1. Kodi niyembekezelenga n’ni, n’nga ninakale osimikiza vya n’ni?

 NIYEMBEKEZELENGA ira ninokoza runi-iwa vevo nina-inda iyo chitwi-u yolaleela. Teto usogolowu ninokoza za runi-iwa vinjinji. (Dan. 11:44; 2 Tim. 3:12; Chiv. 16:21) Komave, ninokoza kala osimikiza ira Yehova unoza anikami-e. Chifukwa n’ni ninaonga eeno? Thawi detene Yehova ukala akami-anga atumikaye kwakwaneli-eda utumiki onoyo uva-iweathu kaya utumikiyo ukale worucha moi avi. Mofwanafwani-a, tiyemoni nione vyongo vimo-i vyevyo vyaireile vamoyo wa namaongela Ezekiyeli, onoyo alaleela wa Ayuda anayo kali mu ukapolo wu Babulo.

2. Kodi Yehova aafotokozile avi athu anayo kakala mu gawo lelo Ezekiyeli alaleela liye, n’nga ninatapanya n’ni mukhanila? (Ezekiyeli 2:3-6)

² Kodi athu a mugawo lelo Ezekiyeli alaleela liye kali athu oyi avi? Yehova oofotokoza ira kali akove “daibewe,” “amakani,” koma teto “opanduwa.” Aluwa kali oporecha n’nga minga koma teto oopi-a n’nga awaluze. Moi Yehova oomuwandela Ezekiyeli moweli-edaweli-eda ira: “Kuwove”! (Welengani Ezekiyeli 2:3-6.) Ezekiyeli ookwakwani-a inda chito yolaleela eneyo ava-iwe liye chifukwa (1) arumiwe na Yehova, (2) ookami-iwa na muzimu wochena, teto (3) oolimbi-iwa na Mawu a Mulungu. Kodi vyongo viraruvi vyakami-ile avi Ezekiyeli? N’nga vinanikami-a avi malambwano?

3. Kodi mba mawu aavi anayo kamulimbi-ile Ezekiyeli, n’nga Yehova amusimikizele avi ira unomukami-a?

³ Yehova oomuwandela Ezekiyeli ira: “Ndinooutumiza.” (Ezek. 2:3, 4) Mawu anala koomulimbi-a Ezekiyeli. Chifukwa n’ni? Pivyookaiki-a ira liye ooumbuwela ira Yehova oo-indi-eda chito teto mawu n’nga anala vevo aruma liye Mose na Yesaya n’nga anamaongelaye. (Ekis. 3:10; Yes. 6:8) Liye ooiziwa teto mwemo Yehova mwakami-edile liye anamaongelaye ambin’lala limbanana mavuto. Eeno vevo Yehova amuwanden’le liye nawili ira: “Ndinooutumiza,” namawongelola ookaana vifukwa vyapama vyororomela ira Yehova unomukami-a. Enjedela vevo, M’buku la Ezekiyeli ninofwanyamo thawi dinjinji mawu oyi: “Yehova oowonga na miyo.” (Ezek. 3:16) Teto thawi dinjinji, liye alembile ira “Yehova oodowanave wonga na miyo.” (Ezek. 6:1) Va Ezekiyeli, kaakaikela ira arumiwe na Yehova. Koma teto, vofwanya ira ali mwana wa wasembe, podi ira babaye oomufunji-a mwemo Yehova thawi detene mwasimikizele liye atumikaye ira unowakami-a. Mofwanafwani-a, Yehova oowandela Isaki, Yakobo, na Yeremiya ira: “Miyo ndili na we.”— Gen. 26:24; 28:15; Yer. 1:8.

