KHANI YOFUNJEDA 5
NYIMBO 108 Chikondi Chokhulupirika cha Mulungu
Madaliso Anayo Ninafwanya Iyo Chifukwa ya Chikondi ya Yehova
“Kristu Yesu ooza va ilambo ya vati za vulumucha ochimwa.”— 1 TIM. 1:15.
VYEVYO NINAFUNJEDE IYO
Mukhanila ninokambilana madaliso anayo ninafwanya iyo chifukwa ya dipo koma teto mwemwo ninatonyi-edele iyo ira ninomuyamikela Yehova.
1. Kodi ninapange avi ira nimusangalasenga Yehova?
NIYEREKEZELE ira mumuva-a muthu m’mo-iwene unoyo munamuwomeliwana nyo mphaso yoria koma teto yomukami-a. Kodi munavwe avi akala muthuyo angakede i-iya vamo-iviwa vene o-oindi-eda chito? Onga vyoona, munokoza sangalala akala unai-indi-eda chito koma teto tonyi-eda yamikela. Mofwanafwana na vyevi, Yehova unosangalala natonyi-edanga ira ninoyamikela mphaso ya dipo koma teto chikondi ineyo unitonyi-edile liye voniva-a mphaso yamtengo wavadimu inela.— Yoh. 3:16; Arom. 5:7, 8.
2. Kodi ninakambilana n’ni mukhanila?
2 Koma thawi yavira, ninokoza ambeela iwona movevuwa mphaso inela. Vinokoza kala ngati nilandile mphaso ya Mulungu nokeda i-iya vamo-iviwa vene. Vili ngati ninosangalalana koma kaninafuna ira ikalenga vooneela. Ira vyevi kaviireye ninafuneya ganizela thawi detene mwemo Yehova na Kristu kanapangelaathu. Khanila inonikami-a ira nipangenga vyevi. Ninoona mwemo dipo linanikami-eleathu vathawiila koma teto mwemo linazeathu linikami-ele usogolo. Ninokambilana teto vyevyo ninapange iyo votonyi-eda ira ninoyamikela chikondi ya Yehova simbwasimbwa va nyengo ya Chikumbuso.
MADALISO ANAYO NINAFWANYA IYO VATHAWIILA CHIFUKWA YA DIPO
3. Kodi mbamadaliso aavi anayo ninafwanya iyo vathawiila chifukwa ya dipo?
3 Viikala madaliso anayo ninafwanya iyo vathawiila chifukwa ya sembe ya Kristu. Mwaisanzo, Yehova unonikululukela machimwi-u chifukwa ya dipo. Iyo kanili athu ofwanelela kululukeliwa koma liye unofuna panga vyevi. Olemba masalimo, unoyo atonyi-edile yamikela, ooimba ira: “Nyo Yehova nyo muli wapama moi muli wokozeya kululuka.”— Sal. 86:5; 103:3, 10-13.
4. Kodi Yehova apelekile dipo ira limukami-e mbaani? (Luka 5:32; 1 Timoteyu 1:15)
4 Athu amo-i kanoviona ira kai ofwanelela kululukiwa na Yehova. Vyoona viwa pivyoi etene iyene kanili ofwanelela kululukiwa. Namarumiwa Paulo oozindikila ira liye kaali “wofwanelela romoliwa namarumiwa.” Koma oonga teto ira: “Chifukwa yooma murima ulukulu wa Mulungu, ndilive mwemo ndilili miyo.” (1 Akor. 15:9, 10) Nalapa machimwi-u Yehova unonikululukela. Liye kanapanga vyevi chifukwa yoi nili ofwanelela kululukiwa, koma chifukwa yoi unoniomeliwana. Mwambeela viona ngati ookaana chito, muumbuwelenga ira Yehova oopeleka dipo ira likami-e athu ochimwa anayo kalapile, ookala athu anayo katichimwile. — Welengani Luka 5:32; 1 Timoteyu 1:15.
