1-2. (a) Kodi ninavwe avi naganizela moyo wa Yesu koma teto utumikaye? (b) Kodi ninatapanya n’ni mukhanila?

 MUTHU onoyo ninamuwomeliwana iyo atatiya ninomusauwela vinjinji. Vowambeela ninokoza vwa chisoni naganizela vyevyo vyaireile anga-alile vong’ono tatiya, simbwasimbwa akala avuteile vinjinji va thawi eneyo. Komave vira wa thawi ninowambeela sangalala naganizelanga vimo-iviwa vyevyo anifunji-ile liye, vyevyo airile liye kapena teto awongile liye na yolinga yoi anilimbikise kapena niteye.

² Mofwanafwana na vyevyi, ninovwa chisoni nawelenga vyokuza vuteya koma teto khwa wa Yesu. Va nyengo ya Iwumbuwelelo ninoganizela simbwasimbwa funeya wa dipo la Yesu. (1 Akor. 11:24, 25) Komave ninosangalala vinjinji naganizela vyetene vyevyo awongile liye koma teto ira angali vailambwela. Ninolimbikisiwa teto naganizela vyevyo unaira liye vathawi ila koma teto vyevyo unaze liye aniirele usogolo. Ganizela vyevyi koma teto chikondaye wa iyo, unoniiri-a yamikela mundila do-iyana-iyana, n’nga mwemo ninaonele iyo mukhanila.

3. Kodi nin’na vifukwa vyiivi vyoniiri-a yamikela dipo?

³ Ninoyamikela vinjinji, naganizela moyo wa Yesu koma teto khwa waye. Vautumikaye wetene angali vailambwela, Yesu oofunji-a athu vyokuza madaliso anayo Umwene wa Mulungu unazeathu uzena. Ninoyamike makundo a imbarimbari okuza Umwene anala. Ninoyamikela teto dipo chifukwa linoniva-a  mwayi wokala vausamwali wapama na Yehova na Yesu. Etene anayo kanaroromela Yesu kokaana teto idedi-edo yozakaana moyo mpakana walewale koma teto za ona athu anayo kaawomeluwanaathu anayo katatiile. (Yoh. 5:28, 29; Arom. 6:23) Kavali eneyo nairile iyo ira nifwanelele madaliso anala, koma teto kaninawande weli-eda Mulungu na Yesu va vyetene vyevyo kaniireleathu. (Arom. 5:8, 20, 21) Komave ninowanda atonyi-eda ira ninoyamikela vinjinji. Moi avi?

4. Kodi Mariya Magadala atonyi-edile avi ira ooyamikela vyevyo Yesu amuirele liye? (Onani ithuzithuzi.)

⁴ Kaganizelani vya iyana m’mo-iwa wa Chiyuda zina laye Mariya Magadala. Liye ali vamavuto alukulu chifukwa oozuzumi-iwa na viwanda 7. Podi ira liye aganiza ira mavutwayala katinamale. Ndiye kakedani ganizela mwemo amuyamikelele liye Yesu angamukumi-ile viwandavyo. Yamikela wewu oomupangi-a ira akale wo-arela wa Yesu, koma teto ira a-indi-edenga chito thawi, kopolo na vyongo vyaye vomukami-eda Yesu va chito yolaleela. (Luk. 8:1-3) Masiki ira Mariya ooyamikela mokumela vati vamurima vyevyo Yesu amuirele liye, podi ira liye kaaiziwa ira Yesu unoza amuva-e mphaso usogolo. Yesu azele za peleka moywaye chifukwa ya athu, “ira uliwetene ororomela liye,” aze afwanye moyo wo-omala. (Yoh. 3:16) Komave ootonyi-eda ira ooyamikela Yesu vokala ororomeleya. Vevo Yesu avuteya liye na ululu vatengo wozuzumelavo, Mariya ooimela vakwikwi ira alimbikise Yesuyo na athu amo-i. (Yoh. 19:25) Yesu angakwile, Mariya na a-iyana amo-i ambinli kooza na vyonukela ira kazoli-e thuthu laye ka-anali-ele m’manda. (Malik. 16:1, 2) Liye oodalisiwa vinjinji chifukwa yororomaleya waye. Ookaana mwayi ogumana na Yesu koma teto wonga na liye angavenyi-iwe, mwayi woi ofunjeda anjinji katan’na. — Yoh. 20:11-18.

