1. Kodi ninaiziwa avi ira Yehova unafuna ira nikale vausamwali na liye?

 YEHOVA unaniwandela ira nimuwandamele. (Yak. 4:8) Liye unafuna ira akale Mulungwi-u, Babi-u, koma teto fwi-u. Unosomeda mapepelwi-u koma teto unonikami-a va thawi yorucha. Unonifunji-a teto vo-indi-eda chito gulu laye koma teto unonititi-eda. Koma kodi ninaire avi ira nikale vausamwali na Yehova?

2. Kodi ninaire avi ira nikale vausamwali na Yehova?

² Ninokoza kala vausamwali na Yehova vopepela waliye koma teto welenga no ganizela Mawaye. Nairanga vyevyi, ninowambeela muwomeluwana vinjinji koma teto muyamikela. Ninofunechecha muvwela koma teto mutamanda n’nga mwemo munafuneelaathu. (Chiv. 4:11) Namuiziwanga vinjinji Yehova, pavevo teto ninamuroromelecha iyo vinjinji liye na gulu lelo univa-ile liye ira linikami-edenga.

3. Kodi Mdyerekezi unashisha avi ira animwalani-e na Yehova, koma chin’ni inanikami-ede ira kani-iye Mulungwi-u na gulu laye? (Salimu 31:13, 14)

³ Komave Mdyerekezi, unofuna nimwalani-a na Yehova, simbwasimbwa vevo ninagumanana iyo na mavuto. Kodi unaira avi vyevyi? Mwavang’onovang’ono liye unofuna niiri-a ira kaniroromelenga Yehova na gulu laye. Komave ninowanda rambela misampa daye. Naroromelanga koma teto dalila vinjinji Yehova kanina-iye Mulungwi-u na gulu laye.—Welengani Salimu 31:13, 14.

4. Kodi ninatapanya n’ni mukhanila?

⁴ Mukhanila, ninotapanya mavuto mararu owambeeli-iwa nailambwela anayo kanairi-e ira kaniroromelenga vinjinji Yehova  na gulu laye. Kodi mavutwala kananimwalani-e avi na Yehova? N’nga ninaire avi ira vyoshisha vya Satana kavinisokoneze?

5. Kodi mavuto anayo ninagumanana iyo kanairi-e avi ira kaniroromelenga vinjinji Yehova na gulu laye?

⁵ Thawi dimo-i, ninogumanana mavuto n’nga runi-iwa na abali kapena mala wa chito. Kodi mavuto anala kanairi-e avi ira nimwalane na Yehova koma teto ira kaniroromelenga gulu laye? Akala nivilele vuto limo-iliwalene wa thawi indendayi, ninokoza fooka nowambeela wona ira kanin’na idedi-edo. Satana unofwanyelavo mwayi oniiri-a ira nikaikelenga akala Yehova unaniwomeluwana. Liye unafuna ira niwonenga ira mavutwayo kanairi-iwa na Yehova kapena gulu laye. Vyofwanafwana na vyevyi, vyoowaireelavo Aizarayeli wu Iguputo. Vowambeela aluwa koororomela ira Yehova ootumiza Aroni na Mose ira aawaki-e uukapolo. (Ekis. 4:29-31) Koma Farao angairi-ile ira mavutwiwa kaenjedeleye, aluwa koowambeela muimba mulandu Mose na Aroni, nowonga ira: “Muuninuki-a vamaso va Farao na atumikaye moi muwava-a supada m’mandani mwiwa ira kanipe.” (Ekis. 5:19-21) Aluwa kooimba mulandu atumiki ororomeleya a Yehova. Vyevyi vyali vyovwi-a tangaranga! Akala mukalile muvilelanga mavuto amo-iwene wa thawi indendayi, kodi munaire avi ira muroromelenga Yehova na gulu laye?

