KHANI YOFUNJEDA 35
NYIMBO 123 Tizigonjera Mulungu Mokulupirika
Kodi Andimuwa Kanakami-e Avi Athu Anayo Kachosiwe Mupingo?
“Udimu unoza ukale isangalalo yoinjiva chifukwa ya muthu m’mo-i ochimwa unoyo ulapile kwaranya athu 99 olungama anayo katinafuneya lapa.” — LUKA 15:7.
VYEVYO NINAFUNJEDE IYO
Mukhanila ninoona chifukwa iwa athu amo-i kanachosiwa mupingo koma teto mwemo andimuwa kanaakami-eleathu ira kalape na yolinga yoi kakale teto vausamwali na Yehova
1-2. (a) Kodi Yehova unaaona avi athu anayo kanapanga machimo koma oolapa? (b) Kodi Yehova unadedi-eda ira athu anayo kapangile machimo kapange n’ni?
YEHOVA kai Mulungu olekelela machimo. (Sal. 5:4-6) Liye unafuna ira nivwelenga makundwae olungama anayo kanafwanyeya m’Baibulo. Pivyoona ira Yehova kanaembekezela ira athu anayo kai angwilo kapangenga vyongo moolakwi-a iliyetene. (Sal. 130:3, 4) Vathawi imo-ive ineyo, liye kanalekelela ‘athu oova Mulungu anayo kanalanda oma murimae ulukulu kala yongo yopangela ikalelo yookaana manyazi.’ (Yuda 4) Moi Baibulo linoonga vyoi ‘athu anayo katinaova Mulungu’ kanoza kaonongiwe va kondwae ya Aramagedo.— 2 Pe. 3:7; Chiv. 16:16.
2 Koma, Yehova kanafuna ira uliwetene aze aonongiwe. Monga mwemo nionele iyo mukhani da mugazinila, Baibulo linofotokoza movweya pama ira Mulungu “unafuna ira athu etene kalape.” (2 Pe. 3:9) Andimuwa kanosazi-eda Yehova kakami-anga moleza murima athu anayo kapangile machimo ira kachenje ndila diwa nokala teto vausamwali na Yehova. Koma thawi dimo-i athu anayo kapangile machimo katinalapa. (Yes. 6:9) Amo-i kanopitiliza panga vyotakala ngakale kangakami-iwe na andimuwa moweli-edaweli-eda ira kalape. Kodi vyera eno andimuwa kanafuneya panga n’ni?
“MUCHOSENI MUTHU OTAKALOYO”
3. (a) Kodi Baibulo linaonga ira andimuwa kanafuneya panga n’ni na muthu oolapa? (b) Chifukwa n’ni ninaonge ira muthu unakala ira usakulile ekave ira achosiwe mupingo?
3 Ngati muthu upangile chimo koma kanalapa, andimuwa katinapangevo yongo koma keda arela malangizo a va 1 Akorinto 5:13, anayo kanaonga ira: “Muchoseni muthu otakaloyo vaari vinyu.” Vinakala ngati ochimoyo usakulile gumana na vyo-arelavo vya vyoira vyae moi unakala a-andanga vyevyo afesile liye. a (Agal. 6:7) Chifukwa n’ni ninaonga eno? Chifukwa yoi liye unakala ira ukoonda chenja ngakale ira andimuwa koomukami-a moweli-edaweli-eda ira alape. (2 Mam. 17:12-15) Vyoira vyae vinotonyi-eda ira liye usakula koonda arela makundo a Yehova. — Doto. 30:19, 20.
4. Chifukwa n’ni vanapelekiwa ilengezo muthu oolapa achosiwa mupingo?
4 Muthu ochimwa unoyo kanafuna lapa achosiwa, ilengezo inopelekiwa upingo yoonga ira liye kai wa Mboni da Yehova. b Yolinga ya ilengezwela kai mupangi-a manyazi muthu ochimoyo. Koma ilengezwela inopelekiwa nayolinga yoi athu etene mupingo ka-arele malangizo a m’Malemba oyi ‘ka-iye gwilizana’ na muthuyo “ngakale teto djela limo-i.” (1 Akor. 5:9-11) Vanokala chifukwa yapama ineyo Mulungu unapelekela liye malangizwala. Namarumiwa Paulo alembile ira: “Vyofufumi-a ving’onong’ono vinofufumi-a mtanda wetene wa uthu.” (1 Akor. 5:6) Ngati muthu oolapa kanachosiwa mupingo vyoira vyae vinokoza fooki-a athu amo-i anayo kanaesaesa arela makundo olungama a Yehova. — Miya. 13:20; 1 Akor. 15:33.
