaonga mawu aibewe na iyanae unosokoneza banja lae koma teto usamwalae na Mulungu. — Yak. 1:26.
8. Kodi Yehova unavwa avi athu kaonelanga vyolava, nanga chifukwa n’ni?
8 Onela vyolava. Yehova unoidana vinjinji noonela vyolava. Eno mulombwana unoyo unaonela vyolava unosokoneza usamwalae na Yehova koma teto kanamulemekeza iyanae. d Yehova unoembekezela ira vyoira koma teto vyoganiza vya mulombwana vitonyi-edenga ira ngororomeleya wa iyanae. Yesu oonga ira mulombwana unoyo unamuing’anechecha mu-iyana m’mo-iwa mpakana mulakalaka upanganae wale “chigololo m’murimani mwae.” e — Mat. 5:28, 29.
9. Chifukwa n’ni Yehova kanasangalala mulombwana azuzumi-anga iyanae va khani dokuza gonana?
9 Panga vyongo vyoofwanelela vakhani dokuza gonana. Alombwana amo-i kanokanyi-eda a-iyaniwa ira kagonane mundila ineyo inapangi-e iyana vivwa ira ngotakali-iwa kapena ira kanakondiwa. Yehova unoidana na ikalelo yovikonda koma teto yooganizela amo-i. Liye unafuna ira mulombwana aomeliwenga samalela koma teto mulemekeza iyanae. (Aife. 5:28, 29) Kodi Mkristu unapange n’ni akala kanalemekeza iyanae, unomupangela nkhaza kapena unoonela vyolava? Kodi unapange avi ira achenje maganizwae koma teto vyoira vyae?
VYEVYO MULOMBWANA UNAPANGE LIYE AKALA KANAMULEMEKEZA IYANAE
10. Kodi isazo ya Yesu inaakami-e avi alombwana?
10 Chin’ni inamukami-e mulombwana ira a-iye mupangela vyongo vya nkhaza iyanae? Liye unafuneya esaesa musazi-eda Yesu. Pivyoona ira Yesu kaatelile koma alombwana kanokoza funjedavo yongo kaganizela mwemo liye mwapangela liye vyongo na ofunjedae. (Aife. 5:25) Mwaisazo, kaganizelani mwemo alombwana kanafunjedeathu va mwemo Yesu mwapangela liye vyongo na anamarumiwae koma teto mwemo mwaongela liye na aliwa.
11. Kodi Yesu apanga vyongo moi avi na ofunjedae?
11 Yesu oopanga vyongo mwaulemu koma teto mooma murima wa anamarumiwae. Liye kaali wankhaza kapena wopondeleza. Ngakale ira liye ali Mbwiiwa, liye kaa-indi-eda chito kopolo ira kamuovenga. Koma m’malo mwiwa liye oopanga vyongo na aliwa movievi-a. (Yoh. 13:12-17) Liye ooawandela ofunjedae ira: “Lolani ira ndiufunji-eni, chifukwa miyo ndili ofwaasa na ovievi-a moi munoza musisimuliwe.” (Mat. 11:28-30) Va vinakeda oneya ira Yesu ali ofwaasa. Muthu ofwaasa kai ofooka koma unokaana kopolo dokwakwani-a viruni-a. Athu amo-i kamuputa liye unokala odekha teto unoviruni-a.
12. Kodi Yesu aonga moi avi na athu amo-iwa?
12 Yesu oonga mawu olimbikisa koma teto osisimula wa amo-i. Liye kaaonga mwauwali na ofunjedae. (Luka 8:47, 48) Ngakale ira athu oruni-a koomunyoza koma teto koomupangela vyongo vyankhaza, “liye kaaweli-eda mwaibewe.” (1 Pe. 2:21-23) Thawi dimo-i, Yesu ookala phee oonga iliyetene. (Mat. 27:12-14) Va liye oopeleka isazo yapama vinjinji wa alombwana a Ikristu.
