KHANI YOFUNJEDA 1
NYIMBO 2 Dzina Lanu Ndi Yehova
Muva-eni Yehova Ulemelelo
LEMBA LA CHAKA YA 2025: “Muva-eni Yehova ulemelelo ofwanelela zina lae.”— SAL. 96:8.
VYEVYO NINAFUNJEDE IYO
Mukhanila ninokambilana vyevyo ninapange iyo ira nimuva-enga Yehova ulemelelo ofwanelela zina lae.
1. Kodi athu anjinji malambwano kanakedecha ganizela vya n’ni?
MALAMBWANO athu anjinji kanakedecha ganizela vya aliwa ba-i. Mwaisazo, amo-i kanopanga vyongo vinjinji va intaneti na yolinga yoi athu amo-i kapangenga chidwi na aliwa kapena kaiziwe vyevyo kanapangaathu. Koma mba athu oyeva vinjinji anayo kanapeleka ulemelelo wa Yehova Mulungu. Mukhanila ninokambilana vyevyo vinatapulela muva-a ulemelelo Yehova koma teto ineyo inanilimbikise ira nipangenga vyevyo. Ninoona teto vyevyo ninapange iyo ira nimuva-enga Yehova ulemelelo ofwanelela zina lae koma teto mwemo liye munaze liye mulemekezele zina laelo musogolo.
KODI MUVA-A YEHOVA ULEMELELO UNATAPULELA N’NI?
2. Kodi Yehova aoni-ile avi ulemelelwae va mwango wa Sinai? (Onani teto lowambeela.)
2 M’Baibulo mawu oyi “ulemelelo” kanokoza tapulela iliyetene ineyo inapangi-e m’mo-iwene ira akale opangi-a chidwi. Yehova ootonyi-eda ulemelelwae wodabwi-a Aizaraeli kangakede masuliwa wene wu ukapolo wu Iguputo. Yerekezelani ira munana ona Aizaraeli anjinji kangasonkanile m’mbali mwa mwango wa Sinai ira kagumane na Mulungwiwa. Murambo odimba ugudumeya mwangoyo. Vanduli viwa ivomerezi yakopolo, yokala ngati mwango inaapuleya igwedezanga vevo kaimelileathu. Koma teto viikala ng’anima noula wa mabingu koma teto ula wakopolo wa lipenga. (Ekis. 19:16-18; 24:17; Sal. 68:8) Vinaoneya ira Aizaraeli koopanga chidwi na mwemo Yehova mwatonyi-edele liye ulemelelwae.
Yehova ootonyi-eda kopolo na ulemelelwae va mwango wa Sinai (Onani ndima 2)
3. Kodi muva-a Yehova ulemelelo unatapulela n’ni?
3 Kodi ninapange avi ira nimuva-e ulemelelo Yehova? Ndila imo-i ineyo ninapangele iyo vyevyo kuwandela athu amo-iwa vyokuza kopolo dae koma teto makalelwae apama. Ninomuva-a ulemelelo Mulungu namulemekezanga chifukwa ya vyongo vyevyo unikami-ile liye panga. (Yes. 26:12) Mwene Davide ali isazo yapama vinjinji va khani yolemekeza Yehova. M’pempelo lelo Davide apelekile liye vagulu la Aizaraeli, liye oomuwandela Mulungu ira: “Nyo Yehova, ulukula, kopolo, riya, ulemelelo na ulemu pivyeenyu, chifukwa vyongo vyetene vya udimu na vailambo ya vati pivyeenyu.” Davide angamari-ile peleka pempelo leli, “athu etene anayo koowambeela mutamanda Yehova.” — 1 Lim. 29:11, 20.
