1. Kodi “kalave oganiza pama” unatapulela n’ni? (2 Timoteyu 4:5)

 THAWI dimo-i mavuto anayo ninagumanana iyo, podi nilepeli-a kala ororomeleya wa Yehova na gulu laye. Ndiye kodi ninaire avi ira niwande limbanana mavutwala? Ninafuneela dowanave kala oganiza pama, kala masove koma teto kala olimba mu iroromelo. (Welengani 2 Timoteyu 4:5.) Ninokalave oganiza pama nakalanga odeka, koma teto naonanga vyongo mwemo Yehova munavionela liye. Nairanga vyevyi, maganizwi-u katinaza kadimeela chifukwa ya mwemo ninavwela iyo.

2. Kodi ninatapanya n’ni mukhanila?

² Mukhani ivirilele, nootapanya mavuto mararu oiri-iwa na ilambwela anayo ninagumanena iyo. Mukhanila, ninotapanya mavuto anayo ninagumanena iyo mupingo anayo kanashisha roromeleya wi-u wa Yehova. Mavutwiwa mbala, (1) naonanga ira Mkiristu fwi-u kaniirele vyongo mwachilungamo, (2) nava-iwa malangizo kapena chilango, koma teto (3) navuteyanga lemeela chenja wewo uireile mugululi. Kodi ninaire avi ira nidowenave kala oganiza pama koma teto kani-iye Yehova na gulu laye nagumanana mavuto anala?

3. Kodi ninaire avi akala ninaona ira Mkiristu fwi-u uniirela vyongo vyookaana chilungamo?

³ Kodi thawi imo-i moowonavo ira Mkiristu fwinyu kapena teto onoyo un’na udindo kauireleni vyongo mwachilungamo? Pivyoiziweya, ira m’baliyo kaan’na yolinga yofuna ukhumudwi-ani. (Arom. 3:23; Yak. 3:2) Komave, mwina vyevyo vyairile liyevyo vyooulunduwi-ani. Mwina teto moolepela gona chifukwa  ya khaniyo. Podi ira moovifuka ira, ‘Akala m’balila uirile vyevyi, kodi leli ti gulu la Mulungu?’ Vi pivyevyo Satana unafuna liye ira niganizenga. (2 Akor. 2:11) Maganizo olakweyala podi iri-a ira ni-iye Yehova na gulu laye. Ndiye akala ninaona ira Mkiristu fwi-u uniirela vyongo vyookaana chilungamo, n’naire avi ira nidowenave kala oganiza pama norambela maganizo olakweya anayo Satana unafuna liye ira nikaena?

4. Kodi Yosefe airile n’ni ira adowenave kala oganiza pama angaireliwe vyongo vyookala vyachilungamo, n’nga ninafunjede n’ni va isazwaye? (Genesesi 50:19-21)

⁴ Kamusungenga yam’murima. Yosefe angali zombwe, achimwenaye katamuirele vyongo mwachilungamo. Koomuida, teto amo-i koofuna vyomupa. (Gen. 37:4, 18-22) Vanduli vuwa, koomuguli-a wu ukapolo. Vi vyooiri-a ira Yosefe agumanena vyoshisha vilukulu wa chaka 13. Yosefe ookoza kaikela akala Yehova unamuwomeluwana. Teto ookoza onanga n’nga Yehova umu-iya vevo afuneela liye likami-edo. Koma liye kaalolile ira vyevyi vimukumudwi-e. Oodowanave kala oganiza pama vokala odeka. Vevo an’na liye mpata woi oowanda aweli-eda abalaeyo, liye kaairile eno, koma oowatonyi-eda chikondi koma teto oowalevelela. (Gen. 45:4, 5) Yosefe ookwakwani-a ira vyevyi, chifukwa ooganiza pama. M’malo moganizela mavuto anayo agumanana liye, ooganizela vyokuza khani yofuneya vinjinji yokuza yolinga ya Yehova. (Welengani Genesesi 50:19-21.) Kodi ninafunjedavo n’ni? Mwaireluwanga vyongo vyookaana chilungamo, kamumulunduwelenga Yehova kapena ambeela ona ira uutatilani. M’malo mwiwa muganizelenga mwemo munaukami-edelani liye vilela vyoshishavyo. Wenjedela vevo, amo-i kauchimwelani mupimbenga vyochimwa viwa na chikondinyu.—1 Pe. 4:8.