5. Kodi ninatonyi-ede avi ira ninoyamikela Yehova na Yesu va vyevyo kaniireleathu?

⁵ Iyo teto ninotonyi-eda ira ninoyamikela  Yehova na Yesu va vyevyo kaniireleathu vo-indi-eda chito thawi, kopolo na ndalama di-u vodowi-a vasogolo chito ya Umwene. Mofwanafwani-a, ninokoza indana chito yomanga nosakaeda malo anayo nina-indi-eda iyo chito volambela oona.

6. Chifukwa n’ni ninaonge ira dipo chi mphaso eneyo yapelekiwe wa muthu uliwetene vaekave?

⁶ Naganizela mwemo Yehova na Yesu mwanitonyi-edeleathu chikondi, ninofunechecha ira iyo teto niawomeluwengana. (1 Yoh. 4:10, 19) Ninoawomeluwana vinjinji nazindikila ira Yesu oonikhwela iyo uliwetene vaeka. Namarumiwa Paulo ooiziwa likundo leli teto ootonyi-eda yamikela waye vevo alembele liye Akiristu a u Galatiya ira: “Mwana wa Mulungu  . . . oondiwomeluwana novipeleka eka chifukwa ya miyo.” (Agal. 2:20) Vo-indi-eda chito dipo, Yehova oonikokela wa liye ira nikale afwaye. (Yoh. 6:44) Kodi kamunasangalala iziwa ira Yehova oowona yongo imo-iwene yapama mwa nyo koma teto ira oopeleka tengo wavadimu na yolinga yoi mukale afwaye? Kodi vyevyi kavinaupangi-ani ira mumuwomeluwengana vinjinji Yehova na Yesu? Munoira pama vifukanga ira, ‘Kodi chikondi enela indilimbikisenga ira n’ni?’

7. N’nga mwemo ninawonela iyo va ithuzithuzila, kodi etene iyene ninatonyi-ede avi ira ninomuwomeliwana Yehova na Yesu? (2 Akorinto 5:14, 15; 6:1, 2)

⁷ Muwomeliwana wi-u Mulungu na Kiristu unonipangi-a ira niawomeliwengana teto amo-i. (Welengani 2 Akorinto 5:14, 15; 6:1, 2.) Ndila imo-i eneyo ninatonyi-edele iyo chikondiyo ku-indanawo mwatindi chito yolaleela. Ninolaleela wa uliwetene onoyo nigumanilena-iyo. Kaninasakula muthu chifukwa ya tundwaye, ikalelo, mafwanyelwaye a vyongo kapena teto mapuzilwaye. Nairanga  vyevyi ninakala niiranga vyongo mogwilizana na ifunelo ya Yehova yoi “athu, kaya kakale a tundu woi avi, kavulumuwe nokala oiziwa imbarimbari molondolo.” — 1 Tim. 2:4.

8. Kodi ninatonyi-ede avi ira ninoawomeliwana abali na arongoli-u?

⁸ Ninotonyi-eda teto ira ninomuwomeliwana Mulungu na Kiristu naawomeliwananga abali na arongoli-u. (1 Yoh. 4:21) Ninowaganizela teto ninowakami-a kagumana na vyoshisha. Ninowamiyali-a kakhweliwa, dowa awona kabulela koma teto ninopanga vyevyo ninawande iyo ira niwalimbikise vevo kafookileathu. (2 Akor. 1:3-7; 1 Ates. 5:11, 14) Ninopitiliza apepelela chifukwa ninoiziwa ira “pembezelo la muthu wolungama lino-inda chito mwakopolo vinjinji.” — Yak. 5:16.

9. Kodi chi ndila imo-i iivi eneyo ninatonyi-edele iyo ira ninoawomeliwana abali na arongoli-u?

⁹ Ninowatonyi-eda ira ninoawomeliwana abali na arongoli-u nayesayesanga kalanawo mwamurendele. Ninoyesayesa landela isazo ya Yehova va khani yokhululukela amo-i. Akala Yehova alolile ira Mwanaye akhwe chifukwa ya machimwi-u, kodi iyo teto kaninafuneela kala okozeya khululukela abali na arongoli-u kanichimwela? Kaninafune kala n’nga muzaari wotakala onoyo aromoliwe mufanizo limo-i la Yesu. Masiki ira mbwiyaye oomukhululukela ngongole ilukulu, liye oolepela khululukela muzaari fwaye ngongole ing’onong’ono. (Mat. 18:23-35) Akala mwasemphanile maganizo na muthu m’mo-i mupingo, kodi munokoza ambeelavo garati-a murendele ya-anafiye thawi ya Iwumbuwelelo? (Mat. 5:23, 24) Panga vyevyo unotonyi-eda ira munomuwomeliwana vinjinji Yehova na Yesu.