5. Kodi nimuonenga avi muthu unoyo uchosiwe mupingo, nanga chifukwa n’ni?
5 Ndiye kodi nimuonenga avi muthu unoyo uchosiwe mupingo? Ngakale ira kaninafuneya aleda na liye, nimuonenga monga khosa yodimeela. Khosa ineyo ivenyilevo vagulu la afwiwa inokoza welela teto. Niumbuwelenga ira khosa yodimeleyo yoovipeleka wa Yehova. Pivyovwi-a chisoni ira vathawila muthuyo unakala ira kanakwakwaneli-eda lonjezo lovipeleka wae moi vi vinakala vyoopi-a. (Ezek. 18:31) Ngakale ira vili eno, Yehova unopitilizave mutonyi-eda chifundo moi unoembekezela ira muthuyo unoza awelele. Kodi andimuwa kanakami-e avi muthu ochimwa unoyo uchosiwe mupingo?
MWEMO ANDIMUWA KANAKAMI-ELAATHU ATHU ANAYO KACHOSIWE
6. Kodi andimuwa kanapange avi ira kakami-e muthu unoyo uchosiwe mupingo?
6 Muthu achosiwa mupingo, kodi andimuwa kanakeda mu-iya oomukami-a ira awelele wa Yehova? Naari kai eno. Komiti ya andimuwa yamufotokozelanga muthu ira uchosiwa mupingo, inomufotokozela vyevyo unapange liye ira aze aweli-ediwe mupingo. Koma teto, andimuwa kanopanga vinjinji kwaranya vevo. Thawi dinjinji aliwa kanomufotokozela ira ngati unaomeliwe kanokoza za gumana teto vavira medi dingasidene ira kaone ngati uchenjile. Ngati muthuyo unasomedele za gumana teto nawin’li, vathawiyo andimuwayo kanomulimbikisa mwachikondi ira alape koma teto welela wa Yehova. Ngakale ira va ulendola muthuyo katonyi-edile ira uchenja, andimuwayo kanokoza vyoi kaze kagumane teto usogolo.
7. Kodi andimuwa kanatonyi-eda avi chifundo ya Yehova kapanganga vyongo na muthu unoyo uchosiwe mupingo? (Yeremiya 3:12)
7 Andimuwa kanoesaesa sazi-eda chifundo ya Yehova kapanganga vyongo na muthu unoyo uchosiwe mupingo. Mwaisazo, Yehova kaadedi-ede ira Aizaraeli kalape liye aanapangevo yongo ira aakami-e. M’malomwiwa, liye ngunoyo aambeele pangavo yongo athwayo kaanaambeele tonyi-eda lapa. Monga mwemo naonele iyo mukhani yanambin’li m’magazinila, Yehova ootonyi-eda chifundo vomuwandela namaongela Hoseya ira agwilizane teto na iyanae unoyo apangile chimo lilukulu. (Hose. 3:1; Mala. 3:7) Vomusazi-eda Yehova, andimuwa kanofunechecha kami-a muthu unoyo upangile chimo ira alape moi kanopanga vyetene vyevyo kanawandeathu ira vikale vyoorucha wa muthuyo welela mupingo. — Welengani Yeremiya 3:12.
8. Kodi fanizo la Yesu la mwana ovolowela linanikami-a avi vwechecha Chifundo ya Yehova? (Luka 15:7)
8 Umbuwelani fanizo la mwana ovolowela lelo nikambilanile iyo mukhani mbin’li da mugazinila. Baba wa mwanoyo angamuonile azanga, “oomutamangela nomukumbarela mwachikondi” (Luka 15:20) Onani ira baboyo kaadedi-ede ira mwanoyo avepe ira kamukululukele. M’malo mwiwa, mofwanafwana na baba uliwetene wachikondi, liye ngunoyo aambeele pangavo yongo. Mu pumwemo teto andimuwa kanapangelaathu na athu anayo kadimelile. Aliwa kanofuna ira khosa dodimeela diwelele wa Yehova. (Luka 15:22-24, 32) Udimu unokala isangalalo ilukulu muthu ochimwa awela, chimozimozi teto vailambo yavati. — Welengani Luka 15:7.