5. Kodi Miqueas airile avi ira akaleve oganiza pama vevo aona liye ira uireliwa vyookala vyachilungamo?

⁵ Kaganizelani isazo yamalambwano ya m’bali mo-i, onoyo uli ndimuwa wu South america, zina laye Miqueas. b Liye unoumbuwelecha mwemo mwavwede liye vathawi imo-iwa vevo awona liye ira abali amo-i audindo koomuirela vyongo mookaana chifundo. Liye eere: “Ndali nda-anakumbanyevo vinjinji munduli mwetene mwemu. Ndoowova. Ma-iyu kandagona, teto ndakalelecha ulave novionanga ira kandili ofuneya.” Koma Miqueas, oodowanave kala oganiza pama teto kaalolile sokoneziwa na mwemo mwavwela liye. Oopepela wiliwili, vepa Yehova ira amuva-e muzimwaye wochena teto kopolo ira avilele. Oosayela teto m’mabukwi-u makundo anayo kamukami-ede. Kodi ninafunjedavo n’ni? Akala munaona ira m’bali kapena murongola m’mo-i kauireleni vyongo mwachilungamo, mukalenga odeka teto muyesayesenga kumi-a maganizo olakweya aliyetene anayo munakayena nyo. Podi ira kamunaiziwe vyevyo vyamuiri-ile onga kapena ira vyevyo airile liyevyo. Eeno mupepelenga wa Yehova muvepa ira aukami-edeni ira muonenga vyongo mwemo munavionela liye. Vyevyi vinoukami-ani ona ira m’bali kapena murongolinyuyo kaan’na yolinga yoi auireleni yotakala teto podi mulevelela. (Miya. 19:11) Muumbuwelenga ira Yehova, unoiziwa vyevyo vinauireelani teto unoza auva-eni kopolo dedo munafuneela nyo ira muvilele.—2 Lim. 16:9; Nam. 5:8.

6. Chifukwa n’ni vili vyofuneya ira nionenga malangizo okumela wa Yehova n’nga ndila yotonyi-edela ira unoniwomeliwana? (Aheberi 12:5, 6, 11)

⁶ Va-iwa malangizo unokoza kala wovoreya. Naganizelanga vinjinji voreyauwa, ninokoza  ambeela ona ira malangizwayo kayi ofuneya vinjinj, kanafuneela va-iwa kapena teto kapelekiwe mookaana chifundo. Vyo-arela viwa, vinakala vyoi kaninaone malangizwayo kala ndila eneyo Yehova unanitonyi-dela liye chikondi. (Welengani Aheberi 12:5, 6, 11.) Koma teto nalolanga sokoneziwa chifukwa ya mwemo ninavwela iyo, Satana unopatelavo ngari. Liye unafuna ira nikoondenga malangizo, teto kwaranya vevo, unafuna ira ni-iyane na Yehova na gulu laye. Ndiye akala muva-iwe malangizo, munaire avi ira mukaleve oganiza pama?

7. (a) Mogwilizana na ithuzithuzila, kodi Petulo a-indi-ediwe chito avi na Yehova chifukwa yosomedela malangizo? (b)  Kodi ninafunjeda n’ni va isazo ya Petulo?