10-11. Kodi andimuwa kanatonyi-ede avi ira kanomuwomeliwana Yehova na Yesu? (1 Petulo 5:1, 2)

¹⁰ Kodi andimuwa mupingo kanatonyi-ede avi ira kanomuwomeliwana Yehova na Yesu? Ndila yofuneya vinjinji eneyo kanaireleathu vyevyi kusamalela khosa da Yesu. (Welengani 1 Petulo 5:1, 2.) Yesu ootonyi-eda pama likundo leli vevo awongile liye na namarumiwa Petulo. Vanduli vomukoonda Yesu maulendo araru, Petulo podi ira oofunechecha ira amutonyi-ede Yesu ira unomuwomeliwana. Angavenyi-iwe, Yesu oomufuka Petulo ira: “Simoni mwana wa Yohani, kodi miyo unondiwomeliwana?” Kaninakaikela ira Petulo ooira iliyetene vofuna tonyi-eda ira unomuwomeliwana Mbwiyaye. Yesu oomuwandela Petulo ira: “Weta a-ima a khosa danga.” (Yoh. 21:15-17) Moywaye wetene Petulo oosamalela mwachikondi khosa da Mbwiye votonyi-eda ira oomuwomeliwana Yesu.

¹¹ Andimuwa mupingo, kodi munatonyi-ede avi ira mawu anayo Yesu amuwanden’le liye Petulo mbofuneya teto wa nyo vanyengo ya Iwumbuwelelo? Munotonyi-eda ira munomuwomeliwana Yehova na Yesu voyesayesa ira thawi detene mufwanyenga thawi yolimbikisa abali na arongola, koma teto vopanga tindi kami-eda anayo kafookile ira kawelele wa Yehova. (Ezek. 34:11, 12) Muirenga teto chidwi na anayo kanafunjeda Baibulo koma teto anayo kafiile u Iwumbuwelelo wathawi yowambeela ira kavivwenga kala owacheliwa. Muumbuwelenga teto ira aluwala kanokoza za kala ofunjeda a Yesu.

12. Chifukwa n’ni ganizela mawu anayo Yesu awongile liye ma-iywaye omari-a unonikami-eda kala olimba murima? (Yohani 16:32, 33)

¹² Ma-iywaye omari-a, Yesu oowandela ofunjedaye ira: “Muilambomu munogumanana masauso, koma limbani murima. Miyo ndiigonji-a ilambo.” (Welengani Yohani 16:32, 33.) Kodi chin’ni eneyo yamukami-ile  Yesu ira alimbe murima gumana na adanaye koma teto kalave ororomeleya mpakana khwa? Liye oororomela Yehova. Voiziwa ira o-arelaye kanoza kagumane teto na vyoshisha n’nga vyevyi, Yesu oovepa Yehova ira aaing’anelenga. (Yoh. 17:11) Chifukwa n’ni vyevyi vinanikami-a kala olimba murima? Chifukwa Yehova ngwakopolo kwaranya adani-u. (1 Yoh. 4:4) Liye unoona iliyetene. Ninoiziwa ira naroromelanga Yehova, unonikami-eda ira kaniovenga koma teto ira nikale olimba murima.

13. Kodi Yosefe wa u Arimateya atonyi-edile avi ira ali wolimba murima?

¹³ Kaganizelani isazo ya Yosefe wa u Arimateya. Liye oolemekeziwa vinjinji na Ayuda afwaye. Yosefe ali m’mo-i mwa oweluza a Khoti Lilukulu la Ayuda loromoliwa Sanihedrini. Koma vevo Yesu aira liye utumikaye vailambwela, Yosefe kaali wolimba murima. Yohani awongile ira liye ali “wofunjeda wa Yesu koma wauseli, chifukwa oowova Ayuda.” (Yoh. 19:38) Masiki ira Yosefe ooira chidwi na uthenga wa Umwene, kaawandelile amo-i ira oororomela Yesu. Mookaikela, liye aova ira unolusa udindwaye wavadimu. Koma Baibulo linoniwandela ira Yesu angakhwile, vamapeto viwa Yosefe “oodowa wa Pilato molimba murima dowa vepa tembo wa Yesu.” (Malik. 15:42, 43) Veva Yosefe kavibisile teto ira ali wofunjeda wa Yesu.