9. Kodi Yehova Unafuna ira athu anayo kachimwile kapange n’ni?
9 Kumela va vyevyo nikambilanile iyovi pivyovaela oneya ira Yehova kanalekelela athu oolapa. Komave kanaatatila athwayo. Unofuna ira aliwa kawele. Maganizo a Yehova okuza athu ochimwa kanofotokoziwa va Hoseya 14:4 vevo vanaonga ira: “Ndinoza ndimali-e oororomeleya uwa. Ndinoza ndiaomeliwena mofuna mwanga, chifukwa ndi-iya alunduwela.” Mawu anala kanokami-a andimuwa ira kaonenga izindikilo yotonyi-eda ira muthu uwambeela lapa. Mawala kanosimikizela teto athu anayo kamu-iile Yehova ira liye unowaomeliwanave moi unofuna ira kawele mombaraanya.
10-11. Kodi andimuwa kanakami-e avi muthu unoyo achosiwe mupingo wale vinjinji?
10 Nanga bwanji vya athu anayo kachosiwe walewale mwina chaka dinjinji mundulimu? Athu anala mwina kanakala ira koo-iya panga machimo anayo kapangi-ile ira kachosiwe. Thawi dimo-i katinaumbuwela ngakale vang’ono vyevyo vyapangi-ile ira kachosiwe. Kaya vavirile thawi yolapa moi avi, andimuwa kanoza kaesaese asaela koma teto aendela athu anala. Va maulendo anala andimuwa kanokoza pempela limo-i na aliwa koma teto alimbikisa mwachikondi ira kawelele mupingo. Ngati muthuyo ukalile unde wa gulu wa chaka dinjinji, pivyo-oira fuka ira unokoza kala ofooka mwauzimu. Eno atonyi-eda ira unofuna wela, andimuwayo kanokoza panga vyoi muthuyo afunjedenga Baibulo ngakale ira kanaweli-ediwe. Va vyoireya vyetene vyevi, andimuwa mbanayo kanafuneya panga vyoi muthuyo afunjedenga Baibulo.
11 Andimuwa kanafuneya sazi-eda chifundo ya Yehova voesaesa kami-a athu anjinji iziwa ira mwai ukalavo oyi kanokoza welela wa Yehova. Ngati muthu ochimwa ulapile moi u-iya vyotakala vyevyo apanga liye, unafuneya weli-ediwa mombaraanya. — 2 Akorinto. 2:6-8.
12. (a) Kodi pivathawi iivi vevo andimuwa kanafuneyaathu kala osamala vinjinji? (b) Chifukwa n’ni kaninafuneya ganiza ira athu anayo kapangile machimo amo-iwene katinapangeliwe Chifundo na Yehova? (Onani teto mawu am’pedi)
12 Thawi dimo-i andimuwa kanafuneya kala osamala vinjnji kaanaweli-ede muthu mupingo. Mwaisazo, ngati muthuyo apangele nkhanza mwana, ambeeli-a mpatuko kapena teto eere sakula ira amali-e banja lae, andimuwa kanafuneya simikizela ira ulapa. (Mala. 2:14; 2 Tim. 3:6) Aliwa kanafuneya teteza abali na arongola mupingo. Vathawi imo-ive ineyo, kazindikilenga ira Yehova ngokozeya wachela muthu unoyo ulapile kumela vati va murima koma teto kasimikizele akala u-iile vyotakala vyevyo apanga liye. Ngakale ira andimuwa kanafuneya samala na athu anayo kapangele chinyengo afwiwa, aliwa katinafuneya ganiza ira kavali ochimwa anayo katinapangeliwe chifundo na Yehova. c— 1 Pe. 2:10.
VYEVYO PINGO UNAPANGEATHU
13. Kodi ninapanga avi muthu azuzuliwa, nanga ninapanga avi muthu achosiwa?
13 Mogwilizana na khani ivirilele, ilengezo yapelekiwa ira muthu uzuzuliwa ninopitiliza pangela vyongo limo-i na liye voiziwa ira ulapa moi u-iya vyotakala vyevyo apanga liye. (1 Tim. 5:20) Liye unakalave mbali ya pingo moi unafuneya limbikisiwa na Akiristu afwae. (Aheb. 10:24, 25) Koma mu kai mwemo vinakalelaathu muthu achosiwa mupingo. Nino-iya gwilizana na liye “ngakale dja limo-i na liye.” — 1 Akor. 5:11.