⁷ Musomedelenga malangizo teto muchenjenga. Maulendo angasene, Yesu oosumulula Petulo vamaso va anamarumiwa amo-i. (Malik. 8:33; Luk. 22:31-34) Podi ira Petulo oonyaswa. Komave liye ookala ororomeleya wa Yesu. Oosomedela malangizo teto oofunjedavo yongo. Vira wa thawi, Yehova oomudalisa Petulo chifukwa yokalave ororomeleya teto oomuva-a maudindo alukulualukulu mupingo. (Yoh. 21:15-17; Vyo. 10:24-33; 1 Pe. 1:1) Kodi ninafunjede n’ni va isazo ya Petulo? Narambelanga ganizela vinjinji ira ninyaswi-iwa nosomedela malangizo koma teto chenja, vyongo vinoniyendela pama iyo koma teto athu amo-i. Nera eeno ninokala ofuneya vinjinji wa Yehova koma teto abali-u.

8-9. Kodi Bernardo, avwile avi vowambeela angava-iwe chilango, n’nga chin’ni yamukami-ile ira achenje maganizo?

⁸ Kaganizelani vyevyo vyamuireele m’bali m’mo-i wa wu Mozambique zina laye Bernardo. Liye oochosiwa va udindo n’nga ndimuwa. Ndiye vowambeela avwile avi? Liye eere: “Ndookumudwa chifukwa kandaomeliwe na chilango eneyo ndava-iwe miyo.” Bernardo ookumbanya na mwemo amo-i kamuonelengaathu mupingo. Liye oosomedela ira: “Vyoondilandela medi ndingasi dene ira ndiambeele teto ona vyongo mofwanelela koma teto roromela Yehova na gulu laye.” Kodi chin’ni yamukami-ile Bernardo ira aambeele ona vyongo mofwanelela?

⁹ Bernardo oochenja mwemo mwaganizela liye. Liye oosambaula ira: “Vathawi eneyo ndali miyo ndimuwa, ndoo-indi-eda chito lemba la Aheberi 12:7 vokami-eda amo-i ira kaonenga mofwanelela chilango yokumela wa Yehova. Ndiye ndoovifuka ira: ‘Kodi ngu mbaani onoyo unafuneela indi-eda chito makundo  avalembali?’ Mba atumiki etene a Yehova tangani-avo miyo.” Moi Bernardo ooira vyongo vyomukami-eda ira aambeele teto roromela Yehova na gulu laye. Oowenjedela vyevyo airaliye va khani yofunjeda Baibulo koma teto ganizela vinjinji vyevyo vyawelenga liye. Masiki ira ookumbanya na mwemo abali na arongola munamuonelengaathu, liye oolaleela koma teto sonkanana limo-i. Vangavirile thawi, liye oo-eliwa teto kala ndimuwa. Akala mofwanafwana na Bernardo, nanyen’ne muva-iwe chilango, kamuganizelenga vinjinji nyaswa wewo munavwanyo, koma musomedelenga malangizo, teto muchenjenga. c (Miya. 8:33; 22:4) Mwairanga vyevyi, munokala osimikiza ira Yehova unoza audaliseni chifukwa yokala wororomeleya wa liye na gulu laye.

10. Kodi ku chenja woi avi mugulu la Yehova wewo washishile roromeleya wa Aizarayeli amo-i?

¹⁰ Chenja wa vyongo mugululi podi shisha roromeleya wi-u. Akala kaninasamale, chenja wewu unoiri-a ira ni-iye Yehova. Mofwanafwani-a, kaganizelani mwemo chenja wa vyongo mugulu la Yehova wakuzeleathu Aizarayeli amo-i muthawi ya Mose. Chilamulo ya-anagarati-iwe, miru damabanja ti dedo daira vyevyo asembe kairaathu. Aluwa koomanga guwa, koma teto peleka sembe wa Yehova m’malo mwa mabanjiwa. (Gen. 8:20, 21; 12:7; 26:25; 35:1, 6, 7; Yob. 1:5) Koma Chilamulo ingagarati-iwe, miru damabanja dafuneya iya panga vyevyi. Yehova oosakula ira athu okumela m’banja la Aroni mbanayo kanapelekenga sembe. Vyongo vingachenjile eeno mugulu la Mulungu, akala muru wa banja m’mo-i onoyo kaali wa m’banja la Aroni aaire vyongo vyokuza usembe, oowanda piwa. d (Lev. 17:3-6, 8, 9) Kodi mwina chenja wewu kuwewo wairi-ile Kora, Datani, Abiramu, na asogoleli amo-i 250 ira kaukele Mose na Aroni? (Num. 16:1-3) Kaninambaranyede onga eeno. Kaya vyongo vyali avi, Kora na afwaye koolepela kalave ororomeleya wa Yehova. Kodi munaire avi akala chenja wewo uireile mugululi ushishile roromeleya winyu?