4. Kodi mba mawu olimbi-a aavi anayo kamuva-ile kopolo Ezekiyeli?

⁴ Kodi Aizarayeli kawachen’le avi uthenga onoyo Ezekiyeli alaleela liye? Yehova awongile ira: “A nyumba ya Izarayeli, katinaza kafuna uvwela chifukwa aluwa katinafuna ndivwela.” (Ezek. 3:7) Vokoonda muvwela Ezekiyeli, athwayo kakoonda vwela Yehova. Mawu anala kookami-a Ezekiyeli iziwa ira koonda vwela wa athwayo, kuwatapulela ira liye ulepela utumikaye waunamaongela. Yehova oomusimikizela teto Ezekiyeli ira vyongo vyevyo vyalaleela liye vyaza vikwakwaneli-ediwa, “aluwa kanoza kaiziweve ira vaari vuwa vookala namaongela.” (Ezek. 2:5; 33:33) Pivyookaiki-a  ira mawu olimbi-a anala koomukami-a Ezekiyeli kaana kopolo doi akwakwaneli-ede utumikaye.

5. Mogwilizana na Yesaya 44:8, kodi ninafwanya avi kopolo?

⁵ Na-iyene teto ninafwanya kopolo chifukwa yoi ninarumiwa na Yehova. Liye unonilemekeza voniromola ira “mboni” daye. (Yes. 43:10) Enela chingari ilukulu vinjinji! N’nga mwemo Yehova mwamuwanden’le liye Ezekiyeli ira: “Kuwove,” Yehova teto unaniwandela ira: “Kamuwove.” Chifukwa n’ni kaninafuneela wova athu anayo kananiruni-a? Mofwanafwana na Ezekiyeli, nirumiwe na Yehova teto liye unonikami-edecha.—Welengani Yesaya 44:8.

6. (a) Kodi Yehova unanisimikizela avi ira unonikami-eda? (b) Kodi ninafwanya uuvi kopolo?

⁶ Yehova unonisimikizela ira unoza anikami-e. Mofwanafwani-a, Yehova aanawonge ira: “Nyo muli mboni danga,” awongile ira: “Waza uviranga va ma-inje, miyo ndinoza ndikale na we, waza ulambuwanga mi-inje, ma-inje katinaza kaumida. Waza uyendanga vamulo kunaza uvya teto masiki lumi la mulo kalinaza liuvula.” (Yes. 43:2) Nairanga utumiki-u, thawi dimo-i ninogumanana mavuto anayo kali n’nga ma-inje osefuwela, koma teto vyoshisha vyevyo vili n’nga mulo. Masiki vili eeno, Yehova unonikami-eda ira nidowenave laleela. (Yes. 41:13) Mofwanafwana na muthawi ya Ezekiyeli, athu anjinji malambwano kanokoonda teto uthengi-u. Ninozindikila ira koonda uwa vuruwana kavinatapulela ira nilepela inda pama chitwi-u yolaleela. Ninolimbi-iwa koma teto fwanya kopolo voiziwa ira Yehova unosangalala nadowanave lengeza uthengaye mororomeleya. Namarumiwa Paulo awongile ira: “Uliwetene vaeka unoza awachele mpotwaye mogwilizana na chitwaye.” (1 Akor. 3:8; 4:1, 2) Murongola m’mo-i onoyo akan’le airanga upainiya wathawi injinji awongile ira: “Ndinosangalala voiziwa ira Yehova unodalisa tindi li-u.”

7. Kodi thawi detene Ezekiyeli avwa avi, aganizela masompenya anayo awonile liye? (Onani ithuzithuzi ya vatakuru lowambeela.)

⁷ Ezekiyeli oowona mwemo muzimu wa Mulungu uliliathu wakopolo. M’masompenya, liye oowona muzimu wochena ukami-edanga angelo akopolo koma teto uwendi-anga mawilo alukulualukulu a galeta laudimu. (Ezek. 1:20, 21) Kodi Ezekiyeli airile n’ni angawonile vyevyi? Liye oolemba vyevyo vyaireile ira: “Ndingawonile vyevyo, ndookokora noworama mpaka kovanga vati.” Chifukwa yoova, Ezekiyeli oogwa vati. (Ezek. 1:28) Thawi detene, Ezekiyeli aganizela masompenya oiri-a chidwala, oolimbi-iwa teto oororomela ira mokami-iwa na muzimu wa Mulungu, unokoza wanda kwakwaneli-eda utumikaye.