4. Kodi Yesu apelekile avi ulemelelo wa Yehova?
4 Yesu angali va ilambwela, liye oomuva-a ulemelelo Babae votonyi-eda ira liye ngunoyo amuva-a kopolo ira akwakwani-enga panga vyongo vyodabwi-a. (Maliko 5:18-20) Vyevyo Yesu aonga liye vyokuza Babae koma teto mwemo mwapangela liye vyongo na athu amo-i, vyoopeleka ulemelelo wa Yehova. Vathawi imo-iwa Yesu afunji-anga gulu la athu wu Sunagoge, vookala zimai m’mo-iwa unoyo avuti-iwa na iwanda wa chaka 18. Iwandeyo yoomupangi-a ira avindeye tana moi kaakwakwani-a venya. Vyali vyovwi-a chisoni vinjinji. Yesu oomuvwela chisoni moi oomuwandamela noonga na liye mooma murima ira: “M’mani, muumasuwa umarendinyu.” Vyangaireile eno oomu-inda zimaiyo moi ooimelela moongowa “nowambeela mutamanda Mulungu”, Zimaiyo ookala teto wakopolo. (Luka 13:10-13) Mofwanafwana na muzimaila, na-iyene nikaana vifukwa vyovweya vyomuva-ela ulemelelo Yehova.
CHIN’NI INANILIMBIKISA IRA NIMUVA-ENGA YEHOVA ULEMELELO?
5. Kodi nin’na vifukwa viivi vyonipangi-a mulemekeza Yehova?
5 Ninopeleka ulemelelo wa Yehova chifukwa yoi ninomulemekeza vinjinji. Niikaana vifukwa vinjinji vyomulemekezela. Yehova ngwakopolo detene, tapulela ira liye ukaana kopolo dookaana malile. (Sal. 96:4-7) Ninoona zelu dae mu vyongo vyevyo alengile liye. Liye ngunoyo aniva-ile moyo koma teto vyetene vyevyo vinanikami-a ira nikaena moyo. (Chiv. 4:11) Teto liye ngororomeleya. (Chiv. 15:4) Iliyetene ineyo unapanga liye inoenda pama teto thawi detene unokwakwaneli-eda vyevyo ulonjezile liye. (Yos. 23:14) Pivyovweya ira namaongela Yeremiya oofotokoza vya Yehova ira: “Vaari va athu etene a zelu a mitundu da athu koma teto vaari va mamweniwa etene, kavili uliwetene ofwanafwana na nyo.” (Yer. 10:6, 7) Eno nikaana vifukwa vyapama vyonipangi-a mulemekeza babi-u waudimu. Kaninakeda mulemekeza Yehova ba-i, koma ninomuomeliwana vinjinji.
6. Chifukwa n’ni ninamuomeliwana Yehova?
6 Ninopeleka ulemelelo wa Yehova chifukwa ninomuomeliwana. Kaganizelani makalelo apama a Yehova anayo kananipangi-a ira nimuomeliwengana vinjinji. Liye ngwachifundo. (Sal. 103:13; Yes. 49:15) Liye unoganizela amo-i teto navwanga voreya naliyene teto vinomuvoreya. (Zek. 2:8) Liye unofunechecha ira nikale afwae. (Sal. 25:14; Vyo. 17:27) Yehova ngovievi-a, “liye unotita vati ira aone udimu na vailambo yavati. Unovenyi-a muthu wonyozeya nomuchosa mutumbulu.” (Sal. 113:6, 7) Kodi iyo etene ninatonyi-ede avi ira ninopeleka ulemelelo wa Mulungwi-u mulukulu? — Sal. 86:12.
7. Kodi nin’na mwai wopanga n’ni?
7 Ninopeleka ulemelelo wa Yehova chifukwa ninofuna ira amo-i kamuiziwe. Athu anjinji katinamuiziwa pama Yehova. Vili eno chifukwa yoi Satana uwarangali-a m’maso vofalisa mauthenga onama okuza Mulungu. (2 Akor. 4:4) Liye upangi-a athu ira karoromelenga ira Yehova ngwakhaza, kanasamala vya athu koma teto ngu liye unoyo unapangi-a mavuto anjinji a muilambwela. Koma iyo ninoiziwa vyoona viwa vyokuza Mulungwi-u. Nikaana mwai wokami-a amo-i ira kaiziwe vyokuza liye koma teto muva-a ulemelelo. (Yes. 43:10) Chaputala 96 ya Masalimo inofotokoza vyokuza mulemekeza Yehova. Nakambilananga mawu owandeliwa a mu Salimoli, muganizelenga ndila dedo munapelekele nyo ulemelelo wa Yehova.