6. Kodi ninafunjede n’ni wa Habakuku va khani yovilela mavuto? (Habakuku 3:17-19)

⁶ Mupepelenga wa Yehova na murima wetene ira aukami-edeni. Namawongela Habakuku oogumanana mavuto anjinji. Va thawi imo-iwa, ookaikela akala Yehova unamuganizela. Eeno oopepela wa liye mokumela vati va murima. Liye eere: “Nyo Yehova, kodi ndinaza ndiulela likami-edo koma nyo o-ondivwa fiyeda alini? . . . Chifukwa n’ni munadowanave ing’ana ikalelo yotakala? (Hab. 1:2, 3) Yehova oosomeda pepelo la mtumikaye ororomeleyola. (Hab. 2:2, 3) Angaumbuwele mwemo Yehova mwavulumuchele liye athwaye mundulimu, Habakuku oowambeela teto kala mosangalala. Liye oosimikiza ira Yehova oomuganizela koma teto unomukami-a vilela vyoshisha vilivyetene (Welengani Habakuku 3:17-19.) Kodi ninafunjedavo n’ni? Mwagumanana mavuto, mupepelenga wa Yehova teto mumuwandelenga mwemo munavwelanyo. Eeno mumuroromelenga ira unoukami-edani. Mwera eeno, mukalenga osimikiza ira Yehova unouva-ani kopolo ira muvilele. Teto mwaona ira uukami-edani, munoza muwambeele muroromela vinjinji.

7. Kodi abalaye a Shirley kayesayesile muiri-a ira aire n’ni, n’nga chin’ni yamukami-ile ira ka-iye muroromela Yehova?

⁷ Mudowenganave ira vyongo vyokuza lambela. Kaganizelani mwemo ira vyevyi wamukami-edeleathu murongola m’mo-iwa wau Papua New Guinea zina laye Shirley, angagumanilena mavuto. b Banja laye lali losauwa, teto thawi dimo-i, oozuzuma fwanya yodja yokwakwanela. M’balaye m’mo-i oomuiri-a ira karoromelenga Yehova. M’balayeyo eere: “Waonga ira muzimu ochena wa Mulungu unoukami-eda, koma va unaukami-eda avi? Banja lawo ti losauwave. Unakedecha tatila thawawo no laleela.” Shirley eere: “Ndoovifuka ira: ‘Kodi Mulungu unoniganizela kapena naari?’ Eeno thawi eneyo ndoopepela wa Yehova muwandela vyetene vyevyo vyali m’murimani mwanga. Ndoodowanave welenga Baibulo na mabukwi-u, laleela koma  teto fwanyeya va misonkano.” Va-anavire thawi liye oozindikila ira Yehova oosamalela banja laye. Liye kanagonevo nandala, teto oosangalala. Shirley eere: “Ndoowona ira Yehova oosomeda mapepelwanga.” (1 Tim. 6:6-8) Akala thawi detene munaira vyongo vyokuza lambela, nyo teto kamunaza mulola ira kaikela kapena mavuto anayo munagumanananyo viwumwalani-eni na Yehova.

8. Kodi chin’ni inaireele abali anayo kanasogolela mu gulu la Yehova?

⁸ Zela m’mawailesi, m’manyuzipepala koma teto va intaneti adani-u kanofalisa khani donama dokuza abali anayo kanasogolela mu gulu la Yehova. (Sal. 31:13) Abali amo-iwa koomangiwa koma teto imbiwa milandu n’nga vigawenga. Vyevyi pivyevyo vyaireile na Akiristu owambeela vevo namarumiwa Paulo aimbiwaliye milandu donama koma teto mangiwa. Ndiye kodi aluwa kairile n’ni?

9. Kodi Akiristu amo-i kairile n’ni Paulo angamangiwe?

⁹ Akiristu amo-i muthawi ya anamarumiwa koo-iya kami-eda Paulo vevo a-eliweliye mundende wu Roma. (2 Tim. 1:8, 15) Chifukwa n’ni? Kodi koonyaswa na liye chifukwa yoi athu amo-iwa kamuona n’nga chigawenga? (2 Tim. 2:8, 9) Kapena kawova ira naaluwene teto kanozuzumi-iwa? Kaya kan’na vifukwa vyoi avi, kakedani ganizela mwemo Paulo mwavwele liye. Liye ali angavilele mavuto anjinji masiki teto ela moywaye vangozi chifukwa ya aluwa. (Vyo. 20:18-21; 2 Akor. 1:8) Tiyemoni kanikalenga n’nga athu anayo kamutatilile Paulo vathawi eneyo afuneela liye likami-edo liwa. Kodi niumbuwelenga n’ni, abali osogolela kazuzumi-iwanga?

10. Kodi niumbuwelenga n’ni abali anayo kanasogolela kazuzumi-iwanga, n’nga chifukwa n’ni?

¹⁰ Muumbuwelenga chifukwa iwa ninazuzumi-iwa koma teto eneyo inairi-a vyevyi. Lemba la 2 Timoteyu 3:12 lini: “Etene ofuna kala na moyo oviveleela wa Mulungu mwa Kiristu Yesu naaluwene teto kanoza kazuzumi-iwe.” Eeno kanidabwenga wona ira Satana unolimbanana vinjinji na abali anayo kanasogolela. Yolingaye chowairi-a ira ka-iye kala  ororomeleya koma teto ira iyo niirenga mantha.—1 Pe. 5:8.