8-9. (a) Kodi yaireile chin’ni Yehova angamulamulile Ezekiyeli ira “aimelele”? (b) Kodi Yehova apitilizile avi muva-a kopolo Ezekiyeli ira alaleele gawo lorucha?

⁸ Yehova oomulamula Ezekiyeli ira: “We mwana wa muthu, imelela ira ndiuwongi-e.” Mawu anala, limo-i na muzimu wa Mulungu vyoomuva-a kopolo Ezekiyeli ira awande venya. Liye alembile ira: “Zimu oovolowa mwa miyo moi oondiimeli-a.” (Ezek. 2:1, 2) Vanduli va vyevi koma teto va utumikaye wetene, Ezekiyeli oosogoleliwa na “ndanda” la Mulungu kapena ira, zimwaye wochena. (Ezek. 3:22; 8:1; 33:22; 37:1; 40:1) Muzimu wa Mulungu oomuva-a kopolo Ezekiyeli na yolinga yoi awande inda chito eneyo ava-iwe liye yolaleela athu a mu gawo laye anayo kali “amakani na o-ovwela.” (Ezek. 3:7) Yehova oomuwandela Ezekiyeli ira: “Ndiiri-a kovawo ira ikale yolimba mofwanafwana na kove diwa teto inji  yawo ira ikale yolimba mofwanafwana na vinji viwa. Ndiiri-a inji yawo kala n’nga libwe la dayamondi, lolimba kwaranya libwe la nsangalabwi. Kuove teto kuove kove diwa.” (Ezek. 3:8, 9) Va vyali n’nga Yehova unamuwandela Ezekiyeli ira: ‘Kufooke chifukwa youma wa mirima diwa. Miyo ndinoulimbi-a.’

⁹ Vanduli vuwa, muzimu wa Mulungu oomulandela Ezekiyeli wu gawo lelo wafuneela liye dowa laleela. Liye alembile ira: “Ndanda la Yehova, loondi-inda mwakopolo.” Namaongelola vyoomulandela mulungu watuta ira avwecheche uthenga onoyo afuneela liye dowa laleela, na yolinga yoi awande laleela mokumela vati vamurima. (Ezek. 3:14, 15) Vaduli vuwa Yehova oomusogolela wu chigwa wewo “muzimu wavolowileathu mwa [liye].” (Ezek. 3:23, 24) Eeno Ezekiyeli ali wokozeya ambeela utumikaye.

10. Kodi ninafuneelanga n’ni vo-inda chitwi-u yolaleela, n’nga chifukwa n’ni?

¹⁰ Kodi chin’ni inanikami-e ira ni-indenga chitwi-u yolaleela? Ira nisomede yofuka enela, kaganizelani vyevyo vyamuireele Ezekiyeli. Aanaambeele chitwaye yolaleela, muzimu wa Mulungu oomuva-a kopolo dedo afuneela liye. Iyo teto malambwano, ninokoza wanda inda chitwela akala ninakami-iwa na muzimu wa Mulungu. Chifukwa n’ni? Chifukwa Satana uli vakondo yolimbana na iyo na yolinga yofuna nilepeli-a inda chito yolaleelela. (Chiv. 12:17) Ona waathu, vinokoza oneya n’nga kan’nakoze kwaranya vakondo yolimbana na Satanela. Koma zela mu chitwela, ninomugonji-a! (Chiv. 12:9-11) Moi avi? Na-indangana chitwela, ninotonyi-eda ira kaninaova ndila dedo Satana una-indi-eda liye chito voniopopi-a. Thawi iliyetene eneyo nilaleele iyo, ninakala ira nimugonji-a Satana. Kodi ninafunjeda n’ni valikundo loi ninodowanave laleela, masiki adani-u kaniruni-anga? Ninafunjedavo ira muzimu wochena unoniva-a kopolo koma teto Yehova unosangalala na iyo.—Mat. 5:10-12; 1 Pe. 4:14.