14. Kodi munafuneela ira n’ni akala munawova athu?

¹⁴ Kodi nanyen’ne teto moowambeela wovavo n’nga mwemo airele liye Yosefe? Mwakala usukulu kapena uchito, kodi thawi dimo-i munonyaswa wandela amo-i ira muli wa Mboni da Yehova? Kodi munozengereza kala wofalisa kapena badiziwa chifukwa yoova vyevyo amo-i kanaganizengaathu vya nyo? Kamulole vyevyi ulepeli-ani panga vyevyo munaiziwa nyo ira pivyofwanelela. Mupepelenga wa Yehova mokumela vati vamurima. Mumuvepenga ira aukami-eni kala olimba murima, ira muire ifunelo yaye. Mwaonanga mwemo Yehova munasomedela liye mapepelwinyu, munoza mukale akopolo koma teto olimba murima vinjinji. — Yes. 41:10, 13.

15. Vanduli voi Yesu uoneela wa ofunjedaye, kodi imwerumweru iwa yaalimbikisile panga n’ni? (Luka 24:52, 53)

¹⁵ Yesu angaphiwe, ofunjedaye kookhumudwa vinjinji. Kaganizelani mwemo teto nyo mwavwele nyo mwaakalevo va thawi eneyo. Aluwa katakeda ona ira kootatila fwiwa wavamurima, koma koona teto ira katin’na idedi-edo.  (Luk. 24:17-21) Komave liye angaoneele wa aluwa, liye oowakami-eda vwechecha mwemo vyevyo vyaireile mwakwakwaneli-edeathu yoro-eda ya m’Baibulo. Oowava-a teto chito yofuneya vinjinji yoi ka-inde. (Luk. 24:26, 27, 45-48) Vevo Yesu agwela liye udimu vanduli va malambo 40, chisoni ya ofunjedaye yoosanduwa imwerumweru ilukulu. Iziwa ira Mbwiiwa uli moyo koma teto ira ngokozeya akami-a va chito isha eneyo aava-ileathu, oowakami-eda kala osangalala. Imwerumweru eneyo kan’naathu yoowakami-eda ira kamutamandenga Yehova mwatindi.— Welengani Luka 24:52, 53; Vyo. 5:42.

16. Kodi ninasazi-ede avi ofunjeda a Yesu?

¹⁶ Kodi ninasazi-ede avi ofunjeda a Yesu? Ninofwanya imwerumweru volambela Yehova ookala va nyengo ya Iwumbuwelelo yoka, koma chaka yetene. Vyevyi vinafuna ira ni-elenga Umwene wa Mulungu vamalo owambeela. Mofwanafwani-a, anjinji koochenja mwemo kana-indelaathu chito diwa, ira ka-indengana chito yolaleela, fwanyeya vamisonkano koma teto panga lambela wavabanja thawi detene. Amo-i teto koofiya vololela ookaana vyongo vyevyo athu amo-i kanavionaathu ira pivyofuneya vinjinji, na yolinga yoi kairenga vinjinji mupingo kapena katumikele wewo unafuneya olaleela Umwene anjinji. Masiki ira ninofuneya vilela ira nipitilize tumikela Yehova, liye unolonjeza ira unoza anidalise vinjinji na-elanga vyokuza Umwene vamalo owambeela. — Miya. 10:22; Mat. 6:32, 33.

17. Kodi musimikiza ira n’ni vanyengo ya Iwumbuwelelwela? (Onani ithuzithuzi.)

¹⁷ Ninodedi-edela mwachidwi za ira Iwumbuwelelo lachiwili va 4 Epulo. Komave kaninafuneela dedi-edela thawi eneyo, ira nize niganizele vya moyo wa Yesu no khwa waye koma teto chikondi eneyo liye na Babaye kanitonyi-edileathu. Nize ni-indi-ede chito mwayi uliwetene onoyo ufwanyeile, ira niire vyevyi vanyengo yetene ya Iwumbuwelelo. Mofwanafwani-a, ninokoza sakaeda vyoi nize niwelenge koma teto ganizela vyoireya vyevyo vili vabokosi loi ““Wiki Yomaliza ya Moyo wa Yesu Padziko Lapansi,” mu Kabuku Kothandiza Kuphunzira Mawu a Mulungu, muru 16. Mwawelenganga, muonenga makundo a m’Baibulo oukami-ani kala oyamikela, achikondi, olimba murima koma teto aimwerumweru. Era eeno, muganizelenga ndila dedo munatonyi-edele nyo yamikela mokumela vati vamurima. Munokoza kala osimikiza ira Yesu unoza ayamikele vyetene vyevyo munaze nyo muire, vomuumbuwela va nyengo ya Iwumbuwelelwela.— Chiv. 2:19.