13. Mogwilizana na Mateyu 19:4-6, kodi mulombwana unapange avi ira avitangani-e wa iyanae? (Onani teto ithuzithuzi.)
13 Yesu oolangiza alombwana ira kakalenga ororomeleya wa a-iyaniwa. Liye oo-indi-eda chito mawu anayo Babae aongile liye oyi mulombwana unafuneya ‘vitangani-a wa iyanae.’ (Welengani Mateyu 19:4-6.) Mawu a Igiriki anayo kaamasulelaathu ira “vitangani-a” kanokoza tapulela “mata na supaguru”. Eno mulombwana na iyana, kanafuneya gwilizananga vinjinji ngati kamatiwe vamo-i na supaguru. Akala kana-iyani-iwe etene ambiili, kanoza kavwe voreya. Mulombwana unoyo unagwilizana eni na iyanae kanaonele vyolava vilivyetene. Liye unotembenuwa mombaraanya ira ‘kaing’ane vyongo vyookaana chito’. (Sal. 119:37) Vinakala ngati upangana na maswae ira kaing’ane mosilila a-iyana amo-i. — Yob 31:1.
Mulombwana ororomeleya unaapewa onela vyolava (Onani ndima 13) g
14. Kodi mulombwana unoyo unamuzuzumi-a iyanae, unapange avi ira asakaede usamwalae na Yehova koma teto na iyanaeyo?
14 Mulombwana unoyo unamuzuzumi-a kapena muongela mawu aibewe iyanae unafuneya panga vyongo vimo-i ira asakaede usamwalae na Yehova koma teto iyanaeyo. Kodi pivyongo viivi vyevyo unafuneya liye panga? yowambeela, liye unafuneya zindikila ira ukaana vuto lilukulu. Kavili iliyetene ineyo chiyobiseya wa Yehova. (Sal. 44:21; Nam. 12:14; Aheb. 4:13) Yanambin’li, liye unafuneya iya muzuzumi-a iyanae koma teto chenja makalelwae. (Miya. 28:13) Yanaralu, unafuneya mupepesa iyanae koma teto vepa Yehova ira amukululukele. (Vyo. 3:19) Unafuneya muvepa Yehova ira amukami-e kala na murima ofuna chenja koma teto ira akale oviruni-a va vyevyo unaganiza liye, vyevyo unaonga liye koma teto vyevyo unapanga liye. (Sal. 51:10-12; 2 Akor. 10:5; Afil. 2:13) Yanambala 4, unafuneya panga vyongo mogwilizana na mapempelwae voidana na vyongo vyachiwawa vilivyetene koma teto mawu aibewe. (Sal. 97:10) Yanambala 5, unafuneya vepa likami-edo wa abusa a chikondi a mupingo. (Yak. 5:14-16) Yanambala 6, liye unafuneya kala na pulani yomukami-a ira kaze aambeele ikalelwae yotakaleyo. Mulombwana unoyo unaonela vyolava unafuneya panga teto vyongo 6 vyetene vyevi moi Yehova unoza amukami-e ira achenje ikalelwae. (Sal. 37:5) Koma keda pewa vyongo vyevyo vinakumudwi-e iyana kai okwakwanela. Liye unafuneya funjeda mulemekeza iyanae. Kodi unapange avi vyevi?
KODI MULOMBWANA UNAMULEMEKEZE AVI IYANAE?
15. Kodi mulombwana unatonyi-ede avi chikondi wa iyanae?
15 Muwatonyi-edenga chikondi. Alombwana amo-i anayo kanasangalala m’banja mwiwa kanoesaesa ira dambo lililetene kapangenga yongo imo-iwene ineyo inatonyi-ede ira kanomuomeliwana iyaniwa. (1 Yoh. 3:18) Mulombwana unokoza tonyi-eda ira unomuomeliwana iyanae mu ndila ding’onong’ono monga mu-inda ndanda kapena mukumbarela. Unokoza mutumizela uthenga vafoni oyi “Ndiusauwela” kapena mufuka ira “Bwanji vinoenda?” Thawi dimo-i unokoza mulembela mawu osakuliwa pama va kalata. Mulombwana apanganga vyongo ngati vyevi unomulemekeza iyanae moi banja liwa linokala lolimba.