5. Kodi viikala muthu uliwetene unoyo unaonge ira ngofwanelela wachela chifundo ya Yehova? Fotokozani.
5 Kavili uliwetene unoyo unafuneya viona ira ngofwanelela pangeliwa chifundo na Yehova ngakale angamutumikele wa chaka dinjinji. Ngakale vili eno, Yehova unoyamikela roromeleya wi-u. (Aheb. 6:10) Liye oopeleka mwanae ngati mphaso yaulele ookala ngati malipilo avyevyo ninapanga iyo vomutumikela. Naganizanga ira nili ofwanelela pangeliwa chifundo kapena teto ira nili ofwanelela ganizeliwa mwavadela, vinakala ngati Kristu kaafuneela nikhwela. — Erekezeleni na Agalatiya 2:21.
6. Chifukwa n’ni Paulo apanga tindi votumikela Yehova?
6 Paulo ooiziwa ira liye kai ofwanelela pangeliwa chifundo na Mulungu. Nanga chifukwa n’ni apanga tindi vomutumikela Yehova? Liye oopanga vyevi vofuna tonyi-eda ira ooyamikela oma murima ulukulu wa Yehova, ookala chifukwa yoi afuneela pangeliwa chifundo. (Aife. 3:7) Mofwanafwana na Paulo, na-iyene ninopitiliza mutumikela Yehova mwatindi vofuna tonyi-eda muyamikela, ookala vofuna tonyi-eda ira nili ofwanelela pangeliwa chifundo.
7. Kodi mbamadaliso amo-i aavi anayo ninafwanya iyo vathawiila chifukwa ya dipo? (Aroma 5:1; Yakobo 2:23)
7 Madaliso amo-i anayo ninafwanya iyo vathawiila chifukwa ya dipo kukala vausamwali wapama na Yehova. a Mogwilizana na vyevyo nafunjedile iyo mukhani ivirilele, etene iyene kanabaliwe nangali vausamwali wapama na Mulungu. Koma chifukwa ya dipo, ninokoza kala “va murendele na Mulungu” moi liye unokoza kala fwi-u wavamurima. — Welengani Aroma 5:1; Yakobo 2:23.
8. Chifukwa n’ni ninafuneya muyamikela Yehova chifukwa ya mwai wa pempelo?
8 Chifukwa yoi nili vausamwali wapama na Yehova ninowanda pempela wa liye. Yehova kanakeda vuruwana mapempelo aatumikae kasonkana vagulu, koma unovwa teto pempelo la uliwetene vaeka. Pempelo linonikami-a ira murimi-u ukale m’malo koma teto maganizwi-u kagarateye. Koma teto pempelo linonikami-a mundila dimo-i. Linonikami-a ira usamwali-u na Mulungu ukale wolimba. (Sal. 65:2; Yak. 4:8; 1 Yoh. 5:14) Yesu angali vailambwela oomeliwa pempela. Liye ooiziwa ira Yehova unovwa mapempelo koma teto ira pempelo linokoza kami-a ira usamwalae na Babae ukale wolimba. (Luka 5:16) Ninoyamikela ira sembe ya Yesu inonikami-a ira nikale afwae a Yehova koma teto ira niongenga na liye m’mpempelo.
MADALISO ANAYO NINAZE IYO NIFWANYE USOGOLO
9. Kodi mbamadaliso aavi anayo athu ororomeleya kanazeathu kafwanye usogolo chifukwa ya dipo?
9 Kodi mbamadaliso aavi anayo atumiki ororomeleya a Yehova kanazeathu kafwanye usogolo? Aliwa kanoza kava-iwe moyo oomala. Athu anjinji kanaganiza ira vyevi kai vyowandeya chifukwa athu kookala kakhwanga wa chaka dinjinji. Koma yolinga yowambeela ya Mulungu yali yoi athu kakaena moyo mpakana walewale. Adamu aakale ira kaachimwile kavali uliwetene unoyo akaikelenga vya moyo oomala. Pivyoona ira vathawiila vinokoza nirucha roromela ira ninoza nikale na moyo mpakana walewale. Koma iyo kaninakaikela vyevi chifukwa ninoiziwa ira Yehova oopeleka malipilo avadimu vinjinji anayo Kali moyo wa Mwanae. — Arom. 8:32.