KODI NINAPANGE N’NI IRA NIMUVA-ENGA YEHOVA ULEMELELO UNOYO UNAFUNEELA LIYE?
8. Kodi chi ndila imo-i iivi ineyo ninamulemekezele iyo Yehova? (Salimo 96:1-3)
8 Welengani Salimo 96:1-3. Vyevyo ninaonga iyo vyokuza Yehova, vinokoza pangi-a ira awachele ulemelelo. Musalimoli ninolimbikisiwa ‘imbela Yehova,’ ‘tamanda zina lae,’ ‘lengeza uthenga wapama wa chipulumuswae’. Koma teto ‘lengeza ulemelelwae vaari va athu a mitundu dimo-i.’ Dedi ti ndila dedo ninapelekele iyo ulemelelo wa Babi-u waudimu. Ayuda ororomeleya koma teto Akristu owambeela, kooawandela amo-i vyongo vyapama vyevyo Yehova aapangelaathu koma teto makalelwae apama. (Dan. 3:16-18; Vyo. 4:29) Kodi iyo ninapange avi vyevi?
9-10. Kodi ninafunjeda n’ni va isazo ya Angelena? (Onani teto ithuzithuzi.)
9 Isazo va khanila ngu murongola m’mo-iwa wa wu United States zina lae Angelena. a Liye oofotokoza molimba murima vyongo vyapama vyokuza Yehova wu chito wae. Angakede lembiwa wene chito, Angelena ooitaniwa wu msonkano wa vakampani vevo a-inda liye chito. Vasonkanovo uliwetene afuneya fotokozela afwae vyokuza mbilae. Angelena oopanga vidiyo ya vithuzi yotonyi-eda mwemo mwasangalalela liye chifukwa yokala wa Mboni da Yehova. Thawae yanga-alile vang’ono, muthu m’mo-iwa oofotokoza ira ooleliwa m’banja la Mboni teto oowambeela nyoza vyevyo ninaroromela iyo. Angelena aongile ira: “Murimanga oowambeela gunda vinjinji. Koma ndooviwandela ira: ‘Koma vyoona ndilole ira muthu m’mo-iwa aonge vyonama vyokuza Yehova? Ndinolimba murima ira ndionge vyapama vya liye.’”
10 Fwaeyo angamari-ile onga, Angelena oopempela mwachidule yam’murimani. Eno oonga na liye mwaulemu ira: “Mbilanga chofwanafwana na yeenyu. Namiyene teto ndaleliwe m’banja la Mboni da Yehova. Moi ndilive wa Mboni.” Vyali vyorucha vinjinji koma Angelena ookwakwani-a onga moi kaaovile. Liye ooni-a athu vidiyo ya vithuzi yotonyi-eda angali m’misonkano dedo afwanyeilevo liye moi oonga mosamala vo-elela unduli vyongo vyevyo ninaroromela iyo. (1 Pe. 3:15) Kodi vyo-arelavo viwa vyali vyoi avi? Vevo Angelena amari-a liye onga, muthuyo ali angachenjile maganizwae. Liye oofotokoza ira vookala vyongo vimo-i vyapama vyevyo vyaireya vevo aleliwa liye m’banja la Mboni. Angelena aongile ira: “Ninafuneela mu-elanga Yehova unduli. Ngu mwai ulukulu onga vyokuza zina lae.” Na-iyene niiva-iwa mwai womutanda Yehova koma teto muva-a ulemelelo ngakale ira amo-i katinamulemekeza.