11. Kodi ninafunjeda n’ni va isazo ya Akohati amo-i?

¹¹ Muirenga vyongo mogwilizana nochenja wewo uireile mugululi. Vathawi eneyo kaviraathu muchipululu, Akohati kookaana utumiki wavadela vinjinji. Thawi iliyetene Aizarayeli katamanga dowa malo amo-i, Akohati amo-i kootukula likasa noyendanga vasogolo va athu etene. (Num. 3:29, 31; 10:33; Yos. 3:2-4) Enela yali ngari ilukulu. Komave, vyongo vyoochenja Aizarayeli kangafiile mu Ilambo Yolanyediwa. Likasa kalafuneela teto tukuliwanga vakwikwivakwikwi. Eeno vathawi eneyo Solomo alamulela liye, Akohati amo-i koova-iwa utumiki woimba, amo-i katumikela monga alonda avageti, teto amo-i kasamalela nyumba dosungelamo vyongo. (1 Lim. 6:31-33; 26:1, 24) Kavili valivetene vevo vanatonyi-eda ira Akohati koodandaula kapena funanga va-iwa udindo wavadimu chifukwa yoi mundulimo kooira utumiki wavadela. Kodi ninafunjedavo n’ni? Mugwilizanenga na murima wetene nochenja uliwetene wewo uireile mugulu la Yehova, masiki wewo ukuzile utumikinyu. Musangalalenga na utumiki uliwetene onoyo muva-iwenyo. Muumbuwelenga ira utumikinyu kai onoyo unatonyi-eda ira nyo muli ofuneya vinjinji. Yehova unowona ira nyo muli ofuneya chifukwa yoi muli ovwela ookala chifukwa yoi muli va utumiki umo-iwene.—1 Sam. 15:22.

12. Kodi Zaina airile avi angawandeliwe ira a-iye tumikela va Beteli?

 ¹² Kaganizelani isazo ya murongola m’mo-i wa wu Middle East zina laye Zaina, onoyo utumikaye onoyo auwomeluwana liye vinjinji woochenja. Liye oowandeliwa ira airenga upainiya wavadela angatumikele va Beteli wa chaka dokwaranya 23. Zaina awongile ira: “Ndookumudwa vinjinji utumikanga ungachenjile. Ndakeda viwona n’nga muthu ookaana chito moi ndakeda kalela vifuka ira, ‘Kodi ndalakwi-ile vaavi?’” Pi vyovwi-a tangaranga ira abali na arongola amo-i mupingo, koowenjedela ululwaye vomuwandela ira: “Vyaakale ira mooira pamapama vyetene, gulu kalautatileni eni.” Wathawi injinji, Zaina ookala okumudwa moi akalelecha ula ma-iyu aliyetene. Komave liye awongile ira: “Ndooyesayesa ira kandikaikelenga ira Yehova unondiwomeluwana koma teto ira kandikaikelenga gulu laye.” Kodi Zaina airile avi ira akaleve oganiza pama?