10. Kodi ozoziwa koma teto a khosa dimo-i kanaembekeza n’ni?
10 Ngakale ira moyo oomala ninoza niiuwachele usogolo, Yehova unafuna ira niuganizelenga vathawiila. Ozoziwa kanoganizela vya moyo wapama vinjinji unoyo kanazeathu kawachele udimu vevo kanazeathu kalamulelenga udimu na Kristu. (Chiv. 20:6) A khosa dimo-i kanoganizela vya moyo wapama unoyo kanazeathu kakaena m’paradaizo vailambo yavati. (Chiv. 21:3, 4) Kodi muli mu gulu la khosa dimo-i moi munana embekezela moyo oomala vailambo yavati? Mphaso inela kai yotita naelekezela na moyo wa udimu. Iyo athu nalengiwe ira nikalenga vailabwela moi moyo wa vailambwela unoza ukale osangalasa vinjinji.
11-12. Kodi mbamadaliso aavi anayo ninaembekezela iyo muilambo isha? (Onani teto ithuzithuzi.)
11 Kaganizelani mwemo moyo unazeathu ukalele m’paradaizo. Kamunaza mukaana m’khawa chifukwa ya marenda kapena khwa. (Yes. 25:8; 33:24) Yehova unoza auva-eni vyongo vyetene vyofwanelela vyevyo munalakalaka nyo. Kodi nyo munaza mufuna funjeda vyongo viivi? Vyasayansi, nyimbo kapena djambula? Vinakeda oneya ira vanoza vafuneye akaswiri oona vya mapulani na vyomangamanga koma teto vyaulimi. Vanoza vafuneye teto athu o-inda chito dimo-i monga sakaeda vyoonongeya, phiya, panga vipangizo vyo-indela chito koma teto zala maluwa. (Yes. 35:1; 65:21) Voi ninoza nikaena moyo oomala, ninoza nikwakwani-enga funjeda luso lililetene lelo ninaze iyo nifune.
12 Vinoza vikale vyosangalalasa wachela athu anayo kanaze kavenyi-iwe. (Vyo. 24:15) Ninoza nisagalale teto funjeda vyongo vinjinji vyokuza Yehova zela mu vyongo vyevyo alengile liye. (Sal. 104:24; Yes. 11:9) Koma yosangalasa vinjinji choi ninoza nilambelenga Yehova voovimbanga mulandu chifukwa yoi nilakwi-a vyongo vimo-i viwa vyene. Kodi munokoza lola tatila vyongo vyetene vyevi chifukwa yokeda funa ‘sangalala wa thawi yoeva vopanga machimo’? (Aheb. 11:25) Kamunafune panga vyevyo. Ninokoza lolela tatila iliyetene vathawiila ira nize nifwanye madaliso anala. Umbuwelani ira vyevyo ninaembekeza iyo m’paradaizo dambo limo-i vinoza viireye. Moi ninoza niongenga ira vyoona vano nili m’paradaizo. Vyevi kavyawandeya aakale ira Yehova kaaniwomele murima vopeleka mphaso ya Mwanae.
Kodi mbamadaliso aavi anayo munafunechecha nyo za aona muilambo isha? (Onani ndima 11-12)
NIYAMIKELENGA CHIKONDI YA YEHOVA
13. Kodi ninatonyi-ede avi ira ninoyamikela chikondi ya Yehova? (2 Akorinto 6:1)
13 Kodi ninatonyi-ede avi ira ninomuyamikela Yehova chifukwa yoniva-a dipo? Ninotonyi-eda yamikela vo-ela chitwae vamalo owambeela vamoywi-u (Mat. 6:33) Vale Yesu ookhwa na yolinga yoi “etene anayo kali na moyo katikale na moyo wokeda visangalalasa ekiwa, koma kakale na moyo wosangalasa unoyo awakhwele novenyi-iwa.” (2 Akor. 5:15) Kaninafuna lepeli-a yolinga yooma murima ulukulu wa Yehova. — Welengani 2 Akorinto 6:1.
14. Kodi ninatonyi-ede avi ira ninororomela malangizo a Yehova?
14 Ninokoza tonyi-eda teto ira ninoyamikela chikondi ya Yehova vororomela malangizwae. Mwaisazo, niganizelenga vyevyo Yehova unafuna liye nafuna sakula vyoira va khani monga dokuza maphuzilo na chito. (1 Akor. 10:31; 2 Akor. 5:7) Viikala vyongo vimo-i vyosangalasa vyevyo vinaireya naroromelanga malangizo a Yehova vosakula vyoira. Nakala vausamwali wapama na Yehova, iroromelo yi-u inolimba koma teto idedi-edo yi-u inokala yakopolo. — Arom. 5:3-5; Yak. 2:21, 22.