11. Kodi ninafunjendavo n’ni va isanzo ya Onesiforo? (2 Timoteyu 1:16-18)

¹¹ Mudowenganave kami-eda abalinyu teto mukalenga ororomeleya wa aluwa. (Welengani 2 Timoteyu 1:16-18.) Paulo angamangiwe Mkiristu m’mo-iwa zinalaye Onesiforo ooira vyongo mo-iyana na amo-i. Liye “kaanyaswile na maunyolo a [Paulo].” M’malomwiwa, liye oomusayelasayela teto angamufwanyile ooyesayesa mukami-eda. Voira vyevyi, Onesiforo oo-ela moywaye vangozi. Kodi iyo ninafunjedavo n’ni? Kanilole ira wova athu unisokoneze kapena unilepeli-e kami-eda abali-u anayo kanazuzumi-iwa. M’malomwiwa, niirenga vyetene vyevyo ninawande iyo ira niakami-ede. (Miya. 17:17) Aluwa kanafuneela chikondi-u na likami-edo li-u.

12. Kodi ninafunjeda n’ni wa abali na arongoli-u awu Russia?

¹² Kaganizelani mwemwo abali na arongoli-u wu Russia kanakami-elaathu Akiristu afwiwa anayo kamangiwe. Amo-i kaimbiwanga milandu wu khoti, abali na arongola anjinji kanodowecha wewo votonyi-eda ira kali umbaliwa. Kodi iyo ninafunjedavo n’ni? Abali anayo kanasogolela kanyoziwanga, mangiwa, kapena zuzumi-iwa, kaniwovenga. Muwapepelelenga, samalela athu a m’banja liwa, koma teto sayelasayela ndila dimo-i dowakami-edela.—Vyo. 12:5; 2 Akor. 1:10, 11.

13. Kodi nyoziwa unairi-e avi ira kaniroromelenga Yehova na gulu laye?

¹³ Abali-u koma teto afwi-u auchito kapena ausukulu, podi ninyozanga chifukwa yoi ninolaleela, kapena teto chifukwa yoi nino-arela makundo a Yehova amakalelo apama. (1 Pe. 4:4) Aluwa podi wonganga ira: “Weyo-i uli muthu wapama, koma chipembezwinyu inokwimi-a vyongo teto inoyendela makundo awale.” Amo-i podi nisumululanga chifukwa ya mwemo ninairelecha iyo vyongo na ochosiwa, voonga ira: “N’nga munawonge avi ira muli athu achikondi?” Mawu n’nga anala, podi iri-a ira niambeele kaana maganizo okaikela. Mwina podi ambeela vifuka ira: ‘Kodi mwina Yehova unondipanikiza? Kodi gulu layeli ninokwimi-a vinjinji vyongo?’ Akala mugumanilena vyevyi, kodi munaire avi ira mukaleve ogwilizana na Yehova na gulu laye?

14. Kodi niirenga n’ni amo-i kaninyozanga chifukwa yo-arela makundo a Yehova? (Salimu 119:50-52)

¹⁴ Mukalenga osimikiza ira munerengave arela makundo a Yehova. Yobu oo-arelave makundo a Yehova masiki ira oonyoziwa chifukwa yoira vyevyi. M’mo-i mwa athu anayo kera mba afwaye, ooyesa muiri-a ira awonenga ira Mulungu kavyamukuza ira uno-arela makundwaye. (Yob. 4:17, 18; 22:3) Koma Yobu kaaroromele maboza anala. Liye ooiziwa ira makundo a Yehova okuza vyapama na vyotakala pivyofwanelela teto ali osimikiza arela. Kaalolile ira amo-i kamuiri-e kala o-ororomeleya. (Yob. 27:5, 6) Kodi ninafunjedavo n’ni? Kamulole ira nyoziwa uuiri-eni ambeela kaikela makundo a Yehova. Muganizelenga vyevyo vinauireelani nyo va ekinyu. Kodi kamuvionele ekinyu moweli-edaweli-eda ira makundo a Yehova mbaimbarimbari koma teto ira kanoukami-edani? Munafuneela simikiza kalave mugulu lelo lina-arela makundwala. Mwera eeno, munodowanave tumikela Yehova masiki athu kaunyozeni moi avi.—Welengani Salimu 119:50-52.