14. Kodi Akiristu kana-indi-ede chito avi ikumbumtima iwa yofunji-iwa Baibulo vopanga vyongo na athu anayo kachosiwe mupingo? (Onani teto ithuzithuzi.)
14 Kodi vyevyo nikambilanile iyovi vinatapulela ira nimunyalanyazenga muthu unoyo uchosiwe mupingo? Naari. Pivyoona ira kaninaaledenga na liye. Koma ngati uchosiweyo ngu bali-u kapena ali fwi-u, ninokoza indi-eda chito ikumbumtima yofunji-iwa Baibulo vosakula muitanela wu misonkano. Ndiye kodi afiya vamisonkano nipangenga avi? Mundulimu kanamulonjela muthu oyi enila. Koma vano Mkiristu uliwetene unokoza panga vyongo mogwilizana na ikumbumtima yae yofunji-iwa Baibulo. Athu amo-iwa kanokoza sakula muva-a moni kapena muwachela vamisonkano. Komave kaninaonge vinjinji na liye kapena waleda na muthu unola.
Ngati muthu uchosiwe mupingo, Akiristu kanokoza indi-eda chito chikumbumtima iwa vosakula muitanela wu misonkano kapena muva-a moni wachidule afiya va misonkano (Onani ndima 14)
15. Kodi lemba la 2 Yohani 9-11 linaonga vya athu anayo kapangile machimo aavi? (Onani bokosi loi “ Kodi Yohani na Paulo Kaonga vya Machimo Ofwanafwana?”)
15 Athu amo-iwa kanokoza fuka ira, ‘Kodi kai vale Baibulo linaonga ira wamulonjela muthu ochosiwa unakala ngati unaapangana chito dae dotakalado?’ (Welengani 2 Yohani 9-11.) Khani yetene valembali inatonyi-eda ira malangizwala kaonga vya athu ampatuko kapena anayo kanalimbikisa makalelo otakala. (Chiv. 2:20) Eno ngati muthu unalimbikisa mpatuko kapena makalelo otakala, andimuwa katinafuneya muendela. Komave vanokala idedi-edo yoi unokoza zachenja maganizo. Vodedi-eda thawi ineyo unaze liye achenje, muthu oyi enila kaninamulonjela kapena muitanela wu misonkano.
MUSAZI-EDENGA CHIFUNDO YA YEHOVA
16-17. (a) Kodi Yehova unafuna ira athu ochimwa kapange n’ni? (Ezekiyeli 18:32) (b) Kodi andimuwa kanatonyi-ede avi ira kana-inda chito na Yehova vokami-a athu anayo kapangile machimo?
16 Kodi nikambilanile n’ni mukhani 5 dedi? Yehova kanafuna ira uliwetene aze aonongiwe. (Welengani Ezekiyeli 18:32.) Koma unafuna ira athu ochimwa kawelele wa liye. (2 Akor. 5:20) Chi chifukwa iwa wa thawi indendai koma teto moweli-edaweli-eda Yehova ukala awandelanga athwae monga gulu koma teto uliwetene vaeka ira alape nowelela wa liye. Andimuwa kano-inda chito na Yehova vokami-a athu anayo kapangile machimo ira kalape. — Arom. 2:4; 1 Akor. 3:9.
17 Udimu unokala isangalalo ilukulu muthu ochimwa alapa. Babi-u waudimu Yehova unosangalala teto khosa yodimeela yawelela mupingo. Ninomuomeliwana vinjinji Yehova naganizela vya chifundo yae koma teto oma murima wae ulukulu. — Luka 1:78.
NYIMBO 111 Tili Ndi Zifukwa Zambiri Zokhalira Osangalala
a Mukhanila ninafotokoza ngati opanga chimo ngu lombwana. Komave makundo anayo kali mukhanila kanokuza teto a-iyana.
b Eno mogwilizana na mawu a namarumiwa Paulo ofwanyeya va 1 Akorinto 5:13, athwayo kanochosiwa mupingo.
c Baibulo linaonga ira athu amo-iwa katinaza kakululukiwa. Athu anala kanakalecha ira koosakula ira thawi detene karuni-engana na Mulungu. Ngu Yehova na Yesu ba-i anayo kanaiziwa muthu unoyo kai ofwanelela kululukiwa. — Maliko 3:29; Aheb. 10:26, 27.