16. Chifukwa n’ni mulombwana unafuneya muyamikela iyanae?
16 Mumuyamikelenga iyaninyu. Mulombwana unoyo unamulemekeza iyanae unomulimbikisa. Ndila imo-i yolimbikisela iyana kumuyamikela va vyongo vyetene vyevyo unapanga liye. (Akol. 3:15) Mulombwana amuyamikelanga iyanae kumela vati va murima, iyanaeyo unovivwa pama. Unovivwa ira ngotetezeya, unokondiwa koma teto unolemekeziwa. — Miya. 31:28.
17. Kodi mulombwana unatonyi-ede avi ira unomulemekeza iyanae?
17 Mupangenga vyongo mooma murima koma teto mwaulemu. Mulombwana unoyo unamuomeliwana iyanae unomuona ira liye ngwamtengo wavadimu. Moi unomuona ira ngu mphaso yamtengo wavadimu yokumela wa Yehova. (Miya. 18:22; 31:10) Eno unopanga na liye vyongo mooma murima koma teto mwaulemu ngakale va khani dokuza gonana. Liye kanamukanyi-ede iyanae ira kagonanenga mu ndila ineyo inamupangi-e ira kavivwenga pama avwivwenga ira ngookaana chito kapena ikumbumtimae imuvuti-enga. f Mulombwanoyo unoesaesa teto ira apangenga vyongo vyetene vyevyo vinamukami-e iyanoyo ira akaena ikumbumtima yapama vamaso va Yehova. — Vyo. 24:16.
18. Kodi alombwana kanafuneya simikiza murima panga n’ni? (Onani bokosi loi “ Ndila 4 Dokami-a Ira Mukale Mulombwana Waulemu” )
18 Nyo alombwana, iziwani ira Yehova unoona koma teto yamikela va vyevyo munapanganyo vomulemekeza iyaninyu. Pitilizani mulemekeza iyaninyu vopewa makalelo otakala koma teto vopitiliza panga vyongo mooma murima, mwaulemu koma teto mwachikondi. Mwapanganga vyevyo munoza mutonyi-ede ira munomuomeliwana koma teto muona ira ngwamtengo wavadimu. Mwamulemekezanga iyaninyu, munoza muteteze yongo yofuneya vinjinji va moywinyu, ineyo ili usamwalinyu na Yehova. — Sal. 25:14.
NYIMBO 131 “Chimene Mulungu Wachimanga Pamodzi”
a Alombwana kanokoza panga pama welenga khani yamuru oyi “Kodi Munoona A-iyana Ngati Mwemo Yehova Munaonela Liye?” Mu Sanja Ya Olonda Ya Januwale 2024.
b Athu anayo kanazuzumi-iwa vande kanokoza panga pama welenga khani oyi “Mfundo Zothandiza Anthu Omwe Achitiridwa Nkhanza Zosiyanasiyana” Vagawo loi “Nkhani zina va Jw.org kapena va JW Library®.
c TAPULELA WA MAWU AMO-I: “Mawu aibewe” Kanokoza tapulela romola mazina onyoza, onga mwauwali koma teto kedanga kalela muimba m’mo-iwa mulandu.
d Onani va jw.org koma teto JW Library va khani yoi “Kuonera Zolaula Kungasokoneze Banja Lanu.”
e Iyana unoyo mamunae unaonela vyolava unokoza panga pama welenga khani yoi “Akala Mulombwana kapena Mu-iyaninyu Unaonela Vyolava” mu Sanja ya Olonda ya Ogaste 2023
f Baibulo kalinaromola vyetene vyokuza gonana ofwanelela kapena oofwanelela vaari va mulombwana na iyanae. Banja la Ikristu linafuneya sakula ekiwa va khanila vyevyo vinatonyi-ede ira linomulemekeza Yehova, linofuna kala na ikumbumtima yapama koma teto linopanga vyongo moganizelana. Onga vyoona, banja kalinafuneya muwandela uliwetene khani diwa dokuza gonana.
g MAWU OFOTOKOZELA ITHUZITHUZI: M’bali una-inda chito yosakaeda magalimoto. Unaakoonda ona mabrosha a vithuzi vyolava na afwae a wu chito.