15. Kodi ninatonyi-ede avi yamikela wi-u va nyengo ya Chikumbuso?
15 Viikala teto yongo imo-i ineyo ninapange iyo votonyi-eda yamikela chikondi ya Yehova. Yongo iwa ku-indi-eda chito pama thawi va nyengo ya Chikumbuso. Enjedela vokozeela ira nafwanyeevo, ninokoza teto itana athu amo-i. (1 Tim. 2:4) Voitana athwayo ninokoza panga pama awandela vyevyo vinaze viireye vamwamboyo. Munokoza panga pama aoni-a vidiyo ya va jw.org monga ya muru oyi Chifukwa n’ni Yesu Akhwile? Koma teto yoi Umbuwela khwa wa Yesu. Andimuwa kanafuneya teto aitanela athu anayo kafookile. Udimu unokoza kala isangalalo ilukulu vinjinji akala khosa imo-i yodimeela inawelele mu gulu. (Luka 15:4-7) Va dambo la Chikumbuso, nize niyesaese peleka moni wa abali na arongola, koma simbwasimbwa wa asha na anayo ka-iile sonkana. Tiyemoni nize niwapangi-e ira kaze kakale omasuwa. — Arom. 12:13.
16. Chifukwa n’ni ninafuneya enjedela vyevyo ninapanga iyo va chito yolaleela va nyengo ya Chikumbuso?
16 Kodi munokoza enjedela vyevyo munapanganyo va chito yolaleela va nyengo ya Chikumbuso? Panga vyevyo unokoza tonyi-eda ira ninoyamikela vyevyo Mulungu na Kristu kanipangeleathu. Napangana vinjinji votumikela Yehova pavevo teto ninaona iyo ira unana nikami-a vinjinji moi ninowambeela teto muroromela vinjinji. (1 Akor. 3:9) Muze muesaese teto arela ndandanda yowelengela Baibulo va nyengo ya Chikumbuso ineyo inafwanyeya m’Buku loi Funjeda Malemba Dambo na Dambo kapena teto mu Ndandanda ya utumiki koma teto moywi-u wa Ikristu. Munokoza indi-eda chito machaputala anayo kanafwanyeya m’mabuku anala vofunjeda Baibulo vaekinyu.
17. Kodi Yehova unasanagalala na n’ni? (Onani bokosi loi “ Mwemo Ninatonyi-edele Iyo Ira Ninoyamikela Chikondi ya Yehova.”)
17 Koma chifukwa ya mwemo vyongo vililiathu va moywinyu, mwina kamunakwakwani-e arela vyetene vyevyo viongiwe mukhanila. Umbuwelani ira Yehova unoona vyevyo vili m’murimani mwinyu moi kanayerekezela vyevyo munapanganyo na vyevyo athu amo-i kanapangaathu. Liye unosangalala aonanga ira munoyamikela mphaso ya dipo kumela vati vamurima. — 1 Sam. 16:7; Maliko 12:41-44.
18. Chifukwa n’ni ninamuyamikela Yehova Mulungu na Yesu Kristu?
18 Mphaso ya dipo chineyo inapangi-a ira nikululukiwe machimo, nikale vausamwali wapama na Yehova koma teto niembekezelenga moyo oomala. Tiyemoni niyamikelenga Yehova unoyo apangi-ile ira nize nifwanye madaliso etene anala chifukwa ya chikondae. (1 Yoh. 4:19) Nitonyi-edenga teto ira ninomuyamikela Yesu unoyo apelekile moywae chifukwa yoniomeliwana. — Yoh. 15:13.
NYIMBO 154 Chikondi Sichitha
a Yehova ookululukela atumikae Kristu aanapeleke dipo. Liye oopanga vyevi chifukwa kakaikela ira Mwanae unoza akale ororomeleya mpakana khwa. Eno wa Mulungu vyali ngati dipo lipelekiya wale. — Arom. 3:25.