Ninokoza mulemekeza Yehova zela mu vyoonga vi-u (Onani ndima 9-10) b
11. Kodi atumiki a Yehova katonyi-edile avi ira kano-arela likundo la va Salimo 96:8?
11 Welengani Salimo 96:8. Ninokoza muva-a Yehova ulemelelo vopeleka vyongo vi-u vyamtengo wavadimu. Ambeela wale, atumiki a Yehova kookala kamuva-anga ulemelelo mu ndila inela. (Miya. 3:9) Mwaisazo, Aizaraeli koopeleka vyongo viwa ira vikami-enga va chito yomanga nosamalela kachisi. (2 Mam. 12:4, 5; 1 Lim. 29:3-9) Ofunjeda amo-i a Yesu, ‘koo-indi-eda chito chuma ineyo kanaathu’ vokami-a liye na anamarumiwae. (Luka 8:1-3) Akristu owambeela koopeleka teto likami-edo wa abali na arongoliwa. (Vyo. 11:27-29) Na-iyene teto malamwano ninokoza mulemekeza Yehova na vyongo vi-u.
12. Kodi vyopeleka vi-u vinamulemekeze avi Yehova? (Onani teto ithuzithuzi.)
12 Tiyemoni nikambilane isazo imo-i yotonyi-eda ira vyopeleka vi-u vinokami-a ira Yehova alemekeziwe. Lipoti limo-i la mu 2020 lootonyi-eda ira wu Zimbabwe wookala mavuto alukulu chifukwa yoi voovira thawi indendai zongwe aanarumbwe. Athu anjinji katan’na yodja, tangani-avo murongola m’mo-iwa zina lae Prisca. Ngakale ira vookala mavuto anala, Prisca oopitilizave laleela Lachitatu na Lachisanu. Liye oopangave vyevi ngakale ira yali thawi yolima. Athu amo-i koomunyoza chifukwa yodowa olaleela m’malo modowa umunda teto koonga ira, “weyo unokwa na ndala.” Koma Prisca oowasomeda murima wangali m’malo ira, “Yehova kana-iyevo atumikae.” Vaanavire thawi indendai, liye oowachela vyongo vyevyo gulu li-u lapelekaathu. Vyongo vyevi vyoofwanyeya chifukwa ya vyopeleka vya abali na arongola. Athu anayo kamuteyale koomuwandela ira, “Mulungu kanau-iyevo, ndiye ninafuna nifunjede vinjinji vyokuza Mulungu unoyo.” Moi athu okwakwana 7 koowambeela fwanyeya va misonkano.
Ninokoza mulemekeza Yehova na vyongo vi-u (Onani ndima 12) c
13. Kodi makalelwi-u kanapeleke avi ulemelelo wa Yehova? (Salimo 96:9)
13 Welengani Salimo 96:9. Ninokoza peleka ulemelelo wa Yehova vokaana makalelo apama. Ansembe anayo katumikela Yehova va kachisi, kafuneya amba koma teto chapa ira kakale owela. (Ekis. 40:30-32) Koma yofuneya vinjinji chi yoi kafuneya kaana makalelo apama. (Sal. 24:3, 4; 1 Pe. 1:15, 16) Na-iyene teto ninafuneya esaesa ‘kurula umuthu wawale’ unoyo uli makalelo otakala, nowara umuthu usha tapulela ira ninafuneya ganiza koma teto panga vyongo mosazi-eda makalelo a Yehova. (Akol. 3:9, 10) Yehova unokoza kami-a muthu ngakale wamakalelo otakala koma teto wachiwawa vinjinji ira achenje nowara umuthu usha.