11. Kodi muzimu wochena unanikami-e avi, n’nga ninaire avi ira nidowenave uwachela?

¹¹ Kodi ninalimbi-iwe teto avi voiziwa ira  Yehova mopipilisa oolimbi-a kove na inji ya Ezekiyeli? Muzimu wa Mulungu unokoza niva-a kopolo ira niwande limbanana vuto lililetene lelo ninagumanena iyo vautumiki-u. (2 Akor. 4:7-9) Ndiye kodi, ninaire avi ira thawi detene niwachelenga muzimu wa Mulungu? Ninafuneela pepela wa Mulungu mookaana malile nangan’na iroromelo ira liye unovwa mapepelwi-u. Yesu oowandela ofunjedaye ira: “Vepanive, . . . Dowananive saelasaela, . . . Gogodanive.” Vosomeda mapepelwayo, Yehova unoza apeleke “muzimu wochena wa anayo kanamuvepa.”—Luk. 11:9, 13; Vyo. 1:14; 2:4.

12. Mogwilizana na Ezekiyeli 2:9–3:3, kodi mpukutuyo wakumele waani, n’nga mwalembiwe n’ni?

¹² Ezekiyeli kaakede kami-iwa na muzimu wochena koma oolimbi-iwa na Mawu a Mulungu. M’masompenya, liye oowona ndanda lingatukulile mpukutu. (Welengani Ezekiyeli 2:9–3:3.) Kodi mpukutuyo wakumele waani? N’nga mwalembiwe n’ni? Kodi walimbi-ile avi Ezekiyeli? Tiyemoni nione. Mpukutuyo wakumele wu pando wa Mulungu. Podi ira Yehova, oo-indi-eda chito m’mo-i mwa angelo 4 anayo Ezekiyeli aaonile liyale ira kamuva-e mpukutuyo. (Ezek. 1:8; 10:7, 20) Mumpukutumo mwali Mawu a Mulungu uthenga wachiweluzo onoyo Ezekiyeli afuneela liye dowa wandela Aizarayeli opanduwa anayo kali wu ukapolo. (Ezek. 2:7) Uthengoyo walembiwe mbali detene da mpukutuyo.

13. Kodi Yehova amuwanden’le Ezekiyeli ira aire n’ni na mpukutuyo, n’nga chifukwa n’ni wali wodjoodja?

¹³ Yehova oomuwandela Ezekiyeli ira adje mpukutu onoyo amuva-ile “ira [ingulwaye] irumbale.” Ezekiyeli oovwela, teto oodja mpukutu wetene onoyo. Kodi mbali ya masompenya anala yatapulela n’ni? Ezekiyeli afuneela vwechecha uthenga wetene onoyo afuneela liye dowa lengeza. Uthengoyo, wafuneela umufiye vamurima. Vanduli vuwa vooireya yongo imo-i yoiri-a chidwi. Ezekiyeli oozindikila ira mpukutuyo “wali wodjoodja n’nga nuwi.” (Ezek. 3:3) Chifukwa n’ni? Chifukwa onga moimelela Yehova, wali wooma, kapena ira, wosangalasa wa liye. (Sal. 19:8-11) Liye ooyamikela ira Yehova umusomedela tumikela n’nga namaongelaye.

14. Chin’ni yakami-ile Ezekiyeli kala wokozeya somedela utumiki onoyo ava-iwe liye?

¹⁴ Vanduli vuwa, Yehova oomuwandela Ezekiyeli ira: “Usunge m’murimani mwawo mawanga etene anayo ndinauwandela miyo teto uvwe na mabarwawo.” (Ezek. 3:10) Vomuva-a malangizwala, Yehova oomuwandela ira asunge mawu a mu m’mpukutwayo m’murimani mwaye koma teto aganizela. Ira vyevi oomukami-eda Ezekiyeli limbi-a iroromelo yaye. Woomukami-eda teto ira alengeze waathu uthenga wakopolo onoyo ava-iwe liye. (Ezek. 3:11) Vwechecha koma teto roromela uthengoyo ooiri-a Ezekiyeli kala wokozeya somedela utumiki onoyo ava-iwe liye.—Yerekezelani na Salimu 19:14.