13. Kodi Zaina airile avi ira a-iye kaana maganizo olakweya?

¹³ Zaina ooyesayesa ira kakayena maganizo olakweya. Kodi airile avi vyevyi? Oowelenga m’mabukwi-u khani dedo dakuza vinjinji vuto layeli. Liye oofwanya khani eneyo yamukami-ile yamuru oyi “Mungathe Kupitirizabe Polefulidwa!” mu Sanja ya Olonda ya Febuluwale 1, 2001. Khanila inosambaula ira podi ira olemba Baibulo Maliko oolimbanana teto maganizo n’nga anala vevo utumikaye wachenjileathu. Zaina awongile ira: “Isazo ya Maliko yali n’nga murombwe onoyo wandikami-ile ira ndiambeele teto vwa pama.” M’malo movipatulanga kapena vivwelanga chisoni, liye ooira vyongo na afwaye. Vogomi-eda viwa, oowona ira muzimu wa Yehova uno-inda chito mugulu laye teto abali osogolela kanomuganizela vinjinji. Liye oozindikila ira gululi linafuneela panga vyongo vyevyo vinakami-e vinjinji ira chito ya Yehova idowe vasogolo.

14. Kodi Vlado avuteile lemeela chenja uuvi wewo waireile mugulu la Yehova, n’nga chin’ni yamukami-ile?

¹⁴ Vlado onoyo uli ndimuwa wachaka 73 wa wu Slovenia, oovuteya maganizo pingwiwa ungatangani-iwe na pingo umo-i koma teto Nyumbiwa ya Umwene inga-eiwe. Liye awongile ira: “Kandavwechecha chifukwiwa Nyumba ya Umwene yoriyela i-eiwe. Ndookumudwa chifukwa nali nangakede isakaeda wene. Ndili kalipentala, teto ndookami-eda sakaedana vyongo vimo-i visha munyumbela. Koma teto nafuneela chenja vimo-i na vimo-i, chifukwa  yotangani-iwa wa mipingodi vyevyo vyali vyorucha wa iyo ofalisa ouluula.” Kodi chin’ni yakami-ile Vlado arelave malangizo anayo kapelekiwe? Liye aongile ira: “Panga vyongo mogwilizana nochenja wewo unaireya mugulu la Yehova thawi detene unozi-a madaliso. Chenja wewu unonikami-eda kozeela chenja ulukulu wewo unaze uireye usogolo.” Kodi nanyen’ne munovuteya chifukwa yoi mipingo dinyu ditangani-iwa kapena utumikinyu uchenja? Iziwani ira Yehova unovwechecha mwemo munavwelanyo. Mwairanga vyongo mogwilizana nochenjawo koma teto dowanave kala ororomeleya wa Yehova na gulu laye lelo unali-indi-eda liye chito, munoza mudalisiwe vinjinji.—Sal. 18:25.

15. Kodi ninaire avi ira nikaleve oganiza pama nagumanangana mavuto mupingo?

¹⁵ Vevo ninaandamela iyo magomelo a ilambwela, nidedi-edenga ira ninokoza gumanana mavuto mupingo. Mavuto anala kanokoza shisha roromeleya wi-u wa Yehova. Eeno ninafuneela kalangave oganiza pama. Akala Mkiristu fwinyu uuireleni vyongo vyookaana chilungamo, murambelenga lunduwa. Mwava-iwa malangizo kapena chilango, kamuganizelenga vinjinji vyoi munonyaswa. Mukedenga vwela malangizwayo teto muchenjenga. Akala chenja wewo uireile mugululi uukuzileni, musomedelenga na murima wetene teto mu-arelenga malangizo anayo kapelekiwe.

16. Kodi munaire avi ira kamu-iye roromela Yehova na gulu laye?

¹⁶ Akala roromeleya winyu ushishiwe munokoza wanda dowanave kala ororomeleya wa Yehova na gulu laye. Koma ira mukwakwani-e panga vyevyi, munafuneela kalave oganiza pama, vyevyo vinatapulela kala wodeka, wona vyongo mofwanelela, koma teto viwona mwemo Yehova munaviwonela liye. Kalani osimikiza ira mufunjedenga vya athu oromoliwa m’Baibulo anayo kavilele mavuto ofwanafwana na eenyu teto muganizelenga isazo iwa. Mupepelenga wa Yehova ira aukami-edeni. Teto kamu-iye ira vyongo na pingo. Ndiye kaya munagumanana vyoi avi, Satana kanaza awanda umwalani-ani na Yehova kapena gulu laye.—Yak. 4:7.