14. Kodi ninafunjedavo n’ni vaisazo ya Jack? (Onani teto ithuzithuzi.)
14 Isazo vakhanila ngu Jack, unoyo ali wachiwawa koma teto woopi-a moi athu kakeda muromola ira iwanda. Chifukwa yamilandu dedo an’na liye, Jack oolamuliwa ira unafuneya akede phiwa. Aembekezelanga dambo loi aphiwe Jack oowambeela funjeda Baibulo na m’bali unoyo alaleela undendewo. Ngakale ira vowambeela Jack ookaana makalelo otakala, liye oochenja moi vanduli viwa oofwanelela batiziwa. Jack oochenja vinjinji moi dambo lelo aphiwa liye asilikali anayo kamuing’anela koowambeela ula vevo kasazikanaathu na liye. Msilikali m’mo-i unoyo a-inda chito vandendevo oonga ira: “Jack ali mkaidi wamakalelo otakala vinjinji. Koma vano ngu m’mo-i mwa akaidi apama vinjinji.” Vanduli voi Jack uphiwa, mulungu o-arela abali koodowa undendewo dowa pangi-a misonkano moi koomuona mkaidi m’mo-i unoyo wali owambeela fwanyeya va misonkanovo. Mkaidiyo oowambeela fiya va misonkanovo angaonile mwemo Jack mwachenjele liye moi oofuna iziwa vyevyo unapange liye ira alambelenga Yehova. Va vinakeda oneya ira makalelwi-u kanokoza peleka ulemelelo wa Babi-u waudimu. — 1 Pe. 2:12.
Ninokoza mulemekeza Yehova zela mu makalelwi-u (Onani ndima 14) d
KODI YEHOVA UNAZA ALEMEKEZA AVI ZINA LAE USOGOLOWU?
15. Vachineneeva, kodi Yehova unaza alemekeza avi zina lae? (Salimo 96:10-13)
15 Welengani Salimo 96:10-13. Mawu ogomi-eda a mu Salimo 96 kanofotokoza ira Yehova ngoweluza wachilungamo koma teto Mwene. Kodi Yehova unaza alemekeza avi zina lae? Vachineneeva, Yehova unoza alemekeze zina lae vopeleka iweluzo. Liye unoza aononge Babulo mulukulu chifukwa yonyoza zina lae lowela. (Chiv. 17:5, 16; 19:1, 2) Athu amo-i anayo kanaze kaone Babulo mulukulu aonongiwanga, kanoza kaambeele lambela Mulungu limo-i na iyo. Teto va Aramagedo, Yehova unoza aononge ilambo ya Satanela nochosa athu etene anayo kanamuruni-a koma teto nyoza zina lae. Koma unoza avulumuche athu etene anayo kanamuomeliwana, muvwela koma teto muva-a ulemelelo. (Maliko 8:38; 2 Ates. 1:6-10) Vanduli va iyeso yomari-a ineyo inaza ireye vanduli va ulamulilo wa Kristu wa chaka 1 000, Yehova unaza akala angaweli-ile zina lae. (Chiv. 20:7-10) Vathawi ineyo, “ilambo yavati inoza izaale na athu oiziwa ulemelelo wa Yehova, ngati mwemo ma-inje kanazaalelaathu mu nyanja.” — Hab. 2:14.
16. Kodi muusimikiza murima panga n’ni? (Onani teto ithuzithuzi.)
16 Vathawi ineyo vinoza vikale vyosangalasa vinjinji, chifukwa uliwetene unoyo unaze akaena moyo, unoza apelekenga wa Yehova ulemelelo ofwanelela zina lae. Vevo ninaembekezela iyo thawi inela, tiyemoni niesaesenga peleka ulemelelo wa Yehova va mwai uliwetene unoyo nifwanyile iyo. Vofuna simikizela vya likundo leli, Bungwe lolamulela liisakula ira lemba la Salimo 96:8 likale lemba la chaka ya 2025. Lembali linaonga ira: “Muva-eni Yehova ulemelelo ofwanelela zina lae.”
Uliwetene unoyo unaze akaena moyo, unoza amuva-enga Yehova ulemelelo ofwanelela zina lae (Onani ndima 16)
NYIMBO 12 Yehova Mulungu Wamkulu
a Mazina amo-i kochenjiwa.