15. Ira nivilelenga, kodi ninafuneela “sunga n’ni m’murimani mwi-u”?

¹⁵ Ira nivilelenga vautumiki-u, ninafuneela dowanave limbi-iwa na Mawu a Mulungu. Ninafuneela “sunga m’murima” vyetene vyevyo Yehova unaniwandela liye. Malambwano Yehova unaonga na iyo zela m’Mawaye, Baibulo. Kodi ninaire avi ira Mawu a Mulungu kakuzenga maganizwi-u, mwemo ninavwela iyo, koma teto vyolinga vi-u?

16. Kodi ninafuneela iranga n’ni na mawu a Mulungu, n’nga ninaire avi ira kagarateyenga m’murimani mwi-u?

¹⁶ Mofwanafwana na yodja eneyo naidja inachileya noniva-a kopolo, funjeda noganizela modii-a Mawu a Mulungu unoniva-a teto kopolo mwauzimu. Li ti puziro lelo Yehova unafuna liye ira niliumbuwelenga, naganizelanga vya  mpukutu. Voonga vya Mawaye, Yehova unafuna ira ‘vingulu vi-u virumbale’ na mawayo tapulela ira, ninafuneela avwechechanga pama. Ninokoza ira vyevyo vopepela, awelenga, koma teto aganizela modii-a. Yowambeela, ninopepela vokozeeli-a murimi-u ira niwachele maganizo a Mulungu. Vanduli vuwa, ninowelenga Baibulo noimela vang’ono ira niganizele modii-a vyevyo niwelengile iyovyo. Kodi vyo-arelavo viwa vinakala vyoi avi? Naganizela vinjinji vyevyo niwelengile iyo, pavevo murimi-u wopipilisa unavwechechaathu vinjinji Mawu a Mulungu.

17. Chifukwa n’ni vili vyofuneya ganizela modii-a vyevyo niwelengile iyo m’Baibulo?

¹⁷ Chifukwa n’ni vili vyofuneya welenga Baibulo, koma teto ganizela modii-a vyevyo niwelengile iyovyo? Ira vyevi unoniva-a kopolo dedo ninafuneela iyo ira niwandenga laleela uthenga wa Umwene vathawi ila, koma teto ira nize niwande lengeza uthenga wakopolo wachiweluzo usogolowu. Koma teto ganizela makalelo apama anayo Yehova un’na liye, unonikami-eda ira usamwali-u na liye ukale wolimba vinjinji. Vyo-arelavo viwa, pi vyoi ninoza nisangalale na yongo imo-i yooma kapena ira yosangalasa vinjinji, eneyo ili murendele wam’murima koma teto ona vyongo vyevyo nin’na iyo kala vyonikwakwanela.—Sal. 119:103.

18. Kodi athu a mu gawo li-u kanaza kafuneela zindikila n’ni, n’nga chifukwa n’ni?

¹⁸ Mo-iyana na Ezekiyeli, iyo kanili anamaongela. Komave, nili osimikiza dowanave laleela uthenga onoyo Yehova unairi-a liye ira ulembiwe m’Mawaye fiyeda vevo unaze liye aone ira uthengoyo ulaleeliwa mokwakwanela. Thawi yachiweluzo yaza ifiya, athu a mu gawo li-u katinaza kakaana chifukwa yoongela ira katiwandeliwe kapena ira Mulungu oowanyalanyaza. (Ezek. 3:19; 18:23) M’malo muwa, aluwa kanoza kazindikile ira uthenga onoyo naalaleela iyo wali wokumela wa Mulungu.

19. Kodi chin’ni inaniva-a kopolo ira nikwakwaneli-ede utumiki-u?

¹⁹ Kodi chin’ni inaniva-a kopolo ira nikwakwaneli-ede utumiki-u? Pivyongo viraru vyevyo vyakami-ile Ezekiyeli. Ninodowanave laleela chifukwa ninoiziwa ira nirumiwe na Yehova, ninokami-iwa na muzimwaye wochena, koma teto ninolimbi-iwa na Mawu a Mulungu. Mokami-iwa na Yehova, ninolimbi-iwa dowanave ira utumiki-u koma teto vilela “fiyeda umagomelo.” —Mat. 24:13.