15. Chifukwa n’ni Brizit anyoziwa?

¹⁵ Kaganizelani vyevyo vyamuireele murongola m’mo-iwene wau India, zina laye Brizit. Liye oonyoziwa na abalaye chifukwa  yairoromelwaye. Angabadiziwe wene mu 1997, mamunaye onoyo kaali wa Mboni, chito yoomumalela. Eeno mamunayeyo ooganiza ira liye limo-i na banja laye kakalenga na makolwaye anayo kakala m’murunda umo-i. Vyevyi vyooiri-a ira Brizit agumanena mavuto amo-i alukulu. Vofwanya ira mamunayeyo kaali vachito, liye oofuneela ira a-indenga chito malambo etene ira akami-edenga banja liwa. Enjedela vevo, mpingo wavakwikwi wali vakuma otamangela makilomita okwakwana 350. Yovwi-a tangaranga choi abalaye amamunaye koowambeela muruni-a chifukwa yairoromelwaye. Vyongo vyoofiya vorucha vinjinji moi banja la Brizit lootama teto. Eeno mo-odedi-edela, teto mamunaye ootatiya. Vanduli viwa teto mwaniwa wamu-iyana ootatiya na khansa angan’na chaka 12. Vyongo vyoofiya vorucha vinjinji vevo abalaye a Brizit koowambeela muimba mulandu ira nguliyene uiri-ile vyetene vyevyo. Aluwa kawonga ira vyaakale ira liye kai wa Mboni da Yehova, mavuto etene anala kataireya. Komave, liye oodowanave roromela Yehova koma teto kala mugulu laye.

16. Kodi Brizit adalisiwe avi chifukwa yoi ka-iile Yehova na gulu laye?

¹⁶ Vofwanya ira Brizit akala mudela lolapela na mpingo, woing’anela dela oomulimbi-a ira alaleelenga mudela la waniwa wewo koma teto airelenga misonkano m’mba mwaye. Vowambeela liye awona ira vyevyi pivyorucha vinjinji komave oo-arela malangizwayo. Oolaleela uthenga wapama wa amo-i, irela misonkano m’mba mwaye koma teto ooira lambela wavabanja na a-imaye. Kodi vyo-arelavo viwa vyali vyoi avi? Brizit oowambeela pangi-a mapuzilo a Baibulo anjinji teto athu anjinji anayo afunjedana liye koobadiziwa. Mu 2005, oowambeela upainiya wogarateya. Liye oodalisiwa chifukwa yororomela Yehova koma teto kala ororomeleya wu gulu laye. Vano a-imaye kanotumikela Yehova mororomeleya teto vano mudela liwa muli mipingo min’li. Brizit kanakaikela ira Yehova oomuva-a kopolo ira awande vilela mavuto anayo agumanana liye koma teto nyoziwa na abalaye.

17. Kodi ninafuneela simikiza murima ira n’ni?

¹⁷ Satana unafuna ira niroromelenga ira Yehova unoni-iya nagumanana mavuto koma teto kala mugulu laye, unakeda wenjedela mavutwayo. Unofuna teto ira niwovenga abali anayo kanasogolela gulu la Mulungu kanyoziwanga, zuzumi-iwa kapena ka-eliwa mundende. Koma teto unofuna ira nyoziwa uniiri-e iya roromela makundo a Yehova na gulu laye. Komave iyo ninoiziwa pama misampa daye dotakala teto kaninapusi-iwa. (2 Akor. 2:11) Tiyeni nisimikize murima ira ninerenga koonda maboza a Satana kalangave ororomeleya wa Yehova na gulu laye. Niumbuwelenga ira Yehova kanaza ani-iya navang’onovene. (Sal. 28:7) Eeno kanilole iliyetene nimwalani-a na Yehova.—Arom. 8:35-39.

18. Kodi ninatapanya n’ni mukhani yo-arela?

¹⁸ Mukhanila, niitapanya mavuto oiri-iwa na ilambwela anayo ninagumanena iyo. Koma thawi ndimo-i mavuto anayo ninagumanena iyo mupingo, kanokoza iri-a ira ni-iye roromela Yehova na gulu laye. Ndiye kodi ninaire avi ira nilimbanena mavuto anala? Ninotapanya vyevyi mukhani yo-arela.